San Juan 1
1
Itlajtol Dios onokuep Tlakatl
1Ijkuak nion tlen xitlaj* onkatka, iTlajtoltsin Dios ye onkatka. Niman iTlajtoltsin, yejuan sano yejua Cristo, nemiya iuan Dios niman sano yejua Dios. 2Ijkon tej, ye nemiya iuan Dios ijkuak nochi on tlajtlamach* xe onkatka. 3Dios okichijchiu nochi on tlajtlamach* tlen onkaj niman tlen yoltikaj itechkopa yejua on yejuan Tlajtojli. Xitlaj tlen onkaj nion on tlen yoltikaj onochijchiu tla xyejua. 4ITlajtoltsin Dios kitemaka on nemilistli yejuan para nochipa. Niman on nemilistli kitemaka tlauijli yejuan nochi tlakatl kimaka kajsikamatilistli. 5In tlauijli onkatkaj intsajlan on xkuajkualtin tlakamej niman xkuajkualtin espíritus, niman yejuamej xuelij kiseuiya on tlauijli.
6Dios okuajtitlan sen tlakatl itoka Juan. 7Yejua ouajlaj ken sen testigo niman okitemachistiko de on tlauijli para ijkon nochimej ueliskej tlaneltokaskej. 8Juan xejua on tlauijli, yejua yej san temachistia itechkopa on tlauijli. 9In tlauijli yejua melauak, niman ouajlaj ipan in tlaltikpaktli para nochi tlakatl kajsikamatis on tlajtlamach* yejuan melauak.
10On yejuan Tlajtojli nemiya ipan in tlaltikpaktli. Maski Dios okichijchiu in tlaltikpaktli itechkopa yejua, on tlaltikpaktlakamej xokixmatkej. 11Ouajlaj intech on hebreos* niman on hebreos* xokiselijkej. 12Pero nochimej on yejuan okiselijkej niman itech otlaneltokakej, okinkauilij para onochijkej ikoneuan Dios. 13Yejuamej onochijkej ikoneuan Dios xpampa ijki okinekkej imintataj noso iminnanaj, yej otlakatikoj ken Dios okinek para otlakatkej itech.
14Niman on yejuan Tlajtojli onochiu tlakatl niman totsajlan onen. Yejua sanoyej* otetlajsojtlak* niman otemachtij tlen melauak. Niman otikitakej iueyilis. On ueyilistli yejua kipiya, pampa yejua isenTekoneu toTajtsin. 15Juan onochiu testigo itechkopa Cristo ijkuak okijtoj: “In yejua nikteneuaya ijkuak onikijtoj ika on yejuan nechajtokatiu ipan notekiu, más ueyixtikaj xken nejua pampa ijkuak onitlakat yejua ye nemiya.” 16Tinochimej tikselijtiuij nochi on tlajtlamach* tlen kuajli yejua kipiya ikan iueyitetlajsojtlalis* yejuan xtechtocarouaya tikseliskej. 17Moisés okitemakak on tlanauatijli pero on iueyitetlajsojtlalis* yejuan xtechtocarouaya tikseliskej niman on tlen melauak okuajkik JesuCristo. 18Xkaman yakaj kitaya Dios. Pero isenTekonetsin yejuan toTajtsin sanoyej kitlajsojtla* yejua yokiteititij.
Juan on tlakuatekijketl okinnankijlij on tiopixkej niman on levitas
(Mt. 3.11-12; Mr. 1.7-8; Lc. 3.15-17)
19On tlayekankej hebreos* chanejkej Jerusalén, okintitlankej tiopixkej niman levitas itech Juan para kitlajtoltiskej akin yejua. 20Yejua ijkin kuajli okinmelajkaijlij:
—Nejua xniCristo yejuan Dios okitlalij para tlamandaros.
21Kemaj okitlajtoltijkej:
—Tla ijkon, ¿akin tejua? ¿Tejua titiotlajtojketl Elías?
Niman Juan okijtoj:
—Ka, xnejua.
Kemaj ijkin okitlajtoltijkej:
—Tla ijkon, ¿tejua titiotlajtojketl on yejuan ika onkatka uajlas?
Niman yejua okijtoj:
—Ka.
22Kemaj más okitlajtoltijkej:
—Xtechijli tej, akin tejua pampa ika onkaj tikpiyaskej tlen tikimijliskej on yejuan otechajtitlankej. ¿Tlinon tikijtoua moka tejua?
23Ijkuakon Juan okinnankilij:
—Nejua nión akin tsajtsi ne kampa xalpatlajkan: “Xmelajkatlalikan nemoyojlo para nenueliskej nenkiseliskej toTEKO.” No ijki nikijtoua ken okijtoj on tiotlajtojketl Isaías.
24On yejuan okinotsatoj Juan okinuajtitlankaj on fariseos*. 25Niman yejuamej okijlijkej:
—Tla ijkon, tla xtejua tiCristo, nion tiElías, nion yejua on tiotlajtojketl yejuan ika onkatka uajlas, ¿tline* tej, titlakuatekiya?
26Juan okinmijlij:
—Nejua nitlakuatekiya ikan atl, pero nemotsajlan okse nemi yejuan xnenkixmatij. 27Yejua nechajtokatiu ipan notekiu. Niman nejua nion achijtsin xnechmelaua* niktojtomas ikakmekayo, pampa más ueyixtikaj xken nejua.
28Nochi in onochiu ne kampa itoka Betábara yejuan nokaua ne ika ikisayan tonaltsintli de on río Jordán kampa Juan tlakuatekiyaya.
Juan okijtoj akinon on Jesús
29Uajmostla Juan okitak Jesús ye ompa kinisiuijtiaya niman okijtoj:
—Xkitakan on tlakatl. Yejua kiuentlaliskej ken sen borreguito para Dios kintlapojpoluilis intlajtlakoluan nochimej on tlaltikpaktlakamej. 30In yejua nikteneuaya ijkuak onikijtoj: “Sen tlakatl yejuan nechajtokatiu ipan notekiu yejua más ueyixtikaj xken nejua pampa ijkuak onitlakat, yejua ye nemiya.” 31Nejua no xnikixmatiya akin yejua. Pero niuajtlakuatekijtiu ikan atl para on hebreos* uelis kixmatiskej.
32Niman Juan okitemachistij on tlen okitak. Yejua ijkin okijtoj:
—Nejua onikitak ken ouajtemok de ne iluikak on Espíritu Santo. Yejua ouajtemok ken itlaj paloma niman ipan onokau Jesús. 33Nejua hasta aman xnikixmatiya akin yejua, pero on yejuan onechajtitlan ma nitlakuateki ikan atl onechijlij: “Ijkuak tikitas temos on Espíritu Santo niman on akin ipan nokauas, tikmatis ika on yejua tlakuatekis ikan Espíritu Santo.” 34Nejua yonikitak niman aman nitemachistia ika yejua iKoneu Dios.
On achtoj inomachtijkauan* Jesús okiskej itech Juan
35Uajmostla Juan oksejpa ompa nemiya iuan omemej inomachtijkauan*. 36Niman ijkuak okitak ompaka panouaya Jesús, okijtoj:
—Xkitakan on tlakatl. On yejua iborreguito Dios. Dios okuajtitlan para kiuentlaliskej ken sen borreguito.
37Kemaj ijkuak on omemej inomachtijkauan* Juan okakkej on tlen yejua okijtoj, oyajkej iuan Jesús. 38Kemaj Jesús ontlachix ikuitlapan niman ika okitak kuitlapanuiyayaj on omemej tlakamej. Okimijlij:
—¿Tlinon nenkitejtemouaj?
Yejuamej okijlijkej:
—Temachtijketl, ¿kanon tichanti?
39Jesús okinmijlij:
—Xuajlakan niman xkitakan.
Kemaj oyajkej niman okitakej kanon chanti, niman ompa iuan onokajkej hasta kaman otlayouak pampa ye tiotlak katka, kanaj ipan naui hora ijkuak oyejkokej.
40Se de yejuamej on omemej yejuan okakkej tlen okijtoj Juan niman iuan oyaj Jesús, itoka katka Andrés yejuan ikniu Simón Pedro. 41Andrés achtoj oyaj okitejtemoto Simón on ikniu, niman okijlij:
—Yotiknextijkej on Mesías —yejuan kijtosneki Cristo yejuan Dios okitlalij para tlamandaros.
42Kemaj Andrés okuikak Simón ne kampa nemiya Jesús. Niman ijkuak Jesús okitak, okijlij:
—Tejua tiSimón ikoneu Jonás, pero motoka yes Cefas —yejuan kijtosneki Pedro.
Jesús okinots Felipe niman Natanael
43Uajmostla Jesús okitoj para yas Galilea. Niman ijkuak okinextij Felipe, okijlij:
—Xuajla nouan.
44Felipe chanej* katka ipan on kalpan itoka Betsaida kampa no chantiyaj Andrés niman Pedro. 45Kemaj Felipe oyaj niman okinextij Natanael. Niman yejua okijlij:
—Yotiknextijkej on tlakatl yejuan okiteneu Moisés ipan on amamoxtli de on tlanauatiltin, niman no on tiotlajtojkej itechkopa otlajkuilojkej. In Jesús ikoneu José yejuan chanej* ipan on kalpan itoka Nazaret.
46Kemaj Natanael okijtoj:
—¿Intech on tlakamej yejuan chantij Nazaret uelis kisas se yejuan tepaleuis?
Felipe okijlij:
—Xuajla niman xkitaki.
47Ijkuak Jesús okitak Natanael ye kinisiuiaya, okijtoj:
—Nikan uajlau se yejuan melauak hebreo* yejuan xkaman tlakajkayaua.
48Kemaj Natanael okitlajtoltij:
—¿Ken tinechixmati?
Niman Jesús okijlij:
—Ijkuak Felipe xe mitsnotsaya, nejua onikmat ika tinemiya tlatsintlan de on kojtli* itoka higuera.
49Kemaj Natanael okijlij:
—Temachtijketl, tejua tiiKoneu Dios. Tejua tiinRey on hebreos*.
50Jesús okijlij:
—¿Tinechneltoka san ika onimitsijlij onimitsontak tlatsintlan de on kojtli* higuera? Aman tej, nimitsijlia ika más uejueyi tlajtlamach* tikitas.
51No ijki okijtoj Jesús:
—Ika tlen melauak nemechijlia, ika nemejuamej nenkitaskej tlapojtias on iluikak niman on iángeles Dios tlejkoskej niman temoskej nopan yejuan oninochiu Tlakatl.
தற்சமயம் தேர்ந்தெடுக்கப்பட்டது:
San Juan 1: nguNT
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
© 1987, 2012 Wycliffe Bible Translators, Inc. All rights reserved.