ARING KELESING 13
13
Abram dawa' Lot petat
1Leka' nah Abram men daléh Mesir dahin hawan na', en na' geri nah lim ketanun na' tei ha' tana Negeb, Lot pah tei dahin na' lahuh. 2Abram atih kelalé' kaya', té' kahum hulung dahin pirek dahin met. 3Panau nah iha' men daléh Negeb pehangei-pehangei tei ateng ha' Betel. Té' hang Betel dahin Ai atih avan na' na lepau na' menuna'. 4Hitih pah ngavan na' na avo' ngavan na' ma'uk bun usu na' tegu ha' tei hitih menuna'. Abram pah sebayang té' Tuhan tinan.
5Té' pah Lot atih murip dahin Abram pa'en ha', iha' pah hipun kading, duba, sapi', dahin lepau-lepau anit lahuh. 6Tana anan nusi' ha' deng ngavan daha' lim murip, avin ngahum lelan hulung dawa', nusi' nah dawa' deng murip peji. 7Avin anan daha' aleng puboh hulung Abram pano' dahin daha' aleng puboh hulung Lot. Tegu atih daha' Kanaan dahin daha' Feris aleng murip té' tana atih.
8Ken Abram men Lot, “Meng nah té' kenep aleng pekelebeng té' itu' aleng peharin nih, nurei pah lahuh té' hang daha' aleng puboh hulung kui dahin daha' aleng tuboh hulung ka' nih dahuh. 9Bareng si' daléh anih seng em anun tu' iah? Sayu nah itu' petulan tana tu' nih, ika' tei pedah ulei men itu', ju akui kah tei pedah ta'o, bi iha' ika' tei pedah ta'o ké', ju akui kah tei pedah ulei.”
10 #
Ar Kel 2:10
En Lot nyineng ké', layang lelan datah ha' Yordan, té' kahum ata' hitih lahuh, awi jam tuk tuvuh Tuhan, dahin awi jam tana ha' Mesir dih jam na' lahuh, tei ateng ha' Zoar tih lim. Lim tuk anih men em payan Tuhan nasa' Sodom dahin Gomora dih. 11Lot mili datah aleng layang ha' Yordan men iha', dahin tei bulak ha' tana men béh matan dau pa'un, iha' nah dawa' petat. 12Abram té' pa'en melo' ha' tana Kanaan. Bi Lot melo' té' alem daléh té' datah layang atih, dahin na lepau-lepau na' ateng ha' béh daléh Sodom tih. 13Lim kelunan huang daléh Sodom atih kelunan ji'ek, kelunan aleng kelalau sala ha' unan Allah.
Abram bulak tei ha' Hebron
14Men'uh Lot tei bulak men béh Abram, ken Tuhan men Abram nunih, “Kerei inih nyineng nah teliling ka' men ngavam nekring anan, nyineng pedah matan dau uli dahin men pedah matan dau pa'un dahin men béh ulei matan dau pa'un dahin men béh tao' matan dau pa'un. 15#HST 7:5 Lim tana aleng im nyineng atih, seng Ek uk men ika' dahin men sau-sau ka' ateng-ateng baya. 16Akui seng na sau-sau ka' awi kahum hit, iha' té' daha' aleng deng mujap hit, uréh daha' deng seng mujap anak dahin sau-sau ka' lahuh. 17Tei nah im, anau nah tana atih ngioh arun na' dahin ayan na' lahuh, avin lim anan nah aleng seng Ek uk men ika'.” 18Men'uh anan Abram masan lepau anit na', dahin mejek na' té' béh pa'un belavan ha' Mamre jeleng Hebron, hinan pah iha' na ji avo' ngavan na' ma'uk bun usu na' men Tuhan.
Iliyochaguliwa sasa
ARING KELESING 13: TDK1990
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Bible in Today's Dahun Kayan Version © Bible Society of Malaysia, 1990.