Matthew 1
1
A puna o Jesus Christ
(Luk 3.23–38)
1Ta konei a ingoa oa puna o Jesus Christ, te afu o David, tera koia te afu o Abraham,
2Abraham te mmana o Isaac,
Isaac te mmana o Jacob.
Jacob te mmana o Judah ma ana taina.
3Judah te mmana o Perez ma Zerah, rau nana ko Tamar.
Perez te mmana o Hezron,
Hezron te mmana o Ram.
4Ram te mmana o Amminadab,
Amminadab te mmana o Nahshon,
Nahshon te mmana o Salmon.
5Salmon te mmana o Boaz, na nana ko Rahab,
Boaz te mmana o Obed,
na nana ko Ruth,
Obed te mmana o Jesse.
6Ma Jesse te mmana o David te Tii.
David te mmana o Solomon,
na nana te nofine o Uriah.
7Solomon te mmana o Rehoboam,
Rehoboam te mmana o Abijah,
Abijah te mmana o Asher,
8Asher te mmana o Jehoshaphat,
Jehoshaphat te mmana o Jehoram,
Jehoram te mmana o Uzziah.
9Uzziah te mmana o Jotham,
Jotham te mmana o Ahaz,
Ahaz te mmana o Hezekiah,
10ma Hezekiah te mmana o Manasseh,
Manasseh te mmana o Amon.
Amon te mmana o Josiah,
11ma Josiah te mmana o Jehoiachin ma ana taina
i te vasia ne fakataia kese ki Babylon.
12Ia tua o te fakataia anga ke oro ki Babylon, Jehoiachin te mmana o Shealtiel,
Shealtiel te mmana o Zerubbabel.
13Zerubbabel te mmana o Abiud,
Abiud te mmana o Eliakim,
Eliakim te mmana o Azor.
14Azor te mmana o Zadok,
Zadok te mmana o Achim,
Achim te mmana o Eliud.
15Eliud te mmana o Eleazar,
Eleazar te mmana o Matthan,
Matthan te mmana o Jacob.
16Ma Jacob te mmana o Joseph, te matua o Mary
ne nai faanaua ko Jesus
e ati ko Christ.
17Ta tera, e fuanga furu ma faa koa tau tupu ranga ne fakatafito mai ia Abraham kia David, e fuanga furu ma faa mai a David ki te fakataia ranga ki Babylon, ma e fuanga furu ma faa mai te fakataia ranga ki Babylon ki te vasia o te faanau ranga o Christ.
Te faanau ranga o Jesus Christ
(Luk 2.1–7)
18 #
Luk 1.27. Ta teinei te fai faanau mai ranga o Jesus Christ ne fai. Na nana ko Mary e fakkau soavaka koraua ma Joseph. Kae i vasia i mua koraua e fai ke avanga iei, ko Mary ku nai iroa ina maso koia ka nai faanaua te memea mai te Mauri Tapu o Tupua. 19Ko Joseph te tangata e fai fekauaki koa nea e tonu i nga vasia katoa. Kae ko Joseph se ne fifia ke fai ko Mary ke mata nonoa ia mata o te kano fenua, tera maanatu rei koia rau tausoa ke motu faka leku leku. 20Ta i na vasia ne maanatu faka peinei, te ʻangelʼ o te Ariki ne faka saa atu kia koia i tana mee, e muna atu kia koia, “Joseph, te afu o David, kau see mataku ke sau ko Mary mo ou nofine, natafito na manava naa mai te Mauri Tapu. 21#Luk 1.31.Ko Mary ka nai faanaua te tama tangata, ta ka faka ingoa ea kee ko Jesus – natafito koia ka nai faka saofia ko na kano fenua mai aratou sara.”
22Ta a nea katoa nei ne okotia, ku nai faka tonu sia pe nia ma te Ariki ne munaki i te ʻprophetʼ:
23“Te makene ka nofo ma na manava,
ka nai faanaua te tama,
tera koia ka ati ko Emmanuel”
(na atamai: “Tupua ia kotatou”).
24Tera i vasia o Joseph ne ara ake iei, koia ne fai tautari rei pe nia ma te ʻangelʼ o te Ariki ne muna atu kiei, tera sau arei ea koia ko Mary o fai na nofine. 25#Luk 2.21.Kae koraua se ne mee taanaki oko rei ki vasia ko Mary ku faanau aki tana tama tangata. Ta ati rei na ingoa e Joseph ko Jesus.
Iliyochaguliwa sasa
Matthew 1: TKP
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2025 Wycliffe Bible Translators, Inc.