Umatiu 5
5
Ujeso a fe kikwu kisọm kima he Ukwel
1Ujeso a nde bendi gbam be ndu ba hwaa le he, a kung mbo le kwu he kibee-ukwel. Bendi-utung bema be le kaa kel-kel fe-e. 2A keb abe biwọm ahwọ-ale.
Igọ igyang angyel
(Luk 6:20-23)
A de le:
3“Kukwun ku yi ke bendi abe be ngye le ki fọng abe le Unim.
Kiteng kusu lifung-atabe ki yi kibel a.
4Kukwun ku yi ke bendi abe be yi le kimbwee,
Unim u ba tie le be.
5Kukwun ku yi ke bendi abe be keb kuhwobel be he itang.
Be ba za lishi igye.
6Kukwun ku yi ke bendi abe be yi le kigyọ kaang le tyang be shi ashi Unim a kee.
Unim u ba kwun abe kigyọ.
7Kukwun ku yi ke bendi abe be nde bendebel beshi.
Unim u ba nda abe befe ọ beshi.
8Kukwun ku yi ke bendi abe atyam abel a yi ataa-ataa.
Be ba nda Unim.
9Kukwun ku yi ke bendi abe be shi ikwun.
Unim u ba ko abe le bebwaa-ma.
10Kukwun ku yi ke bendi abe be kpe kingie
le gbe be shi kinunung ashi Unim a kee le
be shi.
Be yi le abwo he kiteng kusu lifung-atabe.
11“Kukwun ku yi ke men he kunyọng ahwu bendi be bia amen, be teb le men, be be bitaa iman atyetye fe men likọye ma yi ke-m. 12Ma yal gọ likọye Unim a ndọ amen kuke kukandi he lifung-atabe. Kitaa kimen i na bendi be ma shi bitye-ugie kisọm Unim abe le-iti.
Bendo le kikung-gboo
(Mak 9:50; Luk 14:34-35)
13“Ma yi bendo a ke igye. Ukpọ gbe bendo be tem nyin he ungwu ye, be nya sha abe na a be tem nyin? Be tem hwọ kifọng ye. Bendi be kung abe wu le hel, be tem abe abee gbe.
14“Ma mbee yi a na kikung-gboo a ke igye. Ushu angwu be tye pwọm he lishi ukwel u ha ndu kwa he kundyel ye. 15Undi u ha ndu gba kimọ-kinde tem le kitetel sha ashi ye. U kung ashi la ndọ he kusi he kudyan ushọm a, he undi uyang-yang angwu u yi ha he ushọm u nde a. 16Kitaa kimen na ki yi kpe-kpe le ma tyang kikung-gboo kimen ki taa he bendi be nde aki anunung amen, be kung ipee ke Atyamen angwu he lifung-atabe.”
Afele sho Iten
17Ujeso a de be le, “Ma shi gim le mi be mi mbee le Iten Umosis le biwọm abi bitye-ugie kisọm Unim bi maa hwọ bendi a ye. Mi be mi be fe sho bi a, mi mbee le bi a ye. 18Kigyang-kigyang mi da-a le, likpe ken ọ le he Iten li ha ndu nim ye kpam lifung-atabe le igye bi gbe mbee, biwọm puu bi fe lishi. 19Undi uyang-yang angwu a ban uten ken ọ angwu a zen hwo puu, u hwọ bendema le be mbee ban uten umen ana, u ba kwa undi angwu u yi he kukpo ye hwo he kiteng kusu lifung-atabe. Ukpọ undi angwu a ndọ angi puu, u hwọ bendema le be ndọ angi, ha u ba kwa ukandi a he kiteng kusu lifung-atabe. 20Mi kee le ma ngye le gbe ma shi kinunung hwo bitisha Iten befe le bendi Iferesis ye, ha kiteng kusu lifung-atabe ki yi ke men ye.”
Kihwu
21“Ma gyo le be maa da bendi le-iti le be gwu undi ye.#5:21 Ligye 20:13 Undi angwu a gwu undi, be maa he ushe he ukoto. 22Mi ufe mi de men kanaa-anaa i le undi angwu a fel ngyo#5:22 He ashia asuso be fe le fa le atan-lengi ọ fe unwaa-nde,#5:22 Ashin ki yi uwanam undi ufufe a ye, ki yi undi uyang-yang angwu abọng ha Unim a. be maa he ushe he ukoto. Undi angwu a ko unwaa-nde le undi-ilaa, be maa he ushe he ukoto. Angwu a ko unwaa-nde le kikpelye undi, u gya he kinde.
23“He ashin, gbe wo kam le wo ka Unim kuke, wo le fel he kiteng ashang-ale, wo ha wel le unwaa-na u yi linaa ha awo, 24wo kung kuke kugang ndọ ha he kiteng ashang-ale, wo tem nya kukwo-kukwo le shi ikwun he ahe, wo ha tem be kung kuke kugang ke Unim.
25“Gbe undi a ko-a ushe, wo shi ikwun he ahe akikye ma ukpọng ma ha wu he ukoto. Gbe na a ye, u ta le wo la ka umaa-ishe, umaa-ishe u kwa-a ke angwu idasha-nda, angwu idasha-nda u kpa-a le fe he igaadye. 26Kigyang-kigyang mi da-a le, wo ba kwa ha he igaadye kpam wo gbe hwee unde angwu be tang a puu.”
Agbele ipel ha ungye undi le ukyeb undi
27Ujeso a mbee de le, “Ma ma gyo le Iten i de le, undi u gbe ipel ha undi ususo fem ungye-ma ọ, nyọng ukye-ma ọ tyang ye.#5:27 Ligye 20:14 28Mi ufe mi de men kanaa-anaa i le undi angwu a nde ungingye bel he, ha a shi kiban agbele ipel he ahe lityam. 29He atan-lengi angwun gbe utọng-shi ugang angwu lizen u sha-a le wo shi kiban, wo yii waa he tyang le hel. Ki ngbeb le ligwo ligang li waa nim hwo ashi le wo gye he kinde le agwo agang puu. 30Gbe kubwo lizen kugang ku sha-a le wo shi kiban, wo tang ahwu tyang le hel. Ki ngbeb le ligwo ligang li waa nim hwo ashi le wo gye he umọ-kinde le agwo agang puu.”
Libee aban-ale
(Mat 19:9; Mak 10:11-12; Luk 16:18)
31“Iten i mbee de le undi angwu a ndo ungye-ma u fee kushia libee aban-ale ke-e.#5:31 Iten lefee 24:1 32Mi ufe mi de men le gbe undi a ndo ungye-ma kididing fem ashi le ungye angwu ha a gbe ipel ha undi ususo tyang, ha a shi ungye-ma le u shi kiban agbele ipel gbe a gye libee lisuso. Undi angwu a kpeb he ọ titi a shi kiban agbele ipel.”
Atam-ale
33“Ma mbee gyo le be maa da bendi le-iti le be shi ban ukyeb ubel ye, be shi ashi be kyeb he ashi Ada le be sha. 34Mi ufe mi de men le he kunyọng ahwu ma ke undi ukyeb ma shi tam kiwọm ye: ma shi tam lifung-atabe ọ ye, likọye li yi kiteng kusu Unim a. 35Ma tam igye ye, likọye i yi kiteng ashi a pwọm abee ama a. Ma tam Ujeruselem ye, likọye u yi kiteng Usu ukandi a. 36Ma shi tam lishi limen ọ ye, likọye ma sha ugil umen ken ọ le u bel ubi mbee, ngwu ma shi-e u ngyọ ushi-ushi mbee ye. 37Ashi ki yi le ma kee-kee kọng ki yi le eng ọ engheng, ma ki mbee. Kiwọm kiyang-yang ashi ma fel kọng fem ashin tyang ki ba le ha usu bibibi a.”
Utọng-shi ke Utọng-shi
(Luk 6:29-30)
38“Ma gyo le Iten i kọng le undi angwu a hwọ undi utọng-shi, be hwọ he uma ọ titi, undi angwu a gbung undi ushang, be gbung he uma ọ titi.#5:38 Ligye 21:24; Iten ashang-ale 24:20; Iten lefee 19:21 39Mi ufe mi de men le gbe undi ubibi a shi ban-a, wo shi tem he utyang ye. Gbe undi a kpam-a kubwo he kunaa ahwu lizen, wo bel ahwu limbel ndọ he he u mbee kpam. 40Gbe undi a kwa-a gye he ukoto kpe kung aliga agang angi wo shi le he afee, wo mbee waa angi le he igye ọ ke-e pel. 41Gbe undi a kwa-a he ikeb le wo gye utung ahe umail ken, wo gye utung he ahe imail ifee. 42Gbe undi a nyọng-a kiwọm, wo ke-e ashi, gbe undi a be le wo pwee he kiwọm, swan ye.”
Benyin ha bendi-linaa
(Luk 6:27-28, 32-36)
43“Ma gyo le Iten i de le ki nyin amen le bendemen, ma tel bendi-linaa bemen.#5:43 Iten ashang-ale 19:18 44Ukpọ mi ufe mi de men le, ki nyin amen le bendi-linaa bemen, ma kọng ha Unim le u ke bendi abe be shi kibibi ha amen kukwun. 45Gbe ma shi na, ma ha kwa bebwaa Atyamen angwu he lifung-atabe. U sha ishu ima i bya biwọm bendi bebibi ọ, abe benunung ọ nya kitaa ken, u shi umbwo u ndọ wu biwọm bendi abe be shi kinunung le abe be shi kibibi. 46Gbe ki nyin amen le bendi abe ki nyin abe le men befe-befe a, kibang ki kwu lifem limen? Ha ma ndọ lishi le Unim u ke men kukwun ye, likọye bendi abe be kpe ukpanda ọ be yi le benyin abe kitaa ana. 47Gbe ma kọng le bendi bemen befe-befe a, kibang ashi ma shi hwo bendi abe be teng? Bendi abe be bọng ha Unim ye ọ be sha ashin ye a? 48Ma kwu yilididi nya a na Atyamen angwu he lifung-atabe u yi.”
Iliyochaguliwa sasa
Umatiu 5: KUIL
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Version™ New Testament
Copyright © 1982, 2025 by Biblica, Inc.
Used with permission.
All rights reserved worldwide.
Umatiu 5
5
Ujeso a fe kikwu kisọm kima he Ukwel
1Ujeso a nde bendi gbam be ndu ba hwaa le he, a kung mbo le kwu he kibee-ukwel. Bendi-utung bema be le kaa kel-kel fe-e. 2A keb abe biwọm ahwọ-ale.
Igọ igyang angyel
(Luk 6:20-23)
A de le:
3“Kukwun ku yi ke bendi abe be ngye le ki fọng abe le Unim.
Kiteng kusu lifung-atabe ki yi kibel a.
4Kukwun ku yi ke bendi abe be yi le kimbwee,
Unim u ba tie le be.
5Kukwun ku yi ke bendi abe be keb kuhwobel be he itang.
Be ba za lishi igye.
6Kukwun ku yi ke bendi abe be yi le kigyọ kaang le tyang be shi ashi Unim a kee.
Unim u ba kwun abe kigyọ.
7Kukwun ku yi ke bendi abe be nde bendebel beshi.
Unim u ba nda abe befe ọ beshi.
8Kukwun ku yi ke bendi abe atyam abel a yi ataa-ataa.
Be ba nda Unim.
9Kukwun ku yi ke bendi abe be shi ikwun.
Unim u ba ko abe le bebwaa-ma.
10Kukwun ku yi ke bendi abe be kpe kingie
le gbe be shi kinunung ashi Unim a kee le
be shi.
Be yi le abwo he kiteng kusu lifung-atabe.
11“Kukwun ku yi ke men he kunyọng ahwu bendi be bia amen, be teb le men, be be bitaa iman atyetye fe men likọye ma yi ke-m. 12Ma yal gọ likọye Unim a ndọ amen kuke kukandi he lifung-atabe. Kitaa kimen i na bendi be ma shi bitye-ugie kisọm Unim abe le-iti.
Bendo le kikung-gboo
(Mak 9:50; Luk 14:34-35)
13“Ma yi bendo a ke igye. Ukpọ gbe bendo be tem nyin he ungwu ye, be nya sha abe na a be tem nyin? Be tem hwọ kifọng ye. Bendi be kung abe wu le hel, be tem abe abee gbe.
14“Ma mbee yi a na kikung-gboo a ke igye. Ushu angwu be tye pwọm he lishi ukwel u ha ndu kwa he kundyel ye. 15Undi u ha ndu gba kimọ-kinde tem le kitetel sha ashi ye. U kung ashi la ndọ he kusi he kudyan ushọm a, he undi uyang-yang angwu u yi ha he ushọm u nde a. 16Kitaa kimen na ki yi kpe-kpe le ma tyang kikung-gboo kimen ki taa he bendi be nde aki anunung amen, be kung ipee ke Atyamen angwu he lifung-atabe.”
Afele sho Iten
17Ujeso a de be le, “Ma shi gim le mi be mi mbee le Iten Umosis le biwọm abi bitye-ugie kisọm Unim bi maa hwọ bendi a ye. Mi be mi be fe sho bi a, mi mbee le bi a ye. 18Kigyang-kigyang mi da-a le, likpe ken ọ le he Iten li ha ndu nim ye kpam lifung-atabe le igye bi gbe mbee, biwọm puu bi fe lishi. 19Undi uyang-yang angwu a ban uten ken ọ angwu a zen hwo puu, u hwọ bendema le be mbee ban uten umen ana, u ba kwa undi angwu u yi he kukpo ye hwo he kiteng kusu lifung-atabe. Ukpọ undi angwu a ndọ angi puu, u hwọ bendema le be ndọ angi, ha u ba kwa ukandi a he kiteng kusu lifung-atabe. 20Mi kee le ma ngye le gbe ma shi kinunung hwo bitisha Iten befe le bendi Iferesis ye, ha kiteng kusu lifung-atabe ki yi ke men ye.”
Kihwu
21“Ma gyo le be maa da bendi le-iti le be gwu undi ye.#5:21 Ligye 20:13 Undi angwu a gwu undi, be maa he ushe he ukoto. 22Mi ufe mi de men kanaa-anaa i le undi angwu a fel ngyo#5:22 He ashia asuso be fe le fa le atan-lengi ọ fe unwaa-nde,#5:22 Ashin ki yi uwanam undi ufufe a ye, ki yi undi uyang-yang angwu abọng ha Unim a. be maa he ushe he ukoto. Undi angwu a ko unwaa-nde le undi-ilaa, be maa he ushe he ukoto. Angwu a ko unwaa-nde le kikpelye undi, u gya he kinde.
23“He ashin, gbe wo kam le wo ka Unim kuke, wo le fel he kiteng ashang-ale, wo ha wel le unwaa-na u yi linaa ha awo, 24wo kung kuke kugang ndọ ha he kiteng ashang-ale, wo tem nya kukwo-kukwo le shi ikwun he ahe, wo ha tem be kung kuke kugang ke Unim.
25“Gbe undi a ko-a ushe, wo shi ikwun he ahe akikye ma ukpọng ma ha wu he ukoto. Gbe na a ye, u ta le wo la ka umaa-ishe, umaa-ishe u kwa-a ke angwu idasha-nda, angwu idasha-nda u kpa-a le fe he igaadye. 26Kigyang-kigyang mi da-a le, wo ba kwa ha he igaadye kpam wo gbe hwee unde angwu be tang a puu.”
Agbele ipel ha ungye undi le ukyeb undi
27Ujeso a mbee de le, “Ma ma gyo le Iten i de le, undi u gbe ipel ha undi ususo fem ungye-ma ọ, nyọng ukye-ma ọ tyang ye.#5:27 Ligye 20:14 28Mi ufe mi de men kanaa-anaa i le undi angwu a nde ungingye bel he, ha a shi kiban agbele ipel he ahe lityam. 29He atan-lengi angwun gbe utọng-shi ugang angwu lizen u sha-a le wo shi kiban, wo yii waa he tyang le hel. Ki ngbeb le ligwo ligang li waa nim hwo ashi le wo gye he kinde le agwo agang puu. 30Gbe kubwo lizen kugang ku sha-a le wo shi kiban, wo tang ahwu tyang le hel. Ki ngbeb le ligwo ligang li waa nim hwo ashi le wo gye he umọ-kinde le agwo agang puu.”
Libee aban-ale
(Mat 19:9; Mak 10:11-12; Luk 16:18)
31“Iten i mbee de le undi angwu a ndo ungye-ma u fee kushia libee aban-ale ke-e.#5:31 Iten lefee 24:1 32Mi ufe mi de men le gbe undi a ndo ungye-ma kididing fem ashi le ungye angwu ha a gbe ipel ha undi ususo tyang, ha a shi ungye-ma le u shi kiban agbele ipel gbe a gye libee lisuso. Undi angwu a kpeb he ọ titi a shi kiban agbele ipel.”
Atam-ale
33“Ma mbee gyo le be maa da bendi le-iti le be shi ban ukyeb ubel ye, be shi ashi be kyeb he ashi Ada le be sha. 34Mi ufe mi de men le he kunyọng ahwu ma ke undi ukyeb ma shi tam kiwọm ye: ma shi tam lifung-atabe ọ ye, likọye li yi kiteng kusu Unim a. 35Ma tam igye ye, likọye i yi kiteng ashi a pwọm abee ama a. Ma tam Ujeruselem ye, likọye u yi kiteng Usu ukandi a. 36Ma shi tam lishi limen ọ ye, likọye ma sha ugil umen ken ọ le u bel ubi mbee, ngwu ma shi-e u ngyọ ushi-ushi mbee ye. 37Ashi ki yi le ma kee-kee kọng ki yi le eng ọ engheng, ma ki mbee. Kiwọm kiyang-yang ashi ma fel kọng fem ashin tyang ki ba le ha usu bibibi a.”
Utọng-shi ke Utọng-shi
(Luk 6:29-30)
38“Ma gyo le Iten i kọng le undi angwu a hwọ undi utọng-shi, be hwọ he uma ọ titi, undi angwu a gbung undi ushang, be gbung he uma ọ titi.#5:38 Ligye 21:24; Iten ashang-ale 24:20; Iten lefee 19:21 39Mi ufe mi de men le gbe undi ubibi a shi ban-a, wo shi tem he utyang ye. Gbe undi a kpam-a kubwo he kunaa ahwu lizen, wo bel ahwu limbel ndọ he he u mbee kpam. 40Gbe undi a kwa-a gye he ukoto kpe kung aliga agang angi wo shi le he afee, wo mbee waa angi le he igye ọ ke-e pel. 41Gbe undi a kwa-a he ikeb le wo gye utung ahe umail ken, wo gye utung he ahe imail ifee. 42Gbe undi a nyọng-a kiwọm, wo ke-e ashi, gbe undi a be le wo pwee he kiwọm, swan ye.”
Benyin ha bendi-linaa
(Luk 6:27-28, 32-36)
43“Ma gyo le Iten i de le ki nyin amen le bendemen, ma tel bendi-linaa bemen.#5:43 Iten ashang-ale 19:18 44Ukpọ mi ufe mi de men le, ki nyin amen le bendi-linaa bemen, ma kọng ha Unim le u ke bendi abe be shi kibibi ha amen kukwun. 45Gbe ma shi na, ma ha kwa bebwaa Atyamen angwu he lifung-atabe. U sha ishu ima i bya biwọm bendi bebibi ọ, abe benunung ọ nya kitaa ken, u shi umbwo u ndọ wu biwọm bendi abe be shi kinunung le abe be shi kibibi. 46Gbe ki nyin amen le bendi abe ki nyin abe le men befe-befe a, kibang ki kwu lifem limen? Ha ma ndọ lishi le Unim u ke men kukwun ye, likọye bendi abe be kpe ukpanda ọ be yi le benyin abe kitaa ana. 47Gbe ma kọng le bendi bemen befe-befe a, kibang ashi ma shi hwo bendi abe be teng? Bendi abe be bọng ha Unim ye ọ be sha ashin ye a? 48Ma kwu yilididi nya a na Atyamen angwu he lifung-atabe u yi.”
Iliyochaguliwa sasa
:
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Version™ New Testament
Copyright © 1982, 2025 by Biblica, Inc.
Used with permission.
All rights reserved worldwide.