Marka 1
1
Baptistma Jawhan naa Sityng Poai Saihnyak
(Matthaii 3.1–12; Luka 3.1–18; Jawhen 1.19–28)
1Nuatpaw Zaw#1.1 Acya kutjok caw haeyng Nuatpaw Zaw, tijyng myihtih khaw. Jesuh Khrit Sityang Poai acuːk saihnyak. 2Hngawpawe Isaiah jok hnguːt khyang:
“Nuatpawaw naa, ‘Ny hngoaimaw va ceepawe y tuːhlu,
yn cee nyang lyamsaa hai y si.’
3Doaiduka athaii pahuat apang,
Mawhpaw lyamsaa byih jyt;
‘yn tawk puːnpawk nyak lyam singsa byih jyt,’ y tii.”
4Baptisma Jawhan cee khongkhuca kuːh luu theilaa baptizen y bei.#1.4 Baptisma Jawhan cee khongkhuca kuːh luu theilaa baptizen y bei; acya kuːt jok cawvyng khy myi Baptisma Jawhen doaiduk kuːh lue theilaa, tala saih. “Pet duk kuːh hluːh nyak la jubaijei nyak baptisma bawng y susaih.” 5Judah pee jaa kuːh khyang haa laa Jerusalem luh a kuːh haa tomti Jawhan cengnga ym zet. Ym pet haa tomti saih awla Jordan tuiiguu vyng Jawhen cengnga baptisma ym khyammei giah.
6Jawhan cee sangsi hngua eyng tyakeitih suisyak dy, sawvuːn ziangjoii ziangei laa, khau laa doaiduːk khoituii y ei. 7Yn susaih khyang cee, “Keei thyak kyng phungan liantih, keei hnguva lu vy. Keei cee yn khu vyng kuːh khuphawtyap jawi kuːt khy shut hai tuan jonga. 8Keei cee nyangmi haa tuijyng baptisma ky bei luu jyang, ynbawlakhy yn naa cee muikhaw Cim myng baptisma bei jy,” y tinyak.
Jesuh naa Baptisma laa Hlumphlik Khyamnyak
(Matthaii 3.13—4.11; Luka 3.21,22; 4.1–13)
9Ynhnguva Jesuh cee Galilee pee Nazareth luh kuːh lu theilaa, Jordan tuijyng Jawhan cengnga baptisma y khyammei. 10Jesuh tui dukkuːh thooluu hnguva, huankhu hngawngei theilaa Muikhaw Cim cee khuːzaw pahuat bawva ynih huannaa komlue hlyi. 11#Mat 3.17; 12.18; Mar 9.7; Luk 3.22Yn hnguva huankhu kuːh thaii pahuat a luː “Nyang cee keei lung duk kuːh ky khiat khyang Zawpawe ny si,” tilaa y hyau.
12Yn pynnyng Muikhaw na Jesuh cee khongkhucaa tuːh hlyi. 13Khuhnguːp phiikip kkongkhuca a myi hnguva Khukhawng naa hlumhlik khyang y khyam lawh. Yn duːn nyng hyangsei pawngzawe haa dy y myi, yn hnguva huankhu ceepawe haa naa Jesuh ym lupan nyak.
Jesuh Naa Ngawaw Suitih Pahli Y Pan
(Matthaii 4.12–22; Luka 4.14,15; 5.1–11)
14Jawhan phehimm gyak pynyng, Jesuh cee Galilee pee jaa zet theilaa Nuatpaw sityang poai y susaih. 15#Mat 3.2“Acuːn ngawehlue, Nuatpaw teengpee cee lawilue hngyh. Jubaijei laa sityang poai jum byihjyt!” y tinyak.
16Jesuh Galilee tuiili kyam maa zet hnguva, ngawsuitih Simon laa y nau Andrew tuili jyng pykva khyak khyang y hnguh. 17Jesuh naa, “keei hngu lyklue hngih,” “Nyang hngih cee khyang hliangtih a ky thawn shyak ky” y tinyak. 18Yn haa naa ym pykva haa dyyi theilaa Jesuh hngulawng y hngih lykkei hlyi.
19Hnguva meihzawe paan nawva zet pynyng Zebedee zawpawe James laa y nau Jawhan lawng dukkuːh y hnguh. Yn hyih cee lawng dukka pykva y hngih sang. 20Sunshyang kawva yn haa y pannei hlyi, ym pawe Zebedee la lawng ngyng myitih hawsaw haa tawhnguːt awla hngulawng ym lykkei hlyi.
Muikhaw See Syt Nyak
(Luka 4.31–37)
21Jesuh laa hngulawnglyktih haa Jin hnguːp phawlu hnguva Kapanau luh a ym zet, Jesuh Sinakok ka zet theilaa y voang hnguva y cawkhyau. 22#Mat 7.28,29Yn cawkhyau khyang cee khyang hanaa ym muːn nyak, ibawthawnnyngmaatijyngcee yn haa eyng uppyngtih baw y cawk, tala tuattih baw cawkhyau si jo.
23Yn duːn nyng muikhaw see puhei khyamtih khyang pahuat yn haa sinakok dukka y myi. 24Yn cee “Nazareth luh zaw Jesuh, keeimi eyng ibaw ny luːnyak maa? Keeimi shimphak haija ny luu vei? Nyang u tinyak khyang ky hnguat Cim tih Nuatpaw pahuat ny si!” tila y pang.
25Jesuh naa “poaija myih, yn dukka kuːh lyt,” y tinyak.
26Muikhaw see naa yn khyang hiev shyak theilaa yn khyang dukkuːh thaaeyng pang theilaa y lyt bua. 27Khyang haa naa muːnnaw awla, “Ni cee ibyang maa? tilaa pahuat laa pahuat ym hngijei tawng. Uppyngtih cawkhyau nyak puitih atha tawk kei! Yn hyau khyang haa cee Muikhaw see haa naa khy yn khyau ym ngei” ym tii.
28Yn Sityang haa cee Galilee naampung tomti jyng a jyang nga pau jok giah.
Jesuh Na Khyang Panu Y Kaang shyak
(Matthaii 8.14–17; Luka 4.38–41)
29Sinakok kuːh lyt hlyi hnguva, James laa Jawhan dy Simon laa Andrew imm maa ym zet. 30Simon pi cee kua theila ip duːn nyng hngyngei, y nih sityang Jesuh eyng a jyang nga ym saih jei. 31Yn hnguva Jesuh cee yn hngutaw cenga zet theila y kut tyng y thooh. Yn hnguva ynih cee kaang bua theilaa khin y khinnyak bua.
32A muːlyam Khumik kyak pynnyng, Jesuh cenga kaang tih kaw tomti laa tusee puhei khyang haa ym lupui nyak. 33Luh dukkuːh khyang tomti kyttung ngyng ym dynnei, 34Jesuh naa nehnyang a juːjuː y kaansyak. Ynih na khy puhei tih tusee haa panu y shyt. Ynbawlakhy tusee haa na Jesuh u maa tinyak khyang ym hnguat khiannyng Jesuh na yn haa khyau shyak jo.
A Hiivnaw Duːn naa Jesuh Hngihminnei Nyak
(Luka 4.42–44)
35Anguu Khuthuaih hluanna, Jesuh cee thoo theilaa, imm ma kuːh zet theila hiv nawva, y hngihminnei. 36Yn hnguva Simon laa y kyi tih na ym shuijok, 37Jesuh ym hnguh hnguva, “Khyang haa na nyang ym shuijok,” ym tinyak.
38Jesuh na, “Alawipai nyak acya naam haa khy zet pawe. Ynnija khy ky susaih lawh hngyam my. Yn nyy tawk keei ky lu,” y tinyak.
39 #
Mat 4.23; 9.35 Yn khianyng Galilee pee lyaam ma zet theila, ym Sinakok haa dukka y susaih, pynnyngcee tusee haa khy y shyt.
Jesuh naa Buhlitih Khyang Pahuat Kaan Syak
(Matthaii 8.1–4; Luka 5.12–16)
40Buhlitih khyang pahuat cee y cengnga khukdya, “Ny luːei nyak myi jyngcee keei cim nyak ny bei nyn”#1.40 keei cim nyak ny bei nyn: Ni buhli tihaa khyang pahuat thuːmcian bawva kuːk syak nyn jo. tilaa y khawhei.
41Jesuh na y maannei.#1.41 maannei; acya kutjok caw vyng lungtyn, tijyng myi. Y kut tyng ynih dovei theilaa y thyaam, “keei naa ky luːnyak, cimbua!” y tinyak. 42Yn khyang buhlineh khuːk theilaa y cimbua hlyi. 43Jesuh na sathiih bei theilaa y tuːh bua hlyi, 44“Keei na kaang syak bua khyang uvyng khy saih khawh byih. Ynbawlakhy zet, Jahenpaw cengnga ny pumhngaw duan voaih tilaa ny cimbua nyak saksi khyang na hnguat nyak ky Mosee tala bawva henbawn caaibua byih,” y tinyak.
45Yn zet theilaa canaw kawva khyau phawk kei khianyng, yn sityang cee pau jok giah. Yn khiannyng Jesuh cee atha luh aa voang nyn tii jo, yn hnguva a hiiv nyak duːn pumthua a y myijei. Ynbawlakhy naampung tyngnyng kuːh khyang haa ynih cengnga ym luu shoi.
Iliyochaguliwa sasa
Marka 1: NTHTB25
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2025 by the Word for the World International