ᤋᤥᤗᤡᤱᤛᤥᤔᤢ 6
6
ᤘᤍᤵᤔᤠ
1ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤕᤖᤡᤰ ᤔᤧᤒᤥ᤺ᤴᤍᤧᤖ ᤔᤧᤒᤣ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤠ ᤔᤧᤴᤇᤢᤔᤠᤜᤠ᤹ ᤔᤧᤘᤕᤧ. #ᤀᤕᤢᤒ ᥇:᥌. ᥈:᥇ 2ᤏᤡᤱᤘᤠ᤹ᤑᤢᤔᤠᤱᤛᤠᤜᤠ᤹ᤖᤧ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤔᤧᤴᤇᤢᤔᤠ ᤛᤠᤜᤠ᤹ ᤏᤢᤔᤠ ᤔᤧᤏᤡᤛᤢᤛᤡ. ᤜᤧᤰᤁᤩᤠᤱ ᤂᤢᤴᤇᤡ᤹ ᤛᤡᤖᤠ᤹ᤌᤠᤱᤎᤠᤱ ᤔᤧᤸᤗᤡᤱᤃᤧᤴ ᤔᤣ᤺ᤳ ᤔᤧᤍᤠᤖᤢᤛᤡ॥ 3ᤂᤧᤒᤩᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤐᤠ᤺ᤳᤋᤢ. “ᤔᤧᤴᤇᤠᤶ ᤕᤠᤵᤔᤡᤜᤠ᤹ᤏᤢ ᤀᤠᤕᤠᤶᤛᤠᤶᤔᤡᤴ ᤛᤍᤠᤍᤡᤱ ᤔᤧᤘᤠ᤹ᤏᤧᤴ. ᤌᤣᤀᤠᤱᤓᤧᤸᤗᤧ ᤂᤧᤴ ᤏᤠᤛᤡᤃᤧᤴ ᤌᤰᤗᤠᤖᤰᤗᤥ॥ ᤂᤧᤴ ᤁᤡᤵ ᤌᤡᤰᤁᤠᤱ ᤏᤡᤒᤥᤱ ᤋᤱᤒᤣ ᤌᤠᤖᤡᤰ ᤜᤡᤱᤗᤥ॥”
4ᤂᤧᤴ ᤕᤧᤶᤔᤥ ᤏᤢ ᤂᤧᤴ ᤀᤣᤃᤠᤱᤅᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤜᤥᤖᤢᤜᤠ᤹ ᤔᤧᤘᤕᤧ॥ ᤏᤡᤱᤘᤠ᤹ᤑᤢᤔᤠᤱᤛᤠᤜᤠ᤹ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤂᤢᤴᤇᤡ᤹ ᤔᤧᤴᤇᤢᤔᤠ ᤛᤠᤜᤠ᤹ᤖᤥ ᤐᤣ᤺ᤰᤔᤠ ᤔᤧᤜᤣ᤺ᤰᤋᤧ. ᤜᤧᤰᤁᤩᤠᤱ ᤛᤠᤔᤧᤃᤳᤋᤧ॥ ᤂᤧᤱᤜᤠ᤹ᤖᤧ ᤔᤧᤃᤳᤋᤢᤛᤡᤒᤠ ᤛᤠᤜᤠ᤹ᤀᤣ ᤀᤢᤴᤇᤣ᤺ᤴᤒᤠ ᤕᤧᤶᤔᤥᤒᤠ ᤔᤢᤰᤁᤧᤃᤢᤒᤠ ᤏᤢ ᤁᤢᤔᤡᤱ ᤁᤧᤀᤡᤱᤒᤠ ᤔᤏᤠᤜᤠ᤹ ᤔᤧᤘᤕᤧ॥ #ᤂᤠᤏᤡ᤺ᤳ ᥇᥉:᥉᥉
5ᤕᤜᤘᤣ ᤍᤠᤱᤒᤠᤸᤗᤧ ᤀᤡᤰᤛᤠ ᤂᤠᤶᤒᤣ᤺ᤰᤁᤥᤒᤠ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤛᤠ᤹ᤖᤡᤰ ᤁᤢᤀᤡᤔᤧᤓᤧᤖᤧᤒᤠ ᤏᤢ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤀᤥ ᤔᤧᤀᤡ᤺ᤳᤋᤢᤒᤠ ᤐᤠ᤺ᤴᤜᤠ᤹ ᤀᤠᤓᤧᤸᤗᤧᤛᤠᤱ ᤋᤠᤵᤑᤧ᤺ᤶᤒᤠᤖᤰ ᤆᤥᤃᤧᤒᤠ ᤏᤡᤛᤢ॥ #ᤔᤳᤋᤡ ᥈᥊:᥉᥍; ᤗᤢᤁᤠ ᥇᥍:᥈᥌; ᥇ ᤐᤋᤪᤢ ᥉:᥈᥆ 6ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤔᤧᤴᤇᤠᤶ ᤕᤠᤵᤔᤡ ᤆᤥᤃᤢᤒᤠᤀᤥ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤏᤡᤱᤘᤠ᤹ ᤐᤅᤧ. ᤜᤧᤰᤁᤩᤠᤱ ᤛᤠ᤹ᤖᤡᤰ ᤁᤢᤏᤡᤱᤘᤠ᤹ ᤋᤢᤃᤧ॥ 7ᤂᤧᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤠᤸᤗᤧ ᤐᤠ᤺ᤳᤋᤢ. “ᤀᤠᤱᤃᤠ᤹ ᤏᤠᤘᤠᤃᤧᤴ ᤆᤀᤡ᤺ᤳ ᤆᤥᤃᤢᤱᤒᤠ ᤔᤧᤴᤇᤠᤶ ᤕᤠᤵᤔᤡᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤥᤗᤠᤶ ᤔᤧᤰᤂᤢᤱ᤹. ᤔᤧᤴᤇᤠᤶ ᤕᤠᤵᤔᤡ. ᤁᤧᤀᤢ᤺ᤱᤛᤡᤱᤒᤠ ᤁᤢᤒᤢ ᤌᤰᤛᤠ. ᤁᤧᤒᤧᤒᤠ ᤐᤢᤛᤠ ᤁᤧᤖᤧᤰ ᤔᤧᤰᤂᤢᤱᤛᤡᤱ᤹. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤂᤧᤱᤜᤠ᤹ ᤆᤥᤃᤢᤱᤛᤡᤱᤒᤠᤀᤥ ᤀᤠᤏᤡᤱᤘᤠ᤹ ᤋᤢᤃᤧᤀᤠᤱ ᤘᤠ᤹॥” 8ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤰᤛᤠᤀᤥ ᤏᤢᤜ᤺ᤸᤗᤧ ᤗᤢᤱᤍᤢᤰᤔᤠ ᤂᤥᤛᤢ॥
ᤏᤢᤜ
9ᤏᤢᤜ᤺ᤸᤗᤧ ᤏᤢ ᤁᤢᤜᤡᤶᤛᤕᤱᤅᤡᤸᤗᤧ ᤁᤢᤛ᤻ᤛᤠᤵᤔᤢ᤺ᤴᤎᤢᤶᤔᤡᤴ ᤜᤠᤒᤠ ᤁᤸᤗᤥ॥ #᥈ ᤐᤋᤪᤢ ᥈:᥋
ᤂᤢᤏᤧ᤹ ᤁᤢᤕᤧᤶᤔᤥᤒᤠ ᤔᤏᤠᤜᤠ᤹ᤀᤥ ᤏᤢᤜᤴ ᤛᤠᤶᤕᤥᤒᤠ ᤏᤢ ᤁᤢᤍᤥ᤺ᤵᤔᤠ ᤔᤏᤠ ᤘᤕᤧ॥ ᤂᤢᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤛᤥᤛᤥᤖᤡᤰ ᤗᤠᤱᤄᤣᤃᤧ॥ 10ᤏᤢᤜ᤺ᤸᤗᤧ ᤛᤢᤶᤛᤡ ᤁᤢᤛ᤻ᤛᤠ ᤕᤧᤶᤒᤡᤳᤇᤠ ᤔᤧᤘᤕᤧ—ᤛᤣᤔ. ᤜᤠᤔ ᤏᤢ ᤕᤧᤐᤧᤍ॥
11ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤔᤥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤑᤧᤴᤐᤠᤴ ᤏᤢ ᤌᤰᤛᤡᤱᤔᤠ ᤛᤧᤳᤇᤡᤱᤔᤠᤖᤧ ᤋᤡᤶᤛᤧᤀᤠᤱ ᤏᤧᤛ᤻ᤛᤧ॥ 12ᤕᤜᤘᤣ ᤍᤠᤱᤒᤠᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤀᤥᤔᤧᤳᤋᤢ. ᤜᤧᤰᤁᤩᤠᤱ ᤑᤧᤳᤗᤠ᤹ᤖᤧᤒᤠ ᤏᤡᤛᤢ. ᤌᤣᤀᤠᤱᤓᤧᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤧᤘᤠ᤹ᤒᤠ ᤁᤧᤖᤧᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤑᤧᤳᤔᤧᤗᤠ᤹ᤖᤧ ᤔᤧᤒᤣᤀᤠᤱ ᤔᤧᤘᤕᤧ॥ 13ᤂᤧᤸᤗᤧᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤢᤜᤴ ᤔᤧᤳᤋᤢ. “ᤁᤧᤖᤧᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤔᤧᤱᤔᤠᤛᤡ ᤏᤡᤱᤘᤠ᤹ ᤆᤥᤃᤢᤱᤅᤠᤱ ᤘᤠ᤹. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤔᤧᤈᤥᤃᤢᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤌᤰᤛᤡᤱᤔᤠ ᤛᤧᤳᤇᤡᤱᤔᤠᤸᤗᤧ ᤋᤡᤶᤛᤧᤀᤠᤱ ᤏᤧ᤹᤺॥ ᤀᤥᤔᤧᤳᤋᤧ᤹. ᤂᤧᤱᤜᤠ᤹ ᤀᤠᤱᤃᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴᤏᤢ ᤛᤥᤖᤡᤰ ᤔᤧᤰᤂᤢᤱᤛᤡᤱ᤹॥ 14ᤀᤠᤸᤗ ᤂᤧᤏᤧ᤹ ᤛᤤᤐᤪᤛ ᤔᤧᤵᤔᤏᤠᤒᤠ ᤛᤡᤱᤅᤧᤸᤗᤧᤴ ᤘᤠᤗᤠᤎᤠᤎᤡᤰ ᤆᤥᤃᤧ᤹॥ ᤘᤠᤗᤠᤎᤠᤀᤥ ᤕᤠᤰᤑᤠᤱᤜᤠ᤹ ᤆᤥᤃᤧᤛᤧ᤹. ᤜᤧᤰᤁᤩᤠᤱ ᤁᤢᤛᤡᤃᤠᤱ ᤏᤢ ᤗᤠ᤺ᤰᤁᤠᤳ ᤀᤗᤁᤋᤪᤠ᤺ᤸᤗᤧ ᤗᤧᤅᤧ᤹॥ 15ᤂᤧᤏᤧ᤹ ᤀᤰᤂᤣᤗ᤹ᤖᤡᤰ ᤆᤥᤃᤧ᤹—ᤘᤠᤗᤠᤎᤠ᤺ᤸᤗᤧ ᤁᤢᤗᤠᤶᤋᤡ᤺ᤴ ᤁᤡᤵ ᤌᤡᤰᤁᤠᤱ ᤗᤡᤒᤥᤱ ᤔᤡᤋᤖ ᤆᤥᤃᤧ᤹ ᤜᤧᤰᤁᤩᤠᤱ ᤁᤢᤓᤧᤖᤧᤴ ᤏᤡᤒᤥᤱᤅᤠᤱ ᤛᤢᤶᤛᤡ ᤔᤡᤋᤖ ᤆᤥᤃᤧ᤹ ᤜᤧᤰᤁᤩᤠᤱ ᤁᤢᤗᤡᤱᤃᤧᤴᤏᤡᤴ ᤌᤡᤒᤥᤱᤅᤠᤱ ᤗᤡᤛᤡ ᤔᤡᤋᤖᤒᤠ ᤐᤥᤱᤗ ᤆᤥᤃᤧ᤹॥ 16ᤘᤠᤗᤠᤎᤠ᤺ᤸᤗᤧ ᤁᤢᤛᤶᤎᤠᤱ ᤂᤠᤶᤒᤢ ᤆᤥᤃᤧ᤹॥ ᤘᤠᤗᤠᤎᤠᤀᤥ ᤂᤠᤀᤥ᤺ᤳᤗ ᤑᤠ᤹ᤀᤠᤱ ᤂᤠᤶᤒᤢ᤺ᤸᤗᤧ ᤁᤢᤛᤡ᤺ᤰᤋᤥ ᤜᤢᤰᤛᤡᤰᤌᤡᤰ ᤂᤡᤷᤗᤡ ᤜᤱᤒᤧᤳ ᤑᤳᤇᤧ᤹॥ ᤜᤧᤰᤁᤩᤠᤱ ᤘᤠᤗᤠᤎᤠ᤺ᤸᤗᤧ ᤁᤢᤕᤠ ᤗᤧᤵᤔᤠᤱ ᤗᤠᤶᤎᤣ᤺ᤳᤌᤡᤰ ᤑᤳᤇᤧ॥ ᤂᤧᤴ ᤁᤢᤍᤠ᤺ᤸᤗᤠ ᤛᤢᤶᤛᤡ ᤁᤧᤒᤵᤐᤠ ᤆᤥᤃᤧ᤹॥ 17ᤌᤣᤀᤠᤱᤓᤧᤸᤗᤧ ᤋᤠᤱᤛᤠᤱᤒᤠᤸᤗᤧ ᤁᤢᤛᤡ᤺ᤰᤋᤥ ᤁᤢᤛᤰᤔᤠ ᤁᤧᤕᤠᤰᤐᤠ ᤐᤠᤎᤢᤱᤛᤠ ᤁᤧᤖᤧᤰ ᤛᤧᤵᤔᤠᤛᤡᤖᤧ ᤗᤠᤃᤡ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤀᤠᤱᤃᤠ᤹ ᤘᤍᤵᤔᤠ ᤌᤠᤱᤗ ᤕᤠ᤺ᤴᤍᤢᤱ᤹. ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤧᤘᤠ᤹ᤒᤠ ᤁᤢᤛᤰᤔᤠ ᤁᤧᤕᤠᤰᤐᤠ ᤐᤠᤎᤢᤱᤛᤠ ᤁᤧᤖᤧᤰ ᤔᤧᤛᤡᤖᤥ॥ 18ᤁᤖ ᤂᤧᤏᤧ᤹ᤏᤢᤃ ᤀᤠᤱᤃᤠ᤹ ᤀᤠᤔᤠᤱᤜᤢᤵᤐᤡᤴ ᤕᤢᤰᤛᤡᤱ ᤆᤥᤃᤢᤱᤗᤥ॥ ᤂᤧᤏᤧ᤹ ᤜᤧᤰᤁᤩᤠᤱ ᤁᤧᤔᤣ᤺ᤳ. ᤁᤧᤛ᤻ᤛᤠ ᤕᤧᤶᤒᤡᤳᤇᤠᤜᤠ᤹ ᤏᤢ ᤁᤧᤶᤒᤠᤱᤗᤡᤜᤠ᤹ ᤁᤧᤖᤧᤰ ᤘᤠᤗᤠᤎᤠᤀᤥ ᤁᤧᤗᤠᤛᤡᤖᤥ॥ #ᤋᤥᤗᤡᤱ ᥎:᥇᥌ 19ᤁᤧᤖᤧᤰ ᤁᤢᤜᤡᤱᤘᤧᤳ ᤌᤰᤛᤠ ᤐᤢᤛᤠᤜᤠ᤹ᤀᤥ ᤁᤢᤶᤒᤠᤒᤠ ᤏᤢ ᤁᤢᤶᤔᤠᤔᤠ ᤏᤧᤳᤏᤧᤳᤇᤡ ᤘᤠᤗᤠᤎᤠᤀᤥ ᤁᤣ᤺ᤳᤋᤧᤛᤧ᤹. ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤧᤏᤧ᤹ᤏᤢ ᤛᤥᤖᤡᤰ ᤔᤧᤜᤡᤱᤗ॥ 20ᤐᤢᤛᤠᤜᤠ᤹ᤀᤥ ᤂᤧᤱᤜᤠ᤹ᤖᤧ ᤂᤢᤴᤇᤡ ᤗᤡᤴ ᤁᤢᤀᤡᤛᤡᤰ. ᤌᤰᤛᤠᤜᤠ᤹ᤀᤥ ᤂᤧᤱᤜᤠ᤹ᤖᤧ ᤂᤢᤴᤇᤡ ᤗᤡᤴ ᤁᤢᤀᤡᤛᤡᤰ. ᤜᤧᤰᤁᤩᤠᤱ ᤂᤠᤶᤒᤣ᤺ᤰᤔᤥ ᤁᤧᤀᤢ᤺ᤱᤛᤡᤱᤒᤠ ᤌᤰᤛᤠᤜᤠ᤹ᤀᤥ ᤂᤧᤱᤜᤠ᤹ᤖᤧ ᤂᤢᤴᤇᤡ ᤗᤡᤴ ᤁᤢᤀᤡᤛᤡᤰ ᤁᤧᤖᤧᤰ ᤐᤖᤡᤰᤗᤧᤴ ᤏᤧᤳᤏᤧᤳᤇᤡ—ᤂᤧᤱᤜᤠ᤹ ᤁᤢᤜᤡᤱᤘᤧᤳ ᤘᤠ᤹ᤔᤠᤖᤧ ᤗᤠᤃᤡ ᤂᤧᤏᤧ᤹ᤀᤥ ᤔᤧᤍᤠᤖᤥ॥ 21ᤁᤧᤖᤧᤰ ᤐᤖᤡᤰᤗᤧᤴ ᤁᤢᤈᤠᤜᤠ᤹ᤀᤠᤱ ᤂᤧᤏᤧ᤹ ᤛᤢᤵᤛᤧ᤹ᤀᤠᤱ ᤕᤢᤰᤛᤧ᤹॥ ᤂᤧᤴ ᤂᤧᤏᤧ᤹ ᤏᤢ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤆᤠᤔᤠ ᤌᤢᤱᤔᤠ ᤐᤥᤱᤗ॥”
22ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤱᤈᤠ᤺ᤱ ᤐᤡᤖᤢᤒᤠ ᤀᤡᤛᤡ᤺ᤰ ᤏᤢᤜ᤺ᤸᤗᤧ ᤁᤧᤖᤧᤰ ᤐᤠ᤺ᤴᤜᤠ᤹ ᤆᤥᤃᤢ॥ #ᤜᤡᤒᤪᤢ ᥇᥇:᥍
Iliyochaguliwa sasa
ᤋᤥᤗᤡᤱᤛᤥᤔᤢ 6: LIFOTNT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2009, 2023, Wycliffe Bible Translators, Inc. All rights reserved.