Soma Biblia Kila Siku Mei/2022Mfano

Mungu aliitimiza ahadi yake aliyompa Sulemani baada ya huyu kuonyesha unyenyekevu wakati wa maombi yake. Kumbuka itikio la Mungu kuhusu maombi ya Sulemani:Neno hili likawa jema machoni pa Bwana, ya kuwa Sulemani ameomba neno hili. Mungu akamwambia, Kwa kuwa umeomba neno hili, wala hukujitakia maisha ya siku nyingi; wala hukutaka utajiri kwa nafsi yako; wala hukutaka roho za adui zako; bali umejitakia akili za kujua kuhukumu; basi, tazama, nimefanya kama ulivyosema. Tazama, nimekupa moyo wa hekima na wa akili; hata kabla yako hapakuwa na mtu kama wewe, wala baada yako hatainuka mtu kama wewe. Na mambo yale usiyoyaomba nimekupa, mali na fahari, hata hapatakuwa na mtu katika wafalme kama wewe, siku zako zote(3:10-13). Kwa hiyo, hapakuwa na mfano wa hekima aliyokuwa nayo, katika pande zote za dunia. Mungu alimpa maarifa katika kila fani na taaluma katika maisha ya kawaida na utawala wa nchi. Alitunga mithali, nyimbo, alijua elimu ya miti, wanyama, ndege, wadudu n.k. (m.32-33). Sifa zake zilienea kote. Wafalme pamoja na wataalamu walisafiri kutoka mbali kuja kuona na kusikia hekima ya Sulemani.