San Juan 15
15
Cristo gaaita khaarkhaju aai nʉm
1Mamʉ mag wettarrau atarrta warag iyʉʉ nʉmua magjim Jesuu, ichpai igwia:
—Mʉʉta chi uva kharau, maagwai mʉ Aai chi jĩirjem anaa chi jaarjemʉugui ajim. 2Pãar sĩi mʉ khãu nenergau. Wajapcharan pãran mʉ Ayau khõsi simjo nem wawaagta mʉ denkha nʉmgui ajim. Pari mag mʉ khãu nenergkha nʉmta khãu ãb khãijã pod jopba simʉn, mʉ Ayau warag thʉapnaa barpʉiju. Pari ʉuta chewia jop simʉn, warag wajaphata irua jar khekher ajugui ajim, warag chemkhĩir. 3Pãran ya nemjĩir arg ee nʉmjota nʉmgui ajim, mua pãachig nem jaautarr thum ipierraa ʉkha nʉm gaaimua. 4Mag pãachta mʉ khãu nenergkha naawai oob mʉ ogdʉmiet ajim. Jãg chi khãu chaar gaaimua thʉadʉbaadeewai chi neer ich appai pod cheba warag phuajemjo, pãarjã ich agjo mʉ dʉita khapeer khaba nʉm chan, pod Ẽwandam athee nem wajapha waubamgui ajim. Magua mʉ dʉita ich jãg ogdʉba nʉisit ajim, mʉch garmuajã jãg pãar ogdʉba chitaajemjo.
5Mag iekhamamua deeu ichdeu jaautarrjo, —Mʉʉta chi uva khaar charaugui ajim, ich igwia. Maagwai pãar sĩi mʉ khãu nenergau. Chi mʉ dʉita ogdʉba simʉn chadcha Ẽwandam athee nem wajapham pooma waujugui ajim, mʉch garmuajã i ogdʉba chiraawai. Mʉ gaaimua khabam chan bʉ̃ʉrjã pãrau pod nem wajapham waubajugui ajim. 6Chi mʉ dʉi narr khʉʉnta amach garmua mʉ kha ogdʉ nʉm khʉʉnan warag uva khãu bʉ̃ʉrjã cheba aajemjo isegpʉijugui ajim, mʉ gaaita khaar khaba naawai. Magʉm khʉʉnan mʉ Ayau oowaijã, chi khãu thʉrrptarr phuabaadeewai orpäaijemjota nʉmgui ajim, i athee nem wauba sĩi parta naawai.
7’Pãrau mʉ kha ogdʉba mua pãachig jaautarr ipierraata wenʉrrʉmʉn, pãachdeu nem waupim khõsimta mʉrʉg jaaubat, magbaa mua waub khaba waujugui ajim. 8Ar pãrau mʉ Ayau nem waupim khõsi simjota wajapha nem waauwain pãrau warag i thʉ̃rphoota api nʉmgui ajim. Pãach mag nʉm gaaimua õrau khaphʉ aju, pãar chadcha mʉ khapeenkha nʉm. 9Ich jãg mʉ Ayaujã mʉch khõsi wai sĩejemjo, muajã pãar khõsi chitʉm. Ich jãg pãach nʉmjota nʉisit ajim, mua ich jãg pãar khõsi chitaag. 10Ich jãg mʉjã mʉch Ayau jaautarr ipierraa chitʉm gaaimua mʉ Ayau mʉch khõsi wai sĩejemjo, pãraujã mua pãachig jaautarr ipierraata wenʉrrʉmʉn, pãrau khaphʉ ajugui ajim, chadcha mua pãach khõsi chirʉm.
11’Mua pãrag mag iekha chirʉmʉn, mʉch onee chirʉmjo pãachjã warag wajapcha onee amkhĩraugui ajim. Pãar mag mʉjota onee nʉmʉn magan mʉg eegarm oneg khaba, oneg chaarta wai nʉisim. 12Mua pãrag jaau pʉa chirʉmʉn, mʉchdeujã ich jãg pãar daupii chirʉmjo pãach eepaijã jũrr agdaujo chikhamnaan daupii abat a chirʉmʉugui ajim. 13Maadeu dich khapeen athee nem waauwai amag khaphʉ apiejem, chadcha maadeu am khõsi nʉm; pari mag nem wau nʉm khãai ʉ̃rpai simʉn, am kõitjã ʉdʉraa dich thõopi chirʉmta chadcha am daupii chirʉm anʉmʉugui ajim. 14Pãrau mua nem jaau chirʉmta ipierraa amʉn, magan pãarta mʉ khapeenaugui ajim.
15’Sĩi chikham chogkha nʉm khʉʉnau chan amach patronnaanau nem wau nʉmjã khaugba aajeewai ya mua tag pãar sĩi mʉch chognaan gaai thʉ̃rbam. Mag thʉ̃rju khãai sĩi mua mʉch khapeen ata thʉ̃rjugui ajim, ya mʉch Ayau jaaupitarrjã thumaa meerba pãrag jaau wai chiraawai. 16Warrjã pãrau pãach garmuata pãach Porkhamkhĩir mʉ jʉr auba mʉch garmuata pãar jʉr autarr aawai, mua pãar pʉi chirʉmgui ajim, wetwia õrag mʉ iek aaidʉ jaaumamua õor mʉch igar paa aumamkhĩir. Pãrau magmʉn, magan mʉ iek gaai thʉwia mʉ Ayag nem jeeuwaijã thum irua deeb khaba deejugui ajim. 17Deeu mua pãrag, agdaujo jũrr dich khapeen daupii abat a chirʉmgui ajim.
Jesús igar nʉm khʉʉn oomapha aju
18’Ar mʉ iek ʉkhab nʉm khʉʉnau pãach oomapha aawai khĩir eyaa abat ajim: pãar oomapha aju nawe mʉʉta amau nacha oomapha ajierram. 19Pãraujã am denjo mʉ iek ʉkhaba nʉm akhiin, amau pãar daupii akham, amach igar nʉm khʉʉn dʉi aajemjo. Pari pãar am eemua mua mʉch athee jʉr autarr aawai amau pãar oomapha nʉmgui ajim, ya pãar amach dʉi khaba naawai. 20¿Chaig mua jaau chirarr pãrau khĩir eyaa khaba nʉ? Sĩi chikham chogkha nʉm khʉʉn amach patronnaan khãai ʉ̃rpai khaba aajem. Magua, amau mʉ dʉi khaigba aajerr aawai pãarjã ich agjo amau khaibag waujugui ajim. Maagwai ich jãg mua jaau chitʉm iek ãaur khʉʉnau ʉkhatarr aawai pãar iekjã agjo amau ʉkhajugui ajim. 21Amau mag amachdeu am aig pãar khaibag wauju a chirʉmʉn, pãach mʉ dʉi khapeerkha nʉm gaaimuata pãar dʉi amau magju. Pari mag nʉmʉn, mʉ pʉitarr Ẽwandam amachdeu khaugbam gaaimuata pãar dʉi amau magjugui ajim marag.
22’Mʉ beebanaa mua amag bʉ̃ʉrjã mʉʉta Ẽwandam Iewaau anaa am peerdʉ aujujã jaauchebamuan, amachdeu mʉ isegtarr gaaimua Ẽwandam dʉi am iekkhõr chukhu naakhamgui ajim. Pari mua amag mʉch meerba jaautarrta amau mʉ isegtarr aawai ãbmuajã khaugba aawaita mʉ iek ʉkhabajim aju khaba simgui ajim. 23Pari amau khaugba nʉmgui ajim, mʉ oomapha nʉm aig ĩchab ich mʉ Aaipata amachdeu oomapha nʉm. 24Õrau ag na wauba aajem nempa mua am dakhĩir waujimgui ajim, magʉm gaaimua khãijã ʉkhamkhĩir. Mua mag wauba arr akhiin, amachdeu mʉ isegtarr gaaimua chadcha am Ẽwandam dʉi iekkhõr chukhu naakham. Pari ya amach daúacha mag ootarrjã ʉkhabanaa warag mʉ oomap nʉm aig, ich chi mʉ pʉitarrpata oomapha nʉmgui ajim. 25Pari juaujo amau mag nʉmʉn, amachdeu wajapha ʉʉrkhaajem iek gaai phã simjo, “Bʉ̃ʉrjã iekkhõr chukhum paarta mʉ oomap ajurau” a simjo, chadcha ich ag ee obermkhĩrau a jaaumajim ich Jesuu marag.
26-27’Pari õrau mag pãar oomapha nʉm ee, mʉchdeu jaau chirarrjo, mʉch ipaarmua mʉch Ayag ich Akhaar pʉipi jaaujugui ajim, pãar khĩir jãsenkhamkhĩir. Mag pierrwain chadau ichta mʉ destigkhajugui ajim, ichdeuta pãrau õrag chadam iek jaaupimamua ĩchab mʉjã jãga chitʉ́ a khaugpimaju aawai. Pari wajapcharan pãachjã mʉ destignaanaugui ajim, mua warrcha mʉch Aai iek jaaubaaderr aigmua pãachta mʉ dʉi ogdʉba wenʉrraawai.
தற்சமயம் தேர்ந்தெடுக்கப்பட்டது:
San Juan 15: noaA
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
© 2011, Wycliffe Bible Translators, Inc. All rights reserved.