Lukasi 2
2
Bobotami bwa Yesu
(Mt. 11:18-25)
1O mikolo minina', mokondzi oguste ainyaka mobeko 'te bato babèebe badzadzi o bokondzi bwa baloma bakomisa nkombo. 2Yaalemaka mbala ya yambo ntango'eyabaka kiriniusi mokondzi wa etuka ya sulia. 3Nde, moto na moto akèeke o mboka ya bankoko bande mpo ya bokomisi nkombo. 4Yozefu abaaka o libota dza mokondzi Davidi, yo na Maliya baumowaka o mboka Nazarete o etuka ya galileya mpo bake o mboka Beteleme o etuka ya Yudea. Mpo beteleme yabaaka o kalakala mboka ya mokondzi; owabotamaka mokondzi Davidi. 5Yozefu akèeke omoo, mpo akakomisa nkombo yo na Maliya mwadzi owa'okanaka nande mpo ya libala mpe Maliya abaaka na dzemi. 6Ntango'eyaba Yozefu na Maliya o beteleme, ntango yakokaka mpo 'te Maliya abota mwana wande. 7Maliya abotaka mwana wa lele, mwana wande wa yambo, amodzingi na bitobo, mpe amotukidza o ndako ya bibwèle mpo eika ya bodzadzi ya kobaa te, mpo yaba na butu mpe babaaka bampaya. 8Babatedzi ba bibwèle baba bakabatela bibuwa baba o banganda iyaba upe na mboka ya Beteleme. 9Mbala yawi baèni Andzelu owa tomaka Nyaamolo mpe ntei'enena eyeye engengi na nkembo ya nkolo. Na ntina mei babatedzi ba bibuwa, baokaka nsomo wakudzi. 10Kasi Andzelu alobi naba 'te: Nakobanga te, nalo na nsango ndamu mpo ya bino naelobela, yaainya bato babèebe nsai waike. 11Lelo o mboka ya mokondzi Davidi, mobikisi abotami, alo masiya mpe klisto. 12Elembo eyaeteidja 'te bomoeba elo bo: bwa motana bamodzingi na bitobo mpe bamolangei o ntei ya sanduku ekebomba ba toma tokodzeidza ba bibwèle." 13Mbala yawi, boike bwaba anzelu bautaka o likolo, bayaaka elongo na andzelu mokondzi mpe baandzelu babèebe babandaka bokumisi Nyaamolo mpe bakaloba 'te: 14Lokumu o mboka Nyaamolo olo likolo, mpe kimia o mokili mpo ya bato ba Nyaamolo baakasepela nande." "Lokumu loba na Nyaamolo wa biyo o likolo' mpe o tubi likolo'!O mokili, kimia yaba na bato basepedzi nande." 15Ntango ba andzelu bakabwanaka naba baolodzaka o likolo, babatedzi ba bampata balobanaka banaba, "toke kino o mboka beteleme bè sika ebo mpe toène, mobikisi owa toebisaka nkolo Nyaamolo o monoko mwa baandzelu" 16Nampino, bakèeke lai o mboka Beteleme, bawaka kino bakatanaka Maliya na Yozefu mpe baèni mwana atuki o ntei ya sanduku eyaba bakadzeidza biyomba. 17Nde baôkôdzi ba bambata baèni mwana: o nsima ya boèni mwana o motau, baebisaka moto momwèemwe nsango eyabaebisaka Andzelu mpo ya mwana. 18Bato babèebe ba baokaka nsango ya babatedzi ba bampata bakamoi. 19Nde Maliya abombaka makambo mamèeme mamatubaka o motema mwande mpe abaka akamakundola. 20Makambo mèeme ma maèneke mpe ma maokaka bakengedzi ba bambata, maba bè ndenge dza waba'ebisaka anzelu. Ba'embelaka mpe bakumisaka Nyaamolo na mpo iyèye iyaokaka mpe iya'eneke ba.
Bakei na Yesu o tempelo
21Ntango'eyakomaka mwana na mikolo mwambe, ba motenaka gaza ndenge'eya lobaka mobeko mwa Moize, nde baboti bande bamoteidza nkombo 'te Yezu. Andzelu ainyaka nkombo enena yambo 'te Maliya adzia dzemi. 22Ntango mikolo ma bouloi bwa Maliya makokaka, Zozefu na Maliya bakèeke o tempelo ya yelusaleme, engebene na mibeko mya Moize, Mpo ba mopambola o Nyaamolo. 23Mpo yakomama o mibeko mya Nyaamolo 'te:" mwana momwèemwe walélé wa yambo esengedzi bamoinya na nkolo mpo amosalela." 24Bakèeke kainya mbeka ya topule tobale ta kpeti ikoko banaba kpeti ikoko bibale, ndenge etuni mibeko mya Nkolo Nyaamolo." 25O mboka ya Yelusaleme, yabaka na moto moko nkombo yande Simeona, abaka moto molamu; owabaka akabanga Nyaamolo. Abaaka akadzila mokolo mu mwaumola Nyaamolo mawa ma Isalaele: Molimo santu mwabaaka nande. 26Elimo santu yaènidzaka Simeona 'te akowa te, kino aène Masiya olo klisto owalobaka Nyaamolo 'te amotoma. 27Elimo santu ekambi simeona o tempelo, ntango'eya kèeke baboti ba mwana Yezu mpo bamoala mpo iyaba mibeko mikiloba. 28Simeona aèni mwana Yezu mpe amolendzi o maboko mande, nde o nsima akumisi Nyaamolo alobi: 29Nkolo, nalo mosali wao, leme, nampino luu londziya na kimia mpamba te, maloba ma malobaka we makoki. 30Pamba te, miyo manga maèni mobikisi o tomi we. 31Mobikisi o lolei we mpo ya bato ba mokili mobimba. 32Aba mwinda mpo ya bongengedzi bato bako bayuda te, mpe kembo ya bato ba Isalaele 33Yozefu na mama wa mwana bakamoi na ndenge yalobaka simeona. 34Simeona apambondzi Zozefu mpe Maliya, mpe alobi na Maliya 'te Nyaamolo aponi mwana obo mpo asalela mpe alongolo bato baike ba Isalaele baeba Nyaamolo mpe bato baboko ba mayele baupama upe na Nyaamolo. Aaba dza elembo mpo akebisa bato, kasi bato baike bamotelemela. 35Mpo 'te, aatôkôlô makanisi ma bato baike o bwaée. Mpe mpo yao, mompanga mwatuba molimo mwao.
Lisakoli dza Ana
36Mosakoli wa mwalimoto moko nkombo 'te Ana abaaka koto o tempelo, yo'abaka mwana mwalimoto wa Fanuele, owautaka o eboto ya Asere. Abaka mokolu mpendza. Adzalaka na molomi wande mbula nsambo, nde nsima molomi wande awaka. 37Nde akomaka mwalimoto bodzenge, kasi akomaka na mbula ntuku mwambi na inei (84). Atubidzaka ngonga yande o ndako ya tempelo, mpe abaaka akakumisa Nyaamolo, akabatela ntingo; mpe akasambela ntango iyèye. 38Ngonga'abaaka Simeona akasolola na Maliya mpe Zozefu, yo koto ayei mpe ambandi bokumisi Nyaamolo. Alobi mpo ya mwana Yezu o moto mumwèemwe owabaka akadzila na elikya eyeye 'te Nyaamolo atomi klisto mpo aya bikisa bato ba Yelusaleme. 39Ntango'eyailidza Zozefu yo na Malia bokokisi makambo mèeme dza waba mibeko mya Nyaamolo mikiloba, baolodzaka o galileya, o mboka yaba menyi Nazarete. 40Mwana Yesu akolaka mpe akomi mokolu na Ndzoto. Akomaka na mayele maike mpe Nyaamolo amopambodzi.
Yesu o ndako ya Nyaamolo
41Mobu na mobu baboti ba Yesu baba bakakè o Yelusaleme mpo bakasambelaka eyenga ya pasika#2:41 Pasika Yabaka enyanga eyabaaka banaba Isalaele bakasepela boumoi bwaba bwa boombo o ezipito. o lisanga dza bayuda bèebe. 42Ntango'eya kokisa Yesu mbula Dzomi na ibale (12 ANS), bakei nande o'eyenga dza'o momeseno. 43Ngonga'eya iila enyanga, baboti bande Malia na Zozefu baolodzaka o ndako kasi mwana waba Yezu aikalaka o Yelusaleme. Kasi bakoebaka te, 'te Yesu aikadzi liyu yo mpenza o Yelusalame. 44Baboti bande bakanisaka 'te alo ntei yawi na bato bababa naba mobembo mwawi. Kasi balandaka mokolo mobimba o mokanga. Nsima, babandi bomowai onteyi ya mabota mpe o baana bande. 45Kasi dza wakomodziaka ba te, baolodzaka o Yelusaleme mpo 'te bakamowaa. 46O nsima ya Mikolo miyato bakei lika modziya o lopango la tempelo, adzadzi o ntei ya batei ba mibeko akabaoka mpe akabatuna mituna. 47Bato bèebe bababa bakamooka, bakamwaka na mayele mande mpe nabiyano bibaba yo akaba ololedza. 48Wamoène Baboti bande, bakamoi mpendza, nampino nyango alobi nande 'te: "Mwana wanga! Otwadzi dzabo'émpo yaée? Nga na ongo tobei motema likolo tokoéwaa!" 49Nsima, Yesu abalobedzi 'te, bobei bokonsaa'ena likambo baa? Boebiko 'te, natei 'te naba o ndako ya tata wanga te? 50Kasi bakokebaka mpe bakodziaka ntina ya maloba mande te. 51Nsima enena, Yesu aolodzaka elongo na baboti bande o mboka Nazarete mpe aba na botosi o baboti bande. Kasi Malia aba akabomba sekele ya makambo mèeme bè o motema mwande. 52Yezu akolaka na ndzoto mpe na mayele. O yambo Nyaamolo mpe bato.
Iliyochaguliwa sasa
Lukasi 2: LIZ
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Libinza Bible by Beyond Translation is licensed under Creative Commons Attribution-ShareAlike 4.0 License.