LUKAS 22
22
Hadui ji'ek Yudas
Mat 26:1-5,14-16; Mk 14:1-2; 10:11; Yoh 11:45-53
1Dau aya' daha' Kuman Luti Aleng Em Té' Tavah, aleng aran na' Paskah, hu'uh jeleng. 2#Lk 20:19 Daha' imam aya' dahin daha' aleng puboh surat Tuhan ilau alan nuno' tuk daha' deng lematei Yesus, avin daha' takut té' daha' kahum atih.
3 #
Mat 26:14-16; Mk 14:10-11 #Yoh 13:2,27 Pelalau Setan pah tei halem Yudas, aleng aran na' Iskariot, aleng pelebau ujap daha' anak sekulah atih. 4Tei nah iha' tengaran dahin daha' imam aya' dahin kepala' seladu ja pepteng nuno' tuk iha' ma'uk Iha' men daha' atih. 5Melu nah kenep daha' atih, dahin na jaji seng ma'uk ligit men iha'. 6Yudas pah piah kenep dahin ilau jaka' aleng sayu ngavan na' nebau ma'uk Yesus men daha' atih, tegu daha' kahum em té' jeleng.
Marung tuk Paskah dahin pahlung malem
Mat 26:17-25; Mk 14:12-21; Yoh 13:21-30
7 #
Us 12:18-20
Ateng nah dau aya' luti aleng em té' tavah atih, dau aleng ngavan Paskah#22:7 Paskah Anih nah jaka' daha' na dau aya' ha'ut duman, ngavan daha' hituk Tuhan Allah geri daha' musang men daléh Mesir, ngavan daha' uh jadi dipen. Nyineng Usang 12:1-13, 29,40,41; Kel d Musa 16:1-8; Mat 26:2, 17-19; 1 Kor 5:7. atih adang seng en tevek. 8Pelalau Yesus nyihu Petrus dawa' Yohanes, ken Na', “Tei nah kua' nemei pahlung Paskah men telo', ja telo' kuman.” 9Ken dawa' atih men Iha', “Hino' kah kenep Ka' kawa' petmei pahlung atih?” 10Ken Na' men dawa', “Alem kua' uh tei alem daléh, seng té' ji laké' pesuk dahin kua' aleng nyi'un tajau penu ata'. Ngioh nah iha' tei alem uma ngavan na' tei, 11pelalau kuma' nah men laké' aya' uma atih, ‘Guru nyihu meteng ika', nunih dahun Na', Hino' kah amin Ngavak pahlung Paskah dahin dalo' anak sekulah Kui?’ 12Iha' pah seng nujo' men kua' ji amin aleng hujung aleng dekaya' aleng té' uvung na'. Tinan nah kua' petmei.” 13#Lk 19:32 Pelalau tei nah dawa' atih, dahin pesuk lan kah dawa' piah awi aleng uh en Yesus bara men dawa' atih, en dawa' petmei nah pahlung Paskah atih.
Pahlung dahin Tuhan
Mat 26:26-30; Mk 14:22-26; 1 Kor 11:23-25
14Tegu jaka' kuman, melo' nah Yesus dahin lim dalo' sihu Na' atih dahin Na'. 15Pelalau Iha' kuma' men dalo', “Akui hu'uh kelalau kaséh kuman pahlung Paskah anih dahin kelo' em payan Kui jam katé', 16#Lk 13:29 avin Akui kuma' men kelo', nusi' Kui kuman na' la'an ateng ha' uh la'ung alem keligem Allah.”
17En Na' ala nah tebuk, tegu Iha' uh bara sayu kenep, iha' Ha' kuma', “Ala nah anih, petulan nah té' hang kelo', 18avin Akui kuma' men kelo', nusi' nah Akui du'i ata' bua agun la'an ateng keligem Allah uh la'ung.” 19#HST 27:35; 1 Kor 11:23-25 En Na' ala pah luti, tegu Iha' uh bara sayu kenep en Na' mi'ang-mi'ang nah dahin ma'uk na' men dalo' atih, ken Na', “Anih nah batung Kui aleng Ek uk avin kelo', nunih nah kelo' na jadi' ji ngavan kelo' hituk té' Akui.” 20#Us 24:8; Yer 31:31-34; Zak 9:11 Nunan pah lahuh tebuk du'i atih, hu'uh dalo' kuman, Iha' kuma', “Tebuk du'i anih, té' nah jaji maring alem daha Kui aleng muak avin kelo'.
21 #
NDI 41:10; Yoh 13:21-22 “Bi nyineng nah, usu kelunan aleng nebau Akui té' peji Dahik té' mija' anih. 22Avin Anak-kelunan adang tei ngioh awi ket aleng hu'uh en Allah petneng marung Iha', bi asi-asi nah kelunan aleng nebau Iha' atih.” 23Pepteng nah dalo' atih pedeng dalo', hi kah men hang dalo' aleng seng na hadui aleng nunan.
Anak sekulah Na' pepteng marung hi kah aleng seng dekaya'
Mat 20:25-27; Mk 10:42-44; Lk 9:46
24Nei nah ji sekdep kenep té' hang dalo' atih marung hi kah men hang dalo' atih seng dekaya'. 25#Mat 20:25-27; 23:11; Mk 9:35; 10:42-44 Ken Yesus men dalo' atih, “Laja'-laja' daha' aleng alem ha'ut bengsa' bau kah daha' hujung daha', dahin daha' aleng nebara daha' atih en daha' kuma' masi kelunan. 26Bi kelo' anih, nusi' kelo' nunan, bi iha' aleng dekaya' té' hang kelo', sayu iha' awi jam tuk iha' aleng da'uk, dahin iha' aleng geri kelo' awi jam tuk iha' aleng pejei. 27#Yoh 13:4-14 Avin hi kah aleng dekaya', kelunan aleng melo' kuman ia, kelunan aleng mejei iah? Nusi' ha' kelunan aleng melo' kuman iah? Bi Akui anih té' té' hang kelo' awi jam tuk kelunan aleng mejei.
28“Kelo' anih aleng pa'en té' Dahik alem lim pesek aleng nei té' Akui. 29#Lk 12:32 Akui petneng men kelo' ji keligem, awi jam tuk Tamak uh petneng men Akui, 30#Mat 19:28 ja kelo' peji kuman du'i té' mija' Kui té' alem keligem Kui, kelo' pah seng melo' té' ujung ladung aren petneng daha' pulu-dua' pahu bengsa' Israel.
Marung tuk Petrus pamoh
Mat 26:31-35; Mk 14:27-31; Yoh 13:36-38
31 #
Am 9:9; 2 Kor 2:11 “U Simon, Simon, nyineng nah, Setan kelalau akei kelo', ngenep ngilik kelo' awi jam tuk bahah, 32#NDI 51:13; Yoh 17:11,15,20 bi Akui hu'uh sebayang men ika', ja meng kinah ka' tei kahem. Ika', tegu ika' uh pekuli la'an, sayu im petageng dalo' harim.” 33Ken na' men Iha', “U Tuhan, uh sedia' lan nah akui tei alem jin dahin matei tugung Dahim lahuh.” 34Bi ken Yesus, “Akui kuma' men ika' Petrus, malem anih na'a, em payan hiap ngeturut, uh nah ika' pamoh telo' hangun ika' kuma' ika' em jam Akui.”
35 #
Mat 9:9-10; Mk 6:8-9; Lk 9:3; 10:4 Lun ken Na' men dalo', “Tegu Akui nyihu kelo' tei dahin em geri sut ligit pah dahin ngavan nguyo', dahin kudek anit, té' kah kelo' humé' té' ket nun-nun iah? Ken dalo' nyu'ei, “Nusi' té' nun-nun humé'.” 36Ken Na' men dalo', “Bi kerei inih, hi aleng hipun sut ligit dahin bayut sayu nah iha' geri na', dahin hi aleng em té' malat, sayu nah iha' mebet basung na' dahin melé' malat. 37#Yes 53:12; Lk 22:52 Avin Akui kuma' men kelo', ket anih aleng uh kalung, adang ha' nei la'ung halem Kui, iha' tih, ‘Iha' en itung kelunan aleng ji'ek tua,’ avin ket aleng uh kalung marung Akui té' kah la'ung na'. 38Ken dalo', “Tuhan nyineng, té' dua' malat.” Ken Na' men dalo', “Deng nah anan.”
Tuhan Yesus alem lida Getsemani
Mat 26:36-46; Mk 14:32-42
39 #
Lk 21:37; Yoh 18:1 Musang nah Iha' pelalau tei ha' ngalang Zaitun, awi alei Na' pa'en, dalo' anak sekulah Na' pah tugung Iha'. 40Tegu Iha' ateng ha' ngavan atih, pelalau ken Na' men dalo' atih, “Sebayang nah ja kelo' em ga' pesek.” 41Lun mukéh nah Iha' men dalo', tei su awi su daha' nyeparik bato', pelalau nyepukun dahin sebayang, 42#Mat 6:10 ken Na', “U Amei, iha' kenep Ka', Im ukéh nah tebuk anih men Akui, bi alem atih pah meng ngioh kenep Kui, bi sayu ngioh kenep Ka' tua.”
43 #
1 Laj 19:5; Yoh 12:29 Tula nah té' Iha' ji meliket men Surga aleng petu'a Iha'. 44Katé' lelan nah Iha', Iha' pah tangen lelan sebayang, umah Na' pah awi daha tua legak té' tana.
45Tegu Iha' peju men sebayang Na', pelalau Iha' tei ha' dalo' anak sekulah Na', nei ineng dalo', beka' dalo' tebei tudu avin bahat kenep dalo'. 46Ken Na' men dalo', “Na' nun kelo' tudu nan? Ma'un nah kelo' keta', sebayang nah, ja kelo' em ga' pesek.”
Yudas nebau Tuhan Yesus
Mat 26:47-56; Mk 14:43-50; Yoh 18:3-11
47Alem Iha' kuma' nutih, pelalau nei nah daha' kahum, dahin kelunan aleng aran na' Yudas atih, iha' tih ji men hang dalo' anak sekulah Na' aleng pulu-dua' atih, aleng geri daha' kahum atih. Tei nah iha' jeleng Yesus, seng marek Iha', 48bi ken Yesus men iha', “Yudas, marek tua ka' nebau Anak-kelunan iah?” ken Na'.
49Tegu dalo' atih aleng teliling Yesus jam ket aleng seng jadi', ken dalo', “U Tuhan, en alo' miteng daha' iah?” 50Ji la'ung men hang dalo' miteng panyin imam aya', dahin mebet iling bah ta'o na'. 51Ken Yesus, “Deng nah anih.” Pelalau Iha' gem iling na', petagéh iha'.
52 #
Lk 22:37
Ken Yesus men daha' imam aya' dahin daha' pengulu' Uma Allah dahin daha' aleng dekaya', aleng nei ala Iha', “Awi ngenep ala kelunan aleng nakau tua kelo' nei hinih iah, geri malat dahin tukun lahuh? 53#Lk 21:37; Yoh 7:30; 8:20; Kol 1:13 Alem Kui té' dahin kam ha'ut dau alem Uma Allah, nusi' nah ikam meju usu kam ngenep mapuh Akui, bi anih nah jaka' kam, dahin jaka' tingan lidem.”
Tuhan Yesus ha' unan Kayafas.
Petrus pamoh
Mat 26:57-58,69-75; Mk 14:53-54,66-72; Yoh 18:12-18,25-27
54En daha' apuh nah Yesus, pelalau tei geri Iha' ha' uma imam aya'. Bi Petrus ngioh men su. 55Tegu daha' uh pengu apui té' latan, dahin pepeng melo', pelalau Petrus pah melo' dahin daha'. 56Té' nah ji nyemdoh jam iha' melo' té' béh alah apui, pelalau iha' nutok nyineng iha', ken na', “‘Laké' anih lahuh, kelunan dahin Yesus di.” 57Pelalau nah iha' pamoh iha', “U anak, nusi' kui jam kelunan anan,” ken na'. 58Nusi' nuno' dara men'uh anan dih, nei pah ji kelunan la'an nyineng iha', pelalau kuma' men iha', “Ika' pah lahuh ji kelunan men hang dalo' atih dih.” Bi ken petrus, “U arin, nusi' ha' akui.” 59Kio'-kio' ji jam dara na', ji kelunan ha' béh pah kuma' dahin lelan na', ken na', “Lan kelunan anih pah té' dahin Na' lahuh di, avin iha' pah kelunan Galilea.” 60Bi ken Petrus, “Arin, nusi' té' akui jam ket aleng kurim anan.” Alem iha' duan loh, pelalau ngeturut nah hiap. 61#Lk 22:34 Pelalau ngelisah nah Tuhan nyili Petrus. Pelalau hituk nah Petrus té' dahun Tuhan aleng uh kuma' men iha', “Em payan hiap ngeturut malem anih na'a, telo' hangun ika' uh pamoh Akui.” 62Musang nah Petrus dahin nangih dahin ji'ek lelan kenep na'.
Daha' nuten Tuhan Yesus dahin nukun Iha'
Mat 26:67-68; Mk 14:65
63Daha' aleng mapuh Yesus atih nuten-nuten Iha' dahin nukun Iha'. 64Daha' ngelibung neng Yesus, dahin meteng Iha', ken daha', “Bara nah, hi si' aleng meté' Ika' anan?” 65Kahum pah daho' aleng ha' béh la'an en daha' na peji'ek Iha'.
Yesus ha' unan daha' kemiti
Mat 26:59-66; Mk 14:55-64; Yoh 18:19-24
66Aring dau malah, lun pepeng nah lim kelunan aya' daha' Yahudi, iha' tih daha' imam aya' dahin daha' aleng puboh surat Tuhan, pelalau daha' geri Iha' ha' unan daha' kemiti, ken daha', 67#Yoh 3:12; 8:45; 10:24 “Awi Ika' Kristus lan, bara nah men kamé'.” Bi ken Yesus men daha' atih, “Awi Akui bara men ikam, nusi' loh kan ikam nginah; 68awi Akui meteng ikam pah, nusi' pah ikam nyu'ei. 69#NDI 110:1; Dan 7:13 Bi men kerei inih Anak-kelunan seng melo' pedah ta'o Allah aleng ningan.” 70Ken daha' lim, “Awi ha' nutih, Ika' anih nah Anak Allah iah?” Ken Na' men daha' atih, “Akui nah Anak Allah, awi kurin kam di.” 71Ken daha' atih, “Na' nun itam ilau teksi' men itam la'an? Avin batung tam anih hu'uh kelenghi daho' aleng men ba Na'.”
Iliyochaguliwa sasa
LUKAS 22: TDK1990
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Bible in Today's Dahun Kayan Version © Bible Society of Malaysia, 1990.