Maatiyee 7
7
Ɩtaahʋʋ lɛlaa tɔm
(Luk 6.37-38, 41-42)
1Yesu tasɩ-wɛ heyuu se: «Ɩtaahʋʋnɩ nɔɔyʋ nɛ Ɛsɔ ɛɛhʋʋnɩ-mɩ. 2Mbʋ́ pʋyɔɔ yɔ, ɛzɩma mbʋ́ ɩhʋʋnɩ lɛlaa yɔ, ḿbʋ́ ɖɔɖɔ Ɛsɔ kɔŋ-mɩ hʋnaʋ. Mbʋ́ ɩmaɣzɩɣnɩ lɛlaa yɔ, ḿbʋ́ ɖɔɖɔ Ɛsɔ kɔŋ-mɩ maɣzɩnaʋ. 3Pɩlabɩ ɛzɩma nɛ ŋnaɣ kemaɣ ŋgá kɛwɛ ña-taabalʋ ɛsɩyɛ taa yɔ nɛ ŋŋnaɣ ɖaʋ ŋgʋ́ kɩwɛ ña-ñɩnɖɛ taa yɔ? 4Ɛzɩma ŋpɩzɩɣ ŋheyi lɛlʋ se: ‹Sɩŋ malɩzɩ ñɛ-ɛsɩyɛ taa kemaɣ› nɛ ŋŋnaɣ ɖaʋ ŋgʋ́ kɩwɛ ña-ñɩnɖɛ taa yɔ? 5Tɛɛ nɛ pʋ-yɔɔ tʋ ña! Lɩzɩ ɖaʋ ŋgʋ́ kɩwɛ ñɛ-ɛsɩyɛ taa yɔ nɛ pʋcɔ ŋna camɩyɛ nɛ ŋlɩzɩ kemaɣ ŋgá kɛwɛ ña-taabalʋ ñɩnɖɛ taa yɔ.
6«Ɩtaacɛlɩ Ɛsɔ ñɩm hasɩ. Pɩtɛkɛ ḿbʋ́, sɩpɩsɩɣ sɩñasɩ-mɩ. Ɩtaacɛlɩ ɖɔɖɔ afanaa mɩ-lɩtʋ. Pɩtɛkɛ ḿbʋ́, pamɩtɩɣ tɩ-yɔɔ.»
Weyi ɛsʋlʋmaa, pahaɣ-ɩ
(Luk 11.9-13)
7Yesu tasɩ-wɛ heyuu se: «Ɩsʋlʋmɩ Ɛsɔ, ɛhaɣ-mɩ, ɩñɩnɩ ɛ-cɔlɔ, ihikiɣ, ɩma pɔɔyʋʋ yɔɔ, ɛtʋlʋʋ-mɩ. 8Mbʋ́ pʋyɔɔ yɔ, weyi ɛsʋlʋmʋʋ-ɩ yɔ, ɛhaɣ-ɩ, weyi ɛñɩnɩɣ ɛ-cɔlɔ yɔ, ehikiɣ, weyi ɛ́lɛ́ makɩ pɔɔyʋʋ yɔɔ yɔ, ɛtʋlʋʋ-ɩ. 9Mɩ-taa anɩ pɩzɩɣ ɛkpaɣ pɩyɛ nɛ ɛcɛlɩ ɛ-pɩɣa alɩwaatʋ ndʋ́ kasʋlʋmʋʋ-ɩ tindine yɔ? 10Yaa mɩ-taa nɔɔyʋ pɩzɩɣ ɛcɛlɩ ɛ-pɩɣa ɖʋm alɩwaatʋ ndʋ́ kasʋlʋmʋʋ-ɩ kpakpayaɣ yɔ yaa we? 11Mbá mɩ ɩkɛ azaɣ́a yɔ, itekizi haʋ mi-piya mbʋ́ pʋwɛ ɖeu yɔ nɛ pɩcandɩnɩ mɩ-Caa Ɛsɔ weyi ɛwɛ ɛsɔdaa yɔ? Ɛhaɣ mbʋ́ pʋwɛ ɖeu yɔ mbá paba sʋlʋmʋʋ-ɩ yɔ.
Mbʋ́ pʋwɛ paɣtʋ taa yɔ
12Pʋ-yɔɔ lɛ, mbʋ́ ɩcaɣ se ɛyáa ɛlabɩ-mɩ yɔ, mɩ ɖɔɖɔ ɩlabɩ-wɛ ḿbʋ́. Ḿbʋ́ Mooyiizi weyi Ɛsɔ cɛlɩ paɣtʋ yɔ nɛ náyaa paɖʋwa se ɩla.»
Nɩmaŋ naalɛ tɔm
(Luk 13.24)
13Yesu tasɩ-wɛ heyuu se: «Ɩtɩŋnɩ ɖɛɛmɛnɖɛɛ taa nɛ ihiɣ wezuu. Nɔnɔɔ kɩwalaɣ nɛ nʋmɔʋ kɩwalʋʋ patɩŋnaʋ fɛyɩ kaɖɛ. Yee ɩtɩŋnɩ-wɛ yɔ, ileki. Ɛlɛ́, ɛyáa mbá patɩŋɩɣnɩ-wɛ yɔ pɔɖɔ sakɩyɛ. 14Đɛɛmɛnɖɛɛ nɛ nʋmɔsɔka patɩŋnaʋ wɛ kaɖɛ, ɛlɛ́, yee ɩtɩŋnɩ-wɛ yɔ, ihikiɣ wezuu. Ɛlɛ́, mbá panaɣ-wɛ yɔ, pɔtɔɖɔɔ.»
Mbá posusuu cɛtɩm tɔm yɔ
(Luk 6.43-44)
15Yesu tasɩ-wɛ heyuu se: «Ɩɖɔkɩ mɩ-tɩ nɛ mbá pɛcɛtɩɣ se pɛkɛ náyaa yɔ. Pɔkɔŋ mɩ-cɔlɔ lɛ, pɛwɛ ɛzɩ heŋ, naze lɛ, pɛkɛ kpemtɔɔyɩsɩ kañadɩnaa. 16Ɩkɔŋ-wɛ sɩm nɛ pa-lakasɩ ɛzɩ pasɩŋʋʋ tɩʋ nɛ ki-pee yɔ. Paakoyuu leemuu ŋgone yɔɔ yaa hiyikajásɩ sɔɔ tɩʋ yɔɔ. 17Tɩʋ kɩbaŋgʋ lʋlʋʋ pee kɩbana nɛ tɩʋ kɩdɛkɛdʋʋ ñalʋlɩ pee kɩdɛkɛdɛɛ. 18Tɩʋ kɩbaŋgʋ ɛɛpɩzɩɣ kʋlʋlɩ pee kɩdɛkɛdɛɛ nɛ tɩʋ kɩdɛkɛdʋʋ ñaapɩzɩɣ kʋlʋlɩ pee kɩbana. 19Tɩʋ ŋgʋ́ kɩɩlʋlʋʋ pee kɩbana yɔ, pɛsɛtɩɣ-kʋ nɛ paɖʋ-kʋ miŋ taa. 20Ḿbʋ́ ɖɔɖɔ ɩkɔŋ sɩm mbá pɛcɛtɩɣ se pɛkɛ náyaa yɔ nɛ pa-lakasɩ.»
Tiyiyaa kɩbama tɔm
(Luk 13.25-27)
21Yesu tasɩ-wɛ heyuu se: «Mbá payaɣ-m se: ‹Kɩpaɣlʋ! Kɩpaɣlʋ!› yɔ, pɩtɛkɛ patɩŋa pɔkɔŋnɩ sʋʋ Ɛsɔ Kewiyaɣ taa. Ɛlɛ́, mbá palakɩ mbʋ́ man-Caa weyi ɛwɛ ɛsɔdaa yɔ e-liu wɛɛ yɔ, pe-ɖeke pasʋʋnɩ ka-taa. 22Kɩyakʋ ŋgʋ́ Ɛsɔ hʋʋnɩ ɛyáa yɔ, ɛyáa sakɩyɛ kɔŋ-m pɔzʋʋ se: ‹Kɩpaɣlʋ! Kɩpaɣlʋ! Pɩtɛkɛ ɖa lɛ náyaa mbá posusi tɔm nɛ ñɔ-nɔɔ nɛ pɔɖɔɔnɩ aleewaa nɛ pala hama lakasɩ sakɩyɛ yɔ yaa we?› 23Ɛlɛ́, mɔnkɔŋ-wɛ cosuu kpayɩ se: ‹Mantasɩm-mɩ ɖoli kaʋ. Kɩdɛkɛdɩŋ mɩ! Ɩkʋyɩ mɔn-cɔlɔ cɩnɛ nɛ ɩɖɛɛ poliŋ.› »
Ɖɩsɩ naalɛ tɔm
(Luk 6.47-49)
24Yesu tɛm-wɛ yɔɔdɩnaʋ lɛ, eheyi-wɛ se: «Weyi ewelesiɣ tɔm tʋnɛ tɩtɩŋa nɛ ɛɖɔŋ tɩ-yɔɔ yɔ, ɛwɛ ɛzɩ lɔŋsɩnɖʋ weyi ɛma ɛ-ɖɩɣa ɛwaɣ yɔɔ yɔ. 25Tɛʋ nɩwa nɛ pɔsɩ su nɛ heɣlim ma ɖoŋ. Ɛlɛ́, pɩtalabɩ-kɛ pʋyʋ, mbʋ́ pʋyɔɔ yɔ, pasɩ ke-kiɖe ɛwaɣ yɔɔ. 26Piyele weyi ɛ́lɛ́ welesiɣ tɔm tʋnɛ tɩtɩŋa nɛ ɛɛɖɔŋ tɩ-yɔɔ yɔ, ɛwɛ ɛzɩ kɩmɛlɛŋ ŋgʋ́ kɩma kɩ-ɖɩɣa kañɩŋa taa yem yɔ. 27Tɛʋ nɩwa nɛ pɔsɩ su nɛ heɣlim sɔsɔm ma ɖoŋ nɛ kɔtɔlɩ nɛ kɔyɔkɩ katɩŋa naŋa naŋa.»
Yesu wɩlɩɣ ɛyáa tɔm nɛ abalɩtʋ
28Yesu tɛm ɛ-tɔmkpɛlɩkɩyaa sakɩyɛ yɔɔdɩnaʋ ḿbʋ́ lɛ, pɩlabɩ-wɛ piti pɩŋŋ nɛ ɛzɩma mbʋ́ ɛwɩlaɣ-wɛ yɔ. 29Mbʋ́ pʋyɔɔ yɔ, ɛtawɩlɩɣ-wɛ ɛzɩ pa-paɣtʋ wɩlɩyaa yɔ. Ɛlɛ́, ɛwɩlaɣ-wɛ nɛ abalɩtʋ.
Iliyochaguliwa sasa
Maatiyee 7: KABI
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia