John 21
21
Nakama kaukali la eꞌike Jesus
1Kena imuli, Jesus ehuli aꞌe soia hoi i nakama kaukali aia la i kevahi kemoana Galilee.
2Nakama nei enoho ilaa,
Simon Peter,
Thomas, esui ma Keoꞌoa,
Nathanael, kama kemakaꞌina Cana iloko Galilee,
Nakama kela Zebedee,
Ia ma kelaa koꞌolua nakama kaukali Jesus hoi.
3Simon Peter eme aꞌe nakama la, “Anau mehaele nopupui.” Kena nakama la eme aꞌe, “Kakou io.” Ko nakama la iꞌae kemonoui la nopupui kepo la hakoa, ia sehimea ekau.
4Keualoko keaka, Jesus ukuu ikaunakai, ia nakama kaukali la semakino ma kela Jesus.
5Kena iko Jesus ianaa aꞌe nakama la, “Ausoa. Okou haiponohi?” Ia nakama la eme aꞌe, “Sehimea.”
6Kena iko Jesus ime aꞌe, “Pehi keupena okou na kevahi laua kemonoui na ma sehiiꞌa emau.” Kena iko nakama la ipehi keupena lakou la noselavaa kehuki muli, maikinimea komaꞌi naiꞌa ekau.
7Kena iko kama kaukali Jesus elaoi la ime aꞌe Peter, “Kela o Kealiꞌi!” Keualoko Peter nilono nakakala nei, ko kama la ikakaꞌi peala aia la nomau, kena ilee iloko kelokai noꞌau iuka. 8Kena nakama kaukali la ealo aꞌe kemonoui la, noaleko keupena la iuka upii keiꞌa. Maikinimea nakama la semao ikaha ma kaunakai.*f30* 9Nakama la eo aku iuka noꞌike naponohi ia ma nahalaoa ehakuu iluna kemakaahi.
10Kena iko Jesus ime aꞌe nakama la, “Au mai niiꞌa i naiꞌa okou nipui la.”
11Ko Simon Peter ihaele noaleko aꞌe keupena la iuka upii keiꞌa elahi, kela huikalau kipulima ma kolu naiꞌa hakoa. Niaina ma komaꞌi naiꞌa, keupena la semasae oia. 12Ko Jesus ime aꞌe nakama la, “Omai noꞌai.” Ia nakama kaukali la emakaꞌu kevasili aꞌe kama la, “Oai aꞌoe,” maikinimea nakama la umakino ma kela o Kealiꞌi. 13Kena iko Jesus ihaele aꞌe noko nahalaoa la ia ma naponohi la novavae aꞌe nakama la. 14Kenei kanahakolu naualoko Jesus ehuli aꞌe soia i nakama kaukali aia la, imuli kela aia niola muli la.
Jesus ekakala laua ma Peter
15Keualoko nakama la niꞌai nooki, ko Jesus ime aꞌe Simon Peter, “Simon kama John, aꞌoe elaoi anau elaꞌa iluna ma alakama?”
Ko Peter ime aꞌe, “Ino Kealiꞌi, aꞌoe makino pela anau elaoi aꞌoe.”
Kena Jesus eme aꞌe kama la, “Hanai napunua {sipisipi} anau la.”*f31*
16Ia Jesus evasili aꞌe kama la hoi ma, “Simon kama John, aꞌoe elaoi hamaoni anau?”
Ko Peter ime aꞌe, “Ino, Kealiꞌi, aꞌoe makino pela anau elaoi aꞌoe.”
Ko Jesus ime aꞌe kama la, “Lolosi na{sipisipi} soliliꞌi anau la.”
17Keualoko kanahakolu ko Jesus ime aꞌe, “Simon kama John, ea, aꞌoe elaoi anau?”
Ia Peter ukipuaina, maikinimea Jesus evasili aꞌe aia koukolu naualoko pela, “Aꞌoe elaoi anau?” Kena Peter eme aꞌe, “Kealiꞌi, aꞌoe ailoa namea hakoa. Kena aꞌoe makino pela anau elaoi aꞌoe.”
Ko Jesus ime aꞌe kama la, “Hanai na{sipisipi} soliliꞌi anau la. 18Anau eme aku aꞌoe kehamaoni. Keualoko aꞌoe nikipu aꞌe, aꞌoe eleleu pamalo aꞌoe soꞌoe nohaele heꞌina pehe aꞌoe hihai. Ia keualoko aꞌoe umakua, kelaa kama meihaleleu aku pamalo aꞌoe la, kena ihakaꞌi aꞌoe i keꞌina aꞌoe sehihai kehaele la.” 19Jesus ekakala penei ihaꞌali aꞌe pela kipukipu kemake Peter la meihuli aꞌe namahi Keakua. Kena Jesus eme aꞌe kama la, “Kaukali mai anau.”
Jesus ma kelaa kama kaukali aia la
20Kama kela Jesus elaoi la ehaele vamuli Jesus laua ma Peter. Kela o kekama nihakiꞌe nohapale aꞌe Jesus keualoko keꞌai imua la novasili aꞌe ma, “Kealiꞌi, oai kekama mehaꞌali aꞌe aꞌoe i nakama hamakua la?” Peter ehakiꞌe imuli aia noꞌike kama la. 21Kena Peter evasili aꞌe Jesus, “Kealiꞌi, ia kama nei?”
22Ko Jesus ime aꞌe Peter, “Poi anau hihai kama nei iola ikae keualoko anau meivaꞌai mai muli, kela hevahi maua somaua. Aꞌoe ikaukali mai anau.”
23Kena kakala nei ukoha nolono alakama kaukali Jesus la, pela ma kama kaukali la meselavaa imake. Ia Jesus semea pela ma kama la mesemake. Jesus emea ma, “Poi anau hihai kama la iola nokae keualoko anau meivaꞌai mai muli, kela hevahi maua somaua.”
24Kama kaukali la ekakala aku nakakala nei, kena ikakaa nakakala nei iloko kelauniu nei. Kena kakou emakino pela hea kama la ekakala la ehamaoni.
Nakakala haoki
25Jesus ehuli aꞌe komaꞌi namea hoi, kela anau sekakaa iloko kelauniu nei. Poi hekama ekakaa namea la hakoa, nalauniu la amekomaꞌi haeꞌo. Anau ehakaꞌoko ma naꞌina kemaalama nei mesekau kehakau nalauniu la hakoa.
Iliyochaguliwa sasa
John 21: ojv
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 1999, Wycliffe Bible Translators, Inc. All rights reserved.