Hechos 2
2
On Espíritu Santo ouajlaj
1Ijkuak oajsik on iluitl itoka Pentecostés*, nochimej on tlaneltokakej san sekan ompa nemiyaj, niman san se inyojlo kipiyayaj. 2Kemaj nimantsin ouajtlakokomokak ne ipan cielo ken ijkuak sanoyej* chikauak ajaka. Niman on ajakatl okakistik ijtik nochi on kajli kampa yejuamej yejyeuatikatkaj. 3Niman ouajnonextij ken itlaj tlitl yejuan onoxexeloj impan cada se ken itlan nenepiltin. 4Niman on Espíritu Santo nochimej okinyolten. Kemaj opejkej tlajtlajtouaj ikan sesekneka yenkuik tlajtojli* ijkon ken on Espíritu Santo kimpaleuiyaya para ma tlajtlajtokan.
5Ipan on tonaltin chantiyaj ompa Jerusalén hebreos* yejuan kuajli kitlakaitayaj Dios. Yejuamej uajualeuayaj de nochiuiyan ipan in tlaltikpaktli. 6Niman ijkuak okakistik on kokomokalistli, onosentlalijtetskej on tojlamej. Ijkuakon on tlakamej xkimatiyaj tlinon kinemiliskej pampa cada se kakiliayaj tlajtlajtoua ikan intlajtol. 7Yejuamej sa tlatlachayaj niman mojkatlachayaj. Niman kijtouayaj:
—¿Tlen xchanejkej Galilea nochimej in yejuan tlajtlajtouaj? 8¿Man tline* cada se de tejuamej tikinkakij tlajtouaj ikan totlajtol yejuan tejuamej ipan otixtlamatkej*? 9Nikan nemij tlakamej yejuan ualeuaj miyekan. Sekimej de Partia, sekimej de Media, sekimej de Elam, sekimej de Mesopotamia, sekimej de Judea, sekimej de Capadocia, sekimej de Ponto niman sekimej de Asia. 10No nikan nemij yejuan ualeuaj Frigia, niman de Panfilia niman de Egipto, niman de ipan iueyitlalpan Africa yejuan nisiu onkaj itech Cirene. Niman no nikan nemij yejuan ualeuaj Roma, sekimej hebreos* pampa ijkon otlakatkej, niman oksekimej onokuepkej hebreos* pampa okineltokakej intlaneltok on hebreos*. 11No nikan nemij on tlakamej yejuan ualeuaj Creta niman de Arabia. Tinochimej tikinkakij on apóstoles* tlajtlajtouaj cada se ikan totlajtol de on tlamauisoltin yejuan Dios okichiu.
12Niman nochimej sanoyej okintlatlachaltij niman xkimatiyaj tlinon kinemiliskej. Niman kinotlajtoltiayaj:
—¿Tlinon kijtosneki in?
13Pero sekimej san kimpijpinauiyayaj, niman kijtouayaj:
—On yej tlajtlauankej.
Pedro okinmachtij on tojlamej
14Kemaj Pedro ouajnotelkets inuan on majtlaktli uan se apóstoles*, niman ikan chikauak tlajtojli, okijtoj:
—Tlakamej hebreos* niman nemochimej* akin nenchantij nikan Jerusalén, xmatikan nemejuamej yejua in, niman kuajli xkakikan tlinon nemechijlis. 15Yejuamej in tlakamej xtlajtlauankej ken sekimej nenkinemiliaj, pampa kemach las nueve ika kualkan ijkuak chiknaui hora. 16In yejua on ken okijtoj on tiotlajtojketl Joel ijkuak okijtoj:
17Dios kijtoua: “Ipan on sa ika nochi tonaltin,
niktlalis noEspíritu ipan nochimej tlaltikpaktlakamej.
Niman nemokoneuan tlakamej niman siuamej,
kiteijliskej tiotlajtojli yejuan kiseliskej itech Dios.
Niman nemotelpochuan kitaskej tlatlachalistli yejuan ken intemikpan,
niman on ueuentsitsinmej temikiskej.
18Niman melauak ipan on tonaltin niktlalis noEspíritu
ipan notekitkauan tlakamej niman siuamej,
niman kiteijliskej on tiotlajtojli yejuan kiseliskej itech Dios.
19Ne tlakpak ipan cielo* nikteititis tlamauisoltin,
niman ipan tlaltikpaktli nikteititis miyek milagros.
Onyas yestli, tlitl niman poktli yejuan tlapoktemas.
20On tonaltsintli kapotseuis*,
niman on metstli chichiliuis ken itlaj yestli.
In nochiuas achtoj ijkuak xe yejko on ueyi tonajli ijkuak iluiu yes toTEKO.
21Niman san akinon yejuan kitlajtlanilis toTEKO para ma makisa, toTEKO kimakixtis.”
22Pedro no okijtoj:
—Tlakamej hebreos*, xkakikan in tlen nikijtos. Dios kuajli omechititij ika on Jesús Nazareno, melauak yejua iKoneu. Ijkon tej, Dios omechititij ikan uejueyi tetlatlachalistli, milagros* niman tlamauisoltin yejuan yejua okichiu nemotsajlan itechkopa Jesús ijkon ken nemejuamej kuajli nenkimatstokej. 23Dios kimatstikatka on tlen nenkichiuiliskiaj Jesús niman yejua okitlalij ipan iyojlo para notekauilis nenkitemaktiliskej intech on xkuajkualtin tlakamej para ma kajkopilokan ipan kojnepanojli*. 24Pero Dios okiyoliuitij* niman okuiteu ipan itlalkon. Yejua okimanauij ipan ipoder on mikilistli pampa ipoder on mikilistli xouel okiteltlalij Jesús. 25On rey David otlajtlajtoj itechkopa Jesús, ijkuak okijtoj:
Nejua nochipa nikitaya toTEKO nixpan nemi.
Xonkaj itlaj yejuan nechmojtis pampa yejua noyekmakopa nemi.
26Yejua ika, noyojlo sanoyej paki niman nipakatlajtoua.
Niman maski notlalnakayo mikis, ninoseuis ikan tlamachalistli*,
27pampa xtikauilis noalma nokauas ne miktlan,
nion xtikauilis itlalnakayo moyolchipajkatekitkau para ma ijtlakaui.
28Otinechititij on ojtli yejuan nechuika kampa onkaj nemilistli.
Niman tinechyoltemitis ikan paktli chika ninemi mixpan.
29’Nokniuan, in kuajli panestikaj ika toachtojtataj David omik niman okitlaltokakej ipan itlalkon, niman on itlalkon sanken* nikan touan onkaj. 30Pero David tiotlajtojketl katka niman yejua kimatstikatka ika Dios okijtojka kichiuas niman okimelajkaijtoj ika semej iuejkakoneuan notlalis ipan itrono para rey yes. 31Ye uejkaui chika nemiya David okajsikamat tlinon nochiuas. Yejua ika otlajtoj ika Cristo yoliuis* niman nokuiteuas ipan itlalkon, niman ika ialma xnokauas miktlan, nion itlalnakayo ijtlakauis. 32Aman tej, Dios yokiyolitij niman yokuiteu ipan itlalkon sano yejua in Jesús. Yejua ika tej, tinochimej tiktemachistiaj. 33Ijkon tej, Dios yokitlejkoltij yokitlalij iyekmakopa para más ueyixtias. Niman Jesús yokiselij on Espíritu Santo itech iTataj yejuan okiprometerouilij kimakas. Niman aman yotechmakak on tlen nenkitaj niman nenkakij. 34David xotlejkok iluikak, pero sano yejua kijtoua:
On noTajtsin Dios okijlij noTEKO:
“Xmotlali nikan ipan noyekmakopa
35hasta ma nimitstlali tetlanki intech motlauelikniuan.”
36’Yejua ika, nochi kech nenhebreos* ipan in país de Israel xmatikan kuajli niman maka xometlamatikan ika in Jesús yejua on yejuan nemejuamej onenkajkopilojkej ipan kojnepanojli, Dios yokitlalij para yejua toTEKO niman yejua Cristo.
37Ijkuak ijkin okakkej, sanoyej onoyolkokojkej niman okitlajtoltijkej Pedro niman on oksekimej apóstoles*:
—Tokniuan, ¿tlinon tikchiuaskej?
38Kemaj Pedro okinmijlij:
—Xmoyolpatlakan niman xmokuatekikan cada se de nemejuamej ikan itokatsin JesuCristo para nemotlajtlakoluan mechtlapojpoluiliskej, niman nenkiseliskej on itetlayokolil Dios yejuan Espíritu Santo. 39In yejua ipromesa Dios para nemejuamej, niman para nemokoneuan, niman para nochimej nemouejkakoneuan, niman para nochimej on kech toTEKO Dios kinnotsas nochiuiyan ipan in tlaltikpatli.
40Niman ika in niman miyek okseki tlajtojli, Pedro okinmixpantijli niman okintlakanojnots, niman okinmijlij:
—Xmejkuanikan itech on temojtij castigo yejuan kiseliskej on xompayejyeuamej tlakamej.
41Ijkon tej, on yejuan okiselijkej itemachtil Pedro onokuatekijkej. Ipan on tonajli kanaj yeyi mil tlakamej teuan onopojkej intech on tlaneltokakej. 42Niman nochimej kuajli nouikayaj ken on apóstoles* kitemachtiayaj, niman kisepamatiyaj niman nosentlaliayaj para kikuayaj on Santa Cena, niman kichiuayaj oraciones.
On tlaneltokakej kipiyayaj san se iminyojlo
43On apóstoles* miyek milagros* niman tlamauisoltin okichijkej. Yejua ika nochimej tlapakaitayaj. 44Nochimej yejuan otlaneltokakej kuajli nouikayaj san sekan ikan san se inyojlo. Niman nochimej kinomakayaj nochi tlajtlamach* tlen kipiyayaj. 45Kinamakayaj intlal niman okseki tlajtlamach* tlen kipiyayaj, niman on tomin kinxelouiliayaj ken cada se kipolojtikatka. 46Mojmostla nosentlaliayaj ipan on ueyitiopan, niman inchajchan kikuayaj on Santa Cena, niman tlakuayaj san sekan ikan paktli niman yolyemanilistli. 47Kiyekteneuayaj Dios, niman nochi tlakatl kinmixpakaitaya kuajli. Niman toTEKO más kinmiyekilijtiaya mojmostla on yejuan nomakixtiayaj.
தற்சமயம் தேர்ந்தெடுக்கப்பட்டது:
Hechos 2: nguNT
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
© 1987, 2012 Wycliffe Bible Translators, Inc. All rights reserved.