Luka 1
1
Luka de itta dɛptɛl ani
1Gbaare za̧a̧ Teyofil#1:1 Vo goozin vere Aktə. 1:1., náa ve duʼza̧a̧ ve goo dɛ̧ɛ̧ hɛn bɔk daa o ba vo tiŋza̧a̧re nɔ vɛy. 2Ve òo kəni hɛn nɔ vɛ vi kii too náa bɔk ve həy hɛn nɔ vɛ vey nɔt von yɛɛ bi̧i̧ tin nɔ oppo ve yaa oot vo nɔm ve ɛ vo doo ve òo Go̧o̧ge moò ani. 3Moò an oy, mi sɛw, mi teee yana an za̧a̧za̧a̧ yɛɛ bi̧i̧ tin nɔ oppo sȩȩzirɛ, mi hi̧i̧ kay dɛ̧ɛ̧zum vere oozin ani, gbaare za̧a̧ teyofil. 4Mi kɔ ɛnɔ kam vəʼə zee moò za̧a̧ oora bɔk mɔ kii nɔ vɛ ze.
Go̧o̧ge zə̧ə̧ an de fee Zâŋ Batis ɓɔɔri ani
5Vɛllin Helot bɔk o gbɛ̧ɛ̧ hɛk yuuda tin nɔ oppo, wa̧y kɔ maak#1:5 Maak; Maakạ: Náa Islayɛl ve kan ve gok hɛn Go̧o̧ge ligi tuŋtuŋ ve sə̧ə̧ tɛ̧ɛ̧ nɔ vey, hollɔ vey, kəkkɔ vey, vere naa nɔ vey; ve ya̧a̧ bo maaka nɔ oy. Lɛvitik 7:1-7. ak zɔʼ bɔk tin nii an Zakari o náa kɔ maak ak Abiya#1:5 Abiya: vo to kornik 24:7-18. nɔ o ve tiŋza̧a̧re. Kenaa nii an Elizabɛti, o wa̧y kɔ maak ak kɛŋ Aarɔŋ luk ani. 6Ve itto sɛw bɔk ve sȩȩ Go̧o̧ge o nɔrerɛ bɔk ve òo Gbɛ̧ɛ̧ kɛŋ moò buu an nɔ verɛ tɛʼ vere hɛn fee nɔ vɛ sɛw za̧a̧za̧a̧. 7Ɛn ɗaa bɔk ve ɛn tan yɛ, ɛnɔ Elizabɛt bɔk kan zi̧ǐ̧ ha̧a̧n tan yɛ ve itto sɛw bɔk ve gbo̧o̧ ma vin. 8Yo̧o̧ zɔʼ, Zakari bɔk de kɔra kɔm maak#1:8 Maak; Maaka: vo to Luk 1:5. an vɛ Go̧o̧ge o timba, ɛn bɔk yo̧o̧ kɔm kɔra voni. 9Too náa kɔ maak ak ve nɛnin kɔra nɔm, ve goo koyya, koy nɔ sa̧a̧ Zakarii o dɔ tak Go̧o̧ge sa̧a̧ lik an nɔ oppo, tak aŋ hɛn sa̧a̧k#1:9 Hɛn sa̧a̧ka: Vo to Ɛkzoodə 30:7:8. intuu. 10Oò vey aŋŋa hɛn sa̧a̧kɔ Go̧o̧ge náa an ve faa yak gɔn dee. 11Ɛnɔ Gbɛ̧ɛ̧ kɛŋ zə̧ə̧ an zɔʼ hən zakari o timba: o dii yɛɛ aŋ hɛn sa̧a̧kɔ#1:11 Hɛn sa̧a̧kɔ: Vo to Ɛkzoodə 30:1-6; 1Luwa 7:48. o naak za̧a̧ ba. 12Zakari fee ka hə̧ꞌə̧ nɔ, o lɔkkɛ doo kɔꞌɔrɛ. 13Ɛn ɗaa zə̧ə̧ nɔ feeza: «Doo do kɔm sɛ, Zakari, ɛn Go̧o̧ge kii yak faara mɔnɔrɛ: Waa mɔn, Elizabɛt, de ha̧a̧zumma tanna mɔy ya̧a̧za nii an Zaŋŋi. 14Mɔy kanna za̧a̧re kpɛŋ há̧a̧ ve tɛʼ de sɛ̧ɛ̧t voo ɓɔɔri an nɔrɛ. 15Ɛnɔ oy fira Gbɛ̧ɛ̧ kɛŋ, kɔm ak aʼni ani. Oy zɔnna bum yɛ, vere hɛn zɔra zɔʼ yɔmbi nɔ ve tɛʼ#1:15 Hɛn zɔra zɔʼ yɔmbi nɔ ve tɛʼ: Vo goozin vere Nɔɔmbərə 6:3. . Oy kaninna Go̧o̧ge fəəm ani bi̧i̧ naʼan o pə̧ə̧re. 16Oy pan kənna náa zik Islayɛllɔ vɛ duʼza̧a̧ gbɛ̧ɛ̧ kɛŋ, Go̧o̧ge von oppo.#1:16 Vo goozin vere Malasi 2:6. 17Oy yaay too Go̧o̧ge fee moò ak an vin vere Porofɛt Eli fəəm an vere gɔti an tin, ka sɔŋ kən Baa nɔ vɛ vere sam von vɛy, ka kəni náa fəə kɔʼ ak Go̧o̧ge oppo nɔ ve, yana za̧a̧ ba#1:17 Ka kəni náa fəə kɔʼ Go̧o̧ge oppo nɔ ve yana za̧a̧ ba: Vo to Malasi 3:23-24. ; Oy yaa gakka zik Islayɛllɔ vɛ gbɛ̧ɛ̧ kɛŋ ani». 18Ɛn ɗaa Zakari feeza zə̧ə̧ nɔ: «Mii gaana hɛn ɛnɔ bo moò za̧a̧ nɛ? Ɛn mi gbo̧o̧ ma, waa min sɛw ɛ vɛll ɓoo ma vin nɛy». 19Zə̧ə̧ nɔ hi̧i̧za: «Mii mi Gabiyɛlli#1:19 Gabiyɛlli: Vo to daniyɛl 8:16; 9:21; Luka 1:26.; mi dii Go̧o̧ge timba mii kɔzaa kɔm oy, o yaʼiy dooy yaa moozummɛ, dooy panzummi moò za̧a̧ nɛʼi̧. 20Ɛn mɔ tu̧u̧n yak moot min, yo̧o̧n hɛn ɛnɔ ve yaa kɔra tin nɔ yɛ; too ɛnɔmmɔ mɔy kanna nikka mɔy gaana yak moona yɛ de gbɔra yo̧o̧n hɛn ɛnɔ de kɔra tin nɔ oppo doʼ». 21Yɛɛ bɔk ɛnɔ, náa ve laa Zakari kɔ vo bit bo dili maak ligi tuu nɛy. 22Ɛn o vugi nɔ, o moongi vo baʼan ɓɛ yɛ ɛn náa ve gaarɛ ke bo həy hɛn yel maak ligi tuu. O moot vo vere naak ittaa o kan nikka. 23Zakari si̧t yo̧o̧ kɔm kɔra an vɛ maak ligi nɔ, o kə o kaa. 24An kaʼso, kenaa Elizabɛt dɔ pə̧ə̧̌, o ɗin o kaa sȩȩ saa. O fee: 25«Hɛn Gbɛ̧ɛ̧ kɛŋ kɔzi nɔ de nɛ: O hi̧i̧ vuksira ɓɔllɛ hɛn bɔk de kɔyya sem náa o ve timba tɛʼ nɔ opporɛ».
Go̧o̧ge zə̧ə̧ an de fee Yeesu ɓɔɔri ani
26Sȩȩ guu ba, Go̧o̧ge yaʼ zə̧ə̧ Gabiɛl#1:26 Gabiyɛl: Vo to Luk1:19. tak hɛk Galile, kap zɔʼ ve ya̧a̧ bo Nazarɛtɔ oppo, 27tan kep waa zɔʼ gaana wa̧p dee yɛ oppo bɔk ve bɛnaa wii an wa̧y zɔʼ nii an Zozɛfi. Zozɛf bɔk o Gbɛ̧ɛ̧ Davit luk ani vin; Tan kep waa gaana wa̧p dee yɛ nɔ nii an Maari. 28Zə̧ə̧ nɔ dɔ Maari o kaa feeza: «Mɔ gbo̧ʼrɛ! Gbɛ̧ɛ̧ kɛŋ tozum de gimma, oy kanna vega mɔy». 29Maari kii ɛnɔ lɔkkɛ kpɛŋ; O vi wɔɔk an: hɛn moogii ɛnɔ feeri an tuubɔgɛ? 30Zə̧ə̧ nɔ feeza: «Doo do kɔm sɛ, Maari; Ɛn Go̧o̧ge tozum de gimma. 31An kaʼso mɔy dɔra pə̧ə̧̌, pik an mɔy há̧a̧ hɛkpa tan wa̧ppa mɔy ya̧a̧zaa nii an Yeesu. 32Oy fira kɛŋŋa vey ya̧a̧a̧ Go̧o̧ge de bɛlba tan ani. Gbɛ̧ɛ̧ kɛŋ Go̧o̧ge de dɔzaa gbɛ̧ɛ̧̌, too aŋ an Davit vin, 33ɛn o yaa buu zik Islayɛl yɔ faaa, yɛɛ buu an de siʼna yɛ ɓim». 34Maari feeza zə̧ə̧ nɔ: «Hɛn ɛnɔ de kɔra tuubɔgɛ mi gaana wa̧p moò dee yɛ nɛy?» 35Zə̧ə̧ nɔ hi̧i̧za: «Fəəm dȩȩt de yaa umpo ɛn Go̧o̧ge de bɛlba gɔti an de waama too hisikɔl vin. Moò an oy ve yaa ya̧a̧ tan mɔy há̧a̧ nɔ bo tan dȩ̧ȩti bo Go̧o̧ge tan ani. 36Em Elizabɛt gbo̧o̧ ma, o sɛw oy pə̧ə̧re, bɔk ve fee bo o zi̧i̧ akka o dɔ pə̧ə̧ kɔ munɛ sȩȩ guu ma. 37Hɛn zɔʼ ɗəə Go̧o̧ge nɔ paamɛ». 38Ɛnɔ Maari fee: «Mi Gbɛ̧ɛ̧ kɛŋ kɔm ak ani; do kɔzi hɛn nɔ too mɔ fee nɔm». Ɛn zə̧ə̧ nɔ luu ɛʼɛrɛ.
Maari tak Elizabɛt toraa
39Yo̧o̧ ɛnɔ oppo vin, maari luu nɔmpo, o tak kap hɛk gbɔk yɛɛ yuuda nɔ oppo. 40O dɔ zakari o kaa mooga Elizbɛtti. 41Elizabɛt kii maari mooga nɔ, tan nɔ nam o pə̧ə̧re. Fəəm dȩȩt hiʼ̧ Elizabɛt o si̧i̧ba. 42O moò yak aʼre fee: «Go̧o̧ge sum ɗəə keppɔ ve tɛʼ, ɛnɔ o su tan mɔy há̧a̧ nɔrɛ vin. 43Mi hii dɔm yɛɛ gbɛ̧ɛ̧ kɛŋ min naʼ an kaa yaay iippo ze nɛy?. 44Ɛnɔ, mɔ torɛ, yɛɛ ki kii mɔ moogii nɔ, tan nɔ nam ii pə̧ə̧re vere bɛllaa. 45Mɔy za̧a̧re: mɔ tu̧u̧ de hɛn Gbɛ̧ɛ̧ kɛŋ bɔk feezum, de kɔra nɔrɛ nɛy».
Maari gbəŋ Go̧o̧gey
46Maari fee: «za̧a̧n min tɛʼ mii gbəŋŋa Gbɛ̧ɛ̧ kɛŋ Gbəəm ani, 47si̧i̧ dȩȩy fat yɛ, moò Go̧o̧ge sɔzi nɛy, 48Ɛnɔ o vəʼə kɔm ak an liin dɔk yɛ nɛy, too ɛnɔm, ɛŋgɔ, bi̧i̧ de ɓɔllɛ nɛ de takka faaa, náa ve tɛʼ vey fee boy há̧a̧ za̧a̧ dɔm, 49Ɛn Go̧o̧ge ɗəə hɛn tɛʼ, o kɔzi hɛn za̧a̧ vey. O Go̧o̧ge dȩȩta, 50Oy kanna za̧a̧ ɓim faa náa ve waaa doo nɔ vɛ o ve po. 51O kɔ kɔm aʼni vere naak gɔti ani: O wɛksi náa gan wɔɔk ak vɛ o ve yanaarɛ, 52O sit gbɛ̧ɛ̧ nɔ vɛ o ve gbɛ̧ɛ̧ dɔmbarɛ o ɓəəzi náa ve liin dɔk yɛ nɔ ve tinba. 53O po náa gɔ̧l de hɔ̧ɔ̧ voo nɔ ve hella aʼvin, o kən náa nagate ak ve naak za̧a̧ vin. 54O yaa maʼzaa kɔm ak an zik Islayɛllɛy, o zanin za̧a̧ an 55Abaram oppo vere luk an ve daŋ sɛw, yo̧o̧ tuŋŋɔ yɛ, too bɔk o bɛnin aŋ ban vo ve nɔm». 56Maari kan vegaa Elizabɛt tuu kaa kɔ sɛ̧ɛ̧ ta̧a̧torɛ pig an, o luu kə o kaa.
Zâŋ Batis ɓɔɔri ani
57Yɛɛ lii Elizabɛt ka wɔɔzirɛ, o há̧a̧ hɛkpa tan wa̧ppa. 58Daaa ka̧a̧ hi̧ʼ vɛ vere eraa vɛ, ve kii hɛn za̧a̧ Go̧o̧ge kɔza nɔ, ve gbo̧ʼgaa Elizabɛttɛ. 59Tan ɓɔɔ kɔ dɔʼ narupa nɔ, ve yaa ka ve tanaa dɔŋŋa, ve hi̧i̧ ka ve poʼo baʼ nii an, zakari nɛy. 60Naʼ an fee: «hɔ̧ɔ̧̌, nii an Zaŋŋi». 61Ve hi̧i̧za: «Ha̧a̧ zɔʼ nii an zaŋŋi paam um ekke yɛ!» 62Ɛnɔ ve vi baʼ an vey naak ittaa ka ve gaa ke boy ya̧a̧za tan an nɔ nii tuu tuubɔgɛrɛʼ. 63Zakari haa vo pîn pɛkka, o dɛ̧ɛ̧ oppo: «Nii an ɓimmɔ zaŋŋi». Náa ve tɛʼ kɔ vo bit. 64Ɛtuu vin, zakari bi̧i̧ yak moò: o gan wɛl bɛlba gbəŋ Go̧o̧gey. 65Ɛnɔ, daʼaza̧a̧ ka̧a̧ hiʼ̧ ve tɛʼ doo kɔ vorɛ, náa hɛk gbɔk yɛɛ yuuda nɔ ve sɛw ve oozin moò ɛnɔrɛ. 66Náa kii moò ɛnɔ ve tɛʼ, ve vəʼə o ve si̧i̧ba: «tan wagaa ɛnɔ de yaa fira tuubɔgɛ?» Ɛn Gbɛ̧ɛ̧ kɛŋ gɔti an kangaa oy ginu.
Zakari Gbəŋ Go̧o̧gey
67Fəəm dȩȩt hi̧ʼ zakari tan baʼ nɔ o si̧i̧ ba, o bi̧i̧ moò too Porofɛt vin, o fee: 68«Ba gbəŋ vo gbɛ̧ɛ̧ kɛŋ, Go̧o̧ge zik Islayɛlle nɛy, o yaa maʼzaa zik an nɛy, o sɔza yɛɛ ɓɛɛrerɛ. 69O po ba voy wa̧y gɔti ak sɔt hɛn, kɔm ak an gbɛ̧ɛ̧ Davit o lukke. 70De hɛn bɔk fee tinba zɛɛɛ vere Porofɛt an za̧a̧ nɔ vɛ yak von nɛy: 71“Bɔk o bɛn ba vo boo vuksi ba vora za̧a̧k ban vo ve o ve naʼarɛ, vey náa ve hi̧i̧ hɛn ɓɛɛ kɔt ba vora nɔ vɛ o ve gɔtirerɛ tɛʼ.” 72O izaa aŋ ban vo ve si̧i̧ za̧a̧ ani, o zanin yak bɔk tasingi vo nɔ yɛ. 73Ɛn bɔk sa̧a̧za aŋ ban vo Abaram gal, 74boo vuksi ba vora za̧a̧k ban vo vɛ o ve gɔtirerɛ, o po ba vo yana doo ba kɔt vo vó kɔm vey doo sɛ, 75doo ba kan vo o timba dȩȩta likka za̧a̧ yo̧o̧ tuŋ, za̧a̧n ban vo tɛ. 76Ɛn mɔy tan min, ve ya̧a̧ ma Go̧o̧ge de bɛlba Porofɛt ani, mɔy emma gbɛ̧ɛ̧ kɛŋ o tinba, mɔy sɛkka yana an dee. 77Mɔy feeza zik an nɔ, doo gaa Go̧o̧ge boy yaay sɔzaa vere hɛn ɓɛɛ an hoozaa. 78Go̧o̧ge ban vo, o Go̧o̧ge to gim akka kpɛŋ, o za̧ǎ̧ ɓim; oy dȩȩzi ba vo zo̧o̧y yɛɛ dȩȩt bɛlba de liizingaa too yo̧o̧ de vugii nɔm; 79Doo dɛ̧ɛ̧zin náa vey kanna visamme nɔ vɛ, vere vɔɔ o hisikɔʼi nɔ vɛ o ve po, oy panna dɔʼ ban vo yana za̧a̧ ba yɔ». 80Tan nɔ de naa nɔ moò gaa an ɓəə tinba, tinba. O kan ho̧o̧t talle faaa an gbɔ yo̧o̧n, o yaa hən zik Islayɛl o timba tin nɔ oppo.
Iliyochaguliwa sasa
Luka 1: Luk
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia