Matayo 3
3
Tebeza ndia Yohana Mbati̱zi̱
(Maliko 1:1-8; Luka 3:1-18; Yohana 1:19-28)
1Ka tolo injo, Yohana Mbati̱zi̱ ai̱ya ke lungu ndia ka Yu̱deya nakitandika tebeza bhiyo; 2“Bhwesi̱ki̱eku̱ kibi ndianu̱ nanga kusali̱a ndia gulu ali bi̱ya.” 3Yohana andiye muluku mindia nabbi̱ Isaya amuongabe ndia agia bhiyo;
“Laso ndia nkpa atuka ke lungu nakigia bhiyo;
‘Bhubhongi̱se nesi̱yo ka Sali̱a,
nesi̱yo kindia akikolilia abene.’ ”#Isaya 40:3
4Ngoye ndia Yohana bhabha nibhakoli̱ ka sala-sala ngamiya, yalolaga ku̱du̱ ka ti̱naku̱du̱ ndia bhabhongosi̱ ka ngubu, toli̱ yabhuliaga bhangi̱ge na bhanjoki̱. 5Bhakpa ndibha ka tau̱ni̱ ndia ka Yelusalemu na kyalo ndia ka Yu̱deya na kyalo poni ndia abhi̱ bi̱ya na tu̱li̱ Yolodani bhai̱ya kindia Yohana abhi̱o. 6Bhakpa bhesi̱ki̱aku̱ kibi ndiabho toli̱ nakibhubati̱za ke tu̱li̱ Yolodani.
7No ndia abhutangia Bhafali̱sayo na Bhasadukayo bhamamadha nibhali ka bi̱kabho kindia abhi̱o andu̱lu̱ abhubati̱ze, abhugia bhiyo; “Bhenu̱ bhani̱ki̱ ndibha bhanjoka, andi ani̱ mindia abhuhabhu̱li̱ tetia fubilia ndia Mambombi̱ ndia aki̱ya bi̱kai̱? 8Bhukole kima ndia akiani̱sa eti Bhwesi̱ki̱eku̱ kibi ndianu̱. 9Toli̱ bhukulukweli̱li̱kana eti nanga bhuli bhanana Ibbulahi̱mu̱, Mambombi̱ kakibhufubilia. Akitoka gali̱a tali yoho bhai̱ bhanana Ibbulahi̱mu̱. 10Mambombi̱ atekani̱zi̱ luka zomba mili poni ndia kakikpetaku̱ mbu̱ka mabhonga toli̱ bhasumbe.
11“Nikibhubati̱zaga na li̱bho sa kwesi̱ki̱aku̱ no alibe mindia aki̱bi̱ka mindia anikoli̱ mani̱ toli̱ kigbokiliani̱ ku̱mba nkai̱to ndiaki. Akibhubati̱za na Mwoyo Mawelikana na kala. 12Adhaki̱ gba kitalo ndiaki ka kibhoko. Nesi̱ nkoli̱ akyetekani̱zaga wewa ngano ndiaki na kitalo, naye etekani̱zi̱ wewa bhakpa bhoponi. Abi̱sa mabhonga ka nguli toli̱ asu̱mba kisunga ka kala ndia kaki̱li̱mi̱kaga.”
Yohana Mbati̱zi̱ nakimbati̱za Yesu
(Maliko 1:9-11; Luka 3:21-22)
13Du̱mbi̱ Yesu nakituka ka Galilaya naki̱ya ke tu̱li̱ Yolodani andu̱lu̱ Yohana ambati̱ze. 14No Yohana nakingana bati̱zaki nakigia bhiyo; “Uwe ogbokiliani̱ nduwe bati̱zami, toli̱ obi̱ki̱ eti nikubati̱ze?”
15No Yesu naki̱nsi̱ki̱aku̱ bhiyo; “Odhuwe abhebhu, nanga ka mulingo yoho kigbokiliani̱ kola poni ndia Mambombi̱ akikabhaga.” Du̱mbi̱ Yohana nakibhala.
16Yohana ndia adhakia bati̱za Yesu, du̱mbi̱ nakituka ka li̱bho. Gulu naki̱oku̱dhana nakintangia Mwoyo mindia Mambombi̱ nali bhia bi̱mbo ka tukaki gulu naki̱nsi̱mabe. 17Du̱mbi̱ laso ndia nkpa nakituka gulu nakigia bhiyo; “Miyo andiye mi̱ki̱ mindiamo mu̱lu̱ku̱aki mindie ni̱nku̱ndi̱o toli̱ mindie nidhedhelu̱ naye.”
Iliyochaguliwa sasa
Matayo 3: KWAMBA
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© Wycliffe Bible Translators, Inc., 2025