Matiu 2
2
Ịrụa Saghị Saghị Ngaa Ḅoapụ Ḅo Kálátụwọ Jizọs Dighim
1Nnị Jizọs yii fama sa Judiya bie fịnị Bẹtịlịhẹm ḅụ, anịị ámányánáḅọ Hẹrọd sẹ ma táarị sáá, jẹa owiapụ ḅálōló gbólómanyẹ dawọ́arịapụ ịrụa saghị saghị ngaa ma ḅụ saghị Jerusalem ḅoom 2sị gbíla, <<Ọ tẹ́ angaá imi n yii maá Juuapụ ámányánáḅọ ma? Wamịnị ori ḅálōló arịm ịrụa ma saghị saghị ngaa ma ḅụ, wa pịghị ḅomam sị wa susi ọ pịrịị.>> 3Ámányánáḅọ Hẹrọd mịma náa sáá anị pịghị ḅụḅáláḅálá pa ọ pịrịm anị pịghị Jerusalem ḅụ fịnịapụ mamgba pịrị ḅara. 4Ọ túminị́ mamgba sị kobiri fama sáá, igwagwaalaapụ na ólóghó nyẹ́dieapụ ori nnị gbilam nnị, <<Krais ma yii bẹ angaá?>>
5Nnị warị ọ pagharaa, <<Judiya bie fịnị Bẹtịlịhẹm. Mịma anịị ikiakoroḅọ ma gịẹnyẹ:
6<< <Kụ́ma ịrị, Juda
sẹ bie fịnị Bẹtịlịhẹm
ẹ́rẹ́soarị opu ama mamgba ḅụ Juda
sẹ bie ịrị nna bie ịrụ́ḅam ḅẹ́
ibie anịị sẹ́ táaḅọ págháḅo
bẹnyẹ ánánákúrúḅọ sọ
iyẹ́a túminị́ Izirẹlị pịrịị.> >>
7Hẹrọd warị ḅálōló gbólómanyẹ ma dawọapụ ma sị ọ ḅụ pịrị sị n gbíla ḅẹ́ ḅálōló ma anị tẹsá biri págháḅo. 8Ori n pa Bẹtịlịhẹm fịrịmam ḅẹẹ, <<O muu tọ́rụ́ kịsịma ḅara pa tụwọ ma dọghụ. Ọmịnị ori árị kirikiri ọmịnị bịpị pa i fịrịma, irịsọ ine mú susi ọ pịrịbẹ ḅara.>>
9Nnị ámányánáḅọ ma pughu fama sáá n warị saghị nna muunyẹ muu, n pịghị árị ḅálōló ma ịrụa saghị saghị ngaa ma ḅụ tórúku sọọ n pịrịm sị muu wárii sị ḅoo tụwọ ma fịnịngaa ma ọgọnọ ḅụ sẹm. 10Nnị ḅálōló ma árị sáá nnị opuma bieḅẹlẹm. 11Nnị ḅoo wárị ma láa sáá, n tụ́wọ ma arịm ori na o nyingi Meri, nnị warị ẹkpẹrẹkị sị susi ọ pịrịị. Anịsáa n warị nna ngọ akpa findi sị nyẹ́ die tụwọ ma pịrị, odoḅala, kụ́nụ́ Insẹnsị na maya. 12Tamuno nna biri nụ́nụ́máa ḅara ma dáwọ́ju ḅụ ḅẹ́ nnị pịghịma Hẹrọd damaḅo ma, nnị jẹ́ asọ akịm sị sọọ nna sẹ múm.
Meri Na Josẹf Jizọs Pa Soo Ijipiti Múm
13Túminị́ ma soo fama sáá, Gbámásóḅọ ma gbẹ́rẹ́ sookumuḅọ ọ ḅụ pa Josẹf diem dáwọ́ju ḅụ, warị ḅẹẹ, <<Saghị sẹ, ị tụ́wọ ma na nyingiḅọ akị mangị Ijipiti muu. Anị ngaa fịnị wárii sị a dugho ị pịrị sa láa, ḅẹ́ Hẹrọd tụ́wọ ma dọghụbẹm ori ọ ḅáa bẹ ḅara.>> 14Ọ warị saghị, sị tụwọ ma na nyingiḅọ taa mangị so Ijipiti muu dii bie, 15ọ fịnịngaa wárii sị Hẹrọd fịị sáá láa. Mị ḅara ma anịị Gbámásóḅọ ori ikiakoroḅọ ḅụ ḅọ́rọ́ dughonyẹ ma kiriakị ḅara, ḅẹ́, <<Ijipiti bie anịị a i tụwọ sị pághámaḅo nyẹ.>>
16Hẹrọd nimiḅo sáá ḅẹ́ ịrụa saghị saghị ngaa ḅoapụ ma oḅori pa ọ sịmam anị opuma ori igánimam, ọ warị bịpị pịrị ḅẹ́ n dọghụdọghụ owiapụ awọ gonyẹ́ gonyẹ́ ḅáa, Bẹtịlịhẹm na pịghị anị na kikia angaá mamgba ḅụ, mmẹẹ́ a kụ́rá lamaapụ na pịghị mmẹẹ́ a kụ́rá láaghaapụ, ọ mịma mịẹm ịrụa saghị saghị ngaa ḅoapụ ma dugho ọ pịrị sáá ma na kura nyẹ. 17Anịsáa nnị ikiakoro Jerimaya bịpị ḅọ́rọ́ dughonyẹ ma ḅọ́rọ́ karakárányẹ sọ ḅara:
18<<Rama ḅụ n gbẹ́rẹ́ pụghọ naam
owu na pịghị opu tẹ́mẹ́sii.
Resel owu árị awọ pịrịarị
aminigha nnị a biedịịnma,
tegó n fịịmam.>>
Nnị Pịghịma Sọọ Nazarẹtị Ḅoom
19Hẹrọd fịị ḅọ́rọ́maa sáá, Gbámásóḅọ ma gbẹ́rẹ́ sookumuḅọ ọ ḅụ pa Josẹf diem dáwọ́ju Ijipiti bie, 20warị ḅẹ́, <<Saghị sẹ, tụwọ ma na nyingiḅọ akị sị sọọ Izirẹlị muu, ḅẹẹ tụwọ ma ḅáa dọghụapụ n fịịmam.>> 21Anịgo ọ warị saghị sẹ sị tụwọ ma na nyingiḅọ akị sị sọọ Izirẹlị muu. 22Kụ́ma Josẹf náa sáá ḅẹ́ Akelaos Hẹrọd imine kpọrọfịnị sị sághị táarị Judiya sẹ bie, anị ngaa ma muu warị ọ ḅáláfama, nnị pịghị ọ biri nụ́nụ́máa ḅara ma dáwọ́ju, ọ ḅọ́rọ́ Galili ḅẹrẹtọ angaá mum, 23warị muu Nazarẹtị pa sị ama ḅụ ngaa. Mịị ḅara ma ikiakoroapụ ma dughonyẹ ma ḅoo karakárányẹ sọm ḅẹẹ, <<Nnị Nazarẹtịḅọ pa ọ sịịbẹm.>>
Iliyochaguliwa sasa
Matiu 2: IBY
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
©2024 Luke Initiative for Scripture Translation