ARING KELESING 18
18
Allah jaji seng ma'uk ji anak laké' men Abraham
1Men'uh anan Tuhan Allah petula batung Na' men Abraham té' béh iung belavan ha' Mamre, tegu iha' melo' té' ba lepau na' tegu dau hanit aya'-aya'. 2#Ib 13:2 Tegu ha' ngeju'au nyineng, beka' té' telo' la'ung nekring ha' unan na'. Pelalau ha' tei tepurung men ba lepau na' pala dalo', pelalau ha' nukem ha' tana. 3Iha' kuma' men dalo', “U amei, seng nun kenan kelo' seng pelalau lalé' té' lepau kui nih, ki'an kui em té'. 4Bei nah dalo' anih geri uk-iduk ata' ngavan mayau kudek kelo', ngelarah nah kelo' arin té' ida kayo' anih. 5Kuman kelo' arin, iha' kah kelo' tei, bang kelo' uh nei ha' ngavan panyin kelo' anih,” ken na'. Nyu'ei nah dalo', “Sayu kah ké'.”
6Pelalau Abraham tepurung tei ha' lepau na' pala Sara, dahin kuma', “Salet! Ala nah telo' tebeng tepung dinuh aleng sayu, maru nah na dinuh!” 7Tei nah Abraham tepurung ala ji anak sapi' na' aleng tenak dahin aleng sayu jam sin na', dahin nyihu daha' nyemaké' nevek na' dahin pesak na'. 8Men'uh anan en Abraham ala nah uso' sapi' aleng uh en daha' na sem, dahin uso' sapi' aleng em sem, dahin sapi' aleng uh en daha' pesak atih, pelalau matah na' ha' unan dalo' atih, nekring nah iha' té' béh dalo' té' ida kayo' atih, alem dalo' atih kuman.
9Ken dalo' men iha', “No' nah Sara hawam dih?” Ken na' nyu'ei dalo', “Té' kah iha' alem lepau.”
10 #
Rom 9:9
Lun ken Na', “Aleng lan na' Akui seng nei nekulah duman aleng la'an pala ika'. Tegu atih nah Sara aleng hawam anan seng nganak ji anak aké'.” Kelenghen Sara nah daho' anan men ba lepau aleng ha' la'ung Na'. 11Té' pah Abraham dawa' Sara atih uh muku dahin uh lalau urip dawa', dahin Sara pah em na awi daha' doh dih la'an. 12#1 Pet 3:6 Kesing tua nah Sara alem kenep na', ken na', “Seng nuno' tuk akui mali, avin akui uh lalau uku kui, nurei pah laké' kui uh muku lahuh?”
13Ken Tuhan men Abraham, “Na' nun Sara kesing tua dahin kuma', ‘Seng lan kah akui nei nganak lo, avin kui uh muku nunih?’ 14#Lk 1:37 Té' ket aleng em deng en Tuhan na iah? Tegu jaka' aleng uh Ek petneng atih té' duman aréh, Akui seng nei pala ika', tegu anan Sara seng hipun ji anak laké'.”
15Sara pah kamoh avin ha' takut, “Nusi' kui kesing,” ken na'. Bi ken Tuhan men iha', “Nusi', kesing kah ika' di du.”
Abraham sebayang té' Tuhan marung daléh Sodom
16Leka' nah dalo' atih tei ha' Sodom, Abraham pah tei maten dalo' lahuh. 17Kuma' nah Tuhan, “Nusi' tekep Kui em bara men Abraham té' ket aleng Ek na anih, 18avin iha' seng jadi' ji pahu aleng dekaya' dahin aleng ningan, men iha' pah lahuh lim-lim pahu té' usun tana seng ala asi. 19Akui uh mili iha', ja iha' nebara dahin petneng daha' anak-anak na' dahin pahu na', ja daha' murip teneng ngioh alan aleng Ek bara, dahin na ket aleng teneng dahin tutau, ja si' Akui pela'ung lim ket aleng uh Ek bara men iha'.”
20Men'uh anan Tuhan kuma' la'an, “Ngahum lelan daho' tuten daléh Sodom dahin Gomora, avin dekaya' lelan sala' daha'. 21Avin ha' nunan, sayu nah Akui tei ngiléh nyineng daha', ja Kui jam, kelung si' iha' lan awi dahun tuten daha' aleng nei ateng ha' Akui anih. Iha' ha' em nunan pah, ja Kui jam teneng kah lahuh.”
22Leka' nah dawa' laké' anan tei ha' daléh Sodom, bi Abraham pa'en nekring té' unan Tuhan. 23Abraham nei jeleng dahin kuma' men Tuhan, “Nuno' nan, seng Im lematei kelunan aleng teneng dahin daha' kelunan aleng sala iah? 24Nuno', awi ha' té' lima'-pulu kelunan aleng teneng té' alem daléh atih, seng Im lematei daha' iah? Nusi' Ka' ngenep masi lima'-pulu la'ung kelunan aleng teneng alem daléh atih iah? 25Meng nah Im na nunan Tuhan. Seng Im lematei kelunan aleng teneng tugung daha' kelunan aleng ji'ek, seng piah tua nah ukum té' kelunan aleng sayu dahin kelunan aleng ji'ek iah? Meng Im na nunan Tuhan. Ika' aleng petneng lim-lim ji usun tana anih, seng nusi' nah Ika' petneng na' teneng iah?”
26Tuhan pah kuma', “Iha' Akui jam lima'-pulu la'ung aleng teneng alem daléh Sodom, adang Akui seng masi lim na' atih, avin tavit daha' lima'-pulu la'ung atih aleng teneng.”
27Abraham pah nyu'ei, “Lan-lan kah Tuhan, akui ji'ek awi luhep dahin awi pup tana tua, bi makang kah akui tengaran dahin Tuhan. 28Awi ha' kurang lima' la'ung men lima'-pulu la'ung kelunan aleng teneng atih, seng im nasa' lim daléh atih avin daha' lima' la'ung aleng kurang iah?” Ken Tuhan, “Nusi' Kui nasa' daléh atih, awi ha' té' pat-pulu-lima' kelunan aleng teneng hitih.”
29Abraham pejoh dahun na' men Tuhan la'an, “Nuno' awi ha' té' pat-pulu la'ung nunan, Im nasa' iah?” Ken Tuhan pah nyu'ei, “Nusi' loh kah Akui na nun-nun, awi ha' té' daha' pat-pulu atih.”
30Ken Abraham pah, “Meng nah Tuhan hungo', tegu akui meteng ji hangun anih la'an. Nuno' awi ha' té' telo'-pulu hinan sika?” Ken Tuhan nyu'ei, “Nusi' loh kah Akui na nunan, awi ha' té' telo-pulu hinan.”
31Ken Abraham pah la'an, “Akui makang kuma' men ika' Tuhan, Nuno' awi ha' té' dua'-pulu tua kitam hinan sika'?” Ken Tuhan pah nyu'ei, “Nusi' loh kah Akui seng nasa' na' tavit daha' dua'-pulu atih.”
32Ken Abraham, “Meng nah Tuhan hungo', avin ji hangun anih tua nah teng kui la'an. Uno' awi ha' té' pulu tua sika'?”
Ken Tuhan pah nyu'ei, “Nusi' loh kah Akui nasa' na' awi ha' té' dalo' pulu la'ung aleng teneng hinan.” 33Tei nah Tuhan tegu Iha' pek'uh dahun na' men Abraham nan, Abraham pah lahuh tei uli ha' avan na' melo'.
Iliyochaguliwa sasa
ARING KELESING 18: TDK1990
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Bible in Today's Dahun Kayan Version © Bible Society of Malaysia, 1990.