Maˍkuˆ 1
1
Baˆ tiˆ samˍ saˍ laˉ Yoˉhanˍ beu ang buinˉ maˍ tangˍ
1Ningˉ ngaˍ Hpaˍ caoˍ Ang yaˍ Yeˍsuˆ Hkrit beu mawnˍ pyawˉ naeˉ uiˉ ang buingˉ tangˍ yangˍ. 2Pa rawˉ hpaet Iˉsaˍyaˆ Camˉ lik hkaoˉ veu ciˍ jiˍ lawˉ yaˇ hpeuˍ laˉ jiˉ.
Changˉ uiˉ nuing ba penˉ laeˍ naeˍ uiˉ saˍ laiˍ, ga nawng mae kaˍ huˍ veu ga beu naiˍ htangˍ na sa luiˍ naeˍ.
3Ang suingˉ lui kyaˉ kaˉ ba hingˉ na haenˍ htaˍ yao ca bao. Kaˉ ba hingˉ na piˉ pawng biˍ bao nae changˍ kawngˍ ang kuiˍ veu ang tangˍ paoˍ jiˍ.
4Baˆ tiˆ samˍ piˍ naeˍ Yoˉhanˍ maˇ changˍ kawngˍ veu awkˍ taw lui yao, ang buinˉ tangˍ maˍ jiˍ. Naˍ hokˍ na kuitˆ puiˉ laeˍ yao, langˉ cup laeˍ bao, haeˉ mae baoˇ, Hpaˍ caoˍ nawngˍ na naˍ hokˍ hkaoˍ veu piˉ caeˉ laˍ naeˍ yaˇ nae yang ang buinˉ tangˍ maˍ jiˍ. 5Yeˍruˆsaˍlaemˍ vengˍ changˍ hkaˉ hko laˉ hko nae Yuˉdaˆ ang meungˉ changˉ hkaˉ hko laˉ hko uiˉ muiˉ Yoˉhanˍ ca naeˉ haeˉ keung aeˉ jiˉ. Yawng beu naˍ hokˍ ang si uiˉ ciˍ taw luiˍ yao, Yawˍtanˍ langˉ ba veu baˆ tiˆ samˍ hkamˉ yuˉ jiˉ. 6Yoˉhanˍ nawˍ kaˍ laˍ okˆ ang muingˍ nae kuˍ jiˍ hkaˍ lao uiˉ tum jiˉ. Ang cawˍ veu cenˍ ang hkaw tawngˍ sitˍ sitˍ jiˍ. Chaˍ plawngˉ nae changˍ kawngˍ veu pyaˍ cuiˍ uiˍ na caˍ jiˍ. 7Ga htaˍ che nae huiˍ mawng naeˉ htiˍ hu hu maˇ ga nawngˍ veu lui naeˉ. Haeˉ mangˉ beu hkiˉ naw laˍ tuiˍ na bawk yao hpuiˉ biˍ yao muiˉ gaˇ baˍ kuingˍ. 8Langˉ hkaoˉ veu gaˇ nawng na baˆ tiˆ samˍ piˍ laˍ yaeˍ. Hta yao muiˉ, Ang hkawˍ laˉ ang seungˍ sangˉ na cuˉ yao, yaˇ nawng na baˆ tiˆ samˍ piˍ laˍ naeˍ mangˉ nae Yoˉhanˍ ang buinˉ tangˍ maˍ biˍ jiˍ.
Yeˍsuˆ baˆ tiˆ samˍ hkamˉ yuˉ jiˉ
9Haeˉ mae beu, Yeˍsuˆ nawˍ Gaˍliˉlaeˉ ang meungˉ Naˍzaˍraet vengˍ veu nae lui yao, Yawˍtanˍ langˍ ba veu Yoˉhanˍ nawˍ Yeˍsuˆ na baˆ tiˆ samˍ piˍ jiˍ. 10Caˇ, langˉ hkaoˉ veu nae hta laˉ beu, buingˍ htaˍ yangˍ hpawng yao, Ang hkawˍ laˉ ang seungˍ sangˉ maˇ kawngˍ hkaoˍ ang pawnˍ laˍ mae yang htaˍ veu lungˍ luingˉ jiˉ na ya myangˉ jiˉ. 11Naˇ ga hak naeˉ Ang yaˍ maˍ manˉ yaˇ. Ga nuing ba buiˍ naeˍ mangˉ Ang yaˍ mangˍ nae buingˍ htaˍ veu ang tangˍ awkˍ luiˍ jiˍ na ya kyaˍ jiˍ.
Saˍtanˍ hpawngˍ naeˍ na Yeˍsuˆ ya hkamˉ jiˉ
12Haeˉ mae yao, Ang hkawˍ laˉ mangˉ Yeˍsuˆ na changˍ kawngˍ ang kui veu piˉ lae jiˉ. 13Changˍ kawngˍ veu hanˍ cheˍ nuing ca beu, Saˍtanˍ hpawngˍ naeˍ na ya hkamˉ jiˍ. Changˉ baˍ ca nae taeˇ cenˍ ang haiˉ uiˉ kawngˉ htuˍ yaˍ laˉ mae ca jiˉ. Caˇ, buingˍ htaˍ naiˍ htangˍ uiˍ muiˉ Yeˍsuˆ na po hing jiˉ.
Yeˍsuˆ kanˉ vaˍ hpanˍ hpanˍ jiˍ
14Ang nyamˍ iˉ yaˍ mangˍ ngangˍ yao, Yoˉhanˍ na htawngˉ veu lawngˉ nga beu, Yeˍsuˆ nawˍ Gaˍliˉlaeˉ ang meungˉ veu lae jiˉ. Hingˉ keung veu, Hpaˍ caoˍ beu mawnˍ pyawˉ naeˉ uiˉ ang buinˉ tangˍ maˍ lae jiˉ. 15Ang nyamˍ hkeungˇ byaˇ. Hpaˍ caoˍ beu ang meungˉ duiˍ luingˉ byaˇ. Naˍ hokˍ na kuitˉ puiˉ laeˍ yao, mawnˍ pyawˉ naeˉ uiˉ ang buinˉ tangˍ na yumˉ voˍ nae Yeˍsuˆ ha biˍ jiˍ.
Nuingˍ taeˍ saˉ naeˉ changˉ hanˍ hu uiˉ na Yeˍsuˆ haoˉ yuˉ jiˉ
16Gaˍliˉlaeˉ lang awng htang veu Yeˍsuˆ aeˉ beu, nuing taeˍ saˉ naeˉ changˉ uiˉ Siˉmunˍ nae yang hpaeˉ Anˍdeˍreˍ yaˉ yetˍ langˉ awng hkaoˉ veu haw cuingˉ paek yaˍ yao ca jiˉ na myangˉ aeˉ jiˉ. 17Ga nawngˍ veu hkeˍ lao. Nuingˍ taeˍ saˉ naeˉ uiˉ laˉ mae, changˉ na saˉ naeˉ uiˉ nawng na ga piˉ hpeuˍ laˍ naeˍ nae Yeˍsuˆ yawng na ha biˍ jiˍ. 18Yawng muiˉ haw cuingˉ hingˉ na htiˍ chitˍ nae paek saˍ yao, Yeˍsuˆ nawngˍ veu hkeˍ jiˍ. 19Caˇ, iˉ yaˍ lae laeˍ yao, Zeˍbeˍdaeˇ beu ang yaˍ Yaˍkok nae yang hpaeˉ Yoˉhanˍ yaˉ yetˍ na Yeˍsuˆ myangˉ lae jiˉ. Yaˉ yetˍ muiˍ heuˍ htaˍ veu haw cuingˉ na kuˍ yao ca jiˉ. 20Htiˍ chitˍ nae yaˉ yetˍ na Yeˍsuˆ haoˉ biˍ jiˍ. Yaˉ yetˍ muiˍ ya vangˉ Zeˍbeˍdaeˇ nae mongˉ cangˉ yaˍ naeˍ uiˉ changˉ na heuˍ htaˍ veu chiˉ saˍ yao, Yeˍsuˆ nawngˍ veu hkeˍ jiˍ.
Deˍ yaˍ ang haiˉ na kaˍ taw jiˉ
21Yeˍsuˆ nae yang ta peˍ uiˍ Kaˍpeˍneˍonˍ vengˍ veu lae jiˉ. Yuˉdaˆ changˉ ceuˉ beu vanˍ sin nuing hkeu yao, Yuˉdaˆ changˉ ceuˉ hpawm lang kyaˉ veu ang buinˉ tangˍ maˍ yao, seungˍ maˍ jiˍ. 22Yang ang buinˉ tangˍ maˍ biˍ jiˍ hingˉ na changˉ uiˉ muiˉ manˍ hko jiˉ. Aˉ mae yao nae baoˉ vaˍ, Yeˍsuˆ ang buinˉ tangˍ maˍ biˍ jiˍ hingˉ ngaˍ Camˉ lik ang hkiˍ saˍ laˉ uiˉ laˉ mae baˍ aˍ. Changˉ aˉ yaˍ ang ca uiˉ laˉ mae seungˍ maˍ jiˍ. 23Haeˉ mae beu, hpawm lang kyaˉ hkaoˉ haeˉ keung veu deˍ yaˍ awngˉ ngangˉ biˍ jiˍ uiˉ changˉ htiˍ hu ca jiˉ. 24Yang haoˉ yao ciˍ jiˍ hingˉ ngaˍ, Naˍzaˍraet vengˍ changˍ Yeˍsuˆ veuˉ, nang nae gu aˉ mae chaˍ lang naeˇ. Naˇ gu na tiˍ kangˍ tiˍ chaw lui laiˍ ceuˉ nae laˍ. Naˇ aˍ sangˍ mangˉ jeuˉ nae ga ang bae yaˇ. Naˇ Hpaˍ caoˍ beu changˉ ang seungˍ sangˉ mangˉ yaˇ nae haoˉ yao ciˍ jiˍ. 25Yeˍsuˆ mangˉ muiˉ deˍ yaˍ mangˍ na ciˍ sangˍ jiˍ. Kyapˆ nae ca yao awk taw aeˉ bao nae aˉ mingˍ piˍ jiˍ. 26Haeˉ mae beu, deˍ yaˍ mangˍ muiˉ changˉ haeˉ mangˉ na tiˍ kaenˍ biˍ yao, ang hteˉ ang haengˍ nae haoˉ yao awkˍ taw aeˉ jiˉ. 27Changˉ ang byaˍ uiˍ muiˉ kuitˉ manˍ hko laeˍ jiˍ. Aˉ yaˍ ca la nae seungˍ maˍ nae uiˉ tangˍ ang suiˍ baˍ aˍ la. Deˍ yaˍ uiˍ muiˉ yang aˉ mingˍ piˍ yao, yang tangˍ na ang naˉ jaˇ nae htiˍ hu nae htiˍ hu hkai lang jiˉ. 28Haeˉ mae yao, Yeˍsuˆ beu awˍ lawng hingˉ muiˉ tiˍ chitˍ nae Gaˍliˉlaeˉ ang meungˉ uiˉ beu kyaˍ hko aengˉ jiˉ.
Changˉ daˉ ang byaˍ uiˍ na taeng pyo biˍ jiˍ
29Yeˍsuˆ hpawm lang kyaˉ veu awkˍ taw luiˍ yao, Yaˍkok nae Yoˉhanˍ yawng Siˉmunˍ nae Anˍdaˍreˍ yumˉ veu lae jiˉ. 30Siˉmunˍ beu hkaˍ ba ang muing maˇ daˉ yaˍ biˍ yao yuˍ byaˇ, nae yang lawng hingˉ Yeˍsuˆ na yawng ang vaiˍ nae ha biˍ jiˍ. 31Yeˍsuˆ mangˉ lae yao, hkaˍ ba yaˍ hingˍ mangˉ beu laˍ puˍ veu chu lu nae chuingˉ hta laˉ biˍ jiˍ. Yang ang daˉ hingˉ tiˍ chitˍ nae pyo yao, yang yawng na caˍ keungˍ haenˍ yao piˉ yaˍ jiˍ. 32Yuˉdaˆ changˉ ceuˉ uiˉ beu vanˍ sin nuing peunˉ yao, changˉ daˉ nae changˉ deˍ yaˍ awngˉ ngangˉ biˍ jiˍ uiˉ muiˉ Yeˍsuˆ ca naeˉ hingˉ keung yawng na suiˍ lae jiˉ. 33Vengˍ changˍ ang byaˍ uiˍ muiˉ yumˉ langˉ kaw htang veu chawnˉ lang yao ca hko laˉ jiˉ. 34Hpa yat ang byaˍ ceuˍ daˉ yao, ca naeˉ changˉ uiˉ na piˉ che laˉ laeˍ yao, deˍ yaˍ awngˉ ngangˉ biˍ jiˍ changˉ uiˉ na muiˉ kaˍ taw biˍ jiˍ. Deˍ yaˍ uiˍ Yeˍsuˆ na aˍ sangˍ nae ang bae nae yao, Yeˍsuˆ yawng na hkaˍ muˍ htiˍ htaeˍ nae muiˉ baˍ piˍ hkai.
Gaˍliˉlaeˉ ang meungˉ veu Yeˍsuˆ ang buinˉ tangˍ maˍ jiˍ
35Saw hta ang daˍ buingˍ baˍ paenˍ langˉ beu, Yeˍsuˆ yumˉ na chiˉ saˍ yao, changˉ baˍ ca nae ang kyap hingˉ keung veu ang buinˉ paˉ lae jiˉ. 36Siˉmunˍ nae yang ang changˍ uiˍ muiˉ Yeˍsuˆ na la sa nae saˉ cangˉ jiˉ. 37Yeˍsuˆ na myangˉ yao, Aeˉ laeˍ baiˉ seuˍ. Changˉ hkaˉ hko laˉ hko uiˉ muiˉ nang na saˉ laˍ ngaeˉ nae ha biˍ jiˍ. 38Yeˍsuˆ mangˉ muiˉ ang tawngˍ ang htang veu vengˍ ang iˉ uiˉ beu muiˉ, Ga ang buinˉ tangˍ ya maˍ naeˍ uiˉ saˍ laiˍ, vengˍ ang iˉ hingˉ uiˉ beu muiˉ gu aeˉ baiˉ seuˍ. Aˉ mae yao nae baoˉ vaˍ, gaˇ ningˉ kanˉ saˍ laiˍ yaˇ lui yaeˉ nae ha biˍ jiˍ. 39Yeˍsuˆ mangˉ muiˉ Gaˍliˉlaeˉ ang meungˉ hingˉ naiˍ uiˍ beu aeˉ jiˉ. Yuˉdaˆ changˉ ceuˉ hpawm lang kyaˉ uiˉ beu ang buinˉ maˍ yao deˍ yaˍ uiˍ na muiˉ kaˍ taw jiˉ.
Changˉ hkiˉ tutˉ mangˉ na piˉ seungˍ piˉ sangˉ laˉ jiˉ
40Changˉ hkiˉ tutˉ htiˍ hu Yeˍsuˆ tawngˍ naˍ veu hpaˍ tuˍ laˍ hku nae ha yao, nang a loˍ ca baoˉ vaˍ, ga na taeng seungˍ taeng sangˉ laˍ yao ang kaˍ yaˇ, ang taeng laˍ laˍ nae paˉ jiˉ. 41Yeˍsuˆ maˇ saˍ kyaˍ kyaˍ naeˍ uiˉ nuing ba nae, yang htaˍ veu laˍ puˍ boeˉ yao, Ga a loˍ ang ca yaˇ. Seungˍ sangˉ laˉ biˍ bao nae ha biˍ jiˍ. 42Yang hkiˉ tutˉ yangˍ htiˍ chitˍ laˍ hkaoˍ veu pyo aeˉ yao seungˍ sangˉ nae hpeuˍ laˉ jiˉ. 43Yeˍsuˆ mangˉ muiˉ htiˍ hu na baˍ upˍ baˍ hkai biˍ jo nae saˍ tiˍ piˍ jiˍ. 44Yit pa rawˉ hek kawngˉ aeˉ yao nang ang to hingˉ piˉ hu aeˉ voˍ. Moˉseˍ ang liˍ ang kawngˍ ca jiˉ laˉ mae nang ang to seungˍ sangˉ nga aengˉ jiˉ hingˉ, changˉ ang byaˍ tawngˍ naˍ veu piˉ hu aeˉ naeˉ uiˉ saˍ laiˍ, tanˍ aeˉ voˍ nae ha biˍ yao piˉ aeˉ laeˍ jiˍ. 45Changˉ haeˉ maˇ awkˍ taw aeˉ yao, hkaˍ muˍ ang byaˍ nae hingˉ lawng na baˍ chawng nae changˉ ang byaˍ uiˍ na hkai biˍ jiˍ. Hingˉ pa nae Yeˍsuˆ maˇ vengˍ hkaoˍ veu paenˉ paenˉ nae baˍ awngˍ aeˉ laeˍ nae vengˍ ang ngiˉ changˉ baˍ ca nae uiˉ beu ca jiˉ. Haeˉ mae beu, aˉ keung aˉ keung changˉ uiˉ muiˉ yang ca naeˉ hingˉ keung hkeu laˉ jiˉ.
தற்சமயம் தேர்ந்தெடுக்கப்பட்டது:
Maˍkuˆ 1: pyy
சிறப்புக்கூறு
பகிர்
நகல்
![None](/_next/image?url=https%3A%2F%2Fimageproxy.youversionapistaging.com%2F58%2Fhttps%3A%2F%2Fweb-assets.youversion.com%2Fapp-icons%2Fta.png&w=128&q=75)
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
© 2022, Wycliffe Bible Translators, Inc. All rights reserved.