Matei 3
3
Yohane Mbatitsa kotangatsa
(Malk 1:1-8; Luk 3:1-18; Yohn 1:19-28)
1Ghamatsuwa agho Yohane Mbatitsa kaghenda yotangatsa mna inyika ya Yudea, 2kalonga, “Msame, mtsileke tsinzambi tsenu kwaapfila Ufalume wa kulanga wahabehi!” 3Kwa apfila Yohane yuyo imunu iyatabirighwe na nabii Isaya, kulonga,
“Litsi lya imunu lyokemelea kunyika,
‘Itengenetseni inzila ya Imtwatsa,
mgholoseleni inzila yake.’ ”
4Naye Yohane imwenyegho tsakapfala gwanda lya mighala ya ngamiya, na msipi ghwa ngotsi mchuno; na ichijo chake tsachikala nzighe na ukwi wa kumhulo. 5Iwanu wamghendela kulawa Yerusalemu, Yudeya yose na kulawa mna isi tsose tsili mbalimbali mwa ghumto ghwa Yoridani; 6naye kawabatitsa mna ghumto ghwa Yoridani, aku wosama tsinzambi tsawo.
7Naye hayawonile wengi mna Mafarisayo na Masadukayo woutsila ubatitso wake, kawalongela, “Mwemwe yamli lweleko lwa moma, nani iyawakanyile muikimbile imaya ikutsa? 8Lelo mtende aghala igholangusa ako ukusama kwenu; 9wala mleke kwipfikitsa kwilongela, 'Twinaye aba wetu, Abrahamu.' Nomlongelani ghendo, kulawa mna ghamabwe aghano. Imlungu kodaha kumwinulila wana Abrahamu. 10Na ihoya tiyari ikighwa kuna ghamasina gha imibiki, chila mbiki ing'aghukweleka matunda ghanoghile ghwoganighwa na kwasighwa mna ghumoto. 11Ambe nene nowabatitsa kwa ghamatsi kwa ajili ya ukusama, lekeni yeye iyakutsa kuchughu kwangu kana ngupfu kubita nene, mbaka nene sibamighwa baye kudohola imikwabatsa mmaghulu ghake. Ayo katsowabatitsa mwemwe kwa Iloho Yelile na moto. 12Na ilungo lwake lwa ukubetela lwa mmoko mwake, naye katsoliseya ghoya libughano lyake lya ukubetela; na katsoikunga ingano na kuyika mkano, lekeni imikumvi katsoilakatsa mna ghumoto ing'aghutsimika.”
Yesu kobatitsighwa
(Malk 1:9-11; Luk 3:21-22)
13Ichipindi acho Yesu kalawa Galilaya, kaghenda kuna ghumto ghwa Yoridani ili Yohane yakambatitse. 14Lekeni Yohane tsakabama yamghome, kalonga, “Nene nobamighwa nibatitsighwe na ghweghwe, naghwe konitsila nene?” 15Yesu kamwidika, “Uleke sambi iwe pfipfo. Kwaapfila pfipfo pfatubamighwa tuitimitse ihaki yose.” Apfo Yohane katoghola. 16Yesu hayamalitse ukubatisighwa, bahala kalawa mmatsi. Lola! Lilanga limpfughukila, kamwona Iloho wa Imlungu kohulumka kulonga njiwa na kumtsila mchanya mwake. 17Na baho, litsi kulawa kulanga lilonga, “Ayuno Imwanangu yanimkunda, yaninoghelighwa naye.”
Iliyochaguliwa sasa
Matei 3: LBV
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia