If you would like a copy of this version please contact info@davaraudiobibles.org

Dotyali New Testament, CC-BY-SA-4.0, The Love Fellowship. Dotyali New Testament Audio Bible, CC-BY-SA-4.0, Davar Partners International, The Love Fellowship, 2022.

Dotyali New Testament

Dotyali (डोटेली) New Testament, by The Love Fellowship is licensed under Creative Commons Attribution-ShareAlike 4.0 License.

जब हेरोद राजा यहुदिया जिल्लामि सासन अद्दाथ्या, तब तइ जिल्लाको बेतलेहेम गाउँमी येशू जन्म्या। पुर्व बठेइ बुद्दिमान मान्सन जइले ताराको बारेमि पढाइ अरनथ्या, तिनन यरुशलेम सहरमि पुग्या रे तिननले मान्सनलाइ सोध्यो, “यहुदि मान्सनका राजा हुनाइलाइ जन्म्या बालक काँ छन? क्याकि हामले उनरो जन्मको तारा पुर्वतिर धेक्या रे उनलाइ घोप्टिबर आराधना अद्दाइ आइरइछु।” जब हेरोद राजाले यहुदि मान्सनका राजा हुनाइलाइ जन्मन्या बालकका बारेमि सुण्यो, त्यो बिचइन भयो, रे तइसित यरुशलेम सहरका भौत मान्सन लगइ बिचइन भया। पइ तिनले सब यहुदि मुख्य पुजारिन रे मोशाको कानुन सिकाउन्यावालालाइ जम्मा अरायो, रे तिननलाइ सोधपुछ अर्यो, “अगमबक्ताले ख्रीष्ट जन्मन्या ठाउँका बारेमि कि भण्नाहान?” तिननले तइलाइ भण्यो, “यइ यहुदिया जिल्लाको बेतलेहेम गाउँमी ख्रीष्ट जन्मन्या हुन, क्याकि मिका अगमबक्ताले भौत पइल्ली परमेश्वरले भण्या कुरणी लेख्याथ्यो,
‘ए! यहुदिया जिल्लाका, बेतलेहेम गाउँका मान्सन,
यहुदिया जिल्लामि तमरो गाउँ भौत महत्वपूर्ण छ,
क्याकि तम बठेइ एक मान्स आउन्या हो जो सासक हुन्या हुन,
जइले ग्वालाकि जसेरि मेरा इस्राएल देशका मान्सनको हेरचाह अद्दया हुन।’”
राजा हेरोदले जन्म्या बालकको उमेर था पाउनाइलाइ बुद्दिमान मान्सन जइले ताराको बारेमि पढाइ अरनथ्या, तिननलाइ गोप्यमी बोलाइबर तारा ठीक कइ बेला धेका पड्या हो भणबर सोध्यो। राजा हेरोदले बुद्दिमान मान्सनलाइ यिसो भणबर बेतलेहेम गाउँमी पठायो, “जा, रे निक्केरि तइ बालकको खोजी अर। तिनलाइ भेट्या पछा फर्किबर मलाइ तमले धेकया कुरणी भण, रे म लगइ आइबर बालकलाइ घोप्टिबर आराधना अद्द सकु।” तब बुद्दिमान मान्सन आफना बाटा लाग्या, रे बाटामि तइ तारा धेक्यो जइ तारा तिननले आफना देशमि धेकिराइथ्यो। जब तिननले त्यो तारा धेक्यो, तिनन भौत खुशी भया! त्यो तारा तिनरा अगाडी-अगाडी ताँ सम्म गयो, रे बालक भया ठाउँका घरका मलतिर पुग्या पछा त्यो तारा ताँइ रोकियो। पइ घर भितर पसिबर तिननले बालकलाइ उनरी इजा मरियम सित धेक्यो, रे घोप्टिबर उनलाइ आराधना अर्यो। तब आफना थैला खोलिबर उनलाइ सुन, बास आउन्या धुप रे मुर्र भणिन्या बास आउन्या तेल भेटी चडायो। पइ सुइनामी राजा हेरोदका वाँ फर्कि जन जा भण्न्या चेताउनी पाइबर, राजा हेरोदलाइ खबर नअरेइ तिनन अर्खाइ बाटा होइबर आफना देस फर्क्या।

बुद्दिमान मान्सन गया पछा, प्रभुका एक स्वर्गदुत सुइनामी योसेफका वाँ धेका पड्या रे तिनले यिसो भण्यो, “उठ, बालक रे उनरी इजा मरियमलाइ लैयइबर मिश्र देशमि भाग। तुलाइ मइले नभणइय्याँ सम्म ताँइ बस, क्याकि राजा हेरोदले बालकलाइ माद्दाइ उनरो खोजी अद्दा छ।” योसेफ उठीबर बालक रे उनरी इजालाइ संङइनि लय्यइबर मिश्र देशमि राता रात गया। तिनन राजा हेरोद नमरइय्याँ सम्म ताँइ बस्या। भौत पइल्ली होशे अगमबक्ता बठेइ परमेश्वरले भण्या बचन यिसेरी पुरा भयो, “मइले आफ्नो चेलो मिश्र देस हइ बोलाया।”
राजा हेरोद रिसले चुर भया जब बुद्दिमान मान्सनले उनलाइ छकाएइ कुरणी था पायो। यो पइल्ली बेर तारा धेक्या आधारमी बुद्दिमान मान्सनले भण्या बिबरण अन्सार राजा हेरोदले आफना सीपाहीनलाइ बेतलेहेम गाउँ रे तइका वलतिर पलतिरका दुइ बर्ष रे दुइ बर्ष हइ कम उमेर भया सब बालकलाइ माद्द लायो। इसेरि यर्मिया अगमबक्ता बठेइ परमेश्वरले भण्या बचन पुरा भयो,
“मान्सनले कोइ रोया आवाज रामाका गाउँमी सुण्यो,
रुन्नारया रे भौत बिलाप अद्दारया,
राहेल आफना बच्चाका निउति रोइरएइ थी,
कसइले लगइ उइलाइ सान्त्वना दिन सकेइन, क्याकि तइका बच्चान मर्याथ्या।”
योसेफ, मरियम रे बालक येशू मिश्र देशमि थ्या, जब राजा हेरोद मर्यो प्रभुका एक स्वर्गदुत सुइनामी योसेफका वाँ मिश्र देशमि धेका पड्या, रे यिसो भण्यो, “उठ, बालक रे उनरी इजालाइ लइजाइबर इस्राएल देशमि जा, राजा हेरोद रे उइका मान्सन आब मरिसक्या जइले बालकलाइ माद्द खोज्याथ्यो।” योसेफ उठीबर बालक रे उनरी इजालाइ लइजाइबर मिश्र देस छाडिबर इस्राएल देशमि गया। तर जब योसेफले यहुदिया जिल्लामि आफना बा राजा हेरोदका ठाउँमि अर्खिलाउसले राज्य अरिराइछ भण्न्या सुण्यो, उ ताँ जानाइ डरायो। योसेफले सुइनामी परमेश्वर बठेइ चेताउनी पायो रे, तिनन सब गालीलका जिल्लामि गया। तिनन गइबर नासरत भण्न्या गाउँमी बस्या। यिसेरी अगमबक्ता बठेइ येशूका बारेमि बोल्या बचन पुरा भयो, तबइकिलाइ उनलाइ नासरत गाउँको बासिन्दा भणिन्छ।

கேளுங்கள் मत्ती 2