Lukka 1
1
Njiri jee jaa katif nee Lukka
1Ajol ab tee hishima bumarra Tefero, annas milaan katif nee itaa kalama ab ggi amsuku mee kalagu tee Yesu abkan fih fugina jee nammna abkan Rabbana jaa ahad. 2Ummon katif falaata killa sokol jee annas ab ayinu mee enna tomon min fih awlan tee killa sokol ab kaan fih jaa kelem nee inna dukur fih misho ummon ab ayinu meena tomon kun labbi tee alim sokol ab ummon ayinu. 3Mee anaa kaman, soh gussu ab tee agil tee agara tee killa sokol ab ggi amsuku fih Yesu min fih awlan, wu anaa kaman feker gali kaan faa kede kun seme anaa kede katif nee itaa Tefero sunu yaa kaan jaa fih faatiya badum. 4Kalam kede itaa faham fih hakki gali kalama dolde kuul ab jaa fih alim itaa moo ligo yaa addil.
Naaba weledu tee Yokana albatiza
5Fih waakati ab Kerode ligo kaan yaa Sultan tee Bele tee Yudaaya, kaan fih kahin tee Yudaaya asmma too Zakariya, uwo gihso kidima tee kahin min kom tee nas kahin ab naadi badda Abiya. Mee mariya too Elizabethi kaan fih-fih beyy tee Aron yaa kaan kahin tee awlan min Israel. 6Zakariya mee mariya too Elizabethi ummon tinen kaan annas abnedif gidaam Rabbana, dukur ummon leyin nee killa sokol ab Rabbana kelem noomon fih sharia toumon min ummon kaan endis makosa maa. 7Lakin ummon tinen kaan ajussi zaidi min ligo ummon maa endis nyereku, kalam Elizabethi kaan ggi weledu maa.
8Yom wayyi, Zakariya ligo fih-fih kidima too tee kahin gidaam Rabbana, kalam yaa kaan waakati tee kom too kede soh nee Rabbana fih Yeekalu. 9Kubarina tee diin kaan ggi faatiya nammna tee nigitu ligo ummon ggi nigitu ab ruwa soh fih Yeekalu tee Siddi. Fih waakati ab naadi fogo nigitu, lakin nigitu dee wagga fih Zakariya nigitu uwo fih kutu libban fih Yeekalu tee Siddi. 10Fih saa ligo Zakariya ggi kutu libban, kom tee annas milaan lim baara fih midani tee Yeekalu ligo ummon ggi womba nee Rabbana.
11Ligo Zakariya kaan fih minjuwa tee Yeekalu, Malaika tee Rabbana beenu nee uwo yegif fih safa taa yomin tee ludaaya tee kutu fogo libban. 12Ini yaa Zakariya ayinu Malaika, dukur uwo kaffu zaidi. 13Lakin Malaika kelem noowo, “matta kaffu Zakariya, kalam Rabbana asmma womba takki tee nyereku. Mariya takki, Elizabethi, bijja weledu neetaa nyereku ab yowele, itaa endis tee naadi uwo asmma Yokana. 14Nyereku yowele takki dee bijja jibu nee itaa furaayi milaan zaidi mee annas taanin milaan bijja furaayi weledu too dee. 15Kalam obijja kun kebir gidaam Rabbana. Oma bijja asurub merisa sala sokol ata wayyi al bijja sakaran uwo, mee Roho abnedif bijja faatiya uwo kabbla weledu too. 16Obijja aarja annas milaan min annas tee Israel nee Siddu tomon Rabbana. 17Obijja ruwa gidaam Siddu min roho mee guddrra tee Nebbi Eliya, obijja adul annas fijaa tee Siddi. Obijja aarja gelbba tee nas Babba nee yaala tomon, mee geru gelbba tee annas ab ggi amin fih rudu agil tee annas ab addil.”
18Ligo Zakariya jaa asaadu nee Malaika, “anaa bijja faham keefin gali fih hakki weede bi kun fih? Kalam anaa kalas ajussi mee mariya tayi kaman ajussi fih weledu yaala.”
19Malaika kelem noowo gali, “anaa yaa Jibreal anaa ggi yegif geeri gidaam Rabbana ab yaa rasul anaa kede jibu neetaa kabar weede ab seme. 20Ayinu, kalam itaa aba amin mee kabar ab anaa ggi kelem neetaa, itaa maggi ruwa wonus ladi nyereku too ab yowele dee weleduwo, lakin kalama tayi kuul bijja rasul fih waakati tee Rabbana ab addil.”
21Zakariya ligo kaan ggi wonus mee Malaika minjuwa tee Yeekalu, annas ab kaan ggi siteni Zakariya fih midani tee Yeekalu, ummon shannga ley uwo sulu mudda towwhil jeedde fih taala baara. 22Bakaan Zakariya taala min Yeekalu, uwo kaan maa agddear wonus mee annas. Lakin uwo fanisha alama noomon dukur ummon faham gali uwo ayinu wahyu taala nee Rabbana ligo kaan uwo fih minjuwa tee Yeekalu lakin uwo faddul ligo uwo maa ggi wonus maa annas.
23Fih waakati ligo uwo fih-fih kidima too tee soh fih Yeekalu, uwo aarja fih beyy too fih Bele tee Yudaaya. 24Bakaan waakati futu siya, mariya too Elizabethi ligo batnna. Dukur uwo geni fih beyy too ligo uwo maa ggi ruwa fih annas kalas mudda tee shahari kamsaa. 25Uwo wonus gali, “ayinu, Siddi soh naana huruma, uwo wedi naana nyereku. Uwo asmma naana huruma saade ligo uwo amrugu min anaa haaya tee weledu maa nyereku min annas tayi.”
Naaba weledu tee Yesu Kristo
26Fih shahari tee sita fih aamili tee Elizabethi, Rabbana rasul Malaika Jibreal fih meddina Nazaresi ab tee Bele tee Galilaya, 27Oruwa nee binniya ab bikraa asmma too Mariyam ab kaan ggi teesa mee ragi wayyi asmma too Yusufu ab tee kabila tee Sultan Daudi 28Ini yaa Malaika Jibreal ojja nee Mariyam, dukur oselem uwo. Dukur uwo kelem gali, “Rabbana asmma nee itaa huruma zaidi, Rabbana fih bakaan wayyi mee itaa.” 29Bakaan Mariyam asmma kalam ab Malaika wonus, uwo kaffu zaidi. Uwo shannga fih gelbba too fih nammna ab Malaika selem uwo. 30Ini yaa Malaika kelem noowo gali, “matta kaffu Mariyam! Kalam Rabbana asmma nee itaa huruma. 31Ayinu, itaa bijja aamili dukur itaa bijja weledu nyereku yowele dukur itaa endis tee naadi uwo asmma ‘Yesu’. 32Obijja kun mee hishima tee guddrra dukur bijja naadi uwo nyereku tee Rabbana al fih foo zaidi, Siddu Rabbana bijja kutu uwo Sultan nee annas too jee jidi too Sultan Daudi kaan fih. 33Obijja hukkum beyy tee Yakob kuul ladi waakati kuul mee mamlaka too maa bijja kalas.” 34Ini yaa Mariyam asaadu Malaika gali, “anaa bi weledu keefin kalam anaa bikraa?” 35Ini yaa Malaika jibisha uwo gali, “Roho abnedif bijja nee itaa mee guddrra tee Rabbana ab fih foo zaidi, mee itaa bijja kun mee batnna. Fih jeedde, nyereku ab bijja weledu bijja kun ab abnedif dukur binaaduwo nyereku tee Rabbana. 36Ayinu, aku takki Elizabethi, ab kaan naadi uwo ajol ab maa ggi weledu, offih aamili tee shahari sita salakun uwo ajussi zaidi. 37Kalam mafih sokol ab Rabbana agddear soh maa.” 38Mariyam aarja fogo gali, “anaa labbi tee Siddu tayi kede kun fugu anaa jee itaa kelem dee.” Malaika dukur wassa bakaan al kaan uwo fih fogo oruwa.
Mariyam ruwa nee Elizabethi
39Badda mudda siya futu, Mariyam dukur adul uwo ruwa gwaam fih meddina ab fih gala tee Bele tee Yuda. 40Bakaan uwo rasul naa, odakal fih juwa tee Zakariya, oselem Elizabethi. 41Mariyam bakaan selem Elizabethi, nyereku abkan fih-fih batnna tee Elizabethi yizu-yizu mee furaayi. Mee Roho abnedif faatiya Elizabethi. 42Dukur uwo wonus mee sauti tee foo mee furaayi nee Mariyam dukur uwo kelem gali, “Rabbana wedi nee itaa baraka futu nuswaana kuul. Mee Rabbana wedi baraka nee nyereku ab itaa bi weledu. 43Anaa yaa munu ajol ab maa endis hishima gali mamma tee Siddu tayi jaa nee anaa 44Anaa ggi kelem nee itaa gali bakaan itaa selem anaa, nyereku ab fih-fih batnna tayi fih gwaam uwo yizu-yizu mee furaayi. 45Rabbana wedi nee itaa baraka kalam itaa amin gali uwo bi soh killa sokol ab uwo kelem tee soh nee itaa.”
Kungu tee Mariyam
46Dukur Mariyam jibisha gali,
“mee gelbba tayi kuul anaa ggi abdu Siddu teena.
47Mee hayyi tayi kuul furaayi nee Rabbana muhlis tayi.
48Kalam uwo weeri nee anaa musama jee labbi too ab leyin.
Min saade annas tee karni kuul bijja naadi anaa ajol ab wedi noowo baraka.
49Kalam Rabbana Siddu guddrra kuul osoh nee anaa kalama ab kubarina mee asmma too abnedif.
50Rabbana bijja weeri noomon musama karni mee karni nee ummon ab ggi abdu uwo mee kuwaf.
51Oweri guddrra mee idda too,
osetetu annas kuul ab endis gemmu fih adul gelbba tomon.
52Uwo amrugu kubarina min kurisi tomon tee hishima,
Dukur uwo gum annas ab kaan ggi alis.
53Annas ab endis jiyan osabanisha ummon mee sokolinna ab seme,
mee tajirin oturuju ummon ligo ummon maa endis sokol yoyote.
54Uwo awn inna annas tee Israel labbiya too mee kumbuka weeri huruma.
55Jee uwo jaa kelem nee nas jidijidi, naa nee Ibrayim mee yaala too kuul karni kuul.”
56Mariyam dukur faddul nee Elizabethi aku too fih mudda tee shahari talata dukur uwo aarja ruwa fih beyy too fih Nazaresi.
Weledu tee Yokana albatiza
57Fih waakati tee Elizabethi tee weledu nyereku too bakaan timu, oweledu nyereku yowele. 58Bakaan jirana mee akwaana too asmma gali Rabbana ayinu huruma noomon, mon kuul furaayi bakaan wayyi mowo. 59Bakaan nyereku dee tim yom tamaniya, jirana mee akwaana tee Zakariya ummon kuul jaa fih taaru tee nyereku dee ligo ummon ggi feker bijja kutu noowo asmma tee Babba too Zakariya. 60Lakin Elizabethi mamma tee nyereku dee kelem noomon gali, “ata! Inna endis tee naadi uwo Yokana.” 61Ummon kelem noowo gali, “mafih ajol tee kabila takki ab lissa naadi uwo mee asmma jee weede.” 62Dukur ummon weeri nee Zakariya alama asaadu uwo nammna ab uwo aju kee naadi moo nyereku dee. 63Dukur uwo asaadu sokol tee katif fogo, “okatifu gali nyereku dee bi naadi uwo mee asmma tee Yokana!” Mee annas ab kaan lim naa ummon kuul hayiru. 64Fih gwaam Zakariya aarja wonus maara taani ligo oggi shukur nee Rabbana. 65Mee annas kuul ab kaan fih geeri mee ummon shannga mee kaffu zaidi. Mee killa wayyi ab fih-fih Bele tee Yudaaya tee gala ummon wonus fih killa sokol ab soh. 66Mee killa wayyi ab jaa asmma kalama dee, feker fogo fih shannga dee. Ummon kelem gali, “fih hakki nyereku dee bi rabba dukur uwo bijja kun tee mmana.” Kalam kaan addil gali idda tee Rabbana kaan fih moo.
Kungu tee Zakariya
67Dukur Roho abnedif faatiya Zakariya Babba tee Yokana, dukur uwo wonus unabi.
68“Kee shukur asmma tee Siddu Rabbana tee Israel, kalam uwo jaa fih awn inna annas too. Dukur bijja ponyesha inna.
69Mee kaman uwo aarja neena guddrra tee hidaaya fih juwa tee Daudi
70Yaa weede nammna ab Rabbana kelem futu fih Nebbiya too ab nedifin ab kaan fih-fih waakati tee zaaman gali uwo bijja soh. 71Uwo ggi liju nee inna
72Rabbana soh weede weeri huruma nee nas jidi teena mee kumbuka kaman ahad abnedif ab uwo soh noo ummon.
73Ahad ab uwo soh mee jidi teena Ibrayim jee uwo alifu noowo.
74Uwo bijja hidaaya fih idda tee adduya teena,
kee inna agddear abdu uwo yom kuul tee hayyi teena
ligo inna maggi kaffu aduuya teena.
75Inna bijja masi fih sika tee abnedif ab addil gidaam uwo yom kuul tee hayyi teena.
76Mee itaa nyereku tayi Yokana, annas bijja naadi itaa Nebbi taa Rabbana ab fih foo zaidi,
Itaa bijja adul annas tayari fih jaa tee Siddu teena
77Fahamisha annas too muhlis tee sama zambi.
78Rabbana ggi sama kalam uwo weeri huruma ab tee guddrra,
dee yaa kalam muhlis jee semsi tee minsubu bi jaa-jaa nee inna tala min samayi.
79Obijja waala nee ummon ab fih-fih duluma mee ummon ab ggi kaffu muttu.
Uwo bijja faatiya inna masi fih raha mee Rabbana.”
80Nyereku Yokana rabba dukur uwo kun tee guddrra fih roho, dukur uwo geni fih bakaan ab pengele ladi uwo abidu alim fih annas tee Israel.
Iliyochaguliwa sasa
Lukka 1: KCN
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Nubi Bible by Beyond Translation is licensed under Creative Commons Attribution-ShareAlike 4.0 License.