Luk 20
20
Yesu laa a ikoi
(Mat 21.23-27; Maa 11.27-33)
1Zĩewa Yesu lɛ́ yãdanɛ́ Lua ua, àlɛ baonakpanɛ́, ɔ̃ sa'onkiaɔ ń Mɔizi ikoyãdanɛdeɔ ń gbɛ̃zɔ̃ɔɔ sɔ̃̀aazi 2aa òɛ̀: Iko pɔ nlɛ yãpiɔ kɛò owɛ̃ɛ. Demɛ n gba ikopii? 3Ɔ̃ a wèmá à mɛ̀: Mapi sɔ̃ má yã mɛndo gbɛawá. À omɛɛ, 4Zãa gbɛ̃́ da'ilɛkɛa bɔ̀ Lua kĩi yã̀ ge gbɛ̃nazĩna kĩiɛ? 5Ɔ̃ aa lɛkpàaĩ aa mɛ̀: Tó wa mɛ̀ Lua kĩiɛ, a wá la bɔyãi wi aà yãsio ni? 6Tó wa mɛ̀ gbɛ̃nazĩna kĩiɛ sɔ̃, gbɛ̃pii a wá papa ń gbɛo wà wá dɛdɛɛ, asa aa zɛ̀ ń Zãa ãnabikɛoɛ. 7Ɔ̃ aa mɛ̀: Wá dɔ̃ má à bɔ̀uo. 8Ɔ̃ Yesu ònɛ́: Má iko pɔ malɛ yãpiɔ kɛò oɛ́ sɔ̃o.
Vɛ̃ɛbu zĩkɛnaɔ
(Mat 21.33-46; Maa 12.1-12)
9Ɔ̃ Yesu ɛ̀a yãlɛ̀ɛũnɛ́ lɔ à mɛ̀: Gbɛ̃e mɛ́ vɛ̃ɛbu vĩ,#Isa 5.1 ɔ̃ a nà zĩkɛnaɔnɛ ń ɔzĩ, à gɛ̀ wɛ̃lɛu à gɔɔplakɛ̀ we. 10Kɛ́ vɛ̃ɛkɔzɔ̃zɔ̃gɔɔ kà, à a iwae zĩ̀ zĩkɛnapiɔwa wà a asea kpawa, ɔ̃ aa iwapi gbɛ̃̀ wà aà gbàɛ ɔgii. 11À ɛ̀a à iwa pãle zĩ̀ lɔ, ɔ̃ zĩkɛnapiɔ aà gbɛ̃̀, aa widàwà, aa aà gbàɛ ɔgii. 12Ɔ̃ à ɛ̀a à gbɛ̃ɔn aaɔ̃de zĩ̀ lɔ, ɔ̃ aa aà kɛ̀'ĩa aa aà yà. 13Ɔ̃ vɛ̃ɛbudepi mɛ̀: Má kɛa sa ni? Má a nɛ mɛndona zĩmáɛ. Aa gi aà yãdaia? 14Kɛ́ zĩkɛnapiɔ aà è, aa òkɔ̃ɛ aa mɛ̀: Tubiblenan kee, wà aà dɛ, bú i gɔ̃wɛ̃ɛ. 15Ɔ̃ aa bɔ̀aanɔ kaa kpɛ aa aà dɛ̀.
Kpelewa budepi a sɛńnɔ sai? 16A mɔ à zĩkɛnapiɔ dɛdɛ, i búpi si à kpa gbɛ̃pãleɔwaɛ. Kɛ́ gbɛ̃́ɔ yãpi mà, aa mɛ̀: Lua wá bɔ. 17Ɔ̃ Yesu wɛpã̀ńla à mɛ̀: Yã pɔ wa kɛ̃̀ɛ bee mi dɛ kpelewa ni?
Gbɛ pɔ ɛ̃bonaɔ pãkpài mɛ́ gɔ̃̀ mide ũ golau.#Soũ 118.22
18Gbɛ̃́ pɔ lɛ̀lɛ gbɛpiwa, ade a wiwiɛ.
Tó gbɛpi sì gbɛ̃́wa sɔ̃, a ade ulɔɛ.
Yesu Yuda gbãadeɔ fua
(Mat 22.15–23.36; Maa 12.13-40; Luk 11.37-54)
19Mɔizi ikoyãdanɛdeɔ ń sa'onkiaɔ dɔ̃̀ kɛ́ ń yãi Yesu yãpi lɛ̀ɛũi, ɔ̃ aalɛ zɛwɛɛlɛ wà aà kũ gɔ̃̀ɔ, ãma aa vĩakɛ̀ dasiɛ. 20Aalɛ aà kpakpa, ɔ̃ aa zãmade pɔ aalɛ ńzĩa dilɛ gbɛ̃maa ũɔ zĩ̀wà, kɛ́ aa aà kũ aà yã'oa guu, aai aà kpa ń busu gbãadewa aà iko mɔɛ̀. 21Ɔ̃ zãmadepiɔ aà là aa mɛ̀: Mɛtulu, wá dɔ̃ kɛ́ ni yã'o ǹ yãdanɛ́ a zɛ́waɛ, i kɛ gbɛ̃nazĩnaɔ wɛ́ yãi no. Ni Lua zɛ́ ɔlɔnɛ́ ń sĩanao. 22À kũ̀ wàli falubɔ Sezaaɛ yã̀ ge wásuli bɔo? 23Yesu ń ɔ̃nɔ dɔ̃̀má, ɔ̃ a ònɛ́: 24À ɔ̃a do dɔ mà gwa. Dé mi ń aà tɔ́o mɛ́ kuwà lai? Aa mɛ̀: Sezaa pɔɛ. 25Ɔ̃ a ònɛ́: Tɔɔ, à Sezaa dee pɔ kpawà, í Lua pɔ kpá Luawa. 26Ɔ̃ aai fɔ̃ aa aà kũ̀ a yã'oa guu gbɛ̃́ɔ wáao. Aà yãwea bɔ̀ ń saɛ, ɔ̃ aa ń lɛ́ kpàaũ.
27Ɔ̃ Saduse pɔ aaì gɛɔ vua ɛɛboeɔ mɔ̀ Yesu kĩi, aa aà là aa mɛ̀: 28Mɛtulu, Mɔizi dìlɛwɛ̃ɛ à mɛ̀ yóo: Tó gbɛ̃́ vĩi gà à a na tò nɛsai, aà dãuna lí nɔpi sɛ à a vĩi gɛ̃ɛ kɛò.#Iko 25.5 29Màa vĩi ń dãunaɔ ku gbɛ̃ɔn sopla. Woo nɔsɛ̀, ɔ̃ à gà, à aà tò nɛsai. 30Ɔ̃ Se gyaapi da'uakɛ̀. 31Se gbɛa Biɔ sɛ̀ lɔ. Aa kɛ̀ màa an gbɛ̃ɔn sopla mpiiɛ, ɔ̃ aa gàga wà nɔpi tò nɛsai. 32An gbɛa ɔ̃ nɔpi gà. 33Gɛɔvugɔɔzĩ an demɛ aɔ nɔpi vĩi? Asa an gbɛ̃ɔn sopla mpii wà aà dɔ̃̀ nɔ ũɛ.
34Yesu ònɛ́: Dũniaɛ bee gbɛ̃́ɔ aaì nɔsɛ aaì zãkɛ, 35ãma gbɛ̃́ pɔ Lua dìlɛ aa kà aa bɔ gau aa dũnia dafu leɔ, aa nɔsɛ weo, aa zãkɛ weo. 36Aaɔ dɛ lan malaikaɔwaɛ, aa ga lɔo. Aaɔ dɛ Lua nɛɔ ũɛ, gbɛ̃́ pɔ aa bɔ̀ gauɔ ũ. 37Baa Mɔizi lá guu, à gɛɔ vua yã pìliwanɛ́. Gu pɔ à lɛli yã'òu, à mɛ̀ Dii mɛ́ Ablahaũ ń Izaakio ń Yakɔbuo Lua ũ.#Bɔa 3.6 38Diiá gɛɔ Lua no, gbɛ̃́ bɛ̃́ɛɔ Luaɛ. Asa gbɛ̃pii bɛ̃́ɛ Luaɛɛ. 39Ɔ̃ Mɔizi ikoyãdanɛdeeɔ fɛ̀lɛ aa yã'ò aa mɛ̀: Mɛtulu, n yãmaa'ò. 40Ɔ̃ aai we yãe làwà lɔo.
41Ɔ̃ Yesu ń lá à mɛ̀: Bɔyãi wì o Mɛsiá Davidi buiɛi? 42Asa Davidi ò Soũ lá guu à mɛ̀:
Dii ò ma Diiɛ aà zɔ̃lɛ a ɔplaai
43e àɔ aà ibɛɛɔ kɛɛ̀ aà gbadibɔ ũ.#Soũ 110.1
44Lá Davidi òɛ̀ Dii, kpelewa aɔ dɛ aà bui ũ lɔi?
45Kɛ́ gbɛ̃pii lɛ́ aà yãma, ɔ̃ a ò a iwaɔnɛ: 46À laaika Mɔizi ikoyãdanɛdeɔzi. Aaìɔ ye wàɔ bɛbɛ ń uladao daa, wàɔ fɔkpakpamá gãaɛ. Aaìɔ wɛɛlɛ wà zɔ̃lɛ luasisikpɛ gumaaɔu ń blɛble zɔ̃lɛkĩi maaɔ. 47Aaì wabikɛ gbã̀agbãa gbɛ̃́ɔ wɛ́ yãi, ɔ̃ aaì gyaaɔ kpɛ́ siòmá. An ĩadama pãsĩ aɔ dɛńla.
தற்சமயம் தேர்ந்தெடுக்கப்பட்டது:
Luk 20: Boo2024
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
Boko Bible © SIM International, 2024.