Matei 5
5
Yesu kowapetela iwanu kuchidunda
1Yesu hayonile ghamakingili gha iwanu, kagheluka kuchidunda, kakala hasi, na iwanafunzi wake wamtsila; 2baho kafumbula ghumlomo ghwake, kanza kuwalangulitsa, kulonga, 3Wabweda iwali wahingwa wa iloho,
kwaapfila ufalume wa kulanga wawo.
4Wabweda awala wana ihutsuni,
kwaapfila watsokanzighwa.
5Wabweda awala iwali wahole,
kwaapfila watsoihala isi.
6Wabweda awala wana inzala na ing'ilu ya ukutenda haki,
kwaapfila awo watsoghutitswa.
7Wabweda iwanu awala wana libatsi,
kwaapfila awo watsakonelighwa libatsi.
8Wabweda awala wana imimoyo yelile,
kwaapfila awo watsomwona Imlungu.
9Wabweda awala iwopatanisha iwanu,
kwaapfila awo watsokemighwa wana wa Imlungu.
10Wabweda awala iwodununzika kwa ajili ya ukutenda haki,
kwaapfila awo ufalume wa kulanga wawo.
11“Mbweda mwemwe iwanu hawatsomligheni na kumdununzeni na kumlongeni chila mbuli ihile kwa ughutsu, kwaajili yangu nene. 12Mdeng'e na kudeng'elela; kwaapfila ghweko lyenu kulu kulanga; mana apfo pfipfo pfawawadununze manabii wa ghumwande iwamlongoleleni mwemwe.
Imunyu na ghumwanga
(Malk 9:50; Luk 14:34-35)
13“Mwemwe mwa imunyu ya isi. Lekeni imunyu ing'ahinyika, angu itsoghumighwa choni mbaka ikole keli? Ng'aina sang'ano keli baye, ila yasighwe kunze na iwanu waibajughe.
14“Mwemwe mwa ghumwanga ghwa isi. Mji ghung'awa mchidando ng'aghudaha kwipfisika baye. 15Iwanu ng'awotuwa ichitasa na kuchighubika na iseghe baye, ila wochika mna ichinala, nacho chowamulikila iwanu wose iwali mng'anda. 16Pfipfo na mwemwe mleke ghumwanga ghwenu ghumulike hambele ha iwanu, nawo waghone ghamatendo ghenu ighanoghile, wamtunitse Aba wenu iyali kulanga.
Yesu kolangulitsa Ghamalaghitso
17“Mleke kufikitsa kuwa nene nitsa kuleghusa Ghamalaghitso gha Musa au ipfitabu pfa manabii wa Imlungu. Sitsile kuleghusa baye, ila nitsa kutimilitsa. 18Nomlongelani kweli ghendo, mbaka lilanga na isi hapfitsohupa, kuduhu helufi imwe wala alama ndodo mna Ghamalaghitso itsoleghusighwa mbaka ghose ghatimile. 19Apfo munu wowose iyoleghusa laghitso dodo kulawa mna Ghamalaghitso aghano, na kuwalangulitsa iwanu wangi pfipfo, ayo katsokemighwa mdodo ghendo mna ufalume wa kulanga. Lekeni ayula iyoghakinda Ghamalaghitso na kuwalangulitsa iwanu watende pfipfo, ayo katsokemighwa mkulu mna ufalume wa kulanga. 20Mana nomlongelani ghendo, ihaki yenu ana ng'aibita ihaki ya Waandishi na Mafarisayo, mna ufalume wa kulanga ng'amtsokwingila ng'o!
Maya
(Luk 12:57-59)
21“Mhulika iwanu wa ghumwande pfawalongelighwe, ‘Uleke kukoma, na munu wowose yang'akoma katsohighighwa.’ 22Lekeni nene nomlongelani ghendo, chila munu iyomwonela maya ndughu yake, katsohighighwa. Na ayula iyombetsa ndughu yake katsoghalighwa kuna libalatsa, na ayula iyomkema ndughu yake, ‘Mbotsi,’ ayo katsobamighwa ukwingila mna ghumoto ghwa jehanamu. 23Ana ughala inambiko yako hana imatsabahu, kuya kwokumbuka tsakwisonga na ndughu yako, 24uileke inambiko yako hambele ha imatsabahu, ughende tanu ukepatane na ndughu yako, kuya uye uilapfe inambiko yako.
25“Mwipatane hima na imunu iyokughala kuna libalatsa hamng'ali mwa mnzila, hela ayo katsokughala kwa imlamlitsi, na imlamulitsi katsokughala kwa asikali mkulu, naye katsokwika mchifungo. 26Nokulongela kweli ghendo, ng'utsolawa amwo baye mbaka ulihe sendi ya mwisho.
Ughoni
27“Mhulika tsailongighwa, ‘Uleke kutenda ughoni.’ 28Lekeni nene nomlongelani, munu wowose iyololesa ipinga kwa kutama, ayo mala katenda naye ughoni mmoyo mwake. 29Inenge yako ya kujilo ing'akutenda umtotsele Imlungu, ing'ole uyase kutali naghwe; mana ng'apfu kwaghisa chiungo chako chimwe, kubita kululeka ilukuli lwako lwose lwasighwe mna ghumoto ghwa jehanamu. 30Na ghumoko ghwako ghwa kujilo ghung'akutenda umtotsele Imlungu, ghukane ughwase kutali naghwe; mana ng'apfu kwaghisa chiungo chako chimwe, kubita kululeka ilukuli lwako lwose lwasighwe mna ghumoto ghwa jehanamu.
Imbuli ya italaka
(Mat 19:9; Malk 10:11-12; Luk 16:18)
31“Tsailongighwa, ‘Munu yang'amleka imwehe wake kobamighwa yamwandikile hati ya talaka yamwing'e.’ 32Lekeni nene nomlongelani, Munu wowose iyomleka imwehe wake, na imwehe wake ayo ng'atendile ughoni baye, komtenda yawe mghoni, na imunu iyomkwela ipinga ayo iyalekighwe apfo, naye kotenda ughoni.
Imbuli ya ukwilaha
33“Pfipfila mhulika iwanu wa ghumwande pfawalongelighwe, ‘Uleke kwilaha kwa ughutsu na kuleka kutenda chawilahile, ila wiyohe ukutenda achila chawilahile kwa Imtwatsa.’ 34Lekeni nene nomlongelani, Uleke kwilaha ghendo; wala kwa kulanga, kwaapfila acho chicho ichighoda cha ufalume cha Imlungu; 35wala kwilaha kwa isi, kwaapfila acho chicho ichghoda cha ukwikila ghamaghulu ghake; wala kwilaha kwa Yerusalemu, kwaapfila agho ghugho ghumji ghwa Mfalume Mkulu. 36Wala uleke kwilaha kwa litwi, kwaapfila ng'udaha baye kulutenda lumvili lumwe luwe lutselu au lutitu. 37Lekeni mng'alonga ‘Ona,’ iwe ‘Ona,’ na mng'alonga ‘Baye,’ iwe ‘Baye’; kwa apfila chinu chochose ichibita agho, cholawa kwa ayula Yehile.
Nenge kwa nenge
(Luk 6:29-30)
38“Mhulika tsailongighwa, ‘Nenge kwa nenge, na 'tsino kwa tsino.’ 39Lekeni nene nomlongelani, mleke kwihisanya na imunu yehile. Imunu yang'akutowa kanza lya kujilo, mhundusile na likanza lya kumoso pfipfila yakutowe. 40Na imunu yang'abama kukughala kuna libalatsa ili yasole ligwanda lyako, mlekele na likoti lyako pfipfila yalisole. 41Na munu wo wose iyokunanahitsa umdutile mtsigho ghwake kwa utali wa kilomita imwe, ghweghwe mdutile kwa kilomita mbili. 42Ayula iyokulomba mwing'e; na ayula iyobama kukukopa uleke kumhundusila ichisogho.
Mkunde aduwi yako
(Luk 6:27-28,32-36)
43“Mhulika tsailongighwa, ‘Mkunde munu wa habehi naghwe, na umwihile aduwi yako.’ 44Lekeni nene nomlongelani, muwakunde aduwi tsenu, na muwalombele awala iwomdununzani, 45ili muwe wana wa Aba wenu iyali kulanga; kwaapfila yeye kowalangatsila litsuwa lyake iwehile na iwanoghile; na kowatowela imvula wana ihaki na ing'awana ihaki. 46Mana mng'awakunda awala iwowakunda mwemwe, mtsopata liho lyachi? Mbona hata iwatotsa kodi pfipfo pfawotenda? 47Namwe ana muwalamsa ndughu tsenu waliyeka, mtenda choni chikulu kubita iwanu wangi? Angu iwanu ing'awommanya Imlungu ng'awotenda pfipfo baye? 48Muwe watimilifu, kama Aba wenu iyali kulanga pfayali mtimilifu.
Iliyochaguliwa sasa
Matei 5: LBV
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia