ລູກາ 1
1
ບົດໄຂເນື້ອເລື່ຶອງ
1ທ່ານເທໂອຟີໂລທີ່ນັບຖື, ກໍ່ເອ້ຢັ່ກຕີ່ນຂຽນແລ້ວກ່ຽວກັບເລື່ອງຊີວິດພຣະເຢຊູ ຊຶ່ງສຳເລັດແລ້ວທີ່ພຣະເຈົ້າຕີ່ນອູນເກີດເຫລັ່ງໃນທ່າມກາງຈຸເມັ່ງຄືກັບທີ່ພຣະອົງຕີ່ນສັນຍາເຕີ້. 2ຈຸປາຕີ່ນຂຽນສີ່ງທີ່ພຣະເຢຊູຕີ່ນກະທຳແລ້ວຕາມທີ່ຕີ່ນຫນາມກັບມັດຂອງຕົນເອງຕໍ່ຫລ່າຍຈຸປາຕີ່ນກາຍເດ່ງຢັ່ກປະກາດພຣະຄຳຂອງພຣະເຈົ້າ. 3ດັ່ງນາ ທ່ານເທໂອຟີໂລທີ່ນັບຖື ຫລັງຈາກທີ່ຂ້າພະເຈົ້າຕີ່ນສຶກສາຢ່າງຖີ່ຖ້ວນຮອບຄອບ ເຕັ້ງສິ່ງເຫຼົ່າໜີຕັ່ງເຫດແລ້ວຕັ້ງແດຕົ້ນ ຂ້າພະເຈົ້າຈຶ່ງຄິດວ່າເດ່ງການດີທີ່ຈະຮຽບຮຽງເລື່ອງລາວຕາມລຳດັບເພື່ອປະໂຫຍດແກ່ທ່ານ. 4ຂ້າພະເຈົ້າໝິ່ນເຊັ່ນໜີກໍເພື່ອທ່ານຈະຮູຄວາມຈິງຢ່າງຄັກແນ່ ເຕັ້ງເລື່ອງລາວທີ່ເດ່ງແກ່ນສານທີ່ທ່ານຕີ່ນຮັບຮູເຄີ່ນາ.
ທໍານວາຍການເກີດຂອງໂຢຮັນບັນຕິສະໂຕ
5ໃນຄາວທີ່ເຮໂຣດຕີ່ນເດ່ງກະສັດແຫ່ງແຂວງຢູດາຍເຊກາຣີຢາຕີ່ນເອີ້ໃນໝວດຂອງປະໂຣຫິດຊື່ອາບີຢາຄືກັນກັບຮັນມູ້ຂອງຮັນເດ່ງເຊື້ອສາຍຂອງອາໂຣນປະໂຣຫິດອິດສະຣະເອນກຸ່ນທໍາອິດຊື່ຂອງນາງແມ່ນເອລີຊາເບັດ. 6ຫານມູ່ໂອງໜີທີ່ດຳເນີນຊີວິດຢ່າງຖືກຕ້ອງຕໍ່ສາຍພຣະເນດຂອງພຣະເຈົ້າໂດຍເຊື່ອຟັງກົດບັນຍັດຂອງອົງຜູ້ເດ່ງເຈົ້າ ແລະຂໍ້ຄຳສັ່ງຂອງພຣະເຈົ້າຢ່າງນໍກໍທີ່ຕິ. 7ແຕ່ຈຸປາໜໍກໍກອນ ເພາະນາງເອລີຊາເບັດເດ່ງໝັນ ແລະຕັ່ງຫານກໍເຖົ້າແກ່ແລ້ວ.
8ໝໍວັນ ເຊກາຣີຢາກຳລັງປະຕິບັດໝ້າທີ່ຂອງຕົນເອີ້ໃນພຣະວິຫານເດ່ງປະໂຣຫິດ ເພາະຕ້ອງຜຽນໃນໝວດປະໂຣຫິດຂອງຕົນເພື່ອຮັບໃຊ້ພຣະເຈົ້າໃນພຣະວິຫານ. 9ຕາມທຳນຽມຂອງຈຸປະໂຣຫິດແລ້ວ ຮັນຕີ່ນຮັບເລືອກໂດຍການໃຊ້ສະຫລາກ ເຈີປາຫລ່ອນຕີ່ໃນພຣະວິຫານຂອງອົງພຣະຜູ້ເດ່ງເຈົ້າ ເພື່ອເຜົາຄຣຽງຫອມຖວາຍທີ່ແທ່ນບູຊາ. 10ໃນຂະນະທີ່ເຊກາຣີຢາກໍາລັງເຜົາຄຣຽງຫອມເອີ້ເຫລັ່ງແທ່ນບູຊານາກໍກໍ່ປະຊາຊົນເອ້ກຸ່ນຕຶມກັນພາວັນນາອະທິຖານເຖິງພຣະເຈົ້າເອີ້ຫອງວ່າຍພຣະວິຫານ.
11ໃນເວລານາກໍ່ເທວະດາໝໍຕົນຂອງອົງພຣະຜູ້ເດ່ງເຈົ້າ ຕີ່ນຫລ່າຍປາກົດຕໍ່ກາກມັດເຊກາຣີຢາ ໂດຍຕຶ້ງເອີ້ລ່າຕຶກຂອງແທ່ນບູຊາ. 12ເມື່ອເຊກາຣີຢາຕີ່ນໜາມເທວະດາຕົນນາແລ້ວ ຮັນກໍສະດ້ອຍຫຣຸ່ງເປ້ເຊັມ ດ້ວຍຄວາມເຢີ້ນ. 13ແຕ່ເທວະດາຕົນນາກ່າວແກ່ຮັນວ່າ, “ເຊກາຣີຢາເອີຍ ມ່າເຢີ້ນເລີຍພຣະເຈົ້າຕີ່ນແງ໋ຄຳພາວັນນາອະທິຖານຂອງເທົາແລ້ວ ແລະ ເອລີຊາເບັດມູ່ຂອງເທົາ ຈະເກີດກອນປານໝໍຢັ່ກອູນພຣະເຈົ້າ ອູນເທົາເຕີ້ມຊື່ອູນຮັນວ່າໂຢຮັນ. 14ເທົາຈະກໍຄວາມຊົມຊື່ນຍີນດີຢ່າງລົ້ນເຫລືອ ແລະເອ້ກຸ່ນຈະຍີນດີເມື່ອປາເກີດຫລ່າຍ. 15ເພາະວ່າຮັນຈະເດ່ງຢັ່ກຍິ່ງໃຫ່ຍໃນສາຍພຣະເນດຂອງພຣະຜູ້ເດ່ງເຈົ້າ ຮັນຈະໜໍໂຍ່ ຫລ້ຽວອະງຸ່ນຫລືເສບສິ່ງມືນເມົາແຕ່ແນວໂຫມ ແລະຈະບໍາຕີ່ດ້ວຍພຣະວິນຍານບໍຣິສຸດເຈົ້າຕັ້ງແດຈາກກຣຸ່ງເມະຫລ່າຍ. 16ຮັນຈະຊ່ອຍຊາວອິດສະຣາເອນຢ່າງເອ້ອູນກັບໃຈຈາກບາບຂອງຕົນແລະຮັບໃຊ້ອົງພຣະຜູ້ເດ່ງເຈົ້າພຣະເຈົ້າຂອງຈຸປາແອ້ນໜໍຄັ້ງ. 17ຮັນຈະຈັດຕຽມປະຊາຊົນອູນພ້ອມສໍາລັບການສະເດັດຫລ່າຍຂອງອົງພຣະຜູ້ເດ່ງເຈົ້າດ້ວຍລັກຊະນະເຂັ້ມແຂງແລະຣິດອໍານາດເໝືອນດັ່ງຢັ່ກທໍານວາຍເອລີຢາຮັນຈະນຳອີກັບກອນອູນຄືນດີກັນຮັນຈະນຳກຸ່ນດື້ດ້ານກັບອູນກໍ່ປັນຍາຢ່າງກຸ່ນຊອບທຳ ຮັນຈະຕຽມປະຊາຊົນເຕີ້ພ້ອມສຳລັບອົງພຣະຜູ້ເດ່ງເຈົ້າ.”
18ເຊກາຣີຢາເລົ່າກັບເທວະດານາວ່າ, “ຂ້ານ້ອຍຈະກໍ່ກອນຕີ່ນແນວໂໝ? ເພາະຂ້ານ້ອຍກໍເຖົ້າແກ່ແລ້ວ ແລະມຸ່ຂອງຂ້ານ້ອຍກໍເຖົ້າແກ່ເໝືອນກັນ.”
19ລ່າເທວະດານາກໍຕອບວ່າ, “ຈັກຊື່ຄັບຣີເອນ. ແລະຕຶ້ງເອີ້ຊ້ອງກາກມັດພຣະເຈົ້າ ເພື່ອຮັບໃຊ້ພຣະອົງ, ພຣະເຈົ້າຊົງໃຊ້ຈັກຫລ່າຍເລົ່າກັບເທົາ ແລະນຳເລ້ຂ່າວດີໝີຫລາ່ຍໂຢ້ເທົາກ່ຽວກັບກອນອ້າຍຂອງເທົາຈະຫລ່າຍເກີດ. 20ບັດໜີອູນຟັງ ເທົານໍເຊື່ອຖ້ອຍຄຳຂອງຈັກ ຊື່ງຈະເດ່ງຈິງຕາມເວລາທີ່ກຳນົດເຕີ້ຍ້ອນເທົານໍເຊື່ອເທົາຈະເດ່ງກຸ່ນງ້ອງນໍສາມາດເລົ່າຕີ່ນຈົນເຕັ້ງວັນທີ່ເຫດການເຫຼົ່ານາເກີດເຫລັ່ງ.”
21ໃນຂະນະນາປະຊາຊົນກໍຄະມໍເຊກາຣີຢາເອີ້ຫອງວ່າຍພຣະວິຫານດ້ວຍຄວາມຫຣຸງເປ້ເຊັມ ເມື່ອໜາມຮັນເອີ້ໃນພຣະວິຫານຕັ້ງໂລ. 22ເມື່ອຮັນສາຫລ່າຍຈາກພຣະວິຫານຮັນພະຍາຍາມທີ່ຈະເລົ່ານໍາປະຊາຊົນແຕ່ຮັນໜໍສາມາດຂະເຍົາຕີ່ນສະນາຮັນຈຶ່ງໃຊ້ສີໝິ່ນພາສາງ້ອງເພື່ອທີ່ຈະສື່ສານກັບຈຸປາຕັ້ງແດນາປະຊາຊົນຈຶ່ງຮູວ່າຮັນໜາມນິມິດໃນພຣະວິຫານ .
23ເມື່ອເຊກາຣີຢາເຫດກຳນົດຮັບໃຊ້ໃນພຣະວິຫານແລ້ວ ຮັນກໍກັບຄືນເວັ້ນບ້ານ. 24ຫລັງຈາກຜ່ານຕີ່ເອ້ເປ່ຍນາງເອລີຊາເບັດມູ່ຂອງຮັນກໍປ່າກອນ ແລະນາງນໍຕີ່ນສາຈາກຍ່າຕີ່ອາໂໝເລີຍເດ່ງເວລາດຳຂ້າງ. 25ນາງເລົ່າເຫລັ່ງວ່າ, “ອົງພຣະຜູ້ເດ່ງເຈົ້າຊົງບັນດານອູນຂ້ານ້ອຍກໍ່ກອນບັດໝີພຣະອົງຕີ່ນຍົກແມງພະໂອຂອງຂ້ານ້ອຍທີ່ກໍ່ທ່າມກາງກຸ່ນໜໍກໍ່ກອນສາແຫນ.”
ທຳນວາຍການເກີດຂອງພຣະເຢຊູເຈົ້າ
26ເມື່ອນາງເອລີຊາເບັດປ່າກອນຕີ່ນເຜົ້າຂ້າງແລ້ວ ພຣະເຈົ້າກໍຕີ່ນໃຊ້ເທວະດາຄັບຣີເອນ ຫລ່າຍທີ່ໜໍເມືອງຊື່ວ່ານາຊາເຣັດໃນແຂວງຄາລີເລ. 27ເທວະດາຫລ່າຍໂຢ້ກອນໝ້າຍພົມມະຈາຣີໝໍຢັ່ກ ຢັ່ກທີ່ເດ່ງຄູ່ໝັ້ນກັບກອນປານຊື່ວ່າໂຢເຊັບ ຢັ່ກທີ່ເດ່ງເຊື່ອສາຍຫລ່າຍຈາກກະສັດດາວິດສ່ວນກອນໝ້າຍນາຊື່ວ່າ ມາຣີ. 28ເທວະດາຕົນນາຕີ່່ນຫລ່າຍເຕີ້ມນາງ ແລະກ່າວວ່າ, “ສັນຕິສຸກ ຈົ່ງກໍແກ່ເທົາເຖິດອົງພຣະຜູ້ເດ່ງເຈົ້າຊົງສະຖິດເອີ້ກັບເທົາ ແລະອວຍພອນເທົາຢ່າງເອ້ໆ.”
29ລ່າມາຣີກໍຫຣຸ້ງເປັເຊັມເອ້ໃນແມງເລົ່ານາງຈຶ່ງຄິດພິຈາລະນາວ່າ ແມງທັກທາຍຂອງຮັນໝີໝາຍຄວາມວ່າແນວໂໝ. 30ແລ້ວເທວະດາກໍຕີ່ນກ່າວແກ່ນາງວ່າ, “ມາຣີເອີຍ ມ້າເຢີ້ນເລີຍພຣະເຈົ້າຊົງໂຜດເມດຕາກະລຸນາເທົາແລ້ວ. 31ເທົາຈະເອີ້ກອນ ແລະເກີດກອນປານໝໍຢັ່ກ ແລະອູນເທົາເຕີ້ມຊື່ອູນກຸມມານໜີວ່າ ພຣະເຢຊູ. 32ກຸມມານນາຈະກໍ່ອໍານາດຍິ່ງໃຫ່ຍ ແລະຈະເດ່ງທີ່ໂຄ້ງວ່າ ບຸດຂອງພຣະເຈົ້າອົງສູງສຸດ ອົງພຣະຜູ້ເດ່ງເຈົ້າພຣະເຈົ້າຈະຊົງແຕ່ງຕັ້ງອູນຮັນເດ່ງກະສັດເໜືອປະຊາຊົນຂອງຮັນຊື່ງພຣະອົງຕີ່ນສັນຍາເຕີ້ກັບບັນພະບຸລຸດຂອງດາວິດ 33ແລະ ຮັນຈະປົກຄອງເຊື້ອສາຍຂອງຢາໂຄບຕະຫລອດຕີ່ ແລະອານາຈັກຂອງຮັນຈະນໍສິ້ນສຸດໝໍສິ້ນ.”
34ລ່າມາຣີຈຶ່ງຖາມກັບເທວະດາວ່າ, “ຂ້ານ້ອຍຈະກໍ່ກອນຕີ່ນແນວໂໝ ເພາະຂ້ານ້ອຍດັງໜໍຈ່າກໍ່ໂອງ.”
35ເທວະດາຕີ່ນຕອບວ່າ, “ພຣະວິນຍານບໍຣິສຸດເຈົ້າຈະສະເດັດຫລ່າຍເອີ້ເຫລັ້ງເທົາແລະຣິດເດດອຳນາດຂອງພຣະເຈົ້າອົງສູງສຸດຈະປົກຄຸມເທົາເຕີ້.ດ້ວຍເຫດໜີ ກອນດຽດຢັ່ກບໍຣິສຸດຈະເດ່ງທີ່ໂຄ້ງວ່າພຣະບຸດຂອງພຣະເຈົ້າ. 36ເອລີຊາເບັດມ້າງແອມຂອງເທົາ ນາງກຳລັງຈະຕີ່ນກອນປານໝໍຢັ່ກ ເຖິງວ່ານາງເຖົ້າແກ່ແລ້ວກໍຕາມ ກຸ່ນເລົ່າກັນວ່າ ນາງເດ່ງໝັນ ແຕ່ບັດໜີນາງປ່າກອນຕີ່ນເຜົ້າຂັາງແລ້ວ. 37ດ້ວຍວ່າ,ນໍກໍ່ແນວໂໝທີ່ພຣະເຈົ້າໜິ່ນນໍຕີ່ນ.”
38ມາຣີເລົ່າເຫລັ່ງວ່າ, “ຂ້ານ້ອຍເດ່ງທາດກອນຕ່າເກ້ຂອງອົງພຣະຜູ້ເດ່ງເຈົ້າຖີນເຈີເຫດການໝີເກີດກັບຂ້ານ້ອຍຕາມທີ່ທ່ານຕີ່ນກ່າວນາເທີ້ນ.” ແລ້ວເທວະດາຕົນນາກໍຈາກນາງຕີ່.
ມາຣີຕີ່ຢ້ຽມຢາມເອລີຊາເບັດ
39ຈາກນານໍໂລມາຣີກໍສາເດີນທາງຢ່າງຮີບດ່ວນ ຕີ່ທີ່ໝໍເມື່ອງທີ່ເນີນຜູຂອງແຂວງຢູດາຍ. 40ນາງຕີ່ນລ່ອນຕີ່ກອງຍ່າຂອງເຊກາຣີຢາ ແລະທັກທາຍນາງເອລີຊາເບັດ. 41ເມື່ອນາງເອລີຊາເບັດຕີ່ນແງ໋ແມງທັກທາຍຂອງນາງມາຣີ ກອນເອີ້ກອງກຣຸ່ງກໍໂປນ ນາງເອລີຊາເບັດບຳຕີ່ດ້ວຍພຣະວິນຍານບໍຣິສຸດເຈົ້າ 42ນາງຈຶ່ງເລົ່າເຫລັ່ງດ້ວຍສຽງໂນ່ງວ່າ, “ເທົາເດ່ງກອນຕ່າເກ້ທີ່ຕີ່ນຮັບພຣະພອນເອ້ທີ່ສຸດກວ່າກອນຕ່າເກ້ທຸກຢັ່ກ ຕະຫລອດຕັ່ງກອນທີ່ຈະເກີດຫລ່າຍໜີດ້ວຍ 43ເດ່ງມ່າເອເຫດການເກ້ເນ້ຈຶ່ງເກີດເຫລັ່ງກັບຂ້ານ້ອຍນໍ ຄືເມະຂອງພຣະອົງເຈົ້າຂອງຂ້ານ້ອຍ ຫລ່າຍຢ້ຽມຢາມຂ້ານ້ອຍ? 44ດ້ວຍວ່າ,ພໍຂ້ານ້ອຍຕີ່ນແງ໋ສຽງຂອງນາງທັກທາຍ ກອນເອີ້ກອງກຣຸ່ງຂອງຂ້ານ້ອຍກໍດິ້ນດ້ວຍຄວາມຍິນດີ. 45ອົງພຣະເດ່ງເຈົ້າຈະຊົງອວຍພອນນາງເພາະນາງເຊື່ອວ່າອົງພຣະຜູ້ເດ່ງເຈົ້າຈະຊົງໝິ່ນສໍາເລັດຕາມທີ່ພຣະອົງຊົງສັນຍາເຕີ້ກັບນາງ.”
ມາຣີຮ້ອງເພງສັນລະເສີນພຣະເຈົ້າ
46ດັ່ງນາ ມາຣີຈຶ່ງຮ້ອງເພງສັນລະເສີນວ່າ,
“ຈິດໃຈຂອງຂ້ານ້ອຍເອີຍ ຈົ່ງສັນລະເສີນອົງພຣະຜູ້ເດ່ງເຈົ້າ
47ແລະ ຈິດວິນຍານຂອງຂ້ານ້ອຍ
ຕີ່ນຊົມຊືນຍິນດີໃນພຣະເຈົ້າ ຜູ້ຊົງໂຜດຊ່ອຍອູນຂ້ານ້ອຍຕີ່ນພົ້ນ
48ເພາະພຣະອົງຕີ່ນແນມເບິ່ງ
ຂ້ອຍໃຊ້ກອນຕ່າເກ້ຂອງພຣະອົງຢັ່ກຕໍ່າຕ້ອຍ
ຕັ່ງແດໝີຕີ່ກຸ່ນທຸກສະໄໝ
ຈະໂຄ້ງຂ້ານ້ອຍວ່າ ທໍ່ແຫ່ງພຣະພອນ
49ເພາະວ່າພຣະເຈົ້າອົງຊົງຣິດເດດຍິ່ງໃຫຍ່
ຕີ່ນກະທຳການເນ້ແກ່ຂ້ານ້ອຍ
ພຣະນາມຂອງພຣະອົງບໍຣິສຸດ,
50ພຣະເຈົ້າຈະຊົງສໍາແດງຄວາມເມດຕາ
ແກ່ຢັ່ກທີ່ນະມັດສະການ ແລະຮັບໃຊ້ພຣະອົງ
ຕະຫລອດຕີ່ເດ່ງນິດ.
51ເມື່ອພຣະອົງຢຽດແຂ້ງສີສາ
ດ້ວຍລິດອໍານາດຍິ່ງໃຫຍ່ຂອງພຣະອົງ
ກຸ່ນຈອງຫອງ ແລະແຜນການ
ຂອງຈຸປາກໍແຕກຊະ.
52ພຣະອົງຊົງປົດຢັ່ກປົກຄອງທີ່ກໍ່ອຳນາດ
ສວາຍຈາກບ່ອນໂງ່ຍ
ແລະຕີ່ນຊົງຍົກຢັ່ກຕໍ່າຕ້ອຍເຫລັ່ງ.
53ພຣະເຈົ້າດວຍກຸ່ນງອດດ້ວຍ
ຂອງດີ
ແຕ່ພຣະອົງຕີ່ນສັ່ງກຸ່ນຣັ້ງກໍ່ຕີ່ດ້ວຍໜໍອູນມ່າເອເລີຍ.
54-55ພຣະອົງຊົງຊ່ວຍອິດສະຣາເອນອັບຣາຮາມ
ຢັ່ກຮັບໃຊ້ຂອງພຣະອົງ
ຄືພຣະອົງຊົງຈື່ຈຳພຣະເມດຕາ
ຂອງພຣະອົງຕໍ່ອັບຣາຮາມແລະກອນເຈົ້າ
ຂອງຮັນຕະຫລອດຕີ່
ດ້ວຍເຫດໜີພຣະອົງຊົງປະຕິບັດຕາມຄໍາສັນຍາທີ່ຊົງອູນເຕີ້ກັບບັນພະບຸລຸດຂອງຈັກ.”
56ແລ້ວມາຣີຕີີ່ນພັກເອີ້ນຳເອລີຊາເບັດປະມານປາຂ້າງ ແລ້ວນາງກໍກັບຄືນເວັ່ນຍ່າຂອງຕົນ.
ການເກີດຂອງໂຢຮັນບັນຕິສະໂຕ
57ບັດໜີກໍ່ເຕັ້ງເວລາແລ້ວ ທີ່ນາງເອລີຊາເບັດຈະຕີ່ນກອນ ແລະນາງກໍເກີດກອນປານໝໍຢັ່ກ. 58ເມື່ອໄຕ່ບ້ານສະເດີກັບມ້າງແອມຂອງນາງຕີ່ນແງ໋ວ່າ ອົງພຣະຜູ້ເດ່ງເຈົ້າຕີ່ນອູນຄວາມເມດຕາປານີແກ່ນາງຢ່າງລົ້ນເອ້ ຈຸປາຕ່າງກໍຊົມຊື່ນຍິນດີນຳນາງ.
59ເມື່ອກອນດຽດຄົບແປດວັນແລ້ວ ຈຸປາກໍໝິ່ນພິທິຕັດ#1:59 ພິທິຕັດ ຫັນເດ່ງວິທີກໍາຂອງຊາວຢິວແມ່ນການແຈ່ກໂຄດຕຸ້ມກ້ອຍຂອງອະໃວຍະຂອງເພດກອນປານດ້ອຍເກີດຕີ່ນແປດງີ່ອູນ ແລະຕັ້ງຊື່ອູນວ່າ, ເຊກາຣີຢາ ຕາມຊື່ຂອງອີ. 60ແຕ່ເມະເລົ່າວ່າ, “ນໍແມ່ນ ຮັນຈະຕ້ອງກໍ່ຊື່ວ່າ ໂຢຮັນ.”
61ຈຸປາຈື່ງເລົ່າແກ່ນາງວ່າ, “ແຕ່ເທົານໍກໍມ້າງແອມຢັ່ກທີ່ເຕີ້ມຊື່ນາ.” 62ແລ້ວຈຸປາກໍໃຊ້ພາສາໃບ້ຫານອີຂອງກອນດຽດວ່າ ຮັນຕ້ອງການເຕີ້ມຊື່ໂໝເຈີກອນ.
63ເຊກາຣີຢາຖີນອູນປາເລ້ກະດານລາຍ ແລ້ວຮັນຂຽນວ່າ, “ຊື່ຂອງຮັນແມ່ນໂຢຮັນ.” ແລ້ວທຸກກຸ່ນຕ່າງກໍປະຫລາດເປ້ເຊັມ 64ໝໍເວລາກັນນາ ເຊກາຣີຢາກໍຄະເຍົາຕີ່ນແອ້ນ ປາຈຶ່ງສາປາກສັນລະເສີນພຣະເຈົ້າ. 65ຈຸໄຕ່ບ້ານສະເດີຕ່າງກໍເກີດຄວາມເຢີ້ນ ແລະຂ່າວກ່ຽວກັບເຫດການເຫຼົ່າໜີ ກໍຊ່າລືຕີ່ທົ່ວເຂດເນີນຜູຂອງແຂວງຢູດາຍ. 66ເມື່ອທຸກຂຸ່ນຕີ່ນແງ໋ຂ່າວເຫຼົ່ານາ ຕ່າງກໍພິຈາລະນາໃນເປ້ເຊັມ ແລະຫານກັນວ່າ, “ກອນດຽດໜີຈະເດ່ງແນວໂໝນໍ? ເພາະເດ່ງການຈະແຈ້ງແລ້ວວ່າ ຣິດເດດຂອງອົງພຣະຜູ້ເດ່ງເຈົ້າ ຊົງສະຖິດເອີ້ນຳກອນດຽດກຸ່ນໜີ.”
ເຊກາຣີຢາກ່າວແມງທໍານວາຍ
67ລ່າເຊກາຣີຢາອີຂອງໂຢຮັນ ກໍບຳຕີ່ດ້ວຍພຣະວິນຍານບໍຣິສຸດເຈົ້າ ແລະຕີ່ນກ່າວຂໍ້ຄວາມຂອງພຣະເຈົ້າ,
68“ຈົ່ງສັນລະເສີນອົງພຣະຜູ້ເດ່ງເຈົ້າ
ພຣະເຈົ້າຂອງອິດສະຣາເອນ ດ້ວຍວ່າ,ພຣະອົງຕີ່ນຢ້ຽມຢາມ
ແລະ ຕີ່ນໄຖ່ເລ້ພົນລະເມືອງ ຂອງພຣະອົງ
69ແລະ ຕີ່ນອູນຢັ່ກຊົງຣິດໝໍຢັ່ກເກີດເຫລັ່ງ
ໃນເຊື້ອວົງຂອງດາວິດຢັ່ກຮັບໃຊ້
ຂອງພຣະອົງ
ຮັນເດ່ງຢັ່ກຊົງໂຜດຊ່ອຍອູນພົ້ນຂອງຈຸເມັ່ງ,
70ຕາມທີ່ພຣະອົງຕີ່ນຊົງກ່າວເຕີ້
ຕັ້ງແດສະໄໝບູຮານ
ໂດຍແມ້ງຢັ່ກທຳນວາຍເອ້ຢັ່ກທີ່ບໍຣິສຸດຂອງພຣະອົງ.
71ພຣະອົງຊົງໂຜດຊ່ອຍເຈີພົ້ນຈາກສັດຕູຕັ່ງເອ້
ຂອງຈຸຮັນ
ແລະ ພົ້ນຈາກສີກຸ່ນຕັ່ງປວງ
ທີ່ຕ່າແກດເມັ່ງ
72ດັ່ງນາພຣະເຈົ້າ ຈຶ່ງຊົງສຳແດງພຣະກະລຸນາ
ຊຶ່ງຊົງສັນຍາແກ່ບັນພະບຸລຸດ
ຂອງຈຸເມັ່ງ
ແລະຊົງລະນຶກເຕັ້ງພັນທະສັນຍາ
ເກ້ບໍຣິສຸດຂອງພຣະອົງ
73-75ໜີແມ່ນແມງສັນຍາທີ່ພຣະຕີ່ນຊົງກະທໍາເຕີ້
ກັບອັບຣາຮາມບັນພະບຸລຸດຂອງຈຸເມັ່ງ,
ພຣະອົງຊົງກ່າວວ່າ ພຣະອົງຈະຊົງຊ່ອຍອູນພົ້ນຈາກອໍານາດຂອງສັດຕູ
ເພື່ອຈັກຈະຕີ່ນຮັບໃຊ້
ພຣະອົງ
ຕະຫລອດຊີວິດໂດຍໜໍເຢີ້ນຈຸປາ,
ຈັກຈະກໍ່ຊີວິດໃນລ່າທີ່ບໍລີສຸດແລະ
ຖືກຕ້ອງຕໍ່ໜ້າພະພັກພຣະອົງ
ຕາບທີ່ເມັ່ງກໍ່ຊີວິດເອີ້.
76ລ່າກອນດຽດເອີຍ, ປາຈະໂຄ່ງເທົາວ່າ,
ຢັ່ກທຳນວາຍຂອງຜູ້ສູງສຸດ.
ເພາະວ່າເທົາຈະຕີ່ເຄີ່ອົງພຣະຜູ້
ເດ່ງເຈົ້າ ແລະຈັດແຈງບັນດາ ຄະເນ້
ຂອງພຣະອົງ
77ເທົາຈະຊ່ອຍອູນປະຊາຊົນຂອງພຣະອົງ
ຮູວ່າອົງພຣະຜູ້ເດ່ງເຈົ້າສະເດັດຫລ່າຍເພື່ອຊ່ອຍອູນພົ້ນ
ດ້ວຍການອະໄພບາບກໍາ
ຂອງຈຸປາ
78ດ້ວຍໃຈເມດຕາກະລຸນາ
ແຫ່ງພຣະເຈົ້າຂອງຈຸເມັ່ງ
ແສງສະຫວ່າງໃນຮອງເຄີ້ມຈາກທີ່ໂຢນ
ຕີ່ນຫລ່າຍຢ້ຽມຢາມຈຸເມັ່ງ,
79ພຣະອົງຈະຊ່ອຍເຫລືອຢັ່ກທີ່
ເອີ້ໃນແມງໂສກເສົ້າ, ແລະຄວາມທຸກທໍ່ລະມານ
ແລະຄວາມເຢີ້ນໃນຂະນະທີ່ຈຸປາຄິດຂາດເຈດ
ເພື່ອຈະຕີ່ນເອີ້
ຢ່າງສະຫງົບສຸກກັບພຣະເຈົ້າ.”
80ລ່າກອນດຽດນາກໍເນ້ເຫລັ່ງ ແລະຈິດວິນຍານກໍກໍ່ກຳລັງທະວີເຫລັ່ງ ປາຕີ່ນອາໄສເອີ້ໃນຖິ່ນແຫ້ງແລ້ງກັນດານ ຈົນເຕັ້ງເປ່ຍທີ່ຈະຕີ່ນຫລ່າຍປາກົດແກ່ຈຸອິດສະຣາເອນ.
Iliyochaguliwa sasa
ລູກາ 1: PNX
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Phong Bible by Beyond Translation is licensed under Creative Commons Attribution-ShareAlike 4.0 License.