Luka 2
2
Yeesu ɓɔɔri ani
Mat 1:18-25
1Yɛɛ bɔk-ɛnɔ, gbɛ̧ɛ̧ aʼ ogus hɛk Rɔmmɔ oppo o po ya̧a̧ doo ve waʼ náa vey kanna o hɛkpa nɔ vey. 2Há̧a̧ ve waʼra ɛnɔ, bɔk bi̧i̧ non, ɛnɔ kirinus bɔk buu hɛk siriya yɔ. 3Náa ve tɛʼ Ve tak dɛ̧ɛ̧ nii von, nɛ o daŋŋe daŋŋe. 4Zozɛf sɛw o luu kap Nazarɛt hɛk Galile nɔ oppo o dɔk kap Bɛtɛlɛm hɛk Yuuda, gɓɛ̧ɛ̧ Davit zɛɛ ɓɔɔ tin nɔ oppo; Ɛn Zozɛf o Davit luk ani vin sɛw. 5O tak nii an dɛ̧ɛ̧ra tuu, vegare gbaare an Maari daŋ, Maari bɔk oy pə̧ə̧re maa. 6Bɔk vey Bɛtɛlɛm tuu nɔ, Maari yo̧o̧ wɔɔzii an gbɔyrɛ. 7O ha̧a̧ hɛkpa tan wa̧ppa, tan kɛŋ ani. O waana sàmmá, hogaa yɛɛ ve pora hɛn za̧a̧n vɛ lɛm tin nɔ oppo, moò bɔk ve hagin gay ka̧a̧ ka ve dɔ tin nɔ yɛ nɛy.
Go̧o̧ge zə̧ə̧ an zɔʼ hən náa laa tɛ̧ɛ̧ o ve po
Mat 1:18-25
8Hɛk da̧a̧ ɛnɔ oppo vin, náa laa tɛ̧ɛ̧ zɔʼ ve kan han vey laa hɛn za̧a̧n von vɛ vinni. 9Gbɛ̧ɛ̧ kɛŋ zə̧ə̧ an zɔʼ yaa zee vorɛ, Gbɛ̧ɛ̧ kɛŋ gbəəm an kəkgin vo yɛɛ dɛ̧ɛ̧ta, ɛnɔ doo kɔ vorɛ kpɛŋ. 10Ɛn zə̧ə̧ nɔ feet vo: «doo do kɔ vo sɛ, mi pan voy mɔ za̧ǎ̧ náa ve tɛʼ vey bɛllaa kpɛŋ: 11vi̧i̧ munɛ wa̧y de sɔt vora nɔ, o ɓɔɔ de Davit o kare o kiris gbɛ̧ɛ̧ kɛŋ ƴɔ. 12Hɛn de it vora ka vo gaaa ze nɔ de nɛ: voy zee tan waa nɔ ve waana de sàmmá, o ut de yɛɛ vey pora hɛn za̧a̧n vɛ lɛm tin nɔ oppo». 13Ɛtuu vin, zə̧ə̧ zɔʼ ve duʼza̧a̧ ve siy bɛlba, ve sɔŋ vere zə̧ə̧ ɛnɛy, ve gbəŋ Go̧o̧ge de bɛlba ve fee:
14«Gbəəm kaa kan Go̧o̧ge de bɛlba nɔ oppo bɛlti̧i̧ ba gaŋ gɔɔ, sosin, do yaa hɛkpa, náa Go̧o̧ge hi̧i̧ vo nɔ o ve po!»
Náa laa tɛ̧ɛ̧ ve tak bɛtɛlɛm
15Zə̧ə̧ nɔ ve luu ɛ vo ve kə dɔk bɛlba kəzəkkɔ, náa laa tɛ̧ɛ̧ nɔ ve feezin o ve yɛɛ ba: «ba luu gbɔ tak vo bɛtɛlɛm: ba tak to vo hɛn zee ba vo nɛy, hɛn Gbɛ̧ɛ̧ kɛŋ it ba vo nɛy». 16Ve yak luu tak nɔmpo, ve zee Maari vere Zozɛfi, tan əən waa nɔ ut de yɛɛ ve pora hɛn za̧a̧n vɛ lɛm tin nɔ oppo. 17Ve fee ka ve həʼə kəzəkɔ, ve òo hɛn zə̧ə̧ nɔ ke oot vo tan əən waa nɔ oppo nɛy. 18Náa ve tɛʼ ve kii hɛn náa laa tɛ̧ɛ̧ nɔ vey oora nɔ kɔ vo bit. 19Maari so hɛn ɛnɔ ve tɛʼ o si̧i̧ba, kan vəʼəra oy tuŋ. 20Pik an náa laa tɛ̧ɛ̧ nɔ ve iŋ yana ve kərɛ. Ve zɛp Go̧o̧gerɛ, ve gbəŋŋa moò hɛn ve kii nɛy vere hɛn ve hə nɔ vɛ sɛw tɛʼ, ɛnɔ hɛn nɔ ve tɛʼ daa too zə̧ə̧ nɔ bɔk feet vo nɔm.
Ve ya̧a̧za Yeesu nii
21Tan ɓɔɔ kɔ dɔʼ naarupa, pig an yɛɛ lii tan nɔ dɔŋ tannaa, ve ya̧a̧za nii an Yeesu, nii ɛnɔ, Go̧o̧ge zə̧ə̧ an bɔk de itta nɔ, naʼan bɔk dɔnna pə̧ə̧ dee yɛ.
Ve it Yeesu Go̧o̧ge ligi
22Yɛɛ lii Zozɛf vere Maari, ka ve kɔ hɛn Mɔyi̧zə moò buu an fee nɛy, ka ve dȩȩzi fo̧o̧ voni. Ve pan tan nɔ Go̧o̧ge lik zeruzalɛmmɔ oppo ka ve tak iza Gbɛ̧ɛ̧ kɛŋŋi, 23Ɛnɔ ve dɛ̧ɛ̧ de Gbɛ̧ɛ̧ kɛŋ o moò buure: «tan wa̧p kɛŋŋɔ ve tɛʼ vey kanna tɔŋ ba Gbɛ̧ɛ̧ kɛŋ ani». 24Zozɛf vere Maari ve po hɛn kɔ maak Gbɛ̧ɛ̧ kɛŋ moò buu an fee nɔ tin, ve pani kək itto ongɛɛ hi̧i̧m naʼ wagaa ve itto. 25Wa̧y zɔʼ bɔk zeruzalɛm tuu, nii an Simeyɔŋ. Wa̧y ɛnɔ o sȩȩ Go̧o̧ge o timbarɛ, bɔk o kɔza Go̧o̧ge so̧o̧tɛ, bɔk oy laa wa̧y kaa de sɔ̌tta zik islayɛllɛy. Go̧o̧ge Fəəm dȩȩt an bɔk kanga oy 26bɔk feeza bo vɔn kere yɛ, boy hə̧ra kiris Go̧o̧ge de yaʼaay nɔ doʼ. 27Fəəm dȩȩt yaʼ tak simiyɔŋ yo̧o̧n ɛnɔ, Go̧o̧ge ligi. Yeesu kɛŋ an ve pan tan waa von ka ve tak kɔza hɛn moò buu fee nɛy. 28Simiyɔŋ ɓa tan nɔ o naʼa kə dɛnza Go̧o̧ge naak fee: 29«Gbɛ̧ɛ̧ kɛŋ, hɛn bɔk mɔ bɛni nɔ kɔ ma: ɓɔllɛ kaam ɛ kɔm ak mɔn kaa vɔ za̧a̧re. 30Mi hə sɔri mɔn vere nɔt min ma, 31Sɔri ɛnɔ bɔk mɔ gak zikkɔ ve tɛʼ, o ve tinba nɛy: 32O yɛɛ dȩȩt de izaa zik duʼ hɛkpa nɔ vɛ ka ve gaam ze nɔ yɔ, de fira zik mɔn Islayɛllɔ gbəəm ani».
Simiyɔŋ de moò hɛn de yaa daa nɔ vɛy
33Yeesu Baʼan vere naʼan ve kii hɛn simiyɔŋ de oora tan nɔ o oppo nɔ kɔ vo bit. 34Simiyɔŋ su vo tin, kə feeza maari, Yeesu naʼan: «Náa ve duʼza̧a̧ Islayɛlle vey wannaa, zɔʼ ve luu kəra bɛlba tan mɔn ɛnɔ o moòre. Oy bi̧i̧ Go̧o̧ge hɛn itta ani; Ɛn náa vey kiizinna yɛ. 35O yaa vuksi moò vəʼəra ɗin náa o ve si̧i̧ ba nɔ ve tɛʼ yɛɛ dȩȩte, ɛn maari, mɔy, fo̧o̧ ho̧o̧k de pɛnna vɔ̂k mɔn too pak bindɛl vin.
Anna de dɛnzaa Go̧o̧ge naak Yeesu moò ani
36Waa kep zɔʼ Go̧o̧ge yaʼyɛɛ an bɔk tin sɛw, nii an Annay, o Fanuɛl tan ani, Asɛr o lukke. Bɔk o gbo̧o̧ ma kpɛŋ. Bɔk zɔɔga wanaa bɔk ɓaʼa o yukke nɔ vɛll guttambe, 37Pik an o kan kuu, vɛll an bɔk gbɔ wɔɔk natto zoo natto. Anna bɔk luu ɛn Go̧o̧ge lik an yɛ, ɛn o kɔza Go̧o̧ge kɔmma yo̧o̧ vere vi̧i̧ tɛʼ, hɛn kȩȩ ba vere yak faara ba. 38Bɔk o gbɔy ɛtuu vin o dɛnza Go̧o̧ge naaka, kə moò tan nɔ moò an náa bɔk vey laa, Go̧o̧ge boy sɔ̌tta Zeruzalɛmmɔ o ve po.
Zozɛf vere maari ve Kə tak Nazarɛt
39Yeesu kɛŋ an ve kɔ si̧t hɛn Gbɛ̧ɛ̧ kɛŋ moò buu an fee nɔ tɛʼ kəzəkkɔ, ve kəgi vo tak Galile, o ve kare Nazarɛtɔ. 40Tan nɔ oy naariba, oy gɔtii tin. Moò gaa hi̧ʼ o si̧i̧ ba Go̧o̧ge si̧i̧ za̧a̧ an kanga oy.
Yeesu oy Go̧o̧ge ligi vɛll boʼ zoo itto ba
41Vɛl tuŋ, Yeesu kɛŋ an bɔk vey takka zeruzalɛm duʼ pak kɔraa. 42Yeesu vɛll an gbɔ boʼ zoo itto nɔ ve takki vo duʼ nɔ oppo daŋ too tul von fee nɔm. 43Duʼ nɔ vəə kəzəkɔ, ve luu kərɛ, ɛn tan waga Yeesu nɔ o pəəy an Zeruzalɛm, kɛŋ an ve gaanɛ. 44Ve tu̧u̧ nɔ ka bore tɔgaa náa ve daŋ. Ve ɛm yo̧o̧ dɔʼ daŋga. Ve bi̧i̧ teee eek von vɛ, o ve po vere gbaare von vɛ o ve po nɔn, 45Ɛn ɗaa, ve zeena yɛ. Ve ɗɛɛ kə tak Zeruzalɛm ka ve teee oppo. 46Yo̧o̧ dɔʼ ta̧a̧to an, ve həʼə Go̧o̧ge ligi: oy zɔɔri náa it Mɔyi̧zə moò buu an o ve tiŋza̧a̧re, oy kiit voo, de vi voo moǒ. 47Náa vey kiizaa nɔ ve tɛʼ kɔ vo bit, moò gaa an nɔ vɛ oppo, vere hɛn de hi̧i̧t vo nɔ vɛ oppo. 48Kɛŋ an ve həʼə nɔ, kɔ vo bit, naʼan feeza: «Tan min, hɛ̧ɛ̧n mɔ kɔ vi too ɛnɔmmɔ nɛɛ? Viga Baa mɔn daŋ, vi teem kɔ vi kpadak». 49O hi̧i̧t vo: «Vo teey moò nɛɛ? Vo gaan boy ɛ de hɛn kɔra baa min o ligirɛ yɛrɛ?» 50Kɛŋ an ve gaan hɛn o hi̧i̧ feet vo nɔ kɔl an yɛ. 51Yeesu kəgi vo Nazarɛtɔ daŋ, o kiiza kɛŋ an ve kɔʼrɛ. Naʼan ɛ hɛn daa nɔ ve tɛʼ o si̧i̧ba. 52Ɛn Yeesu bɔk oy naa dɔkka ba, moò gaa an tak tinba tinba, o sȩȩza Go̧o̧gerɛ, vere ha̧a̧ ve sɛw.
Iliyochaguliwa sasa
Luka 2: Luk
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia