لَاتَانٛوجِ 11
11
سُودُ تٛوْندُ حَا بَابِلَ
1ندٜرْ وَکَّتِ مَاجُمْ يِمْࢡٜ ڢُو طٛنّٛ مبٛلْوَ طٜمْنغَلْ غٛوتَلْ عٜ بٛلّٜ غٛوتٜ؞ 2ندٜ يِمْࢡٜ ندِلِّ غَلْ ڢُونَانغٜ، ࢡٜتَوِ وَادِوٛلْ ندٜرْ لٜسْدِ سِنٜعَرْ، ࢡٜنجٛوطِ تٛنْ؞ 3ࢡٜمبِعْمبِعْتِرِ: «مبَطٜنْ بِرِکْجٜ، نغُلٜنْ طٜ حَا طٜ شَاتَ؞» ࢡٜࢩِࢡْرِ بٜى مَاجٜ بَنَ بٜى کَاعٜ، ࢡٜکٛوعِ تَارِ لٜسْدِ#11:3 تَارِ لٜسْدِ مَنْ نَنْدِ بٜى غُدُرٛنغْ؞ بٛو نغَمْ تَکِّنْدِرْغٛ طٜ؞ 4ࢡٜمبِعِ: «ندِلّٜنْ! ࢩِࢡٜنْ بٜرْنِوٛلْ عٜ سُودُ تٛوْندُ، حَا حٛورٜ سُودُ ندُعُ يٛتّٛ عَسَمَ، نغَمْ حَا مبَطَنٜنْ کٛعٜ مٜىٰطٜنْ عِنْدٜ، تَا عٜنْ شَنغْکِتٛ ندٜرْ دُنِيَارُ ڢُو؞» 5جَوْمِرَاوٛ جِݠِّ نغَمْ لَارُغٛ بٜرْنِوٛلْ عٜ سُودُ تٛوْندُ، کٛ ࢡِࢡّٜ عَادَمَ ࢩِࢡَتَ؞ 6عٛوِعِ: «ندَا، ࢡٜ عُمَّاتٛورٜ وٛورٜ، ࢡٜطٛنْ مبٛلْوَ طٜمْنغَلْ غٛوتَلْ؞ کٛ ࢡٜنغَطِ طٛ، طُمْ ڢُطّٛودٜ تَوٛنْ؞ جٛنْتَ کَمْ، وَلَا کٛ حَطَتَ ࢡٜ وَطُغٛ کٛ ࢡٜنُڢٛتٛ ڢُو؞ 7ندِلّٜنْ، عٜنْ نجِݠّٛ، عٜنْ نجِيࢡَ وٛلْدٜ مَࢡّٜ، تَا ࢡٜݠَامْݠَامْتِرَ!» 8جَوْمِرَاوٛ سَنغْکِتِ ࢡٜ دِغَ تٛنْ ندٜرْ دُنِيَارُ ڢُو، ࢡٜعَشِّ ࢩِࢡُغٛ بٜرْنِوٛلْ؞ 9نغَمْ مَاجُمْ نغٛلْ عِنْدِنَامَ بَابِلَ#11:9 بَابِلَ يِطِ وِعْغٛ جِيࢡُغٛ بٜى عِبْرَنِنغْکٜىٰرٜ؞، نغَمْ حَا تٛنْ جَوْمِرَاوٛ جِيࢡِ وٛلْدٜ يِمْࢡٜ دُنِيَارُ ڢُو عٜ دِغَ تٛنْ بٛو عٛسَنغْکِتِ ࢡٜ ندٜرْ دُنِيَارُ ڢُو؞
دَࢩْغٛلْ سٜمْ
10ندَا حَبَرُ دَࢩْغٛلْ سٜمْ: ندٜ سٜمْ وَطِ دُوࢡِ تٜىٰمٜرّٜ (100)، دُوࢡِ طِطِ ࢡَاوٛ عِلَمْ تُوڢَانَ، عٛدَࢩِ عَرْڢَسَدَ؞ 11ࢡَاوٛ دَࢩٜىٰکِ عَرْڢَسَدَ، سٜمْ يٜىٰطِ دُوࢡِ تٜىٰمٜطّٜ جٛوِ (500)؞ عٛدَࢩِ ࢡِࢡّٜ وٛرْࢡٜ عٜ رٜوْࢡٜ؞
12ندٜ عَرْڢَسَدَ وَطِ دُوࢡِ شَݠَّنْطٜ تَتِ عٜ جٛوِ (35)، عٛدَࢩَنَامَ ࢡِطّٛ: سَلَ؞ 13ࢡَاوٛ دَࢩٜىٰکِ سَلَ، عَرْڢَسَدَ يٜىٰطِ ڢَحِنْ دُوࢡِ تٜىٰمٜطّٜ نَيِ عٜ تَتِ (403)؞ عٛدَࢩِ ࢡِࢡّٜ وٛرْࢡٜ عٜ رٜوْࢡٜ؞
14ندٜ سَلَ وَطِ دُوࢡِ شَݠَّنْطٜ تَتِ، عٛدَࢩِ عٜبٜرْ؞ 15ࢡَاوٛ دَࢩٜىٰکِ عٜبٜرْ، سَلَ يٜىٰطِ دُوࢡِ تٜىٰمٜطّٜ نَيِ عٜ تَتِ (403)؞ عٛدَࢩِ ࢡِࢡّٜ وٛرْࢡٜ عٜ رٜوْࢡٜ؞
16ندٜ عٜبٜرْ وَطِ دُوࢡِ شَݠَّنْطٜ تَتِ عٜ نَيِ (34)، عٛدَࢩِ ݠٜلٜکْ؞ 17ࢡَاوٛ دَࢩٜىٰکِ ݠٜلٜکْ، عٜبٜرْ وَطِ دُوࢡِ تٜىٰمٜطّٜ نَيِ عٜ شَݠَّنْطٜ تَتِ (430)؞ عٛدَࢩِ ࢡِࢡّٜ وٛرْࢡٜ عٜ رٜوْࢡٜ؞
18ندٜ ݠٜلٜکْ وَطِ دُوࢡِ شَݠَّنْطٜ تَتِ (30)، عٛدَࢩِ رٜعُ؞ 19ࢡَاوٛ دَࢩٜىٰکِ رٜعُ، ݠٜلٜکْ وَطِ دُوࢡِ تٜىٰمٜطّٜ طِطِ عٜ جٛوٜىٰنَيِ (209)؞ عٛدَࢩِ ࢡِࢡّٜ وٛرْࢡٜ عٜ رٜوْࢡٜ؞
20ندٜ رٜعُ وَطِ دُوࢡِ شَݠَّنْطٜ تَتِ عٜ طِطِ (32)، عٛدَࢩِ سٜرُکُ؞ 21ࢡَاوٛ دَࢩٜىٰکِ سٜرُکُ، رٜعُ يٜىٰطِ دُوࢡِ تٜىٰمٜطّٜ طِطِ عٜ جٛوٜىٰطِطِ (207)؞ عٛدَࢩِ ࢡِࢡّٜ وٛرْࢡٜ عٜ رٜوْࢡٜ؞
22ندٜ سٜرُکُ وَطِ دُوࢡِ شَݠَّنْطٜ تَتِ، عٛدَࢩِ نَحٛرْ؞ 23ࢡَاوٛ دَࢩٜىٰکِ نَحٛرْ، سٜرُکُ يٜىٰطِ دُوࢡِ تٜىٰمٜطّٜ طِطِ (200)؞ عٛدَࢩِ ࢡِࢡّٜ وٛرْࢡٜ عٜ رٜوْࢡٜ؞
24ندٜ نَحٛرْ وَطِ دُوࢡِ نٛوغَسْ عٜ جٛوٜىٰنَيِ (29)، عٛدَࢩِ تٜرَ؞ 25ࢡَاوٛ دَࢩٜىٰکِ تٜرَ، نَحٛرْ يٜىٰطِ ڢَحِنْ دُوࢡِ تٜىٰمٜرّٜ عٜ سَݠّٛ عٜ جٛوٜىٰنَيِ (119)؞ عٛدَࢩِ ࢡِࢡّٜ وٛرْࢡٜ عٜ رٜوْࢡٜ؞
26ندٜ تٜرَ وَطِ دُوࢡِ شَݠَّنْطٜ جٛوٜىٰطِطِ (70)، عٛدَࢩِ عَبْرَامَ عٜ نَحٛرْ عٜ حَرَنْ؞
دَࢩْغٛلْ تٜرَ
27ندَا حَبَرُ دَࢩْغٛلْ تٜرَ: تٜرَ دَࢩِ عَبْرَامَ عٜ نَحٛرْ عٜ حَرَنْ؞ حَرَنْ بٛو دَࢩِ لُوطُ؞ 28حَرَنْ مَايِ ندٜرْ لٜسْدِ کَلْدِيَ، ندٜرْ بٜرْنِوٛلْ عُرْ حَا عٛدَࢩَ، يَاکٜ بَابَ مَاکٛ غٜىٰتٛنٛ؞ 29عَبْرَامَ عٜ نَحٛرْ تٜعِ رٜوْࢡٜ؞ عِنْدٜ دٜبّٛ عَبْرَامَ، سَرَيْ؞ عِنْدٜ دٜبّٛ نَحٛرْ بٛو، مِلْکَ ࢡِي حَرَنْ؞ حَرَنْ وٛنِ بَابَ مِلْکَ عٜ يِسْکَ؞ 30سَرَيْ لَاتِنٛ دِمَرٛ، عٛوَلَانٛ ࢡِنغٜلْ؞
31تٜرَ حٛوعِ ࢡِيُمْ عَبْرَامَ عٜ لُوطُ ࢡِي حَرَنْ، تَانِرَاوٛ مُمْ عٜ سَرَيْ، عٜسِرَاوٛ مُمْ، دٜبّٛ عَبْرَامَ؞ ࢡٜ ڢُو ࢡٜعُمِّ دِغَ عُرْ ندٜرْ کَلْدِيَ، حَا ࢡٜنجَحَ لٜسْدِ کَنَانَ؞ ࢡٜنجٛتِّ حَرَنْ، ࢡٜنجٛوطِ تٛنْ؞ 32دُوࢡِ تٜرَ مبَطِ تٜىٰمٜطّٜ طِطِ عٜ جٛوِ (205)؞ عٛمَايِ ندٜرْ حَرَنْ؞
தற்சமயம் தேர்ந்தெடுக்கப்பட்டது:
لَاتَانٛوجِ 11: داَ
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
Fulfulde Bible Ajamiya © Bible Society of Cameroon, 2016.