MAT 4

Godetǝn kǝ Yesu

1Arni Ruhu kǝ Yam ba ri Yesu gip lǝpe, kǝ dǝ Shetan mǝn setǝn gode ti. 2Nan tǝ pi guzum mal muri hauya rop (40) pǝt na gasi, den kariwo, guzum nǝm ti. 3Arni mǝn setǝni ɗir tǝ wul ti'e, <<In kǝ Nya Yamno, wul tat ju'e wu dǝm bǝredi.>>

4Arni Yesu nǝmi ti, tǝ wul ti'e, <<Ar ra na rǝshi gip shirǝm kǝ Yam'e, <Na bǝredi ni katl mbarǝm ba mani dǝmi da'a, ama na ko gonge shirǝm kan ba ɗǝl kar Yam gwa.>#4.4 Shirǝm tu ba zam ni gip Bi Doka kǝ rop 8.3 >>

5Arni mǝn setǝni si ti bǝn Urshalima, bǝn tu kan Yam zǝzari gam gǝs gwa, tǝ te ti to den gam bom kǝ Yamka kan to yam naar gwa. 6Tǝ wul ti'e, <<Ki Nya Yam ni, ɓo tuma su atlka. Ai Shirǝm kǝ Yam wule,

<Ti bi bi dǝ mǝn kartǝn kǝ Yam

den wu gaa ki,

bǝse kǝ ɓo asǝmka den tate.> >>#4.6 Shirǝm tu ba zam ni gip Zabura 91.11-12

7Arni Yesu wul ti'e, <<Ar ra na rǝshi'e, <Ki gode Babom Yam gi da'a.>#4.7 Shirǝm tu ba zam ni gip Bi Doka kǝ rop 6.16 >>

8Den kariwo, arni mǝn setǝni te Yesu den gam tlyari tlǝndǝr, tǝ ta'i ti am den mulki kǝ atl kup na nartǝn gǝzǝni. 9Tǝ wul ti'e, <<Aa bi'i mulki kǝ atl ju kup, kini kǝ nda atl cina da'ǝm kǝ botem gwa.>>

10Arni Yesu wul ti'e, <<Tli karǝmka, Shetan! Ar ra na rǝshi'e, <Bote Babom Yam gi nan gǝsi. Ti ni katl ki bote ti.> >>#4.10 Shirǝm tu ba zam ni gip Bi Doka kǝ rop 6.13

11Arni mǝn setǝni za ti. Kan mir mǝn kartǝn kǝ Yam ba cwat kar ti, wu pi ti mbapi.

Yesu pare pi mbap gǝs gip Galili

12Nan Yesu kum'e la Yohana gip bom kǝ moni kawo, arni tǝ ndara kǝti atl kǝ Galili. 13Kan tǝ za bǝn Nazarat, tǝ te Kafarnahum na dǝmi, te bi bar ɓulaka, las tu kan kǝ Zebulun na Naftali gwa#4.13 Zabuluna na Naftaliwo mimir kǝ Yakubu ni . 14Kǝ dǝ laa'i argon tu Ishaya mǝn yari shirǝm kǝ Yam yari gwa'e,

15<<Ki las kǝ Zebulun

na las kǝ Naftali kan ra gip kǝti atl kǝ Galili,

kǝti atl kǝ munju kan mǝn Yahuda ni da gwa

kǝti atl tu kan kop bi bar ɓula gwa

na markǝm bar ɓula'i,

ar ba su jikat ɓula Urdun gwa.

16Munju ba dǝm gip dǝmǝn

shin bar cirtǝn wi.

Mǝn dǝmi bi dǝ mǝshtǝno, cirtǝn cwati wur wi.>>

17Tun wokoci ta ni Yesu pare la'i icin shirǝm kǝ Yam tǝ den wultǝn'e, <<Cini atl gam kǝ pal ni kar Yami, domici mulki kǝ Yam mbira kosak wi.>>

Yesu la bi mǝn nǝmi kos mbarǝm wupse

18Nan tǝ den kopi bi bar ɓula Galiliwo, arni tǝ shin mbarǝm rop, Simon kan ba la ti bi'e Bitǝrus gwa na erǝm gǝs Andǝrawus. Tǝ zam wur den la'i bar kǝ nǝmi kos gǝzǝn gip mal bar ɓula'i domici wi mǝn nǝmi kos ni. 19Tǝ wul wur'e, <<Kopǝn ni, aa pali in mǝn dǝli mbarǝm ɗir karǝmi.>> 20Na zhotǝne, arni wu za bar kǝ mǝmi kos gǝzǝnka, kan wu kop ti.

21Nan te cinawo, arni tǝ pa shin mbarǝm rop, wu ma mǝn gǝpi na mǝn bari ni, Yakubu nya Zabadi na erǝm gǝs Yohana. Tǝ zam wur gip kungǝlǝn jikat mal na bazǝn Zabadi, wu den kǝrkǝm bar kǝ nǝmi kos gǝzǝni. Kan tǝ la wur bi. 22Arni wu za kungǝlǝn jikat mali kup na bazini, wu kop ti.

Yesu ne am mbarǝm ra na womti

23Yesu kop kup gip kǝti atl kǝ Galili, tǝ den kulci gip bom domtǝn kǝ mǝn Yahuda. Tǝ den la'i icin kǝ zo shirǝm dǝmi kǝ Yam gunye, na pǝni kumi dli kǝ ko gonge ciwo kǝ mbarǝme. 24Na untuni shirǝm den ti ri gip atl kǝ Siriya kup. Na untu ni pi ta ɗiri ti mǝn kumi dli kup, mǝn patǝn na gonge ciwo, na mǝn dun itǝri, na mǝn ndetǝn atli, na munju itǝr tle wur dlika gwa. Tǝ warke wur kup. 25Mbarǝm na womti kop ti gip kǝti atl kǝ Galili, na kǝta atl kǝ Dikapolis (mir bǝn kutl ituwi), na bǝn Urshalima, na kǝti las kǝ mǝn Yahuda, na kǝti las kǝ te bi ɓula Urdun ka.

தற்சமயம் தேர்ந்தெடுக்கப்பட்டது:

MAT 4: PLJ

சிறப்புக்கூறு

பகிர்

நகல்

உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்

Zul பற்றி மேலும் அறிக