متّای انجیل 1
1
عیسی مسیح شجره‌نؤمه
1عیسی مسیح شجره‌نؤمه،
داوود ریکه، ابراهیم ریکه:
2ابراهیم، اسحاق پِئر بو،
اسحاق، یعقوب پئر بو
و یعقوب، یهودا و اونه برارونِ پئر بو.
3یهودا، فِرِص و زِراح پئر بو و اوشونِ مَئر ایسم تامار بو.
فرِص، حِصرون پئر و حِصرون، رام پئر بو،
4رام، عَمّیناداب پئر،
عَمّیناداب، نَحشونِ پئر و
نَحشون، سَلمونِ پئر بو.
5سَلمون، بوعَزِ پئر بو. بوعَز مَئر ایسم، راحاب بو،
و بوعَز، عوبیدِ پئر بو و عوبیدِ مَئر ایسم، روت بو،
عوبید، یَسا پئر بو.
6و یَسا، داوود پادشاه پئر بو،
داوود، سلیمانِ پئر بو، سلیمانِ مئر، پیشتر اوریا زناک بو.
7سلیمان، رِحُبعامِ پئر، و
رِحُبعام، اَبیّا پئر،
و اَبیّا، آسا پئر بو.
8آسا، یَهوشافاط پئر،
یَهوشافاط، یورام پئر،
و یورام، عُزّیا پئر بو.
9عُزّیا، یوتام پئر،
یوتام، آحاز پئر،
و آحاز، حِزِقیا پئر بو.
10حِزِقیا، مَنَسی پئر،
مَنَسی، آمون پئر،
و آمون، یوشیا پئر بو.
11یوشیا، یِکُنیا و اونه برارون پئر
که ایی زمون میئن یهودیِ أن، بابِل سو تبعید بوبوئن.
12بعدِ یهودی أنِ تبعید بابِل سو:
یِکُنیا، شِئَلْتیئیلِ پئر و شِئَلْتیئیل، زروبابِل پئر بو.
13زروبابِل، اَبیهود پئر،
اَبیهود، اِلیاقْیم پئر،
و اِلیاقْیم، عازورِ پئر بو.
14عازور، صادوقِ پئر،
صادوق، اَخیمِ پئر،
و اَخیم، اِلیودِ پئر بو.
15اِلیود، اِلعازارِ پئر،
اِلعازار، مَتّانِ پئر،
و مَتّان، یعقوبِ پئر بو.
16یعقوب، یوسفِ پئر، و یوسف، مریم مرد بو،
که عیسی نامدار به مسیح مریمَ جی بزاسّه بوبؤ.
17پس تموم نسلؤن، ابراهیمَ جی تا داوود، سرجمع چهارده نسل و داوودَ جی تا زمؤنِ یهودی أنِ تبعید بابِل سو چهارده نسل، و تبعید زمؤنای تا مسیح، چهارده نسل بُوئن.
عیسی مسیح بدنیا اَمئن
18عیسی مسیح بدنیا اَمَئن ایطوری بوبؤ: وختیکه مریم، عیسی مئر، یوسف نامزد بو، پیشتر از اونکه همدیگرِ برسَن، معلوم بوبُو که مریم روحالقدسَ جی شوکومدار ایسّه. 19اورا جی که اونه مرداک یوسف، یکته صالح مرداک بو و نخواس که مریم سر، ایسم بدنؤمی بنای، بخواسّه که خلوتی اوناجی سیوا ببی. 20امّا وختی یوسف ایی فکرونِ میئن دبو، یدفاری خداوندِ یکته فرشته، اونه خوء نما بوبؤ و بوته: «ای یوسف، داوود ریکه، تی زنِ گیتنَ جی مریم، واهیمه ندار، چون اوچیزی که اونه شوکمِ مِیئن هنّه، روحالقدسَ جی ایسّه. 21مریم یکته ریکه زَئنه که، تو اونه ایسم عیسی نِئنی. چونکه او خو قوم اوشونِ گوناهؤنَ جی نجات دِئنه.» 22ایشون همه اتفاق دکته تا اوچیزیکه خداوند، اِشعیای پیغمبر زُبؤن أمره بوته بو، حقیقت پیدا کونی که:
23« باکره شُوکُم دارَ بُو، یکته ریکای زَئنه
و اونه ایسم عِمانوئیل نِئنه»
که یعنی، خدا امه اَمره ایسّه. 24هیطوکه یوسف خوؤ آی ویریسا، اوچیزی که خداوند فرشته اونه دستور بَدأبو، انجؤم بده و خو زن مریم بیته. 25امّا مریم أمره نخوته تا او خو ریکه بزاسّه و یوسف اونه ایسمِ عیسی بنه.
Iliyochaguliwa sasa
متّای انجیل 1: EGB
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
@ 2024 Korpu Company