Mateo 2
2
Kuimbai ãrãndure jyveru pohyshu sanjay
1Jesús oa tijupa Belén he'iashuva yvy Judeape, mburuvisha vasu Herodes jy'arape. Akuape vãhẽ jyveru Jerusalenpe kuarasy õhẽaivi kuimbai ãrãndure, 2haire pyrãndushu: “Mapera ĩme'ẽ Judiovare juhuvisha vasu oava? Ore heshaha kuarasy õhẽakyty jasytata sape'ẽherã, hãrã ouha omomba'eashu”. 3Mburuvisha vasu Herodes henduma kovarã, pya myngyjepy hareka opaite Jerusalenvare. 4Hãrã mburuvisha vasu hẽnoka pai juhuvishare hareka jyve Moisés mbypara vekua pyrỹmboi'iheare, haivi pyrãndushu reta maperapo oa Cristo. 5Haire heishu: Belén Judeape'õ, shara Tũpa ĩñee mbeu'ia kyrã mbypara: 6“Nde Belén, Judeape rẽĩva, nimishivẽãmapokui mbavaivi tentare mbytepe. Shara ndyhevipo õhẽ mburuvisha vasu, ñyngarekohe verã shyrẽnta Israel”. 7Haipe Herodes, ñemiapẽĩ hẽnoka karai ãrãndure. Hãrã pyrãndushu reta mbaipeitera hesha jasytata. 8Haivi mondoshu reta Belenperã, heishu reta: “Pekua hareka pypyrãndu kavihe sanjay; pyvãĩshurã peijy pymbeushekui, aha ãmombaishu verã jyve”. 9Henduma reta mburuvisha vasu heishuarã, karai ãrãndure jyraha. Hãrã jasytata heshavare kuarasy õhẽaivi, hỹnonderã ohoshu reta pytapeve sanjay ẽvãpe. 10Ko kuimbai ãrãndure heshama jasytatarã, vy'a jyre. 11Iche reta oo iperã, hesha sanjay hareka ishy María hãndi. Haipe ĩñesu retarã, õmombaishu sanjay, haivi mbai hyru pea retarã, meẽshu ita vera ijuva, mbai pishekatuva hareka mirra. 12Tẽvã Tũpa kuaakashu reta jypaihupe, potamba ohojy verãre Herodes ẽvãpe, hãrã tape yngavaipi jyrahajy hentape.
José raha sanjay hareka ishy Egiptope
13Ohojyma karai ãrãndu retarã, Tũpa jokueva José jypaihupe ijeshakashurã hei: “Pũ'ã, narẽ'ãĩte raha sanjay hareka ishy Egiptope. Haipe pytakui she ãrỹmarãndujypeve, shara Herodes hekakapo'ẽ sanjay juka verã”. 14José sarekorã, hoka pyhareperavĩ raha sanjay hareka ishy Egiptope. 15Haipe pyta reta Herodes manopeve. Kyrã jehu iko verã hekope kavi Ñandeja hei vekua, Tũpa ĩñee mbeu'ia rupii: “Egiptoivi ãheno shyray”.
Herodes jukaka sanjayre
16Herodes kuama kuimbai ãrãndure mbytavyrã, pya poshyiterã, mondo syndarore juka verã sanjay kuimbaimi nde'iaveteri mokue ãño mbotyva, Belénpe hareka hyvache'õre, kuimbai ãrãndure mbeushua rãĩmi mbai arapera hesha jasytata. 17Kyrã jehu, iko verã hekope kavi Tũpa ĩñee mbeu'ia Jeremías mbypara vekua kuatiape: 18“Tenta Ramápe ñyhendu jaheo vasu; Raquel hãpĩrõtere membyre shara opa manoshi, hãrã katuã pya haikavi'ẽjy”.
José hareka María, jyrahajy Jesús hãndi Nazaretpe
19Herodes manomarã, Ñandeja jokueva ijeshakashu José jypaihupe Egiptoperã heishu: 20Pũã, rahajy nysanjay hareka ishy, ekuajy tenta Israelpe shara ko sanjay pota jukareare manoma. 21José pũãrã, rahajy sanjay hareka ishy tenta Israelpe. 22José kuama Arquelao mburuvisharã ẽjy Judeape tuu Herodes hẽndakueperã, kyje ohojy haipe. Tẽvã Tũpa mbeushu jypaihupe oho verã Galileape. 23Vãhẽ jyraha haiperã, oho iko jyre tentami Nazaret he'iashuvape. Kyrã jehu iko verã hekope kavi Tũpa ĩñee mbeu'ia hei vekua: “Jesús mbyheeapo Nazareno”.
Iliyochaguliwa sasa
Mateo 2: TPJ
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
©2023 LETRA Paraguay