If you have would like a copy of this version please contact info@davarpartners.org

Text: Churahi New Testament, CC-BY-SA-4.0, The Love Fellowship. Audio: Churahi New Testament Audio Bible, CC-BY-SA-4.0, Davar Partners International, The Love Fellowship, 2022

Churahi New Testament

Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.

यीशु जेख्णी मैहणुवां केरी भीड़ तकाय ता सै हल्कै पहाड़ा पन थोड़ा त्या प्रन चढ़ा, जां जेख्णी तैन्हांं शिख्रांणेरै तेईनी बेठा ता तेसेरै चैलै तैस किनि यै। जां यीशु ऐ उपदेश दींणा शुरू किया:

“धन्य अत्तै सै मैहणु जै आत्मिक तौर पनि परमेश्वरेरै प्रति अपड़िया जरूतिया केरा ऐहसास कातै,
केईनी कि परमेश्वरैरा राज्य तेन्हैरा आ।
धन्य अत्तै सै, जै दुख मंनातै
केईनी कि परमेश्वरा तेन्हांनि तसल्ली दींणी।
धन्य अत्तै सै, जै नम्र अत्तै
केईनी कि परमेश्वरा तैन्हांं सिंउ अपड़ै वादै पूरै कांने।
धन्य अत्तै सै, जै धार्मिकताय सिंउ जीवन जींणैरी सच मझ ईच्छा रखतै
केईनी कि परमेश्वरा सैक्यै त्रिप्त कांने।
धन्य अत्तै सै जै दयालु अत्तै
केईनी कि परमेश्वरा बि तैन्हांं पन दया कांनी।
धन्य अत्तै सै, जेन्हैरै मंन साफ अत्तै
केईनी कि तैन्हांं परमेश्वरेरै दर्शन कांने।
धन्य अत्तै सै, जै मेल-जोल करवांणार अत्तै
केईनी कि तेन्हांनि परमेश्वरेरै पुत्र बोलणु।
धन्य अत्तै सै जै धर्मी जीवन जींणैरी वजहि ला सतायूंतै
केईनी कि स्वर्गेरा राज्य तेन्हैरा आ।”
धन्य अत्तै तुवे, केईनी कि जेख्णी मैहणुवां तुवे मिंडै चैलै भूंणैरी वजहि सिंउ तुवाड़ी निंदा करिया, जां सताईया जां झूठ बोलि-बोलि करि तुवाड़ै विरोधा मझ हर प्राकारेरी बुरी गलै बोलिया। ता आनन्दित जां मघन भौ, केईनी कि तुवाड़ै तेईनी परमेश्वरै स्वर्गा मझ बड़ा बडा ईनाम रखौरा आ। ऐठणीरै तेईनी कि मैहणुवें सैक्यै भविष्यवक्ता बि जै बड़ै साल पेहिलै थ्यै सै बि ऐहियें-चारै सताउरै थ्यै।

तुवे ऐस संसारैरा मैहणुवां केरै तेईनी लूणा सैयि अत्तै; पण अगर लूणैरा स्वाद बिगड़ी गहिया ता, फिरी तैस नमकीन ना बंणा सकतै। सै फिरी कोस कंमेरू ना रींहणु। सिवाय ऐठणीरै तेईनी कि सै भेईर सुटियो जां मैहणुवां केरै पायड़ा हेटीं पीह दियो आ। तुवे ऐस संसारेरै मैहणुवां केरै तेईनी लाईटी सैयि अत्तै; जै नगर पहाड़ा पन बसोरू आ सै छपि ना सकतु। जां मैहणु दीया जाई करि तैस दियुंटा हैटां ना पण दियुंटा पन रखतै, तेख्णी घरेरै मैहणुवंनी सारानि प्रगड़ु पुजि गांहथु। तीहैं चारै तुवाड़ु प्रगड़ु मैहणुवां केरै सांमणै चमकिया कि सै तुवाड़ै भलै कंमा तका करि तुवाड़ै पिता परमेश्वरेरी, जै स्वर्गा मझ आ, तेसैरी महिमा करिया।

ऐहीं मेईं समझा, कि आंउ मूसेरी व्यवस्थाय या भविष्यवक्ता केरिया लिखोरिया गला मुकांणा यौउरा आ, आंउ ऐन्हां गला मुकांणा ना पण पूरी कांननी यौउरा। आंउ तुहां सिंउ सच बोलता, कि ज्यो-तेईनी सुरग जां धरती नष्ट ना भौ गाहलै त्यो-तेईनी व्यवस्थायरी अक बि गल या अक बि बिंदु पूरू भूंणै बिना ना टअनु। ऐठणीरै तेईनी जै कौ बि ऐन्हां हल्किया किना हल्किया आज्ञाईया मझ कोसक्यै एकि बि ना मनिया, जां होरनियां मैहणुवंनी बि ऐहीं कांनु शिख्रांता, सै स्वर्गेरै राज्य मझ सभनियांं हल्का समझियुंणा। पण जै कौ बि ऐन्हां मनता जां होरनियां मैहणुवंनी बि मनणी शिख्रांता, सै स्वर्गेरै राज्य मझ महान समझियुंणा। केईनी कि आंउ तुहां सिंउ बोलता कि तुवे यहूदी शास्त्रिया जां फरीसिया केरै धर्मेरै व्यवहारा किना बधि करि व्यवहार करा, तां तुवाड़ु स्वर्गेरै राज्य मझ गांहणु आसान आ।

तुहांनि शुणाउरू आ, कि परमेश्वरै असेड़ै पूर्वजनी बोलोरू थियु कि कोसेरी हत्‍या मेईं कातै जां जै कौ हत्‍या करैला सै अदालती मझ सजायरा हकदार भूंणा। पण आंउ तुहां सिंउ बोलता कि, जै कौ मैहणु अपड़ै भाई पन गुस्सा करैला परमेश्वरा तेसैरा न्याय कांना, जां जै कौ अपड़ै भाई निकम्मा समझि करि तेसैरी बेजती करैला सैक्या भरी सभाय मझ दण्डैरै काबिल भूंणा; जां अगर कौ अपड़ै भाईनी मूर्ख बोलिया ता सै नरकेरी आगी मझ सजायरा हकदार भूंणा। ऐठणीरै तेईनी अगर तु मंदरैरी पिंडी पन अपड़ि भैंट चाढ़ता आ, जां तैड़ी तांउ याद ऐईछिया, कि तिंडै भाईरै मंना मझ तिंडै तेईनी विरोध आ, ता तु तैस भैंटी तैड़ियै पिंडिरै सांमणै छडि गा, जां पेहिलै गहि करि अपड़ै भाई सिंउ राजी-नामा कर, फिरी अईछी करि तु अपड़ि भैंट पिंडी पनि चाहढ़। ‍ज्यो तेईनी तु अपड़ै दुशमणा सिंउ बत्तै मझ आ, तैस सिंउ झटपट मेल-मिलाप करि लै किहींक्यै ऐहीं ना भुईया कि सै तांउ जज्जैरै हवालै करि दिया, जां जज तांउ सिपाहिया केरै हवालै करि दिया जां फिरी सिपाहि तांउ जैल्ही मझ सुटि दिया। आंउ तुहां सिंउ सच बोलता कि, ज्यो तेईनी तु तैस सारूरा भुगतान ना करैला, त्यो-तेईनी तिंडै बोलै तेठां किना ना छुड़खियुंणु।

तुहांनि शुणाउरू आ, कि परमेश्वरैरा ऐ आदेश आ कि, व्यभिचार मेईं कातै? पण आंउ तुहां सिंउ बोलता कि अगर केणुक्या मैहणु कोसक्यै जनेनी बुरी नजरी सिंउ तकांता ता सै परमेश्वरेरी नजरी मझ तैस सिंउ पाप करि बेठौरा। अगर तिंडु टीर ताउ पाप कांना पन मजबूर कातु ता तैस पापा कांना छडि दै! केईनी कि तिंडै तेईनी ऐ बधिया आ कि तिंडै एकि अंगा मझांं अक अंग खत्म भौ गहिया जां तिंडा सारा शरीर नरका मझ ना सुटियो। अगर तुवे अपड़ै एकि हत्था पाप कांननी मजबूर करिया, ता तैस अपड़ै हत्था पाप कांना किना रौक। ऐड़ि तेईनी कि अगर तुहां नरका किना बचणेरै तेईनी अपड़ा हत्थ बढि करि सुटणा पुईया, तां बि ऐहीं करा।

मूसेरी व्यवस्थाय मझ ऐ बि बोलोरू आ कि, जै कोई अपड़ि लाड़िनी तलाक दींणा चांहथा ता सै तेसनी कागजा पन लिखि करि दिया। पण आंउ तुहां सिंउ बोलता कि जै कौ अपड़ि लाड़िनी व्यभिचारा छडि करि कोसक्यै होरी गलेरी वजहि ला तलाक दींता ता, सै तैस किना व्यभिचार करवांता; जां जै कौ तैस छडोरी सिंउ ब्याह करिया, ता सै बि तैस सिंउ व्यभिचार काता।

तुहैं ऐ बि शुणौरू आ, कि असेड़ै पूर्वजा सिंउ बोलोरू थियु, “झूठी कसम मेईं खांतै, पण परमेश्वरा सिंउ क्यौरा वायदा पूरा करै। पण आंउ तुहां सिंउ बोलता, कि कसम कदि मेईं खांता, ना ता स्वर्गेरी, केईनी कि सै परमेश्वरैरा सिंघासन आ; ना धरतिरी केईनी कि सै तेसेरै पैयिड़ रखणैरी जगा आ; ना यरूशलेमेरी, केईनी कि सै महाराजेरू नगर आ। अपड़ै शिरैरी बि कसम मेईं खांता, केईनी कि अपड़ि मर्जी ला तु एकि शिरवा ना ता हच्छा जां ना काआ करि सकता। पण तुवाड़ी गल हाँ ऐरी हाँ जां नाँ ऐरी नाँ भुईया; केईनी कि जै किछ ऐत किना जादु भूंतु सै शैतान यानि बुराई ला भूंतु।

तुहैं मैहणुवें शुणि लियौरू आ, कि व्यवस्थाय मझ ऐ लिखोरू आ, टीरैरै बदलै टीर, दंतैरै बदलै दंत। पण आंउ तुहां सिंउ बोलता कि, व्यवस्थाय मझ ऐ बि लिखोरू आ कि कोस बि बुरै मैहणुरै बुरै कंमा केरा बदला मेईं लींतै; पण जै कौ तिंडै देहिणी तलवड़ी पन थप्पड़ मारी करि तिंडि बेजती करिया, ता तैस धेरै होरी तलवड़ी करि दैई। जां अगर कौ तांउ पन कचहरी मझ मुकदमा चला करि तिंडा कुरता बि लींणा चहिया, ता तैस कौट बि लैयि गांहणा दै। जां अगर कौ तांउ अक किलोमीटर चलणैरै तेईनी मजबूर करिया ता तु तैस सेईतै दो किलोमीटर तेईनी चलि गा। जै कौ ताउ किना कौ चीज मगिया ता तु तेसनी दै, जां जै कौ ताउ किना उधार लींणा चांहथा ता तेसनी नमां मेईं करै।


तुवे मैहणु शुणि बेठोरै अत्तै, कि व्यवस्थाय मझ ऐ लिखोरू आ, कि अपड़ै ग्रांवाला सेईतै प्रेम कर, जां अपड़ै दुशमणा सेईतै दुशमणी कर। पण आंउ तुहां सिंउ ऐ बोलता कि अपड़ै दुशमणा सेईतै प्रेम कर, जां जै तुहां सतांतै तेन्हैरै तेईनी प्रार्थना करा। ताकि जेनि ला तुवे स्वर्गा मझ रींहणारै अपड़ै पिता परमेश्वरेरै बच्चै बंणिया; केईनी कि सै भला जां बुरा दोईयो मैहणुवां पन बराबर दीहेरू प्रगड़ु काता, जां धर्मियां जां अधर्मियां सभनियांं मैहणुवां पन बराबर झड़ी पूंती। केईनी कि अगर तुवे अपड़ै प्रेम रखणै बाऐ मैहणुवां सिंउ प्रेम रखतै, ता परमेश्वरा तुहांनि कोई ईनाम ना दींणा, केईनी कि चुंगी लींणै बाऐ बि ऐहियें ता कातै। जां अगर तुवे सिर्फ अपड़ै भाईयनी ऐ नमस्ते कातै ता केणु त्या बडा कम कातै? क्या होरी जाति बि ऐतियु ऐ ना काति? ऐठणीरै तेईनी जरूरी आ तैन्हांं सिंउ प्रेम करा जै तुहां सिंउ प्रेम ना कातै। तिहियें-चारै तुवे सिद्ध बंणा, जेतिया तुवाड़ा स्वर्गीय पिता सिद्ध आ।”

கேளுங்கள் मत्ती 5