Luk 6
6
Jisɔs akɔn arɔ we ale Minfɔni wu Epo yi Ewealɔ
(Mat 12:1-8; Mak 2:23-28)
1Epo yid yi Ewealɔ Jisɔs ali kingag wa mkwɔ yi afen wit#6:1 Wit ale ala mbukpa., bɔ ba anyedag we ato ɔbɔng bechɔchɔg, afori bi wa babɔ amibɔ alɔb bekpaga ka ali mbuni obu. 2Ebe bane ba Farisi ba ale afa abeb bɔ arɔ, “Ye ka nyɔ olemag nyum yi eben ekaming sɔ elem wa Epo yi Ewealɔ?”
3Jisɔs abɔri bɔ arɔ, “Nyɔ ɔkan yen yi Debid aleming a yi nsong aloming bɔ we yi bane ba anyeding we a? 4We awen wa nju Ɔsɔwɔ, akun beliang bi asɔming ake Ɔsɔwɔ, we ali ka we akun ebe ake bane ba anyeding we. Wa eben arɔ mine wuntad chang wu ayag beliang abia wu akinging basingag ba besingi bi Ɔsɔwɔ.” 5Nyining Jisɔs abɔri bɔ, arɔ “Mmɔn wu Mine ale Minfɔni wu Epo yi Ewealɔ.”
Jisɔs agban wa Epo yi Ewealɔ
(Mat 12:9-14; Mak 3:1-6)
6Wa Epo yi Ewealɔ yintad we achin wa nju efugi yu bane ba Ju akɔag bane. Minine wud ale afa wu ɔbɔ wu obolom owu ɔkwɔ. 7Bɔ Farisi yi bakɔag ba eben bale afa akeag eri nyum yi bɔ akunag akɔ Jisɔs arɔ we alem bobe, bɔ ababag we gɔgigɔgi arɔ ebu we ting agban bane wa epo yi Ewealɔ. 8Ka Jisɔs aji yi bɔ ali kerag aba tɔ minine wu ɔbɔ owu ɔkwɔn arɔ, “Lo belag lami wa boso bu feb bane.” Ka we alo belag alami afa.
9Eruafa Jisɔs atɔ bɔ arɔ, “Me mbeb nyɔ, yin yi eben ekaming erɔ sɔ elem wa Epo yi Ewealɔ. Elem bɔnɔ lale elem bobe, enyangang ekwen yi mine lale ejɔgang yi?”
10We amɔn bɔ feb afari, ka nyining we atɔ minine awun arɔ, “Nyabi ɔbɔ ɔwa.” Minine awun alem ala, ka ɔbɔ awun otisɛm okori. 11Bakɔag ba eben yi ba Farisi boted bɔsang bɔ gbɔg ka bɔ ato ɔkami yi bolom yi bɔ ka alemag Jisɔs.
Jisɔs asang bane ɔfɔ yi bafai ba alamag ɔbɔ owu
(Mat 10:1-4; Mak 3:13-19)
12Epo yid Jisɔs alon esɔ mpub aka soi nsɔm, akuning boru abua feb asoag nsɔm akerag Ɔsɔwɔ. 13Yi epo ehɔche, we ayen bane ba ali nyedag we aba ka we asang bane eri ɔfɔ yi bafai wa erɔng eyibɔ, ba alamag ɔbɔ owu. Fa bɔpi obubɔ: 14Saimɔn (wu we ayening Pita), ninyen owu Andru, Jems, Jɔn, Filip, Batolomi, 15Matiyu, Tɔmɔs, Jems mmɔni Alfiyɔs, Saimɔn (we wu akwe etɛm enun yi mpam oyu), 16Juda mmɔn wu Jems yi Juda Iskarɔd wu aban abakɛmi mine wu achɔn Jisɔs.
Jisɔs akɔi bane erɔng agban bane
(Mat 4:23-25)
17We aloag eboi yi bɔ aka lami wa ekpen yi ele gbed. Jugijugi bane ba ali nyedag we ale afa yi nsɔgi bane ba arun bekpen bintad feb wa Judia, abodi Jerusalim, yi mpami Taya yi Sidɔn bu bole nkpɔgi baya, 18bɔ aban aba wog Jisɔs erɔng agban bɔ bekɔn ebibɔ. Bɔ ba bebe bi bɔnyɔganyɔ beli nɔgag bɔ we agban, 19Bane feb bali nɔgag agbi we, wantagi ɔsa oli tɛbag we beke ɔgbanag bɔ feb.
Benɔb yi Minro
(Mat 5:1-12)
20Jisɔs akpedi amɔn bɔ ba ali nyedag we arɔ,
“Erienɔ ele yi nyɔ ba ale bakpak,
wantagi bɔlen bu Ɔsɔwɔ bole boke nyɔ.
21Erienɔ ele yi nyɔ ba nyɔ ole ala nsɔng fafa,
wantagi nyɔ ting oli oyuri.
Erienɔ ele yi nyɔ ba nyɔ ɔbeag ala fafa,
wantagi nten ala bag yu nyɔ ɔwɔag.
22Erienɔ ele yi nyɔ ebu bane ajing nyɔ,
akeb nyɔ, achib nyɔ,
arɔ ole mine mbe,
wantagi nyɔ oli nyedag Mmɔni Mine.
23“Bɛn yi bochoba bu nted wa epo ayia, bu yi bochoba bu nted wantagi etɛm otorerom ole awa oworag we wa mpam yu esɔ. Wa nkeri bansi abibɔ ba nyanya aleming barɔag ba eyammɛd yi Ɔsɔwɔ.
24“Ka, eriebe ele yi nyɔ ba nyɔ ɔfang fafa;
wantagi nyɔ ɔgbɛrɔ rami betingi bi nggom.
25Eriebe ele yi nyɔ ba nyɔ oli oyuri fafa,
wantagi ebubu nsɔng ting alom nyɔ.
Eriebe ele yi nyɔ ba nyɔ ɔwɔag ala fafa,
waoye nten ala bag yu nyɔ ɔlangag ekud yi mbei.
26Eriebe ele yi nyɔ ba kpeicha mine achɔdag betingi bi nggom abangang nyɔ,
wa nkeri bansi abibɔ ba nyanya aleming yi barɔag ba eyammɛd bi baram.
Anun we bɔ ba ajingag we
(Mat 5:38-48; 7:12)
27“Ka me nsidi nyɔ ba nyɔ oli wogag me: anun we bɔ ba ajingag we, lem bɔnɔ ke bɔ ba ajingag we, 28soi nsɔm yu nnɔ ke bɔ ba arog ala we, soi nsɔm ke bane ba aleming we bobe. 29Ebu mine asoming we wa okig wud kpedi okig wu wag tɔngi we erɔng asom. Ebu mine araming nkwu ɔya yu efi, jɔg kpe yu eteng erɔng ke we. 30Ke kpeicha mine wu aleding we, mine kpe wun wu akuning nyum yi ele eya kɔngɔ beb we ɔrɔ atisɛm ake we. 31Lem ke bane bantad nkeri we ɔken ɔrɔ alem ake we.
32“Ebu we ɔfɔning enun yi bɔ ba we onunag bɔ, ye ele nching oyuna? Kpe ba alemag ba bobe akwe enun yi bɔ ba anunag bɔ. 33Ebu nyɔ oleming bɔnɔ nyɔ ke bɔ ba aleming nyɔ bɔnɔ nching oyuna ale ye? Kpe ba lemag ba bobe alemag alafa. 34Ka ebu nyɔ ɔfɔn bane ba nyɔ ɔkering ɔrɔ bɔ amanag akai barɛm amɛn, ye ele nching oyuna? Kpe balemag ba bobe afɔg bolom amɔnag mmɛd arami nkeri afɔn pɔp. 35Ka anun we bɔ ba ajingag we, lem bɔnɔ ke bɔ, we erɔng fɔ bɔ kan chori ekpo ɔrɔ ating atisɛm ajog we. Ebu nyɔ oleming lafa, otorerom owuna oting ɔtɔ, ka yifa etɔngag arɔ nyɔ ole mbɔn ba Ɔsɔwɔ wu Ɔchiming nlag Oking nggom feb, wantagi we alemag bɔnɔ akerag bane ba we chang asoag bɔ wa mmɛd yi ba abebing botɛd. 36Fɔn nsɔn, nkeri nsi eyina bane akɔrag we nsɔn.
Kan ke bane bobe
(Mat 7:1-5)
37“Kan wag osob mpem yi bolom nkeri we erɔng anungi akan wag mpem eya osob. Kan ke bane bobe, nkeri Ɔsɔwɔ ahɔ ke we bobe erɔng. Lo cha bolom bu bane wa bebe bi nggom ebibɔ nkeri Ɔsɔwɔ aloag achai we wa bebe bi nggom egwa. 38Ke, da Ɔsɔwɔ ting ake we. Etingi ekanang, anye yi eboi, anyingi nchim, esoi epogi, ting alang ake we. Nkan yu we okuning ɔkan, wa yu Ɔsɔwɔ akunag akan ake we.”
39We erɔng arob bɔ ekan yifa arɔ, “Minchegag mmɛd ting aman atɔngi nnum minchegag mmɛd nnen a? Bɔ bafai ahɔchɔ awei wa ebebe a? 40Mmɔn wu akɔag botiti ahɔtɔ aking minkɔkɔi owu, ka kpe icha mine wu akɔn we aman botiti obu akɛmag ala minkɔkɔi owu.
41“Ye ka we ɔmmɔnag ni nteteb yu ale elid yi ninyen ɔwa ɔchai ɔrɔ ekpara yi ele wa elid eya? 42Elemaglan we ɔtɔ ninyen ɔwa ɔrɔ, ‘Ninyen, nungi me nlob ni nteteb wa elid eya,’ wanteni we ɔkpak erɔang ekpara yi ele wa elid eya? We mine baso afai, ranen lob ekpara yi ele wa elid eya, ka we ɔrɔ jai ɔlob ni nteteb yu ale wa elid yi ninyen owa.
Erere yi bemei ebi
(Mat 7:16-20; 12:33-35)
43“Etingi erere chang yi ewomag ebe eme, erɔng ebe erere ehɔ wom etingi eme. 44Kpeicha erere arenag yi wa eme eyi. Bane ahɔ bob bemei bi fig wa etun yi basen erɔng ahɔ bob bemei bi greb wa erere yi bɔpenpen. 45Etingi mine abag yi betingi bi nggom wa betingi bi anunging wa nted oyu, ka ebe mine abag yi bebe bi nggom wa bi anunging wa nted oyu. Waoye minyɔ ɔchɔdag bi beson wa nted.
Bafai ba ali tɛbag nju
(Mat 7:24-27)
46“Ye ka nyɔ oyenag me, ‘Minfɔni, Minfɔni,’ ka nyɔ chang olemag nkeri me nsiding nyɔ? 47Kpewun wu aban ɔmɔma ka awog balem angama alem nkeri nchɔding, Me nting ntɔngi we nkeri we ale. 48We ale ala mine wu atɛbag nju, wu asɛming eboi ebi atɛb botog bu enud bu nju wa betakpa. Wa nten yu oloi ohɔsoi ɔsa wu oloi okwud nju ayua ka ɔmaning onyingi yu, wantag yu atɛbing yu gɔgigɔgi. 49Ka we wu awoging balem angama ka aleming nkeri nchɔding ale ala mine wu atɛbing nju yu botog bu enud bu nju ayun bosin betakpa. Ebu oloi onungi osoi okwud nju ayun, achɔrag ajɔgi feb.”
Iliyochaguliwa sasa
Luk 6: NBB
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
©️2024 Luke Initiative for Scripture Translation