Matei 8
8
Yesu komhonya imunu yana ukoma
(Malk 1:40-45; Luk 5:12-16)
1Yesu hayahulumke kulawa kuchidunda, mtingano mkulu ghwa iwanu ghumuwinza. 2Baho, munu yumwe yana ukoma kamghendela, kamwinamila hambele hake, kamlongela, “Ghwemtwatsa, ung'abama, kwodaha kunitenda nideghete.” 3Yesu kagholosa ghumoko ghwake, kamkinda imunu ayo, kalonga, “Nobama, haya udeghete!” Bahala imunu ayula kadegheta ukoma wake. 4Kuya Yesu kamlongela, “Lola, uleke kumlongela munu wowose; ila ghenda wikelanguse kwa mlapfa nambiko; kuya ulapfe inambiko iyalaghitse Musa, ili iwe ukalangama kuna wawo.”
Ukutoghola kwa akida wa askali wa Roma
5Yesu hayengile Kaperinaumu, akida yumwe wa askali wa Roma kamghendela, kamlomba, 6kamlongela, “Ghwemtwatsa, mtumwa wangu kaukaye kawasa, kaholola; kuya koghula ng'ani.” 7Yesu kamlongela, “Nitsoghenda kumhonya.”
8Iakida ayo kamwidika, “Ghwemtwatsa, nene sili munu ghendo baye mbaka ghweghwe wingile hasi ha ikano yangu, ila ulonge longa limwe tu, imtumwa wangu katsohona. 9Kwaapfila hata nene nyikighwa hasi ha utawala, nina askali yaniwalongotsa. Nomuamulu ayuno, ‘Ghenda,’ naye koghenda; na munu yungi, ‘Itsa!’ Naye kakutsa; na imtumwa wangu, ‘Tenda achino!’ Naye kotenda.” 10Yesu hayahulike apfo kakangawala ghendo, kawalongela awala iwamuwinzile, “Nomlongelani kweli ghendo, sina mbone baye munu wowose mna isi ya Isiraeli yana inoghola ng'ulu apfino. 11Na nomlongelani ghendo, wengi watsakutsa kulawa mashariki na magharibi, nawo watsokala waje mmetsa hamwe na Abrahamu, Isaka na Yakobu mna ufalume wa kulanga. 12Lekeni iwana wa ufalume watsakwasighwa kunze, kuna ichisi totolo, kuko kutsakuwa na ichililo na ukugeng'eda ghamatsino.” 13Kuya Yesu kamlongela akida ayula, “Uka, na ghakulawile kama apfila pfautoghole.”
Kuya saa yiyila imtumwa wake kahona.
Yesu kohonya wanu wengi
(Malk 1:29-34; Luk 4:38-41)
14Yesu hayapfikile ukaye kwa Petiri, kampfika mai mkwe wake Petiri kawasa mchinanda, koghula homa. 15Kamkinda ghumoko ghwake na lihoma limlawa; naye kenuka kamtandila ichijo.
16Nemihe haipfikile, wamghalila iwanu wengi wana ipfinyamkela, naye kapfilapfa ipfinyamkela kwa kupfikembela; kawahonya wose iwakalile watamu; 17ili achila ichilongighwe na nabii Isaya chitimile, hayalongile,
“Yeye kasola ghamaghonzwa ghetu,
na kaghabapa ghamatamu ghetu.”
Wanafunzi wa Yesu pfawobamighwa kuwa
(Luk 9:57-62)
18Yesu hayonile mtingano mkulu ghwa iwanu ghwomtsunguluka, kawalaghitsa wanafunzi wake waloke kumwambu kwa litsimbu. 19Baho mwandishi yumwe kamghendela, kamlongela, “Mlangulitsi, nitsokuwinza kokose kwaughenda.”
20Yesu kamwidika, “Wambwa wa kumhulo wana mango, na wapfideghe wali mlanga wana pfibali, lekeni imwana wa Adamu kahela hanu ha ukuwasitsa litwi lyake.” 21Mwanafunzi wake yungi kamlongela, “Ghwemndewa, ungaye luhusa tanu mbuke nikamtsike aba wangu.” 22Lekeni Yesu kamlongela, “Uniwinze, waleke iwanu iwafile wawatsike iwanu wawo iwafile.”
Yesu koikembela inyahemu
(Malk 4:35-41; Luk 8:22-25)
23Kuya Yesu kadina mna ghumnumbwi, na iwanafunzi wake wamuwinza. 24Bahala ilawila nyahemu ng'ulu mna litsimbu, mbaka ghamawimbi ghang'ali ghakwingila mna ghumnumbwi; lekeni Yesu tsakawasa fofofo. 25Wanafunzi wake wamghendela, wamlamsa, walonga, “Gwemtwatsa, utukombole, twotsama!” 26Kawedika, “Hebari mpfuka, mwemwe yamli na noghola ndodo?” Kuya kenuka, kaikembela inyahemu na ghamawimbi, baho litsimbu litulia tuli! 27Iwanu wose wakangawala ghendo, weghutsa, “Angu ayu munu wachi? Hata libeho na ghamawimbi pfose pfomhulikitsa!”
Yesu kowahonya wanu weli wana ipfinyamkela
(Malk 5:1-20; Luk 8:26-39)
28Naye hayapfikile kumwambu, kuna isi ya Gadara, ketingana na wanu weli wana ipfinyamkela wolawa kuna ghamakabuli; wakala wakali ng'ani mbaka kuduhu munu yadahile kubita inzila ayo. 29Bahala wakemelela, “Angu utubamila choni, ghwemwana wa Imlungu? Pfii kutsa kutudununza ng'ana ichipindi chetu chipfike?” 30Kutali kulawa hanu ahala kukala na kingili kulu lya ngubi wakuja. 31Pfinyamkela awo wamlomba Yesu, “Ung'atulapfa, tuluhusu tughende tukawengile wangubi awala.” 32Kawalongela, “Haya laweni!” Baho wawalawa iwanu awo, wawengila wangubi, na likingili lyose litsumila umhulumko mkali, wengila mna litsimbu, na wose wafa mna ghamatsi. 33Lekeni iwadimi wa wangubi awo watsuma, waghenda kuna ghumji. Ako wawalongela iwanu agho ghose, na achila ichiwalawilile iwanu wana ipfinyamkela. 34Baho iwanu wose wa ghumji walawa waghenda kwitingana na Yesu; nawo hawamwonile, wamlomba yalawe kuna isi yawo yoke.
Iliyochaguliwa sasa
Matei 8: LBV
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia