San Mateo 2
2
Nk'aj achjab' che mas kin'oj xib'e che rilik Jesús
1Ri Jesús chla' xalax chpam un tinmit Belén o pukwent un tinmit Judea. Echi' xalax Jesús, jare un rey Herodes o che atb'altzij pujlom un tinmit Judea. Tik'ri xiyo'pan nk'aj achjab' chpam tinmit Jerusalén che kiyikunik kikkil ch'mil sutaq ku'ono, mas kin'oj. Ke jala kipitik wi pusuk'mal jachi kel loq ij. 2Echi' xiyo'pnik, xikta chke mnaq iy'o chla':
—¿Jachi k'wi nak'al che xalaxik che kok na che atb'altzij pkijlom iyaj Israel? Qo'j xqil jun ch'mil xwa'laj pusuk'mal jachi kel loq ij, jare retal che jare Re xalaxik. Chanim ujpitnaq rech kqanmirsaj u'ij, —xiche chke.
3Echi' xuta un rey Herodes che jala xikb'ij, xsach uk'u'x rmal, soq xsach kk'u'x kunjel mnaq chpam tinmit Jerusalén. 4U Herodes xyusk'ij kunjel jumpa nk'aj achjab' itk'al pkijlom nk'aj rajchak Dios, rich'il jumpa nk'aj ajtojnel rech upxab' Dios, tik'ri xuta chke:
—¿Jachi kalax nak'al chi' che kok na che Cristo?#2:4 Cristo kel kub'ij jun chaytajnaq rmal Dios. Un tzij Mesías xaq jnam kilwi. —xche chke. 5Ke xikb'ij che:
—Chla' kalax wi chpam tinmit Belén che o pukwent nim tinmit Judea, xa rmal che najb'il utzij Dios jawa utz'ib'am kanoq:
6“Ri ix ix'o chpam tinmit Belén che o pukwent Judea,
xa mib'ij che jare ix ot mas iweqle'n
chikuch atb'altzij iy'o chpam tinmit Judea,
mal chixo'l ix, kel na jun ajk'mal b'e rech kyuchjij mnaq
chpam ntinmit Israel peche mow kyuy'uj”. (Mi 5:2)
—Jarewa utz'ib'am kan najb'il utzij Dios ujer.
7Tik'ri', u Herodes el'al xyusk'ij nk'aj achjab' che o mas kin'oj. Ena xuta chke chinchke ij xkil un ch'mil che xuk'ut chikuch che xalax nak'al che kok na che Cristo.
8Echi' xikb'ij che chinchke ij xkilo, xyutaq b'i chpam tinmit Belén, xub'ij chke:
—Jix che utayik rson chrij laj ak'al. Chitjoj iwib' che rech kiwit'amaj jachi k'wi. Echi' kiriqo, chanim kixpi che ub'ixik chwe, rech soq kimb'e in che rilik y kinmirsaj u'ij, —xche chke.
9Echi' xuk'is ub'ixik u Herodes chke, xikmaj chub'i kb'e xib'e chik. Nun ch'mil che xkil pusuk'mal jachi kel loq ij, nab'e chikuch ib'enaq. Echi' xo'pan un ch'mil pujlom un ja jachi k'wi un laj ak'al, xb'in t chik. Xaq chla' xitk'e' wi. 10Nk'aj achjab' che kiyikunik kikkil ch'mil sutaq ku'ono, mas xiki'ktik echi' xkilo che xitk'e' un ch'mil, mal xkit'amaj che chla' k'wi un laj ak'al. 11Echi' xiyo'pan chla' jachi xitk'e' un ch'mil, xiyok pja. Xkilo che o laj ak'al chla' rich'il uchuch che Mri'y ub'i'. Ena xiyixke'ik, xkinmirsaj u'ij laj ak'al. Tik'ri xiktor nk'aj kkaxa kuk'am loq, xkesaj loq nk'aj sipnik chpam, xikya chjuch laj ak'al. O an pwaq kuk'am, o pom, soq o jun kumb'al mas k'ok' ruxlab', mirra ub'i'. Jarela xiksipaj rech laj ak'al. 12Nk'aj achjab'i' xb'ix chke pkiwram che ot mow kiyitzlij chik ruk' u Herodes. Xa rmal, wa'l un chik b'e xipi chpam echi' xiyitzlij piktinmit.
U Jse rich'il rixqil xikk'am b'i laj ak'al Jesús chpam tinmit Egipto
13Echi' ib'enaq chik nk'aj achjab' che xikya sipnik che laj ak'al Jesús, o jun ángel rech Qajaw Dios xuk'ut rib' puwram u Jse, xub'ij che: «Katwa'ljoq, chik'ma b'i laj ak'al rich'il uchuch. Jix chpam tinmit Egipto rech kixanmaj b'ik. Chla' kixkje wi, ast retal echi' kimb'ij chiwe, tik'ri o mow kixpi chik, xa rmal mel u Herodes kutzkuj un laj ak'al rech kukamsaj». Jala xub'ij un ángel che u Jse.
14Ena cha'ab' na, xwa'laj u Jse tik'ri xuk'am qaj laj ak'al rich'il uchuch, xyuk'am b'i chpam tinmit Egipto. 15Chla' xiyikje wi ast retal echi' xkam u Herodes. Jala x'antjik peche ub'im kan Dios che k'antaj na, jala peche xub'ij najb'il utzij Dios. Re xub'ij su xutaq Qajaw Dios che ub'ixik, xub'ij: «Chla' chpam tinmit Egipto, xinsk'ij pnoq niK'jol»,#Os 11:1. xche che.
U Herodes xutaq kkamsxik taq ak'lab'
16Echi' xuril u Herodes che xa xiksub' kan nk'aj achjab' che o mas kin'oj, jwert xpi riwal. Ena xutaq kkamsxik kunjel jumpa ak'lab' che mja kitz'qat keb' jnab' chke chpam runjel un tinmit Belén soq rich'il jumpa tinmit o chunqaj. Re xurit'amaj chinchke ak'lab' kyukamsaj mal jare xukoj retal ij che xikb'ij kan nk'aj achjab' che, che o kin'oj. 17Jala x'antjik peche ub'im kan najb'il utzij Dios ujer che Jeremías ub'i'. Jarewa tzij ub'im kanoq:
18«K'aljan uch'ab'al jun mnaq chpam tinmit Ramá che jwert ko'ik.
Kusik'b'aj rib' rmal b'is.
Jare il Raquel jwert ko' chke taq ral che xikamik.
Kraj taj che kkub'sax uk'u'x,
mal otchich jachi kumaw taq ral, mal xikamik». (Jer 31:15)
Jala ub'im kan u Jeremías.
Ri Jesús rich'il uri'jal xiyitzlij loq Nazaret
19Echi' kamnaq chik u Herodes, o jun ángel rech Qajaw Dios xuk'ut rib' puwram u Jse echi' o chpam tinmit Egipto, xub'ij che: 20«Katwa'ljoq, chik'ma b'i laj ak'al rich'il uchuch y kixtzlij chik chpam tinmit Israel mal ya xikam nk'aj mnaq che kkaj kikkamsaj laj ak'al», xche che.
21Ena xwa'laj u Jse, xuk'am b'i laj ak'al rich'il uchuch, xib'e chpam tinmit Israel. 22U Jse xuta rson che o jun chik achi Arquelao ub'i' xok che atb'altzij pujlom tinmit Judea. Nachi le', uk'jol u Herodes. Jare re xok kan che atb'altzij rech ku'on uwuchb'al uqaw. Ena xux'ej rib' u Jse k'e jala'. Soq xch'ab'ex rmal Dios puwram. Xb'ix che, che jare utz kib'e chpam tinmit Galilea. Xa rmal, chla' xib'e wi. 23Echi' xiyo'pnik, xiyikje chpam jun tinmit Nazaret ub'i'. Jala x'antjik peche kb'im kan nk'aj ajb'il utzij Dios ujer. Ke kb'im kanoq che ri Jesús, aj Nazaret kb'ix na che.
Iliyochaguliwa sasa
San Mateo 2: qucSAS
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
El Nuevo Testamento
en K'iche' de San Andrés Sajcabajá
© 2024 Asociación Educativa y Cultural Maya (AECM)
en colaboración con SIL Global