San Juan 8
8
1pero Jesús oyaj ne ipan on tepetl itoka Olivos. 2Uajmostla ijkuak ouajtlanes, oksejpa oyaj ne ipan on ueyitiopan. Nochi tlakatl okinisiuij, niman yejua onotlalij niman opeu kinmachtia. 3Kemaj on temachtijkej ika on tlanauatijli niman on fariseos* okuajuikakej se siuatl yejuan okinextikej ipan tlajtlakojli iuan sen tlakatl yejuan xiueuentsin. Okitlalijkej ne tlajkotian imixpan nochimej. 4Niman ijkin okijlijkej Jesús:
—Temachtijketl, in siuatl otiknextijkej iuan se tlakatl ipan tlajtlakojli. 5On itlanauatil Moisés technauatia tiktemojmotlaskej niman tikmiktiskej in ken in siuatl. ¿Tejua ken tikijtoua?
6Yejuamej ijkon okijlijkej san para okitlatlatakej, niman ijki ye ueliskiaj kiteixpanuiskiaj. Pero Jesús ouajnopachoj niman opeu tlatlajkuiloua ipan tlajli ikan imajpil. 7Pero ika más kitlajtoltiayaj, yejua ouajnauatelkets, niman okinmijlij:
—San akinon yejuan xkaman tlatlajkoua, yejua achtoj ma kimotla.
8Niman kemaj, oksejpa onopachoj niman oksejpa otlajkuiloj ipan tlajli. 9Pero ijkuak yejuamej ijkon okakkej, okimatkej ika okintlajtlakolmakak intlamachilis, niman cada se de yejuamej oyajyajkej. Achtopa opejkej yauij on yejuan más ueuetkej. Niman ijkuak nochimej yoyajkej, Jesús iselti onokau iuan on siuatl yejuan ompa onokau ne ixpan. 10Kemaj Jesús ouajnauatelkets niman ika xok yakaj okitak yej san on siuatl, okijlij:
—Siuatl, ¿kanon nemij on yejuan mitsteixpanuiyayaj? ¿Xakaj omitstlajtlakolmakak?
11Yejua okijlij:
—Ka noTEKO, xakaj.
Kemaj Jesús okijlij:
—Tej, nion nejua xnimitstlajtlakolmaka. Aman xuiya, pero maka oksejpa titlajtlakos.
Jesús yejua sen tlauijli ipan in tlaltikpaktli
12Jesús oksejpa okinnots on tlakamej niman okinmijlij:
—Nejua nitlauijli ipan in tlaltikpaktli. Yejuan yas nouan, xnejnemis kampa tlayouajtok, yej nejnemis ipan on tlauijli yejuan kimakas yenkuik nemilistli.
13Kemaj on fariseos* okijlijkej:
—Tejua sano moka titlajtoua, niman on tlen tikijtoua xmelauak.
14Jesús okinmijlij:
—Tlen nejua nikijtoua, kemaj melauak maski sano nejua noka nitlajtoua, pampa nikmati kanon niualeua niman kanon niau. Pero nemejuamej xnenkimatij kanon niualeua nion kanon niau. 15Nemejuamej nentetlajtlakolmakaj ken on tlaltikpaktlakamej kichiuaj. Pero nejua xakaj niktlajtlakolmaka. 16Pero tla nitetlajtlakolmakaskia, notetlajtlakolmakalis nikchiuaskia ken kitocaroua, pampa xnoselti nitetlajtlakolmakaskia. NoTajtsin yejuan onechajtitlan iuan nitetlajtlakolmakaskia. 17Ipan nemotlanauatil tlajkuilolnestikaj ijkuak omemej testigos san se tlajtojli kijtouaj, on tlen kijtouaj melauak. 18Sano nejua noka ninotestigojtlalia, niman noTajtsin yejuan onechajtitlan, no yejua notestigo.
19Kemaj okitlajtoltijkej:
—¿Kanon nemi moTajtsin?
Jesús okinnankilij:
—Nemejuamej xnennechixmatij, nion noTajtsin xnenkixmatij. Tla nennechixmatiskiaj, no nenkixmatiskiaj noTajtsin.
20Jesús okijtoj in tlajtlamach* chika temachtiaya ne ijtik on ueyitiopan kampa kejeuayaj on uentomin. Pero xakaj okajsik, pampa sanken* xe yejkoya on tonajli para ijkon ipan nochiuas.
Jesús okijtoj ika yas kampa oksekimej xueliskej yaskej
21Jesús oksejpa okinmijlij:
—Nejua yenau, niman nemejuamej nennechtejtemoskej. Pero nemejuamej nenmikiskej ipan nemotlajtlakol. Tej, kampa nejua niau, nemejuamej xuelis nenyaskej.
22Kemaj on hebreos* okijtojkej:
—¿Manin yej nomiktis sano yejua? Kas kemaj, niman yejua ika kijtoua xuelis tiaskej kampa yejua yas.
23Jesús okinmijlij:
—Nemejuamej nenkisaj nikan ipan tlaltikpaktli, pero nejua oniualeu ne iluikak. Nemejuamej nenkisaj ipan in tlaltikpaktli, pero nejua xnikisa ipan in tlaltikpaktli. 24Onemechijlij ika nenmikiskej ipan nemotlajtlakol. Tla xnennechneltokaj ika nejua niCristo yejuan Dios onechtlalij para nitlamandaros, nenmikiskej ipan nemotlajtlakol.
25Kemaj okitlajtoltijkej:
—¿Tlen akin tejua?
Niman Jesús okinmijlij:
—Nejua desde ijkuak onipeu nitemachtia yonemechijlijka akin nejua. 26Nikpiya miyek tlajtlamach* tlen nemoka nikijtos niman tlen nemechtlajtlakoltis. Pero noTajtsin yejuan onechajtitlan yejua kijtoua tlen melauak. Niman tlen nikijtoua ipan in tlaltikpaktli on yejua onikak itech.
27Pero yejuamej xokajsikamatkej ika kiteneuaya on iTajtsin. 28Yejua ika okinmijlij:
—Ijkuak nemejuamej nennechajkopiloskej ipan sen kojnepanojli*, nejua yejuan oninochiu Tlakatl, ijkuakon nenkimatiskej akin nejua. Niman nenkimatiskej ika xitlaj* nikchiua yejuan san nejua nikneki, yej san nikijtoua on tlen noTajtsin yonechmachtij. 29On yejuan onechajtitlan nouan nemi. NoTajtsin xnoselti nechkaua, pampa nejua nochipa nikchiua tlen yejua kuelita.
30Ijkuak Jesús ijkin okijtoj, miyekej okineltokakej.
Yejuan tlajtlakoua nokaua esclavo itech on tlajtlakojli
31Kemaj Jesús okinmijlij on hebreos* yejuan okineltokakej:
—Tla nenmelajkanemiskej ipan on tlen nemechijlia, nenmochiuaskej melauak nennomachtijkauan. 32Nenkixmatiskej tlen melauak, niman on tlen melauak yejua mechmanauis.
33Yejuamej okijlijkej:
—Tejuamej tiiuejkakoneuan Abraham niman xkaman yakaj otechpix esclavos. ¿Kenijki tej, tikijtoua ika tikpiyaskej temanauilistli?
34Jesús okinmijlij:
—Ika tlen melauak nemechijlia ika nochimej yejuan tlajtlakouaj, yejuamej nokaua esclavos itech on tlajtlakojli. 35Sen esclavo xkaman teuan tlapouajli ipan se chanyotl*, pero sen tekoneu kemaj nochipa teuan tlapouajli ipan on chanyotl*. 36Tla nejua yejuan niiKoneu Dios nemechmanauis, nemejuamej melauak nennemiskej tlamakaualtin intech nemotlajtlakoluan. 37Ye nikmatstikaj ika nemejuamej neniuejkakoneuan Abraham. Pero nenkinekij nennechmiktiskej pampa xnenkiseliaj tlen nemechijlia. 38Nejua nikijtoua on tlen noTajtsin nechititia, niman nemejuamej nenkichiuaj tlen nemotataj mechijlia.
39Yejuamej okijlijkej:
—Tejuamej totataj Abraham.
Pero Jesús okinmijlij:
—Tla nemejuamej melauak nentekoneuan yeskiaj itech Abraham, nenkichiuaskiaj on tlajtlamach* yejuan okichiu. 40Pero maski nemechijlia on tlen melauak yejuan Dios yonechijlij, nemejuamej nenkinekij nemechmiktiskej. ¡Abraham xkaman itlaj ijkon okichiu! 41Nemejuamej sano yejua nenkichiuaj on tlen kichiua nemotataj.
Kemaj yejuamej okijlijkej:
—Tejuamej xtiteichtakakoneuan. San se tajtli tikpiyaj niman on yejua Dios.
42Niman Jesús okinmijlij:
—Tla melauak Dios nemoTajtsin yeskia, nemejuamej nennechtlajsojtlaskiaj*, pampa nejua niualeua itech Dios niman aman nikan ninemi. Xoniuajlaj san pampa oniknek, yej oniuajlaj pampa Dios onechajtitlan. 43¿Tline* xueli nenkajsikamatij on tlen nemechijlia? On pampa xnenkinekij nenkiseliskej notemachtil. 44Nemejuamej nemotataj on diablo*, niman nenkinekij nenkichiuaskej tlinon yejua kineki. On diablo* desde opeu in tlaltikpaktli temiktia. Xkaman kijtoua on tlen melauak, pampa xkipiya ipan iyojlo on tlen melauak. Ijkuak kijtoua on tlen xmelauak, san kijtoua ken nochipa nouika, pampa yejua tlakajkayaua niman yejua imintataj on yejuan tlakajkayauaj. 45Pero nejua pampa nikijtoua tlen melauak, xnennechneltokaj. 46¿Akinon de nemejuamej uelis nechititis ika nikpiya sen tlajtlakojli? Niman tla nikijtoua tlen melauak, ¿tline xnennechneltokaj? 47On yejuan ikoneuan Dios kakij on itlajtoltsin Dios. Pero nemejuamej xnenikoneuan Dios. Yejua ika xnenkinekij nenkakiskej.
Ijkuak Abraham otlakat, Cristo ye nemiya
48Kemaj on hebreos* okijlijkej:
—¿Xtikijtouaj tlen melauak ijkuak tikijtouaj ika tejua tisamaritano niman mojtik nemi on xkuajli espíritu?
49Jesús okinmijlij:
—Nejua xnemi notik nion se xkuajli espíritu. Pero nejua niktlakaita noTajtsin, niman nemejuamej xnennechtlakaitaj. 50Nejua xniktejtemoua para on tlakamej ma nechtlakaitakan. Nemi okse yejuan kintejtemoua tlakamej para ma nechtlakaitakan. Yejua teyolkuitia niman tetlajtlakolmaka. 51Ika tlen melauak nemechijlia ika yejuan kichiua on tlen nejua nikijtoua, xkaman mikis.
52Ijkuakon on hebreos* okijlijkej:
—Aman kuajli tikmatij ika tikpiya sen xkuajli espíritu. Abraham niman nochimej on tiotlajtojkej omikkej, niman tejua tikijtoua: “Yejuan kichiua on tlen nejua nikijtoua, xkaman mikis.” 53¿Tla ijkon, tejua más tiueyixtikaj xken totataj Abraham yejuan omik? Niman on tiotlajtojkej no omikkej. ¿Akinon tikuitia tejua in?
54Jesús okinmijlij:
—Tla sano nejua ninotlakaita, notlakaitalis xitlaj* kijtosneki. Pero noTajtsin kemaj nechtlakaita, on yejuan nemejuamej nenkijtouaj ika nemoDios. 55Nemejuamej xnenkixmatij, pero nejua, kemaj nikixmati. Tla nikijtoskia xnikixmati, tla ijkon, nitlakajkayajki yeskia no ken nemejuamej. Pero nejua melauak nikixmati niman nikchiua nochi on tlen yejua kijtoua. 56Abraham on nemoachtojtataj opak pampa okimat ika niuajtlakatiskia ipan in tlaltikpaktli. Yejua itechkopa itlaneltok onechitak niman yejua ika opak.
57Kemaj on hebreos* okijlijkej Jesús:
—Nion cincuenta xipan xe tikpiya, ¿niman tikijtoua ika otikitak Abraham?
58Jesús okinmijlij:
—Ika tlen melauak nemechijlia: ijkuak Abraham xe nemiya, nejua ye ninemiya.
59Kemaj okontilankej temej para kimojmotlaskiaj. Pero Jesús oniyan, niman okisteu ne ipan on ueyitiopan.
தற்சமயம் தேர்ந்தெடுக்கப்பட்டது:
San Juan 8: nguNT
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
© 1987, 2012 Wycliffe Bible Translators, Inc. All rights reserved.