Génesis 20
20
Abraham soc Abimelec
1Te Abraham loc' bael tey a, been bael ta sq'uinal Néguev. C'o nainuc ta lum Gerar te ay ta olil q'uinal yu'un Cades soc yu'un Shur. 2Tey la yal a te Abraham te ja' yijts'in te Sarae,#Gn 12.13; 26.7. ma ba la yal ta jamal te ja' yiname. Jich yu'un te muc' ajwalil yu'un Gerar, Abimelec sbiil, la sticun ta iq'uel te Sara, c'an yic' yinamin. 3Ja'uc me to, ta ajc'ubal c'oponot yu'un Dios ta swaich te Abimelec, jich albot:
—Ya me xlajat ta ora ta scaj te ants te c'an awiq'ue, te melel ayix smamlal —xi'.
4Ja'uc me to, te Abimelec ma to bay sjoinej ta wayel a, jich yu'un la yal:
—Cajwal, ¿lec bal teme ya amilon, te ma'yuc bila amen jpasoje? 5Melel la yalbon te Abraham te ja' yijts'in te antse, soc jich nix la yal te ants te ja' sbanquil ta sc'ope. Jich yu'un jun co'tan, ma'yuc mulil ta co'tan te c'an quiq'ue —xi'.
6Albot xan ta swaich yu'un te Diose:
—Jna'oj stojol te ma'yuc bila amen anopoj ta awo'tan te bit'il jich c'an apase. Jich ma la cac'bat ale amul ta jtojol, ma ba la cac'bat apic. 7Jich yu'un ticuna sujt'el ta stojol smamlal te antse, te melel j'alwanej cu'un te Abrahame. Ya me xc'opoj awu'un ta jtojol, jich me ya xcuxinat. Yan teme ma x'aticun sujt'ele, jc'axel ya xlajat soc spisil mach'a ay awu'un —xi' sc'oplal yu'un te Diose.
8Jich yu'un sab jajch' te Abimelec, la sticun ta iq'uel te abatetic yu'une, la xcholbey yaiyic spisil. Bayal xiw yo'tanic yu'un te abatetique. 9Patil te Abimelec la yic' tel te Abraham, jich la yalbey:
—¿Bistuc jich la apasbotic? ¿Bi jmul awu'un te bit'il muc' mulil la awac'bon jmulin soc te jlumale? Ma lecuc te bila la apasbone. 10¿Bila yacat ta snopel te bit'il jich la apase? —la yut. Jich c'opoj ta stojol Abraham te Abimeleque.
11La sjac' te Abraham:
—La cal ta co'tan te ma'yuquex ta xi'el te Diose. “Ya me smilonic ta scaj quinam”, xoon ta snopel. 12Melel nix a, te quijts'in te antse, melel snich'an jtat; ja'uc me to, ma ja'uc yal te jme'e. Jich yu'un la quic' quinamin. 13Te c'alal Dios la yic'on loq'uel tel ta sna te jtat, jich yu'un la calbey te quinam: “Ya me ac'uxtayon. Teme ay mach'a ya sjojc'obat ta bay ya xbootic te bi awutojone: ‘Xi'lel’, xaat me cu'un”, la cut —xi' te Abrame.
14Jich yu'un te Abimelec la yic' tel bayal xchij soc bayal swacax, soc bayal abatetic yu'un, antsetic soc winiquetic. Spisil la yac'bey smajt'anin te Abraham, soc la sujt'esbey te yiname, ja' te Sara. 15Soc jich la yal te Abimelec:
—Ila me awil spisil te jq'uinale, nainan tey a te banti ya sc'an awo'tane —la yut.
16Soc jich la yalbey te Sara:
—La cac'beyix jmil ta jsejp plata te axi'lele, jich yu'un ja' me smajq'uil aq'uexlal ya xc'ot awu'un ta sit spisil yantic ajoinej. Ma me ayuc mach'a amen sc'op ta atojol —la yut.
17Jich yu'un te Abraham la sc'oponbey Dios, jich col te Abimelec, te yinam soc te criadaetique, alajic ta spisilic. 18Melel te Cajwaltic ma la yac' alajuc te antsetic te ayic ta sna Abimelec ta scaj Sara te yinam Abraham.
Iliyochaguliwa sasa
Génesis 20: TZOXCH
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Biblia en Tzeltal de Oxchuc y Tenejapa © Sociedad Bíblica de México, A.C., 2001.