Luk 1
1
Luk ɔchɛrɛ rachɛrɛ nda ra baŋa Jisɔs ɔnyɛ Tiofilɔs
1Tata Tiofilɔs, ani esii wa bum wa kani kɔkani rotumɔ ndu Ɛbɨrɔkpabi ebosi ra kɛdɔŋ kɛchɨl. 2Irigirigɔ kɛmanchi atumachɛ akɨla arin kɛlam wa komi wanye wul. 3Awu nwu ayugɔ ra reju, kum ami mɨnɛ nruŋini olili mbaŋa birɛ mbi fɛb mbi wɛjagɔ, bɨnɛ ra rɛbɨnɛ, nsi etimɔ ɛyɨm nchɛrɛ irigirigɔ nye wu. 4Fɛɛ esiafɛ agbɛra raikpɛ abaŋa birɛ mbi wabɔ kɔge wu.
Kɔkani abaŋa ɛmalɛmalɛ a Jɔn Ɔwaani mani
5Kɛgbɔ nchi Ɛrɔd ɔra ɔkɨm a Judia, ɛfɔnɔ osiakɔya ka Ɛbɨrɔkpabi nwu wa yinɔ ridɨnɔ ridɛn Sɛkaraya, osi ra kɛdɔŋ ka asia kɔya ka Ɛbɨrɔkpabi mbaa Abija. Ɔwɔwɛn Elisabɛd osi ra kɛtɨb ka Erɔn. 6Abɛ afaafaa wa wanɛwanɛ ra roisɔ ra Ɛbɨrɔkpabi, wa lua ibina akɨla raikau ra Ɛbɨrɔkpabi ƆKƆKƆ. 7Gbɔ wabi fɔnɔ mbɔn, kum Elisabɛd ɔra okumɔ; mɨnɛ abɛ afaafaa wa tɨm. 8Reyi dinɛ, ndi asia kɔya ka Ɛbɨrɔkpabi ra kɛkpɛna kɛchɛn wara rotumɔ, Sɛkaraya ɔra osia rotumɔ rɔdɛn kɛmaka osiakɔya roisɔ ra Ɛbɨrɔkpabi. 9Wa raŋɔ mɔ ra kum rotumɔ ka asia kɔya kabɛ, odulɔ Ɛtɔa Ɛbɨrɔkpabi ƆKƆKƆ ɔka digɛ isɔ. 10Kɛgbɔ ka isɔ edigedigɛ kɛkɨlɔ jag, rɛkau ra ani esii rɛra rɔfa re rua nyɔm. 11Oyilarotumɔ Ɛbɨrɔkpabi ƆKƆKƆ ɔmɨlɛnɛ ɔkɔga mɔ, ɔbarɔ kɔbɔ kodumɔ ka kum kɔya ka isɔ. 12Ndi Sɛkaraya ɔchɛ mɔ, ɔyɛrɔ mɨnɛ ɛrau esimɔ. 13Gbɔ oyilarotumɔ Ɛbɨrɔkpabi ɔkani Sɛkaraya na, “Ɛrau enisii wu, kum Ɛbɨrɔkpabi edim nyɔm owu. Owowu Elisabɛd kɨn ɔmalowu wɔn odumini, mɨnɛ kɨn ayinɔ ridɨnɔ ridɛn Jɔn. 14Kɨn afɔnɔ kɛdɔmetimɔ arigɛ ɛtɔmɛlɛ, mɨnɛ ani esii kɨn wa tɔmɔ rɛfɔ ra ɛmalɛmalɛ ɛyɛn. 15Kum amɔ kɨn otumɛ ɔkɨmkɨm oni roisɔ ra Ɛbɨrɔkpabi ƆKƆKƆ. Matug kpagkpag oniŋɔ, titi mma mafɔnɔ ɔfɔfɔp. Ɔwanɛwanɛ Roifɛ kɨn oyugɔ mɔ ra ɛkpaju, bɨnɛ ra kɛgbɔ nchi ɔnɨŋɔ malɛ. 16Kɨn osi bɔna Isɨrɛl esii wa mulɛnɛ wawɔ wa yimɔ Ɛbɨrɔkpabi ƆKƆKƆ ɛbɛ. 17Mɨnɛ kɨn odulɔ ɛkparoisɔ a Kɨraist ra roifɛ akɨla nsɨm Ɛlaija, kɨn osi bɨritɛ wa fɔnɔ rɛda ra etimɔ ra mbɔn, akɨla ani mba wa kpɛna remu ra Ɛbɨrɔkpabi ƆKƆKƆ, wa tɔrɛ ɛtɨma ani mba wa wanɛwanɛ; ɔmɔlɛ ani ɛkpa wa dimini ɛwɔɛlɛ a Kɨraist.” 18Sɛkaraya ɔbɨbɔ Oyilarotumɔ Ɛbɨrɔkpabi nwɛn na, “Nnan dɛ nnɨŋɔ gbɛra na bumbu kɨn wɔwa jag? Ami ntɨm, owowum mɨnɛ ɔtɨm.”
19Oyilarotumɔ Ɛbɨrɔkpabi ofini na, “Ami Gebɨrɛl. Mbara roisɔ ra Ɛbɨrɔkpabi, mɨnɛ wa tigɛ mɛ nwa kani wu Bɨrika Kɛlam nchifa. 20Kum abi lɔɔ raikpɛ ra bumbu nkani wu nla, kɨn agbɔ nsɨl tata reyi ndi bumbu wɔnɨŋɔ jag.” 21Ani mbɛn wara wa dimana Sɛkaraya, ɛkpa ewiabɛ na otumɛ ɔfɨrɛtɨma kɛgbɔ ra Ɛtɔa Ɛbɨrɔkpabi. 22Ɔkɨlɔ jag ɔwɔ, obikɨlɔ yɛ ɔlamɔ kɔtag rabɛ. Ɛtalɛbɛ na Ɛbɨrɔkpabi ɛkɔgɛlɛ mɔ mbum akɛ ra Ɛtɔa Ɛbɨrɔkpabi, kum ɔta fuga ibɔ ayayɛ, gbɔ mbum obilamɔ.
23Kɛgbɔ rotumɔ kɛchɛn kɛkɨlɔ wɛ, ɔkɨlɛ ra ɛtɔ. 24Kɛgbɔ giriri, ɔwɔwɛn Elisabɛd oyimɔ risɔ, ɔgbɔ rikalɔ ra ɛtɔ rafɛ ratan, rɔfa obi jagɔ. 25Ɔlamɔ na, “Ɛbɨrɔkpabi ƆKƆKƆ esi ɛdɔnyi ɛnyɛ mɛ, ɛsaŋ mɛ gbɔu ani mbufa.”
Oyilarotumɔ Ɛbɨrɔkpabi ɔkani Meri na Jisɔs kɨn ɔmalɛ
26Ra rafɛ ratital, Oyilarotumɔ Ɛbɨrɔkpabi Gebɨrɛl odulɔ kɛfɨrɔ nchi wa yinɔ ridɨnɔ na Nasarɛd rikalɔ ra Galili ndi Ɛbɨrɔkpabi etigɛ mɔ. 27Ɛkpa obibɛn, rekoni ra odumini nwu wa yinɔ ridɨnɔ na Josɛf, nwu osi ra kɛtɨb ka Defid. Wa yina obibɛn nwɛn Meri. 28Oyilarotumɔ Ɛbɨrɔkpabi ƆKƆKƆ odulɔ oyimɔ mɔ, ɔkani mɔ na, “Nlɛwu, awu nwu ayugɔ ra ɛmɔlɛmɔlɛ! Ɛbɨrɔkpabi ɛra rawu.”
29Meri etimɔ ejuŋa mɔ ebiebi ra ɛdɔɔ ɛlamɛlɛ nyifa. Gbɔ ɔfɔna nkatir ɔbaŋa bumbu ɛdɔɔ rɛlɛ ndifa rɛjagɔ. 30Gbɔ Oyilarotumɔ Ɛbɨrɔkpabi ɔkani mɔ na, “Ɛrau enisii wu Meri; Ɛbɨrɔkpabi ɛnye wu ɛmɔlɛmɔlɛ. 31Kɨn ayimɔ risɔ amalɔ wɔn odumini, mɨnɛ kɨn ayinɔ ridɨnɔ ridɛn Jisɔs. 32Kɨn otumɛ ɔkɨmkɨm oni, mɨnɛ kɨn wa yinɔ mɔ Wɔna Ɛbɨrɔkpabi a Mbirambira. Ɛbɨrɔkpabi ƆKƆKƆ kɨn ɛnyɛ mɔ ketuu rɛkɨm ka mitɛ ɔwɛn Defid. 33Mɨnɛ kɨn otumɛ ɔkɨm ɔnyɛ ɛtɔa Jekɔb rajɛrajɛ. Rɛkɨm rɛdɛn itɨm rɛkɔ.”
34Meri ɔbɨbɔ Oyilarotumɔ Ɛbɨrɔkpabi na, “Nnan dɛ bumbufa wɔnɨŋɔ jag, ndi ami odumini mbɨri gbɛra?”
35Oyilarotumɔ Ɛbɨrɔkpabi ofini na, “Ɔwanɛwanɛ Roifɛ kɨn ɔwɔ oyimo wu, mɨnɛ nsɨm Ɛbɨrɔkpabi-a Mbirambira kɨn ɔkɨbɛ wu. Rɛfɔ adifɛ, wɔn nwu anɨŋɔ ma kɨn wa yinɔ mɔ Ɔwanɛwanɛ a Wɔn Ɛbɨrɔkpabi. 36Ɔmalowu Elisabɛd mɨnɛ, nwu wa kani na kɨn ɔgbɔ okumɔ, oyim risɔ rafɛ ratital (6) ra ɔtɨmɔ ɔbɛn. 37Mbum tum bunɛ wɔda mbu wɔ jani wosiŋɔ kɛlam ka Ɛbɨrɔkpabi.”
38Meri ofini na, “Ami orin ɔwani Ɛbɨrɔkpabi ƆKƆKƆ, lɔɔ etumɛ ɛnyɛ mɛ kɛmanchi kɛlam kechi kɛlamɔ.” Kadi Oyilarotumɔ Ɛbɨrɔkpabi odulɔ ɔgbɛ Meri.
Meri odulɔ idiwɔ ɛkpa Elisabɛd
39Ra kɛgbɔ achifɛ, Meri owulanɛ odulɔ kɛfɨrɔ ka okulokul ra Juda. 40Ɔnɔlɔ ɛtɔ-a Sɛkaraya, mɨnɛ ɔlɛ Elisabɛd. 41Ndi odimɔ rɛlɛ ra Meri, nwɔn nwu ɔra ra ɛtɔ ɔmaa Elisabɛd ogbugɛnɛ, mɨnɛ Elisabɛd oyugɔ ra Ɔwanɛwanɛ Roifɛ. 42Okugɔ ra ɔkɨmkɨm remu na, “Wa mɔle wu ra kɛdɔŋ ka awani, ɛmɔlɛmɔlɛ mɨnɛ ɛfɔnɔ nwɔn nwu anɨŋɔ ma! 43Ami nra mɛdoni, nwu mika Ɛbɨrɔkpabi ƆKƆKƆ owum ɔnɨŋɔ wɔ idiwɔ oyimɔ mɛ? 44Rantuni nwu ndimo wu remu, wɔn nwu ɔramɛ ra ɛtɔ ɔmaa ogbugɔnɛ ra kɛdɔmetimɔ. 45Ɛmɔlɛmɔlɛ ɛfɔnɔ oni nwu ɔlɔɔ raikpɛ, na bumbu Ɛbɨrɔkpabi ƆKƆKƆ ɛbɔ kani mɔ kɨn wɔwa siŋ!”
Meri ojuɛ Ɛbɨrɔkpabi
46Mɨnɛ Meri ɔlamɔ na,
“Nsamɛ Ɛbɨrɔkpabi ƆKƆKƆ ra etimɔ ɛyɨm fɛb.
47Mɨnɛ roifɛ rodum rɔ tɔma ra Ɛbɨrɔkpabi Ɔnananana owum.
48Kum otigɔ ɔwani nwu ami nra, ɔfɔnɔ nkatir rami. Bɨnɛ faŋandi, ani kekul ndɨm kɨn wa kani na Ɔgbadɨm Ɛbɨrɔkpabi ɛnyɛ mɛ keliwɔretu ebiebi.
49Ra birɛ mbi Ɔwanɛwanɛ Ɛbɨrɔkpabi ebosi ɛnyɛ mɛ,
reju rɛfɔnɔ ridɨnɔ ridɛn.
50Bɨnɛ ra kɛsɛ chinɛ ajagɔ kɛsɛ kedudu,
ɛfɔna mafɨbɔ ra ani mba wa jua yɛ.
51Esi akɨmkɨm a birɛ,
mɨnɛ ɛnyana ani mba wa fɔnɔ ɛtalɛtalɛ ra etimɔ ɛbɛ.
52Ɛrɛ aniretu ra ketuu rɛkɨm kɛbɛ,
gbɔ ɛlɛ ani mba wa tɔlanɛ ɛkpa mbira.
53Ɛnyɛ ania mŋbɔ bɨrika kɔjɛ,
gbɔ etigɛ ifaŋanɛ idulɔ ibɔ ibin.
54Ɛnani arin abɛn Isɨrɛl,
etilɛnɛ ɛkɔgɛlɛ bɛ mafɨbɔ.
55Kɛmanchi etila ɛnyɛ bɨritɛ abal,
ra Ɛbɨraam akɨla bɔnabɛn rajɛrajɛ.”
56Meri ɔgbɔ ra Elisabɛd rafɛ amɔm ratal, fɛkadi ɔkɨlɛ kɛfɨrɔ kɛchɛn.
Ɔmaa Jɔn Ɔwaani mani
57Kɛgbɔ kɛkɨlɔ jag nchi Elisabɛd ɔnɨŋɔ ma, ɔmalɔ wɔn odumini. 58Amalɔ-abɛn akɨla ani mba wa tuma wa kula mɔ, wa dimɔ na Ɛbɨrɔkpabi ƆKƆKƆ ɛkɔgɛlɛ Elisabɛd ɔkɨmkɨm mafɨbɔ mamɛn, wa kanɔ ramɔ mɨnɛ.
59Ra rayi ranaranaa (8), wawɔ nwɔn nchim esiɛlɛ, mɨnɛ wa tiŋi na wa yinɔ mɔ Sɛkaraya, ridɨnɔ ra mitɛ ɔwɛn. 60Gbɔ mika ɔwɛn ɔkani na, “Ei! Wa yina mɔ Jɔn.”
61Wa fini mɔ na, “Oni ɔda ra kɛtɨb kechi nwu wa yina ɛdɔɔ ridɨnɔ ndifa.”
62Fɛkadi wa ka sii ichɛŋa ra ibɔ wa kɔgɛlɛ mitɛ ɔwɛn, fɛɛ wa gbɛra ridɨnɔ ndi odugɔ wa yinɔ wɔnɔwɛn. 63Ɔbɨbɔ bɛ wanyɛ mɔ kɛkpa rachɛrɛ, mɨnɛ ra kɛbɛkpa ka oniranwunɛ, ɔchɛrɛ na, “Ridɨnɔ ridɛn Jɔn.” 64Ɔmɔmɛɔmɔmɛ kama ka Sɛkaraya ka kɨbɛlɛnɛ, ɔbɨnɛ kɔtag ɛlamɛlɛ, mɨnɛ ɔmɔlɛ Ɛbɨrɔkpabi. 65Ani mba wa tuma wa kula bɛ ɛrau esibɛ, mɨnɛ kɛlam nchɛn kɛ yanɛ kedulɔ ɔfɨrɔ okul a Judia fɛb. Mɨnɛ ani wa lama wa baŋa bumbu wɔbɔ jag. 66Oniranwunɛ nwu odimɔ bumbu, ɛkpa ɛbamɔ ɔbɨbɔ na, “Maa mbum bɛ wɔn nwufa ɔnɨŋɔ wɔ ɔwa tumɛ?” Kum etimɔ Ɛbɨrɔkpabi ƆKƆKƆ ɛra ramɔ.
Kɛkɔn ka Sɛkaraya abaŋa oni nwu ɔnɨŋɔ wɔ ɔwa nani Isɨrɛl
67Ɔwanɛwanɛ Roifɛ ɔrɛ ɔwɔ ra ɛkpajua Sɛkaraya mitɛ a Jɔn, mɨnɛ ɔlamɔ kɛlam ka Ɛbɨrɔkpabi:
68“Ɛmɔlɛmɔlɛ ɛfɔnɔ Ɛbɨrɔkpabi ƆKƆKƆ,
Ɛbɨrɔkpabi a Isɨrɛl, kum ɛwɔ ɛwa sii ɛtaɛlɛ-atibɔ aniabɛn. 69Ɛlɛ enyi ɛnaninani ɛyɨl ra ɛtɔ orin ɔwɛn Defid.
70Kɛmanchi etila ra kama ka Awanɛwanɛ alamaremu ra Ɛbɨrɔkpabi reyadi.
71Faŋandi, awul kɨn rɛfɔnɔ ɛnaninani ra ibɔ anianjɨŋ abal,
akɨla ani mba re kpugɔ bɛ.
72Ɛkɔgɛlɛ bɨritɛ abal mafɨbɔ,
mɨnɛ etilɛnɛ Ɔwanɛwanɛ etilatila ɛyɛn.
73Etilatila nyi esii ɛnyɛ mitɛ owul Ɛbɨraam.
74Ɛtawul etibɔ ra ibɔ anianjɨŋ abal,
fɛɛ esi wul rɛyɛ rɛ juɛ yɛ ra etimɔ a ja.
75Ra ɛwanɛwanɛ akɨla rokpin ra kɔŋŋ,
roisɔ rɔdɛn rajɛrajɛ.
76“Mɨnɛ awu wɔnowum,
kɨn wa yino wu ɔlamaremu ra Ɛbɨrɔkpabi a Mbirambira;
kum awu kɨn adulɔ ɛkparoisɔ aka mɔlɛ ɛtɨma anyɛ Ɛbɨrɔkpabi ƆKƆKƆ.
77Kɨn asi ani wa gbɛra ɛtɨma ɛnaninani,
nyi esiŋa ra ɛfɔrɛfɔrɛ obia ɔbɛ.
78Rɛfɔ mafɨbɔ ma Ɛbɨrɔkpabi,
kɨn etigɛ wul oni nwu onɨŋo si ɛkpa mbira ɔwɔ amɔm royi ra sisɔu.
79Kɨn ɛnyɛ ani mba wara ra kɛrɨrɔ akɨla ɛrau rɔbɔ kumkaja,
mɨnɛ etiwɔ wul ɛtɨma kumkafuɛɛ.”
80Mɨnɛ wɔn nwɛn oruɔ, ɔwa jani ra Bɨrika roifɛ akɨla rɛmalɛ. Ra rɛbinɛ rotumɔ ra ɛkanikani rɔdɛn ta itɨm, ɔgbɔ ra rɔchɛ ra ifɨrifɨr fɛɛ ɔmɨlɛnɛ ra okpu ɔwɔ Isɨrɛl.
Iliyochaguliwa sasa
Luk 1: Olulumo-Ikom
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
©️2024 Luke Initiative for Scripture Translation