LUKAS 18
18
Ivun hakim aleng em teneng dahin debalo' aleng em tei ketapah kinah na'
1 #
Rom 12:12; Kol 4:2; 1 Tes 5:17 Iha' na ji ivun men daha' atih, ja daha' tekep sebayang pa'en dahin em tei ketapah kinah daha'. 2Ken Na', “Alem ji daléh té' ji hakim aleng em takut té' Allah dahin em hituk té' kelunan. 3Alem daléh atih pah lahuh té' ji debalo' aleng tutek lelan tei pala iha', kuma', ‘Im petneng nah kawa' laké' aleng heléh dahik.’ 4Kuri-kuri dara laké' hakim atih em mun, bi ken na' alem kenep na', ‘Lan pah akui em takut té' Allah, dahin em hituk té' kelunan, 5#Lk 11:7-8 bi avin debalo' anih pela'ei akui, bei nah akui em petneng dawa', bahi iha' pehungo' akui alem iha' tutek nei.’ ” 6Ken Tuhan, “Kelenghi nah dahun laké' hakim aleng em teneng atih. 7Nusi' kah Allah seng petneng kelunan aleng uh Na' mili aleng ngetalau Iha' pah dau pah malem, Iha' pah aru kenep dahin daha'? 8Akui kuma' men ikam, dahin salet na' Iha' seng petneng marung daha' atih. Bi nuno' tegu Anak-kelunan nei ateng, seng pesuk Ha' kinah té' usun tana anih lo'?”
Ivun kelunan Farisi dahin kelunan aleng mepeng sukei
9Lun kuma' nah Iha' dahin ivun anih men kuri-kuri la'ung aleng nginah barik daha' teneng, dahin muau lim daha' aleng ha' béh, 10Té' dua' kelunan tei alem Uma Allah ngenep sebayang, ji la'ung kelunan Farisi dahin ji la'ung kelunan aleng mepeng sukei. 11#Yes 58:2-3; Lk 16:15 Nekring nah kelunan Farisi atih, sebayang men batung na' dep, nunih nah dahun na', ‘U Allah, akui bara sayu kenep Dahim, avin nusi' nah Akui awi kelunan ha' béh, iha' tih kelunan aleng pusing kelunan, dahin kelunan aleng em tutau, dahin kelunan aleng nuyang, dahin awi kelunan aleng mepeng sukei anih pah. 12#Mat 23:23 Akui pelien dua' hangun ji hang migu, dahin lim-lim ket aleng kelak akui ma'uk ji alem ha'ut-ha'ut pulu,’ ken na'. 13#NDI 51:1 Bi kelunan aleng mepeng sukei atih nekring su-su, neng'o ha' langit pah iha' em kaséh, bi iha' nebup usuk na' tua dahin kuma', ‘U Allah, masi nah akui ji'ek, kelunan aleng sala,’ ken na'. 14#Yehez 21:26; Mat 23:12; Lk 14:11 Lan Akui kuma' men ikam, kelunan anih uli ha' uma na' teneng ha' men'uh kelunan ji atih dih. Avin ha'ut la'ung aleng meju batung na' dep, iha' nah aleng seng en daha' na liva, dahin hi-hi aleng ngeliva kenep na' iha' aleng seng en daha' ju.”
Tuhan Yesus masi daha' nyam
Mat 19:13-15; Mk 10:13-16
15 #
Mat 18:3
Daha' pah geri daha' nyam aleng da'uk pala Yesus ja Iha' gem daha', bi tegu dalo' anak sekulah Na' nyineng marung tuk atih, pelalau dalo' mano' daha' atih. 16Bi Yesus muvui daha' nei pala Iha', dahin kuma', “Bei nah daha' nyam nei ha' Akui, meng ma'eng daha', avin keligem Allah uh té' men kelunan aleng awi jam tuk daha' anih. 17Dahuk lan men kelo', hi-hi aleng em ala keligem Allah awi jam tuk ji nyam aleng da'uk, nusi' peletu iha' tei halem na'.”
Marung tuk ji pengulu' aleng kaya'
Mat 19:16-30; Mk 10:17-31
18Té' nah ji pengulu' aleng meteng Yesus, ken na', “U Guru aleng sayu, nun aleng seng ek na ja akui hipun urip aleng pa'en?” 19Ken Yesus men iha', “Avin nun kah ika' kuma' Akui sayu? Ji la'ung pah em té' aleng sayu bi ji tua, Iha' tih Allah. 20#Us 20:12-16; Kel d M 5:16-20 Adang ika' jam tebara atih, Meng im nuyang, Meng im lematei kelunan, Meng im nakau, Meng im teksi' pamoh, Ju nah tamam dahin hinam,” 21Bi ken na', “Akui hu'uh ngioh lim na' anih men tegu akui da'uk.” 22#Mat 6:20 Tegu Yesus kelenghi dahun na' nutih, ken Na' men iha', “Ji tua la'an aleng ngavam em nuno' teneng. Im belé' nah nun-nun ket aleng té' té' ika', dahin ma'uk men kelunan aleng humé', ika' pah seng hipun daven aleng ha' Surga, pelalau nei nah ngioh Akui.” 23Bi tegu iha' kelenghi daho' nunan, pelalau bahat lelan nah kenep na', avin iha' kelalau kaya'. 24Tegu Yesus jam iha' bahat kenep Iha' kuma', “Mahen lelan nah kelunan aleng kaya' tei halem keligem Surga. 25Kelalau melei ji hulung unta tei men alem luvang luh men'uh kelunan kaya' tei halem keligem Allah.” 26Kelunan aleng kelenghi atih pah kuma', “Awi ha' nutih, hi kah aleng deng ala urip sika?” 27Bi ken Na', “Ket aleng em deng kenan kelunan, nusi' ha' em deng kenan Allah.”
28Ken Petrus, “Nyineng nah, kalo' anih hu'uh melek ketanun alo' dahin ngioh Ika'.” 29Bi ken Na' men dalo', “Dahuk lan men kelo', hi-hi aleng uh melek awi uma na', awi hawan na', awi harin na' kah, awi hinan na' dahin taman na' kah, awi anak na' kah avin keligem Allah, 30daha' anan seng ala kahum uli na' alem urip anih, dahin alem urip aleng baya daha' ala urip aleng pa'en.”
Ketlo' hangun Tuhan Yesus bara marung katé' Na'
Mat 20:17-19; Mk 10:32-34
31 #
Lk 9:22-44
En Na' geri nah dalo' pulu-dua' atih dahin kuma' men dalo', “Telo' anih tei nah anih ha' Yerusalem. Lim-lim nun-nun aleng hu'uh kalung kenan daha' nabi marung Anak-kelunan seng nei la'ung. 32Avin Iha' seng en daha' uk men daha' aleng alem adet ha' béh, Iha' pah seng en daha' nuten dahin peha'éh, dahin en kelunan lemura. 33Daha' seng jeliket Iha', dahin lematei Iha', bi té' dau aleng ketlo' Iha' seng nei peju murip la'an.” 34Bi lim dalo', piah tua dalo' em ateng té' alem dahun Na' atih, bi sihuk nah lim na' té' dalo', nusi' nah dalo' jam marung tuk daho' aleng en Na' bara atih.
Iha' petagéh ji kelunan buta' jeleng daléh Yerikho
Mat 20:29-34; Mk 10:46-52
35Alem Iha' jeleng ateng daléh Yerikho, té' nah ji la'ung kelunan buta' aleng melo' té' béh alan aleng melo' akei tua. 36Tegu iha' kelenghi dahun kelunan kahum lalau tinan iha' ha' meteng, “Ket nuno' anih du?” 37En daha' bara nah men iha', “Yesus kelunan Nazaret aleng lalau tinih anih.” 38Lun medéng nah iha', ken na', “U Yesus anak Daud, masi nah akui.” 39Kelunan aleng panau una' atih pah mano' iha', nyihu iha' tepaka', bi sa'-sa' na' ihet dahun na', “U anak Daud, masi nah akui.” 40Lun ngeta' nah Yesus dahin nyihu daha' geri iha' pala Iha'. Tegu iha' uh nei jeleng, pelalau Yesus meteng iha', 41“Nun kah aleng kenep ka' Ek na men ika'?” Iha' pah kuma', “U Tuhan, Im masi nah akui ja akui deng nyineng la'an.” 42Ken Yesus men iha', “Hirik nah matam. Kinah ka' hu'uh petagéh ika'.” 43Men tegu atih nyebaneng nah matan na', pelalau iha' ngioh Iha', dahin meju aran Allah. Lim daha' pah mahek Allah tegu daha' nyineng hadui anan.
Iliyochaguliwa sasa
LUKAS 18: TDK1990
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Bible in Today's Dahun Kayan Version © Bible Society of Malaysia, 1990.