Mattaayo 18
18
Abatti eti ꞌdooꞌdi addan tuumman iween Yeesso worsatta
(Marko 9:33-37, Luuka 9:46-48)
1Chirraakka abatti Yeesso itimiyye, “Dakhi goobi Waakh ka ayyo ꞌdooꞌdi addan tuumman iween?” worsatte. 2Weeloo rucchul wahe, goycho toolliche.
3Wihi us yidah, “Rume atin icheeka, sammata atin iurgiyine, iꞌdi nyaakhuti rurrucchul iitaahan, koloo kalday laka dakhi goobi Waakh ma gessaan. 4Maantaka eti tuummane iꞌdi weeluu isnuglaache, dakhi goobi Waakh ka weyti weenyahe.
5“Eti tuummane weeloo iꞌdee jeenteti us abattiteey iyahuu martiiste, ani imartiiste.
Yeesso wihi enenyet uskeel kalugꞌdo kaayyeeda
(Marko 9:42-48, Luuka 17:1-2)
6“Iꞌdaasenyi chiꞌ etoo ꞌdooꞌdaar irummeesti kichokoo tarraantarricho wihi ideefo a usuhi daddaabti buurenye gurnaan lakatumo lukhum lakahido, beyti buurenye hoge ka bicche khaataan. 7Jeenteti wahanyeyyohi enenyet uskeel kalugꞌduu, ꞌdooꞌdi harrata sinati sugto eenna a buure! Wahanyeyyoha a yamiitiine, iꞌdaasenyi eti icho leeyamiitiin sinati sugto eenna a buure! 8Chiꞌ dahantaah ommos luhtaah uskeel kaaluguꞌddo gooche rog. Atihi dahan laaye ommos luh laaye jiroti jirtuu imassan ꞌhesso deefta, atihi dahano lammacho ommos luhlo lammacho khabto ꞌdabi armaanjireen lakalugꞌdo ka. 9Chiꞌ issaah uskeel kaaluguꞌddo la, bihiche rog. Atihi issoo laaye jiroti jirtuu imassan ꞌhesso deefta, atihi indo lammacho khabto, meessi ꞌdabi armaanjireen lakaalugꞌdo ka. 10Taba nyaakhuti rurrucchul aꞌdarraawina. Iꞌdi tahe wihi an atin iadeeh, herti Waakhe goobi Waakh ka icho yuubisso kol dakkhan goobi Waakh ka fool Aabbaheey a agarta.#18:10 Chiirnaanneti Yeedi Waakhe uumacchee gaasoo chiirnaanka a kakhayte. 11 “Wihi tahe, Ínam Aadam a yimiyye, ꞌdooꞌdi uskeel kajiro uskeel kasoolaaba.”
Mammahti naffi iiyyaate baabe
(Luuka 15:3-7)
12“Bal waha kamalda. Ersinki iiyti kudoowe khabo, naffoo kabaabe, mehe yeela? Ersinkaas iiyti tomon saagaal ichoow saagaale hal yaakhtaayi a kataba, irta naffi kaldache baabe yowta menya? 13Chirri us ꞌhele la, naffaas kalday weyti kahamaada iiyti kootte tomon saagaal ichoow saagaalenye ibaabin ka laka. 14Aabbaheeyki serey jiro laka saggaas u, nyaakhuta rurrucchul ichehi koo kalday laka baabo ma ꞌdoono.
Wihi at eti koo Kiriisteenye uskeeloo kiyeele iyeesso
15“Chirri etaahkoo koo Kiriistee uskeeloo kiyeele, iiro saggi us uskeel kiyeele icheeke, lammatiin on la a eheetti. Chirri us kidaage, etaas a sooholisse. 16Iꞌdaasenyi chirri us kidaagiwwaaye, etoo ommos et lammatoo addane Kiriisto rummeysatte khaato, leeyyeeda, ꞌdee et lammataas ommos et seyyahtaas gar a laabto.#18:16 Deewutoronomi 19:15. 17Chirri us ꞌdooꞌdaas sookute, urur Kiriisto icheek. Chirri us urur Kiriisto laka sookute, iꞌdi eti Waakh igaran ommos iꞌdi eti suujenye kooddi goocho iekkaacha.
18“Rume atin icheeka, walahbaaw at harra ka hiddo, Waakh laka goobiis ka a hide. Wihi at harrata ka furto la, Waakh laka goobi Waakh ka a fure.”
19“Toro wihi an atin iadeeh, chirri harrata ka et lammatoo wihi iche Waakh daahto iskadaagte, Aabbaheeyki serey jiro wahaas iche daahte a siicha. 20Wihi tahe inti et lamma ommos et seyyahe jeenteti icho abattiteey iyahiin u kakulmeen, an goycho a kijira.”
Yeesso uskeeli enenyet liikakuto kaayyeeda
21Yomboka Beetero Yeesso iyimiyye wihi us worsate, “Kamur, chirri walaaleeykoo uskeeloo iyeele, kol geeddoh uskeel ikakuto? Kol teeba ikakuta?”
22Yeesso wihi us ilaabe, “Wihi an kiadeeh, kol teeba menye, iꞌdaasenyi kol tomon teeba ichoow teeba ikakut.
23“Iyookkoka dakhi goobi Waakh a iꞌdi karnati ilbooyyetiis ebba mogti us kakhabe ichehi soogutto ꞌdoono. 24Chirra us worsan sookhabte ka, koo mogti weyti buurenye, jirtuu dakkhan igunnamin#18:24 Geeddi Yeesso harrata kijire ka, mogta a gunnaanki eti guꞌh alif kud lamma hil haaggiche laguto. khabo liikeene. 25Mog gunnaan ma yabuuꞌd gone, kamuriis amuri usu ichoow makhaabassiis ichoow nyaakhutiis ichoow wihi us khabo tuumman lakoororicho, ꞌdee mog lakaguto bahche.
26“Ilbooy kamuriis ortiis ka jilbo il kaguꞌdde, hawwaaste, ‘Kamuraaw, isug on, amba mogtaah tuumman kisoogutaa,’ iyidah. 27Kamuri ilbooyaas la uur isoonugleeste, mog leeꞌdiiche, toro la ꞌdiiche irte.
28“Iꞌdaasenyi ilbooyaas uus bahe, ilbooyoo addane wahalhiisenye mogti chilimmeti eti orrah kudoo hil haaggiche laguto kakhabo ꞌhele, kur khabte, hude, ‘Toolla kofche mogteey soogut,’ iyidah.
29“Ilbooyaas wahalhiise luhlo khabte, hawwaaste, ‘Isug on, amba mogtaah kisoogutaa,’ iyidah.
30“Iꞌdaasenyi ilbooyaas us mogtiis khabo sugnaan leeꞌdiiꞌde, khaate jeela gesse, ichoowka maanti us mog sooguto. 31Chirri ilbooyyeti addan wihi yitah agarte ka, weyti bolkheene, irteene, kamuricho wihi yitah tuumman icheekeen.
32“Kamuricho ꞌdeerka ilbooyi mogtiis khabo wahe, wihi us iyidah, ‘Atiha ilbooyi suuje, an jeenteti at ihawwaassatte u, mogteeyti ati khabto tuumman a kileeꞌdiiche. 33Saggaas maanta an uur kisoonugleesde u, at laka ilbooyaas wahalhaahe uur ma inugleysatti?’ 34Kamuriis hol ka, dahanohi ꞌdooꞌdi usu jeela ka sina kawaaricho gesse ichoowka maanti us mog tuumman sooguto.
35“Sammata at walaalaah uuraah ka tuum uskeel ikakutin, Aabbaheeyki serey jiro laka, etiimba iꞌdaas on yeela.”
தற்சமயம் தேர்ந்தெடுக்கப்பட்டது:
Mattaayo 18: rel
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
© 2018, Wycliffe Bible Translators, Inc. All rights reserved.