San Juan 1
1
Ri Cristo jare ri Lo'laj Utzij Dios che o ruk' Dios echi' xumaj u'anik runjel su olik
1Mja na k'an kaj ulew,
per ni Qajaw Jesucristo che jare kb'ix uTzij Dios che,
o chik Re jala ruk' Dios, xaq ijnam ruk' ri Dios.
2Ri Jesucristo, su o ruk' Dios, echi' xmajtaj loq u'anik runjel sutaq olik.
3Xa rmal Re, ri Dios xu'ono runjel jumpa sutaq olik.
Wet mitji Re, ot su kri' olik, mal xa rmal Re che x'anik.
4Ruk' Re k'wi k'asnmal.
Ri k'asnmali', jala peche jtzuk' chaj tzjil chpam qu'm che kuk'ut b'e chikuch mnaq.
5Ri Saq kitluw chpam qu'm,
ni qu'm kikun taj che uchupik ri Saq.
6O jun achi xtaq loq rmal Dios. Nachi ri', Wan ub'i'. 7Xpi nachi ri' rech xuy'a ub'ixik su kilwi ri Saq che kuk'ut b'e chikuch mnaq. Jare kraj re che kunjel mnaq qast kiyikjon che Jesucristo rmal ri utzij. 8U Wan jare taj re ri Saq, xa xtaq loq rech kuya ub'ixik chrij ri Saq. 9Ri Jun che qatz qtzij ri Saq, jare Re kuk'ut b'e chikuch mnaq, pitnaq chik, xa nqaj chik k'wi.
10Ri Qajaw Jesucristo che jare Re uTzij Dios o chik chi' chuchlew.
Miskini' xa rmal Re che xu'on Dios uwuchlew, nk'aj mnaq iy'o chi' chuchlew, xikch'ob' t uwuch.
11Ri Qajaw Jesucristo xpi kuk' umnaq,
per ni umnaq xkik'laj taj.
12Chintaq k'ut xikk'amo, soq xikkoj utzij,
xu'on chke che iralk'al Dios.
13Ijnam t wa kuk' kalk'al mnaq che kiyalaxik, peche kiyalax kunjel mnaq,
mal xa rmal jun achi kiyalaxik,
xani jare ke, puro iralk'al Dios, rmal jala kraj Re.
14Chi' wa k'aljan wi, ri Jun che kb'ixik che jare Re uTzij ri Dios, tik'ri xujal mnaq, xikje chi' chiqxo'l.
Xqilo che nim u'ij, mal jare Re uK'jol qaQaw Dios.
Ruk' Dios pitnaq wi, tik'ri xikje chi' chiqxo'l qo'j, nim wa' ri ut'ob' rich'il ri saqlaj tzij xuk'ut chiquch.
15U Wan xub'ij tzij chrij Re, ena xusik'b'aj rib' che ub'ixik, xub'ij: «Nachi ri', jarewa nb'im chiwe che o Jun kpi chna, per mas nim u'ij Re chinwuch in, mal nab'e o chik Re chinwuch in», xcha'.
16Ri ut'ob' o ruk' che mas nim, k'ilaj taq b'welt, uy'om chqe qo'j jumpa qawuch qunjel.
17Ri utzij upxab' Dios, rmal u Moisés xya chqe,
ni ut'ob' Dios rich'il saqlaj tzij,
jare Qajaw Jesucristo xuk'ut chiquch.
18Ot chin jun rlom uwuch Dios,
xaq xaw ri uK'jol Dios che xaq xaw Re olik.
Jare Re xuk'ut qaQaw chiquch,
mal chla' ruk' Re k'wi, soq jare Re Dios.
U Wan ajb'nal qasna' xch'aw chrij ri Cristo
(Mt 3:1-12; Mr 1:2-8; Lc 3:15-17)
19Echi' xitaq b'i nk'aj rajchak Dios, rich'il nk'aj chik achjab' che levita#1:19 Jare ajchak chpam nimlaj rchoch Dios jala Jerusalén. kb'ix chke, jala ruk' u Wan ajb'nal qasna', kmal nk'aj aj Israel chla' Jerusalén, jawa xikb'ij che u Wan:
—¿At chinoq? —xiche che.
20U Wan xuk'ul uwuch ktzij, xuwaj t uwuch chikuch, xa xub'ij chke ruk' saqlaj tzij:
—In jare taj ri Cristo,#1:20 Cristo kel kub'ij jun chaytajnaq rmal Dios. Un tzij Mesías xaq jnam kilwi. —xche chke.
21—¿At chinoq? ¿At jare u Elías? —xiche che.
—In taj, —xche u Wan chke.
—¿At jare wa' un ajb'il utzij Dios qi'em#Dt 18:15-19; Jn 6:14; 7:40. che kpi na? —xiche chik che.
U Wan xub'ij:
—In taj, —xche chke.
22—¿At chinoq? —xiche che.
—Chb'ij chqe rech jare kqab'ij qo'j chke nk'aj achjab' che ujkitqom loq awuk'. ¿Su kab'ij chawij at? —xiche che.
23U Wan xub'ij chke:
—In, in jare jun che xutz'ib'aj kanoq un ajb'il utzij Dios ujer che Isaías ub'i', xub'ij:
“O jun kusik'b'aj rib' chpam un lyar che xa chqi'j ulew, kub'ij:
‘Chijma pnoq jun sk'um b'e rech Qajaw pitnaq,’” (Is 40:3)
—xche chke.
24O nk'aj achjab' itqom b'i kmal nk'aj fariseo ruk' u Wan. 25Xikb'ij che u Wan:
—¿Suche ka'an qasna' we at taj at Cristo,#1:25 Un tzij Cristo kel kub'ij Mesías. mowni at Elías, mowni at atajb'il utzij Dios? —xiche che.
26U Wan xub'ij chke:
—In xa ruk' jron kin'an qasna', per o Jun chixo'l che iwit'am t uwuch ix. 27Jare Re kpi chna, nim u'ij Re chinwuch in. Tqal t chwe kinchke' qajoq rech kintur uwuch uxjab', —xche chke.
28Runjel jumpa wari' jala x'an wi chpam un tinmit Betania ub'i', jala ch'qap che un nim ja' Jordán ub'i', chla' jachi kitjin u Wan che u'anik qasna'.
Ri Jesús jare peche Laj Chij che kkamsax na chjuch Dios rech tab'al kuyb'al mak
29Chkab' ij, u Wan xurilo che pitnaq Jesús. Ena xub'ij u Wan: «Chiwlampe', pitnaq jun che peche jun Laj Chij che kkamsax na chjuch Dios rech tab'al kuyb'al mak. Jare Re kuch'aj kmak kunjel jumpa mnaq iy'o chi' chuchlew», xche u Wan chke mnaq. 30«Jare Re xinch'aw chrij echi' ximb'ij chiwe: “O Jun kpi chna, per mas nim u'ij Re chinwuch in, mal nab'e o chik Re chinwuch in”. 31In wit'am t uwuch ujer chinoq, per kintjinik kin'an qasna' chke mnaq, rech kink'ut chikuch nk'aj aj Israel chin Re, rech kkit'amaj uwuch», xcha'.
32U Wan soq xub'ij: «Xinwil Tyoxlaj Uxlab'xel xqaj loq pujlom Jesús, jala unom peche jun tz'kin paloma ub'i', xikje pujlom. 33In wit'am t uwuch, chin Re, mitji xnutaq loq Dios che u'anik qasna' ruk' jron chke mnaq, jawa xub'ij chwe ri': “Chin Jun kawilo che kqaj loq Tyoxlaj Uxlab'xel chkaj, tik'ri kikje pujlom, jare Re kuqasaj Tyoxlaj Uxlab'xel pijlom, peche qasna' ku'on che”, xche chwe. 34Jarewa xinwil in, xqaj Tyoxlaj Uxlab'xel pujlom Jesús, xa rmal kimb'ij che jare Re uK'jol Dios», xche u Wan chke nk'aj mnaq.
Chi' kqil wi ri nab'e taq udiscípulo Jesús
35Chkab' ij o jmul chik u Wan chla', rich'il keb' chke nk'aj udiscípulo. 36Echi' xuril u Wan che x'ax Jesús, xub'ij:
—Chiwlampe', nachi ri', jala peche jun Laj Chij che kkamsax na chjuch Dios rech tab'al kuyb'al mak, —xche u Wan chke.
37Echi' xikta keb' udiscípulo u Wan che jala xub'ij, xiyitrij b'i chrij Jesús. 38Ri Jesús xka'y chrij. Echi' xurilo che o chin itrin chrij, xyuka'yej xub'ij chke:
—¿Su kitzkuj? —xche chke.
Ni ke xikb'ij che:
—Ajtojnel,#1:38 Tyox Wuj kch'aw chrij Rabí. Un tzij Rabí kel kub'ij Ajtojnel. ¿jachi katkanaj wi? —xiche che.
39—Kixjosaj wuk', chiwlampe', —xche Jesús chke.
Ena xib'e ruk', xkilo jachi kkanaj wi. Xikanaj kan runjel nuqajb'al ij ruk', mal ma'tan chik, kjeb' (4) hora chik b'enaq che uqajb'al ij.#1:39 Tyox Wuj kch'aw chrij ljuj (10) hora. Ljuj (10) hora kel kub'ij kjeb' (4) hora chik b'enaq che uqajb'al ij.
40Jun chke keb' achjab' che xikta' su xub'ij u Wan, che xiyitrij b'i chrij Jesús, jare jun achi che Trix ub'i', i'al ruk' u Simón Lu'. 41Xaw xuta u Trix che jare Jesús x'axik, chanim x'e che utzukxik un rachlal che Simón ub'i'. Xaw xuriqo, xub'ij che:
—Xqariq ri Mesías, —xche che. Ri tzij Mesías xaq jnam kilwi ruk' Cristo.#1:41 Un tzij Mesías kel kub'ij jun chaytajnaq rmal Dios rech kitk'e' pujlom tinmit Israel. Un tzij Cristo xaq jnam kilwi.
42U Trix xuk'maxtaj b'i u Simón ruk' Jesús. Ni Jesús, echi' xurilo, xub'ij che:
—Jare at Simón uk'jol u Wan. Per ni le', Simón t chik kb'ix che ab'i'. Jumpa k'ek, Cefas chik kb'ix chawe, —xche che. Un b'i' Cefas xaq jnam kilwi ruk' Lu'.#1:42 Piktzij aj arameo un tzij cefas kel kub'ij ab'aj. Piktzij aj griego un tzij petros kel kub'ij ab'aj.
43Chkab' ij, ri Jesús xuchomaj k'e jala chpam un lyar Galilea ub'i'. Echi' xuriq u Pelipe, xub'ij che:
—Saj wuk', katitrij chwij, —xche che.
44U Pelipe jala chpam un tinmit Betsaida kpi wi, xaq jnam ktinmit ruk' u Trix rich'il u Lu'. 45U Pelipe chanim x'e che utzukxik u Natanael. Xaw xuriqo, xub'ij che:
—Xqariq nachi che utz'ib'am kanoq u Moisés chpam upxab' Dios, che soq ktz'ib'am kanoq ri ujer taq ajb'il utzij Dios, jare Jesús uk'jol u Jse, che kpi jala chpam un tinmit Nazaret, —xche che.
46U Natanael xub'ij:
—¿Le o jun mnaq lo nim rilik we xa chla' chpam tinmit Nazaret kpi wi? —xche che.
U Pelipe xub'ij che u Natanael:
—Saj, jawlampe', —xche che.
47Ri Jesús, echi' xurilo che pitnaq u Natanael, xub'ij:
—Pitnaq jun achi qatz qtzij aj Israel. Ot sub'nik chpam ranma', —xche che.
48U Natanael xch'awik, xub'ij che Jesús:
—¿Su mow che kch'ob' la nwuch? —xche che.
Ri Jesús xub'ij che:
—In xatinwilo echi' mja katusk'ij u Pelipe, atku'l chuxe' un che' higo ub'i', —xche Jesús che u Natanael.
49U Natanael xub'ij che:
—Ajtojnel, in kinkojo che jare la qatz qtzij lal uK'jol Dios. Jare la rey tk'al pkijlom mnaq iyaj Israel, —xche che.
50Ri Jesús xch'aw chik ruk', xub'ij che:
—¿Le kakoj ntzij per xa rmal che ximb'ij chawe che xatinwilo at'o chuxe' un che' higo? Kawil na nmaq taq k'utb'al chjuch su xawil chanim, —xche Jesús che.
51Ri Jesús xub'ij chik:
—Qatz qtzij kimb'ij chiwe, kiwil na che ktortaj kaj. Kiwil na “nk'aj ángel rech Dios kiwa'ljik, soq kiqaj”#Gn 28:12-13. pnijlom in nAchi nuK'jol Dios. —Jala xub'ij Jesús chke.
Iliyochaguliwa sasa
San Juan 1: qucSAS
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
El Nuevo Testamento
en K'iche' de San Andrés Sajcabajá
© 2024 Asociación Educativa y Cultural Maya (AECM)
en colaboración con SIL Global