Rut 1
1
Elimeleke roo muda pio aldeia Belem rae Israel la le rae iso gala Moab
1-2Pes muno te dia liurai le rae Israel, mekei naan noor ta ukun atu Israel.
Pes tempu uu, dia atu iso gala Elimeleke. U atu Efrata, pio aldeia Belem vere distritu Juda. Ni vee gala Noemi.#1:1-2 Dia dale u'u Ebreu, gala Elimeleke nii signifika “Nai ta Liurai”, i gala Noemi nii signifika “lara mau”. Loru dia ana mane ru, iso gala Malon iso gala Kilon.
Pes tempu uu, rae slae hae vere distritu Juda. Iso uu bat kee Elimeleke roo posi bali si aldeia, odi la peni udi le rae Moab, le lua Jordaun vere parte lel sae. 3Mas le rae uu Elimeleke mate, posi bali nii vee o nii ana noor mesa. 4Te agi ana noor ala vine atu pio rae Moab. Malon ala vine iso gala Rut. I Kilon ala vine iso gala Orpa. Mas roo peni lee rae Moab rata too sagulu. 5Noemi nii ana mane ruu mos mate. Roo mate posi bali sii ina mesa: te dia mane iso, te dia ana iso, i te dia ubu ana iso.
Noemi o Rut g'lelu la vali rae Belem
6Mas aipil iso Noemi veki peni le rae Moab, u plii dale, "NAI Maromak nurat Nii atu vere distritu Juda, vere uu dia vali lapar haa se." Ple'u bat kee Noemi o nii vine veu ruu mokoi sii lapar posi bali rae Moab odi g'lelu vali la Noemi nii umo vere nii rae riko. 7I Noemi o nii vine veu ruu la posi bali Noemi nii umo vere rae Moab, dara daa iso ke g'lelu la distritu Juda.
8Mas aipil iso Noemi o nii vine veu ruu sole tili, Noemi dale lee ni vine veu ruu dale, Pleu see! Bloi desi kimi ruu g'lelu vali la kimi ina noor. Pita kimi matani kimi lara bloi lee kau ana ruu ke mate bali see, o mos mai a. Ple'u bat kee a negii la NAI Maromak odi matani Nii lara bloi lee kimi ruu. 9Kee NAI Maromak nee lee kimi ruu mane selo ke lara bloi, ple'u kee kimi lebo mori tenega. I Noemi kopa i meku loruu, i roo mos sio uru.
10Mas loruu matar, "Tai, ama! Kami manara dara taa ama, odi la mori putu o ama nii atu noor.
11Mas Noemi matar, "Kau ana doben roo! Kimi na g'lelu la pee! Te dia tanugu iso, se kimi dara a. A makei see, a tee eto pita ana mane odi aer-airuu ala vali kimi. 12Maske kimi ruu mgees kau ana riko, mas bloi desi kimi ruu g'lelu vali laa. Pita a makei see, ple'u kimi tee lebo nurat tok de a veki ala mane vali. A riko tee nurat iso uu see. See ple'u buta kde'e, a ala mane i eto ana mane, kimi nurat ple mane? 13Kimi nurat kimi let peni rata ana noor ha'e i kimi ala roo, ka? Loba ka tai! Be punu kimi tee peni pita, ma'o kimi ala muno vali mane selo. Iso uu susar, loba ka tai? Mas kau lara susar pelu desi kimi noo. Pita a sinti NAI Maromak riko taa kastigu a. Ple'u bloi desi kimi te lebo dara pita a."
14Mao roo telu sio uru vali pita. I Orpa meku Noemi i bati loor odi g'lelu. Mas Rut kopa d'nia Noemi.
15Noemi dale lee Rut, "Lise laa! Orpa glelu laa nii povo i glelu laa nii luli noor. Kiti mos g'lelu putu o Orpa?
16Mas Rut matar,
Tee lebo ksiit, mas amaa te lebo ksu a glelu.
I amaa te lebo obriga a laa posi bali amaa mesa.
Pita a manara mori dara navati o amaa.
Amaa la vere mane, a mos la vere u'u.
Amaa peni vere mane, a mos peni vere u'u.
Amaa nii atu veki sai mos kau atu.
I amaa nii Nai Maromak veki sai mos kau Nai Maromak
17Aer-airu amaa mate vere mane, a mos mate vere u'u.
Atu tana amaa vere mane, atu mos tana a vere u'u.
See a poi pio amaa,
NAI vek kastigu a,
Be tok de mate bat-bati kiti ruu.
18Aipil Noemi lise Rut manara loba dara u, Noemi tee soru pita.
19I loru sole navati, rata lee aldeia Belem.
Aipil Noemi o Rut rata laa Belem, atu ma'o mege kakora loru. Vine noor vere ke aldeia u'u tugu la loor dale, "Iso u'u tia Noemi, ka?"
20Mas Noemi matar laa roo dale,
Kimi te lebo via pita a 'Noemi',
Pita gala'u nii signifika dale, 'lara mau'.
Bloi desi kimi via a 'Mara',
pita gala'u nii signifika dale, 'lara pelu'.
Pita NAI Maromak iso ke Forsa Teba'a punu akau mori sai pelu teba'a.
21Pes muno a sai pio kde'e,
a o limu benu, pita a dia laki o ana ruu.
Mas agora NAI Maromak odi a g'lelu,
o limu ma'o moe.
Pita seta batu kimi via a 'Noemi',
kee NAI kastigu a?
Pita NAI taa forsa teba'a.
I NAI ta ksu susar mai a."
22Iso u'u ta istoria aipil iso Noemi g'lelu pio rae Moab o nii vine veu Rut, atu Moab. Loru rata lee Belem, vere tempu klobu trigu kai.
Iliyochaguliwa sasa
Rut 1: BTKD
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Wycliffe Timor-Leste © 2025 Wycliffe Bible Translators Inc