These Scriptures are a new translation into the Naskapi language spoken at Kawawachikamach, Quebec. We the Naskapi people have been eager to have our own translation of the Bible. For many decades we have had to make do with Scriptures that were translated for indigenous languages that are different from our own: most notably Bishop Horden's Moose Cree New Testament and prayer book, and Rev. W. G. Walton's prayer book. The Naskapi Development Corporation has been engaged with this work since the 1990s, facilitated by Wycliffe Bible Translators and the Canadian Bible Society. The Naskapi community grateful acknowledges the help of all who participated with us in producing these Scriptures. Our prayer is that these Words of God will be cherished by our people for generations to come.

ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ The Naskapi text is copyright © Naskapi Development Corporation Naskapi Development Corporation Kawawachikamach, Québec G0G 2Z0 Canada New Testament published by the Canadian Bible Society (CBS) © 2007 Canadian Bible Society 10 Carnforth Road, Toronto Ontario M4A 2S4 Canada

ᒋᓴᒪᓂᑐᐤ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ God's Word in Naskapi

ᑲᒋ ᓂᓱ ᒋᓯᑲᒡ ᒪᒃ ᒋ ᓂᐳᐅᓇᓄᐤ ᐊᓐᑕ ᐊᓐ ᐅᑕᓇᐤ ᑲᐃᓇ ᑲ ᐃᓯᓂᐧᑲᑕᒡ ᐊᓐᑕ ᑲᓕᓕ ᐊᔅᒋᒡ ᑲ ᑎᒂᒡ᙮ ᐊᑯᑕ ᐊᓐᑕ ᑲ ᑕᔨᒋ ᒋᓴᔅ ᐅᑲᐎᔭ᙮ ᒋᓴᔅ ᑭᔭ ᐊᓂᔭ ᐅᒋᔅᒋᓄᐊᒧᐛᑭᓇ ᑭᔭ ᐎᔨᐛᐤ ᒋ ᐎᓴᒪᐊᑭᓄᐅᒡ ᐊᓂᔭ ᐊ ᓂᐳᐅᓇᓄᐎᒡ, ᐃᔅᐱ ᒪᒃ ᒥᓯᐛ ᑲ ᒋᔅᑕᑭᓄᐅᒡ ᐊᓐ ᓱᒥᓇᐳᔾ, ᒋᓴᔅ ᒋ ᐃᑎᑯᐤ ᐅᑲᐎᔭ, “ᓴᔅ ᓄᑕᐱᔪᒡ ᓱᒥᓇᐳᔪᐤ᙮”
ᒋᓴᔅ ᒪᒃ ᒋ ᐃᑕᐤ, “ᐃᔎᐤ, ᒐᒂᓐ ᐛᒋ ᐎᑎᒧᔨᓐ ᐊᓐ ? ᑕᐸ ᐊᔅᒄ ᐅᑎᒋᐱᔪᐤ ᐊᓐ ᓂᑎᐸᐃᑭᓐ ᐊᓐᑕ ᒐ ᒋᔅᒐᔨᒥᑯᐅᔭᓐ ᐊᐛᓐ ᐊ ᐊᐎᔭᓐ᙮”
ᐊᑯ ᒋᓴᔅ ᐅᑲᐎᔭ ᒂ ᐃᑕᑦ ᐊᓂᔭ ᐊᐱᒋᐊᑭᓇ, “ᒥᒄ ᑕᓐ ᒐ ᐃᑎᓱᒥᑕᒂ ᐊᐅᒄ ᐊᓂᔭ ᐃᑐᑎᒺᐧᒄ᙮”
ᒋ ᑎᑯᓇ ᒪᒃ ᐊᓐᑕ ᐊᓱᑕᒡ ᐊᓯᓂᔪᐤ ᐳᑎᔭ᙮ ᐸᐸᐃᒄ ᒪᒃ ᐅᔭ ᐳᑎᔭ ᓴᓯᑲᓐ ᓂᓱᔪᐤ ᑭᔭ ᒪᒃ ᓂᔅᑐᔪᐤ ᑕᑐᔭᓇᑭᓐ ᒐᒋ ᐃᔅᐱᓯᐸᔭᒡ ᓂᐱᔾ ᒋ ᐊᔭᔅᐱᓴᐛ᙮ ᒍᐤ ᐃᔪᒡ ᒪᒃ ᐊ ᒋᔅᑕᐸᐅᐛᒐᒡ ᐃᑕᐱᒋᑕᐅᒡ ᐅᔭ ᓂᐱᔪᐤ ᐊ ᐃᑐᑕᒡ ᑕᓐ ᐊ ᐃᑎᓱᒥᑯᒡ ᐅᑦ ᐊᔭᒥᐊᐅ ᐎᓱᐛᐅᓄᐛᐤ᙮
ᐊᑯ ᒋᓴᔅ ᒂ ᐃᑕᑦ ᐊᓂᔭ ᐊᐱᒋᐊᑭᓇ, “ᓴᑭᔅᒋᓇᐱᑕᒄ ᓂᐱᔾ ᐅᑕ ᐅᔭ ᐳᑎᔭ᙮” ᓇᔅᒡ ᒪᒃ ᒋ ᓴᑭᔅᒋᓇᐱᑕᔪᐛ᙮
ᐊᑯ ᒥᓐ ᒂ ᐃᑕᑦ, “ᒂᐸᐊᒥᒄ ᐊᐱᓯᔅ ᒐ ᐃᑐᑐᐛᒄ ᐊᓐ ᒥᑯᓴᐅᒋᒪᐤ᙮”
ᐊᐅᑯᓐ ᑭᑈ ᑲ ᐃᑎᔨᒋ᙮ ᒋ ᑯᒋᔅᑎᒻ ᐊᓐ ᒥᑯᓴᐅᒋᒪᐤ ᐊᓂᔭ ᓂᐱᔪᐤ, ᓴᔅ ᒪᒃ ᓱᒥᓇᐳᒡ ᒋ ᐃᑕᑭᒥᔪᐤ᙮ ᓇᒪ ᐅᒋ ᒋᔅᒐᔨᑎᒻ ᑕᓐᑕ ᑲ ᐅᒋᐱᔨᒡ ᐊᓂᔭ ᓱᒥᓇᐳᔪᐤ᙮ ᐊᓐᒡ ᒪᒃ ᐎ ᐊᐱᒋᐊᑭᓐᒡ ᐊᓂᔭ ᓂᐱᔪᐤ ᑲ ᒂᐸᐊᒡ ᒋ ᒋᔅᒐᔨᑎᒧᒡ ᐎᔨᐛᐤ ᑕᓐᑕ ᑲ ᐅᒋᐱᔨᒡ ᐊᓂᔭ ᓱᒥᓇᐳᔪᐤ᙮ ᐊᑯ ᐊᓐ ᒥᑯᓴᐅᒋᒪᐤ ᒂ ᐎᓴᒪᑦ ᐊᓂᔭ ᐅᔅᒋᓂᐳᐛᓇ, ᒂ ᐃᑕᑦ, “ᒥᓯᐛ ᐊᐛᓐ ᐊ ᒥᑯᓴᑦ, ᐊᓂᔭ ᒪᐅᒡ ᐊ ᒥᔽᔨᒡ ᓱᒥᓇᐳᔪᐤ ᓂᔅᑎᒻ ᐱᒥᐱᔨᑕᐤ, ᐊᑯ ᐃᔅᐱ ᐊ ᐊᑎ ᒥᔪᐧᑭᓱᔨᒋ ᐊᓂᔭ ᑲ ᐎᓴᒪᑦ, ᐊᑯ ᐊᓂᔭ ᐊᑲ ᐎᐧᑭᓂᔨᒡ ᓱᒥᓇᐳᔪᐤ ᐸᒥᐱᔨᑕᑦ᙮ ᒋᔾ ᒪᒃ ᒐᒂᓐ ᐛᒋ ᒪᔅᑕᔾ ᐱᒥᐱᔨᑕᔨᓐ ᐊᓐ ᑲ ᒥᔽᒡ ᓱᒥᓇᐳᔾ᙮”
ᐊᑯᑕ ᒪᒃ ᐊᓐᑕ ᑲᐃᓇᒡ ᐊᓐᑕ ᑲᓕᓕ ᐊᔅᒋᒡ, ᓂᔅᑎᒻ ᑲ ᒪᒥᔅᑲᒡ ᐃᑎᑦ ᒋᓴᔅ, ᐊᑯᑕ ᑲ ᓄᑯᓂᔨᒡ ᐅᒋᔅᑕᔨᑕᑯᓱᐅᓐ᙮ ᐊᑯᑕ ᒪᒃ ᑲ ᐅᒋ ᑕᑈᔭᔨᒥᑯᑦ ᐅᒋᔅᒋᓄᐊᒧᐛᑭᓇ᙮
ᐊᑯ ᒋᓴᔅ ᑭᔭ ᐅᑲᐎᔭ ᑭᔭ ᐎᐧᑲᓂᓴ ᑭᔭ ᐊᓂᔭ ᐅᒋᔅᒋᓄᐊᒧᐛᑭᓇ ᒋ ᐃᑐᑕᐅᒡ ᐊᓐᑕ ᐅᑕᓇᔪᐤ ᑲᐳᕐᓇᐊᒻ ᑲ ᐃᓯᓂᐧᑲᑕᔨᒡ, ᐊᑯᑕ ᐊᓐᑕ ᑲ ᑕᒡ᙮ ᓇᒪ ᒥᒄ ᓇᔅᒡ ᒥᒐᑐᐤ ᒋᓯᑲᐛ ᐅᒋ ᑕᐅᒡ ᐊᓐᑕ᙮



ᓴᔅ ᒪᒃ ᒋ ᐸᓱᓇᑯᓂᔪᐤ ᒍᐤ ᐃᔪᒡ ᑲᒋ ᒥᑯᓴᒡ, ᐎᒪᔅᑲᒐᐅ-ᒥᑯᓴᐅᓐ ᑲ ᐃᓯᓂᐧᑲᑕᔨᒡ, ᐊᑯ ᐊᓐᑕ ᒋᕈᓯᓕᒥᒡ ᒂ ᐃᑐᑕᑦ ᒋᓴᔅ᙮ ᐊᓐᑕ ᒪᒃ ᒋᓴᐊᔭᒥᐊᐅᒋᐛᐱᒡ ᒐ ᐊᑎ ᐱᒐᑦ, ᒋ ᐛᐱᒪᐤ ᓇᐸᐛ ᐊ ᐊᑕᐛᔨᒋ ᒥᔅᑐᓴ ᑭᔭ ᒪᔭᑕᓂᓴ ᑭᔭ ᐱᔭᓯᓴ, ᑭᔭ ᐊᓂᔭ ᑲ ᒥᔅᑯᑐᓇᔨᒋ ᓱᓇᔭᔪᐤ ᐊ ᐊᐱᔨᒋ ᐊᓐᑕ᙮ ᐊᑯ ᒂ ᐅᓯᑕᑦ ᐱᓯᔅᑕᐃᑭᓂᔪᐤ ᐊᐱᓯᔪᐤ ᐊ ᐊᐱᒋᑕᑦ, ᐊᑯ ᒂ ᐎᐎᑎᓴᐛᑦ ᐊᓂᔭᔪᐛ ᑲ ᐊᑕᐛᔨᒋ ᑭᔭ ᐊᓂᔭ ᐊᐛᓯᓴ ᐊᓐᑕ ᒋᓴᐊᔭᒥᐊᐅᒋᐛᐱᒡ, ᑕᐱᔅᑯᓐ ᐊᓂᔭ ᒪᔭᑕᓂᓴ ᑭᔭ ᐊᓂᔭ ᒥᔅᑐᓴ᙮ ᒋ ᒂᑎᐱᐛᐱᓂᒺᐤ ᑭᔭ ᐅᒥᒋᓱᐛᑭᓇᑎᑯᔪᐛ ᐊᓂᔭ ᑲ ᒥᔅᑯᑐᓂᒥᔨᒋ ᓱᓇᔭᔪᐤ, ᒂ ᐃᒐᐛᐱᓂᒺᑦ ᐊᓂᔭ ᐅᓱᓇᔭᓂᒥᔪᐤ᙮ ᒋ ᐃᑕᐤ ᒪᒃ ᐊᓂᔭ ᐱᔭᓯᓴ ᑲ ᐊᑕᐛᒐᔨᒋ, “ᒪᒋᒄ ᓇᑕ ᐎᐎᑕᐊᐧᑯᒡ ᐊᓐᒡ᙮ ᓄᑕᐎᔾ ᐅᔭ ᐎᒡ, ᓇᒪᔭᐤ ᐅ ᐊᑕᐛᐅᒋᐛᑉ᙮ ᐊᑯᓐ ᐊᑯ ᐃᔅᐱᔅ ᐊ ᑕᐛᒄ ᒐᒂᓐ ᐅᑕ᙮”
ᐅᒋᔅᒋᓄᐊᒧᐛᑭᓇ ᒪᒃ ᒋ ᐅᒋ ᒋᔅᒋᓯᔪᐛ ᐊᓐᑕ ᒥᓯᓇᐃᑭᓂᒡ ᑲ ᐃᑎᔅᑕᔨᒡ,
ᓇᔅᒡ ᓂᑭ ᓴᐧᑯᒋᐃᑯᓐ ᓇᔅᒡ ᐊ ᓴᒋᑕᔭᓐ ᒋᒡ᙮
ᐊᑯ ᐊᓂᔭᔪᐛ ᒍᐤ ᐃᔪᐛ ᑲ ᓂᑲᓂᔅᑯᐛᔨᒋ ᒂ ᐸᒋ ᓂᑐᐛᐱᒥᑯᑦ, ᒂ ᐃᑎᑯᑦ, “ᐊᐛᓐ ᑲ ᐃᑎᓱᒥᔅᒃ ᐊᓐ ᑲ ᐃᑐᑎᒥᓐ, ᒐᒄ ᒪᒥᔅᑲᒡ ᐃᑐᐅᓐ ᒐᒋ ᐛᐸᑎᔨᔭᒡ ᑕᑈ ᒋᓴᒪᓂᑐᐤ ᐊᒋ ᐃᑎᓱᒥᔅᒃ ᒐᒋ ᐃᑐᑎᒥᓐ ᐊᓐ ᑲ ᐃᑐᑎᒥᓐ ?”
ᐊᑯ ᒋᓴᔅ ᒂ ᐃᓯ ᐎᑎᒧᐛᑦ, “ᓂᓱᐅᓇᒋᑕᒄ ᐅ ᒋᓴᐊᔭᒥᐊᐅᒋᐛᑉ, ᓂᔅᑐ ᒋᓯᑲᐛ ᒪᒃ ᐃᔅᐱᔅ ᒥᓐ ᑯᑎᒡ ᓂᑭ ᐎᔨᑲᐳᐅᑕᓐ᙮”
ᐊᑯ ᒂ ᐃᑕᒡ, “ᓂᔅᑐ ᒋᓯᑲᐛ ᐊ ᐃᔅᐱᔅ ᓴᔅ ᒥᓐ ᒋᑭ ᒋ ᐎᔨᑲᐳᐅᑕᓐ ? ᓇᐎᔪᐤ ᐊᓱ ᐊᓱᑕᒡ ᑕᑐᐤ ᐱᐳᓇ ᒋ ᑎᓯᐧᑲᑭᓄᐤ ᐅ ᒋᓴᐊᔭᒥᐊᐅᒋᐛᑉ ᑲ ᐎᔨᑲᐳᐅᑕᑭᓄᐅᒡ᙮” ᐎᔪᐤ ᐊᓂᔭ ᑲ ᐊᔨᒧᑕᐧᒃ ᒋᓴᔅ ᐊᓂᔭ ᑲ ᐃᔅᒋᔄᑦ ᒐᒋ ᐎᔨᑲᐳᐅᑕᑦ ᐊᔭᒥᐊᐅᒋᐛᐱᔪᐤ ᓂᔅᑐ ᒋᓯᑲᐛ ᐃᔅᐱᔅ᙮ ᐃᔅᐱ ᒪᒃ ᑲ ᐅᓂᔅᑲᓇᑭᓄᐅᑦ ᓂᐳᐅᓂᒡ ᐅᒡ, ᐊᑯ ᒂ ᒋᔅᒋᓯᔨᒋ ᐊᓂᔭ ᐅᒋᔅᒋᓄᐊᒧᐛᑭᓇ ᐅᔭ ᑲ ᐃᔅᒋᔄᑦ᙮ ᒋ ᑕᑈᑎᒧᒡ ᒪᒃ ᑕᓐ ᐊ ᐃᑎᔅᑕᔨᒡ ᒋᓴᒪᓂᑐᐛ ᐅᑦ ᐃᔨᒧᐅᓂᔨᒡ ᑭᔭ ᑕᓐ ᑲ ᐃᔅᒋᔄᔨᒋ ᒋᓴᓴ᙮

ᒪᒂᒡ ᒪᒃ ᒋᓴᔅ ᑲ ᑕᑦ ᐊᓐᑕ ᒋᕈᓯᓕᒥᒡ ᐊᓂᔭ ᒪᒂᒡ ᑲ ᒥᑯᓴᓄᐎᒡ ᐎᒪᔅᑲᒐᐅ-ᒥᑯᓴᓂᔪᐤ, ᒥᒐᑦ ᐊᐛᔪᐛ ᒋ ᑕᑈᔭᔨᒥᑯᐤ ᐎᔾ ᑕᑈ ᐊ ᐊᐎᑦ ᙭ ᐃᔅᐱ ᑲ ᐛᐱᒥᑯᑦ ᐊ ᒪᒥᔅᑲᒡ ᐃᑎᑦ᙮ ᒋᓴᔅ ᒪᒃ ᓇᒪ ᐅᒋ ᑕᑈᐅᒐᔨᒪᐤ ᐛᔅ ᒥᓯᐛ ᐊᐛᔪᐛ ᒋ ᒋᔅᒐᔨᒪᐤ ᑕᓐ ᐊᓐ ᐊ ᐃᑕᔨᑕᑯᓯᔨᒋ᙮ ᓇᒪ ᑭᔭ ᐅᒋ ᓂᑐᐛᔨᑎᒻ ᒐᒋ ᐎᑎᒪᑯᑦ ᐊᐛᔪᐛ ᑕᓐ ᐊ ᐃᑕᔨᑕᑯᓯᔨᒋ ᐊᐛᔪᐛ ᐛᔅ ᒋ ᒋᔅᒐᔨᒪᐤ ᑕᓐ ᐊᓐ ᐊ ᐃᑕᔨᑕᑯᓯᔨᒋ᙮

கேளுங்கள் ᒠᓐ 2