Lŭka 16

Dèmèpho Adîdî̄dahma ńò

1Jezŭ d́ògè abōhmubicè tòcò gōjo, “Bija aniò̆jòa dèbwè adèmèpho ògè dèbwè. Bija d́òi acòaca d́ŏ zè mèkè̆mèô cî b́icè adî̄adè nu. 2Zo jo hwă lōwa, ‘Ji thîhè̆b́è nî wî nè kè̆ ḿî d́ò̆ cadè̄? D́è̆lî̄bò̄ jè nè dèphîdèmè acèrè̆, ni di ḿîbe dèmèpho ńò,’ cò d́ò lōwa do. 3Dèmèpho dèbwè d́òlage ane, ‘Jè gè̄ mèb́è danè̄ b́ĕ ja sara phîkè̆ thĭwī jè dèmè ajo nu? Ju du khu kèhta lākho ńò. Athăwā da a jè dè dè. 4Jè gè̄ mèb́è danè̄ nu ji thîhè̆ htŏ, htè b́ĕ jè hèhta hwă akhî nu cab́ô̆htè bija tòcò gè lekhabò̄ jè d́ŏ cè tòcò ahibu nu,’ cò d́ò do. 5Zo jo hwă acwĕ b́è za sara tòcò dèbwè ladū, dèbwè ladū d́ō cè d́è̆tcagè aŭsu dèbwè, ‘Ni ki ib́è ja sara pwedè̄?’ 6D́ō cò d́ò lōwa, ‘Si ahmwe dègèjè,’ Cò d́ò lōwa, ‘Hwela plaplăbò̄ nè cèrè̆ abu ahmwe jè̄scĭ.’ 7Mèhwă cò d́ò d́ò̆ alewe dèbwè, ‘Ni kī ib́ège d́ò̆ pwedè̄?’ d́ō cò d́òge, ‘B́u ata dòhtò.’ Cò d́ò lōwa, ‘Ajo nè cèrè̆ ò jo, hwela plaplăbò̄ ata agèjèlwīthô,’ cò d́ò lōwa do. 8Za sara thîhè̆b́è dèmèpho dèbwè mè dè ajo tòcò d́ō, za htăi tèpwè lōwa; lākhopho tòcò bla d́olĭ tèpwè dèhlî̆pho tòcò nu akhoacè̆ nu.

9“Jò d́ò̆sa thĭ mèthòbò̄ lākho adî̄adè cab́ô̆htè zè gè lèkhabò̄ thĭ d́ŏ dèò alahtŭlablo alle nu.” Cò d́ògè lōwa tòcò do. 10“Bija htè agî̄ dî̄ gā hma d́ŏ dèphîdèmè atîkîpho abu dèbwè nu, zî gî̄ dî̄ gā hmakò̆ d́ŏ dèphîdèmè adoamu abu nu nu, kî bija htè adîdî̄dahma ńò d́ŏ dèphîdèmè atîkîpho abu dèbwè nu, zî gî̄ dîdî̄dahmakò̆ ńò d́ŏ dèphîdèmè adoamu abu ńò ńò. 11Mègōnu akhoacè̆, d́ŏ lākho adî̄adè aklè̆ nu, thĭ gî̄ dîdî̄dahma ma ńò d́ō, bò̄bwè gā sascĭi za thĭ d́ŏ dè ab́èkja dèdî̄dèhma tòcò nu bwè? 12Kî thĭ gî̄ dîdî̄dahma ma d́ŏ dè ab́èkja thĭ tòcò nu ńò d́ō, bò̄bwè ki i za thĭ dè ab́èkja thĭ tòcò nu bwè?

13“Zôpho dèbwè da khazô za ab́icè gībwè ńò. Zè gè̄ dè wè̄ dè sè̆ hwă ńò dèbwè, cè kè b́èlò̄ dèbwè. Ḿî̆dîḿî ńò zô kô thô̆htô hwă dèbwè, cè gè̄ htèkè̆htèô alewe dèbwè. Thĭ dè mèkèhta Kib́ĭcè adèmè kî Lākho adèmè taplakhă lò ńò,” Cò d́ògegè lōwa tòcò do.

Pharizè̆pho tòcò Adèmèbarasa

(Mattĕo 11.12,13; 5.31,32; Mărko 10.11,12)

14B́ĕ Pharizè̆pho ab́èlò̄ pĭd́ŏpĭsa tòcò sòkhĕńe hwă dè ajo d́ō, zè htèkè̆htèôgè Jezŭ. 15Kî Jezŭ d́ògè cè tòcò, “Thĭ ḿî bija htè ad́òla ane adî̄ahma d́ŏ bija ahlò̆mò̄ nu, barasă Kib́ĭcè thîhè̆ thĭ tha. Manè̄ d́ō, ab́è bè̄htajî d́ŏ bija ahlò̆mò̄ tòcò ḿî azizòmòthŏ d́ŏ Kib́ĭcè ahlò̆mò̄ nu.

16“Htô̆do Zowănnī le nu, Mŏzè Adèhmèla kî Prò̆fèt tòcò ò htŏ; d́ŏ dèd́ò̆htôla Kib́ĭcè Ahtĭage Adèthalōthalai Awîakè̆ akhoacè̆ bija gŏ abwè sanīwî̄nī abu. 17Mò̄kho kî Lākho gò̄ phlòtôlô hjŏkakî nòthò̆ d́ō, Mŏzè Adèhmèla ascipho dohmô̆lò hnò̆nu kè tè b́è tca tôlôb́è ńò.

18“Gajă bija alè̄dakè̆ ahmè̆, aphî alewe dèbwè ḿî za lakèḿè lò. Kî bija aphî amihmu ab́èlè̄ladakè̆ dèbwè nu ḿî za lakèḿè lò lò.

Aniò̆jòa dèbwè kî Lazarŭ

19“Bija aniò̆jòa ògè dèbwè kî cô kô̆ thĭ thò thĭ kî aẃiò̆scĭ gŏ ani lò. 20Assègnè̆pho Lazarŭ ògè dèbwèbwè. Zi neb́î̆cè ò pĕhtakî abulebukle, kî cò ò gò̄la d́ŏ lōwa akhaglè̄htî nu, 21kî htwi tòcò le hlîa tèpwè zu bulebukle ahmĭatho dòkhò̆. Zô dôai tèpwè toko akholakăsè aladē akîńîôńô̆ d́ŏ lōwa adadākho nu. 22Bwèssègnè̆pho thĭ d́ō Mò̄khobwèzo zālei cè d́ŏ Abraham athaî̆nè̄ bu nu. Bija aniò̆jòa dèbwè ḿî thĭgè gè kî cè b́è b́ŭlăgè. 23Za ladē d́ŏ Larrā abu kî khab́è dèssègnè̆bòdò akhî nu, ze jehta co ko kî tcahtîgè d́ŏ ajî nu Abraham kî Lazarŭ d́ŏ lōwa athaî̆nè̄ bu nu. 24Zo htŏhta ze lē kî cò d́ò, ‘Apa Abraham, khòwèbò̄ jè tîkî. Kî hnabò̄ Lazarŭ agē le trŭlă hwă acukońŏ d́ŏ htĭklè̆ nu d́ō htelacobò̄ jî blî tîkî. Manè̄ assègnè̆bòdòsôgè jè d́ŏ hmîŭhtĭsè̆ aklè̆ jo,’ cò d́ò lōwa do. 25Barasă Abraham d́òscĭge cè, ‘Apho gomohtanigebò̄ htè d́ŏ ńò ò thôḿô̆we nu, ni nib́è htŏ dè aè tòcò nu kî Lazarŭ nib́ègè dè atè è ńò tòcò nu. Barasă khŏnujo cè b́è mèmòhtagegè, ḿî nè nu nè b́èssègnè̆bòdògè hŏ. 26Alewe domo ḿî d́ŏ wa kî nè azo nu, ròdo ògè dòrò pwĕ acab́ô̆ bija aò b́ĕ wò ò dòkhò̆wō thaè lehtî nòthò̆ thĭ hnò̆nu, zè dè kèhta mè ńò,’ cò d́ò̆sagegè lōwa do. 27Ḿî cò d́ò lōwa, ‘Mègōnu, Apa, ja damò nè agā hna le Lazarŭ d́ŏ ja pa ahi nu, 28manè̄ jè thè̆buwe ò jè̄bwè. Cab́ô̆htè zi gi mîbò̄ lōwa tòcò anikhĭ dè amòhmăi nu, dî ḿî ńò d́ō cè tòcò ḿî ḿî gē le òb́è tèpwè d́ŏ dèssègnè̆bòdò ale jo,’ cò d́ò lōwa do. 29Abraham d́òscĭge cè, ‘Mŏzè kî Prò̆fèt tòcò òkô tèpwè ca kă, zò sòkhĕńe d́ò̆è lōwa tòcò alē,’ cò d́ògè lōwa do. 30Barasă cò d́òscĭge d́ò̆ lōwa, ‘Tè b́è ńò, Apa Abraham, bija athĭgè aklè̆ dèbwèbwè gē gehtî ma cè d́ō, za gā salage tèpwè ca tha,’ cò d́òscĭge lōwa do. 31‘Zò dò sòkhĕńe ma Mŏzè kî Prò̆fèt tòcò alē ńò d́ō, bija ahtaboge tòcò alē hnò̆nu tè b́è zò gò̄ sòkhĕńe dalā ńò,’ Abraham d́òscĭge cè gōnu,” Cò d́ò̆sa lōwa do.

தற்சமயம் தேர்ந்தெடுக்கப்பட்டது:

Lŭka 16: GRNT21

சிறப்புக்கூறு

பகிர்

நகல்

உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்

Geba Roman New Testament © Bible Society of Myanmar, 2021.

Geba Roman New Testament பற்றி மேலும் அறிக