ꤜꤢꤨꤊꤢ꤬ 16
16
ꤖꤚꤢꤩ꤬ꤗꤢꤧꤡꤢꤧ꤬ ꤒꤢ꤭ꤗ꤫ꤥ꤬ꤒꤢ꤭ꤒꤢꤩ꤬ ꤘꤣ ꤢ꤬ ꤜꤤ꤬ꤗꤢꤧ꤭ ꤒꤣ꤬ꤖꤚꤢꤩ꤬
1ꤛꤢꤩ꤬ꤏꤛꤢꤨ ꤟꤢꤩ ꤢ꤬ ꤋꤥ꤭ꤖꤢꤨꤡ꤫ꤢꤩ꤬ ꤒꤣꤧ꤬ꤟꤢꤩ꤬ ꤔꤢꤧ, “ꤒꤣ꤬ꤖꤥꤢ꤬ꤋꤢꤩ꤭ ꤊꤣꤧ꤬ꤛꤢꤧ꤭ ꤘꤢꤨ꤬ꤛ꤫ꤢꤧ꤬ꤓꤢꤧ꤬ꤞꤢꤩ꤭ ꤥ꤬ ꤒꤣ꤬ꤖꤚꤢꤩ꤬꤯ ꤚꤣꤧ꤬ ꤢ꤬ ꤥ꤬ ꤚꤣꤧꤘꤢꤦ꤬ ꤔꤢꤧ ꤖꤚꤢꤩ꤬ꤗꤢꤧꤡꤢꤧ꤬ꤚꤣꤧ ꤢ꤬ ꤒꤢ꤭ꤗ꤫ꤥ꤬ꤒꤢ꤭ꤒꤢꤩ꤬ ꤒꤣ꤬ꤖꤚꤢꤩ꤬꤯ ꤢꤨ꤭ ꤟꤢꤩꤜꤥ꤭ ꤕ꤫ꤢꤩ꤬ ꤜꤢꤨ꤭ ꤔꤢꤧ ꤢ꤬ ꤗꤢꤩ꤬ꤜꤢꤪ꤭ ꤊꤢꤧ꤭ꤘꤢꤩ꤭ ꤜꤢꤪ꤭ ꤢ꤬ꤙꤢꤧ꤬ꤡꤢꤩ꤬ ꤒꤢ꤭ꤗ꤫ꤥ꤬ꤒꤢ꤭ꤒꤢꤩ꤬ ꤕꤝꤢ꤭꤮ ꤒꤣ꤬ꤡꤣ꤬꤯ 2ꤊꤣꤧ꤬ꤛꤢꤧ꤭ ꤘꤢꤨ꤬ꤛ꤫ꤢꤧ꤬ ꤣꤧ꤭ꤒꤣ꤬ꤖꤚꤢꤩ꤬ ꤢꤩꤟꤢꤧ꤭ ꤢ꤬ꤖꤚꤢꤩ꤬ ꤗꤢꤧꤡꤢꤧ꤬ ꤒꤢ꤭ꤗ꤫ꤥ꤬ꤒꤢ꤭ꤒꤢꤩ꤬ ꤣꤧ꤭ꤒꤣ꤬ꤖꤚꤢꤩ꤬ ꤚꤣꤧ꤬ ꤢ꤬ ꤟꤢꤩ ꤜꤢꤨ꤭ ꤔꤢꤧ, ‘ꤔꤢꤧ꤬ꤚꤤ꤬ꤔꤢꤧ꤬ꤊꤢꤧ꤭ ꤘꤣ ꤠꤢꤧ꤭ ꤔ꤫ꤤ꤬ꤟꤥ꤭ ꤣꤧ꤭ꤔꤣꤧ꤬ꤗꤢ꤬ ꤟꤢꤨꤒꤢꤩ꤭ ꤒꤣ꤬ꤡꤣ꤬ꤒꤢꤩ꤭? ꤔꤢꤧ꤬ ꤙꤢꤩ꤬ ꤘꤢꤧ꤬ꤓꤢꤧ꤬ꤜꤥ꤭ ꤔꤢꤧ꤬ ꤚꤢ꤭ꤗꤢꤚꤢ꤭ꤒꤢꤩ꤭, ꤔꤢꤧ꤬ ꤗꤢꤧꤡꤢꤧ꤬ꤚꤣꤧ ꤠꤢꤧ꤭ ꤒꤢ꤭ꤗ꤫ꤥ꤬ꤒꤢ꤭ꤒꤢꤩ꤬ ꤔꤣꤧ꤬ꤒꤣꤧ꤬ꤟꤢꤩ꤬ ꤢ꤬ꤚꤤ꤬ꤢ꤬ꤊꤢꤧ꤭, ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬ ꤠꤢꤧ꤭ ꤔꤢꤪ꤭ ꤓꤝꤢ꤭ ꤡ꤫ꤢꤧ꤬ ꤕꤢ꤬ ꤔꤢꤧ꤬ ꤔꤢꤧ ꤖꤚꤢꤩ꤬ꤗꤢꤧꤡꤢꤧ꤬ ꤠꤢꤧ꤭ ꤒꤢ꤭ꤗ꤫ꤥ꤬ꤒꤢ꤭ꤒꤢꤩ꤬ ꤒꤣ꤬ꤖꤚꤢꤩ꤬ ꤕꤢ꤬ꤒꤥ꤬ ꤟꤣꤧ꤯’
3“ꤖꤚꤢꤩ꤬ꤗꤢꤧꤡꤢꤧ꤬ ꤒꤢ꤭ꤗ꤫ꤥ꤬ꤒꤢ꤭ꤒꤢꤩ꤬ ꤣꤧ꤭ꤒꤣ꤬ꤖꤚꤢꤩ꤬ ꤟꤢꤩꤜꤢꤧ꤬ ꤚꤣꤧꤘꤢꤦ꤬ ꤢ꤬ꤔ꤫ꤢꤩ꤬ ꤔꤢꤧ, ‘ꤠꤢꤧ꤭ꤙꤢꤧ꤬ꤡꤢꤩ꤬ ꤔꤢꤪ꤭ꤓꤢꤩ꤬ꤊꤢꤧ꤭ꤟꤣꤧ ꤠꤢꤧ꤭ ꤘꤣ ꤢ꤬ ꤒꤢꤩ꤬ꤗꤢꤩ꤬ꤊꤢꤨ꤭ ꤟꤣꤧ ꤚꤣꤧ꤬ ꤠꤢꤧ꤭ ꤙꤢꤩ꤬ꤟꤢꤩ ꤟꤢꤨꤒꤢꤩ꤭? ꤠꤢꤧ꤭ ꤊ꤫ꤢꤦ꤬ ꤤ꤬ꤖꤥ꤭ꤤ꤬ꤠꤢꤩ꤭ ꤢꤩ꤬ ꤟꤢꤩ꤬ꤊꤢꤨ꤭ ꤟꤢꤩꤚꤣꤧ꤬, ꤠꤢꤧ꤭ꤟꤢꤧ꤭ꤠꤢꤧ꤭ꤚꤢꤩ꤬ ꤜꤣꤙꤢ꤭ ꤒꤥ꤬ꤒꤥ꤬, ꤠꤢꤧ꤭ ꤊ꤫ꤢꤦ꤬ ꤊꤝꤤ꤭ꤢꤩ꤬ꤏꤢꤩ꤬ ꤟꤢꤩꤚꤣꤧ꤬, ꤠꤢꤧ꤭ ꤞꤤꤒꤣꤧ꤬ꤚꤢꤩ꤭ ꤜꤢ꤭ꤜꤢ꤭꤯ 4ꤙꤣꤧ ꤠꤢꤧ꤭ ꤒꤢꤩ꤬ꤗꤢꤩ꤬ ꤥ꤬ ꤕꤢ꤬ ꤒꤥ꤬ ꤣꤧ꤭ꤢ꤬ꤋꤢꤩ꤭ꤔꤣꤧ꤬, ꤞꤢꤧꤟꤢꤨ ꤠꤢꤧ꤭ ꤊ꤫ꤢꤦ꤬ ꤥ꤬ ꤊꤣꤧ꤭ꤔꤢꤧ ꤠꤢꤧ꤭ ꤋꤥ꤭ꤙꤢꤧꤞꤝꤢ ꤘꤣ ꤢ꤬ ꤊ꤫ꤢꤦ꤬ ꤢꤩꤗꤥ꤬ꤏꤢꤦ꤬ ꤊꤣꤧ꤭ ꤠꤢꤧ꤭ ꤘꤣ ꤛꤢꤩ꤬ꤞꤤ꤭ ꤟꤤ꤬ꤊꤢꤨ꤭ ꤕꤢ꤭ꤔꤣꤧ꤬ ꤚꤣꤧ꤬, ꤊꤢꤨꤔ꤫ꤢꤧ꤬ꤣꤧ꤭ ꤠꤢꤧ꤭ ꤒꤥ꤭ꤙꤢꤩ꤬ ꤗꤢꤩ꤬ꤟꤢꤨꤒꤢꤩ꤭ ꤔꤣꤧ꤬, ꤠꤢꤧ꤭ ꤞꤤꤑꤢꤩ꤭ ꤟꤣꤧ꤯’
5“ꤟꤢꤨꤔꤣꤧ꤬ ꤢ꤬ꤋꤝꤢ꤬ꤢ꤬ꤋꤛꤢ꤭, ꤢ꤬ ꤢꤩꤟꤢꤧ꤭ ꤜꤢꤪ꤭ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤏꤢꤨ꤬ꤥ꤬ ꤢ꤬ꤙꤢꤧ꤬ꤡꤢꤩ꤬ ꤔꤣꤧ꤬ꤒꤣꤧ꤬ꤟꤢꤩ꤬ ꤒꤣ꤬ꤖꤚꤢꤩ꤬ ꤓꤥ꤭ ꤒꤣ꤬ꤖꤚꤢꤩ꤬꤯ ꤚꤣꤧ꤬ ꤢ꤬ ꤘꤣꤧꤟꤣꤧ꤭ ꤢ꤬ ꤟꤢꤧ꤭ ꤚ꤫ꤣꤧ꤬ꤜꤣ ꤔꤣꤧ꤬ꤒꤣ꤬ꤖꤚꤢꤩ꤬ ꤔꤢꤧ, ‘ꤔꤢꤧ꤬ꤏꤢꤨ꤬ꤥ꤬ ꤠꤢꤧ꤭ꤙꤢꤧ꤬ꤡꤢꤩ꤬ ꤙꤢꤒꤢꤩ꤭?’
6“ꤢ꤬ ꤟꤢꤩꤏꤢꤦ꤬ ꤜꤢꤨ꤭ ꤔꤢꤧ, ‘ꤠꤢꤧ꤭ ꤏꤢꤨ꤬ꤥ꤬ ꤜꤢꤨ꤭ ꤢꤪꤜꤤꤠꤢ꤬ꤓꤣꤧ꤭ ꤢ꤬ꤊꤢꤪ꤭ꤘꤢꤨ꤬ ꤒꤣ꤬ꤛꤢꤩ꤬,’
“ꤚꤣꤧ꤬ ꤖꤚꤢꤩ꤬ꤗꤢꤧꤡꤢꤧ꤬ ꤒꤢ꤭ꤗ꤫ꤥ꤬ꤒꤢ꤭ꤒꤢꤩ꤬ ꤣꤧ꤭ꤒꤣ꤬ꤖꤚꤢꤩ꤬ ꤟꤢꤩ ꤜꤢꤨ꤭ ꤔꤢꤧ, ‘ꤖꤛꤢ ꤔꤢꤧ꤬ ꤜꤤ꤬ꤚꤢ꤭ꤗꤢꤚꤢ꤭ꤒꤢꤩ꤭ ꤔꤣꤧ꤬ꤒꤣ꤬ꤙꤢ꤬ ꤚꤣꤧ꤬ ꤥ꤬ꤔꤢꤧ꤭ ꤚꤢ꤭ꤒꤢ꤭ ꤗꤣꤧ꤭, ꤚꤣꤧ꤬ ꤚꤢ꤭ꤔꤥ꤭ ꤖꤢꤧ ꤍꤢꤧ꤭ꤏꤣꤧ꤭ ꤔꤣꤧ꤬꤯’
7“ꤢ꤬ ꤘꤣꤧꤟꤣꤧ꤭ ꤕ꤫ꤥ꤬ ꤘꤣ ꤢ꤬ꤚꤥ꤬ꤒꤣ꤬ꤖꤚꤢꤩ꤬ ꤔꤢꤧ, ‘ꤔꤢꤧ꤬ꤜꤢꤩ꤭꤮ ꤔꤢꤧ꤬ꤏꤢꤨ꤬ꤥ꤬ ꤜꤢꤨ꤭ ꤙꤢꤒꤢꤩ꤭?’
“ꤚꤣꤧ꤬ ꤢ꤬ ꤟꤢꤩꤏꤢꤦ꤬ ꤜꤢꤨ꤭ ꤔꤢꤧ, ‘ꤠꤢꤧ꤭ꤏꤢꤨ꤬ꤥ꤬ ꤜꤢꤨ꤭ ꤙꤥꤊꤢꤨ꤬ꤜꤢ꤭ ꤢ꤬ꤋꤝꤢꤒꤣ꤬ꤛꤢꤩ꤬꤯’ ꤖꤚꤢꤩ꤬ꤗꤢꤧꤡꤢꤧ꤬ ꤒꤢ꤭ꤗ꤫ꤥ꤬ꤒꤢ꤭ꤒꤢꤩ꤬ ꤣꤧ꤭ꤒꤣ꤬ꤖꤚꤢꤩ꤬ ꤟꤢꤩ ꤜꤢꤨ꤭ ꤔꤢꤧ, ‘ꤖꤛꤢ ꤔꤢꤧ꤬ ꤜꤤ꤬ꤚꤢ꤭ꤗꤢꤚꤢ꤭ꤒꤢꤩ꤭ ꤔꤣꤧ꤬ꤒꤣ꤬ꤙꤢ꤬ ꤚꤣꤧ꤬ ꤚꤢ꤭ꤔꤥ꤭ ꤖꤢꤧ ꤏꤣꤧ꤭ꤜꤝꤤ꤭ꤞꤝꤢ ꤔꤣꤧ꤬꤯’
8“ꤖꤚꤢꤩ꤬ꤗꤢꤧꤡꤢꤧ꤬ ꤒꤢ꤭ꤗ꤫ꤥ꤬ꤒꤢ꤭ꤒꤢꤩ꤬ ꤘꤣ ꤢ꤬ꤡꤢꤪꤢ꤬ꤒꤢꤩ꤬ ꤒꤥ꤬ ꤣꤧ꤭ꤒꤣ꤬ꤖꤚꤢꤩ꤬ꤔꤣꤧ꤬, ꤢ꤬ꤙꤢꤧ꤬ꤡꤢꤩ꤬ ꤓꤢꤨ꤬ꤞꤢꤩ ꤚꤣꤧꤘꤢꤦ꤬ ꤔꤢꤧ꤬ꤡꤣꤧ ꤜꤢꤨ꤭, ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬ ꤢ꤬ ꤗꤢꤩ꤬ꤜꤤ꤬ꤗꤢꤧ꤭ ꤒꤢꤩ꤬꤯ ꤖꤚꤢꤩ꤬ꤜꤢꤨ꤬ꤟꤢꤩ꤬ꤋꤢꤨ꤬ꤖꤢꤨ ꤣꤧ꤭ꤒꤣꤧ꤬ꤟꤢꤩ꤬ꤔꤣꤧ꤬ ꤢ꤬ ꤜꤤ꤬ꤗꤢꤧ꤭ ꤜꤣꤧ꤬ꤟꤥ꤭ꤜꤣꤧ꤬ꤟꤢꤧ꤬ ꤚꤣꤧꤘꤢꤦ꤬ ꤋꤛꤢ꤭ꤜꤢꤨ꤭, ꤚꤣꤧ꤬ ꤢ꤬ ꤡ꤫ꤢꤧ꤬ꤜꤣ ꤕꤢ꤬ ꤡꤣꤧ ꤔꤢꤧ ꤊꤣꤧ꤬ꤛꤢꤧ꤭ ꤥ꤬ ꤘꤣ ꤒꤢꤩ꤬ꤜꤤ꤭ꤊꤢꤨ꤭ ꤔꤣꤧ꤬ꤒꤣꤧ꤬ꤟꤢꤩ꤬ ꤡꤣꤧ꤯” 9ꤓꤥ꤭ꤚꤣꤧ꤬ ꤛꤢꤩ꤬ꤏꤛꤢꤨ ꤟꤢꤩ ꤔꤢꤧ, “ꤟꤢꤨꤔꤣꤧ꤬ ꤢ꤬ꤋꤝꤢ꤬ꤢ꤬ꤋꤛꤢ꤭ ꤠꤢꤧ꤭ ꤟꤢꤩꤏꤥ꤬ ꤞꤤ꤭, ꤞꤢꤧꤟꤢꤨ ꤔꤢꤧ꤬ ꤊ꤫ꤢꤦ꤬ ꤔ꤫ꤤ꤬ꤙꤢꤩ꤬ ꤢꤩ ꤔꤢꤧ꤬ꤋꤥ꤭ꤔꤢꤧ꤬ꤞꤝꤢ ꤒꤣꤧ꤬ꤟꤢꤩ꤬ ꤘꤣ ꤢ꤬ ꤊ꤫ꤢꤦ꤬ ꤓꤝꤢ꤭ ꤔꤢꤧ꤬ꤒꤢꤩ꤬ ꤔꤣꤧ꤬, ꤔꤢꤪ꤭ꤢꤩ꤬ ꤔꤢꤧ꤬ꤟꤢꤩ꤬ꤋꤢꤨ꤬ ꤒꤢꤩ꤬ꤘꤢꤨ꤬ꤛ꤫ꤢꤧ꤬ꤓꤢꤧ꤬ꤞꤢꤩ꤭ ꤣꤧ꤭ꤒꤣꤧ꤬ꤟꤢꤩ꤬ꤔꤣꤧ꤬꤯ ꤟꤢꤨꤔꤣꤧ꤬ꤚꤣꤧ꤬ ꤏꤢ꤮ ꤔꤢꤧ꤬ ꤒꤢꤩ꤬ꤘꤢꤨ꤬ꤛ꤫ꤢꤧ꤬ꤓꤢꤧ꤬ꤞꤢꤩ꤭ ꤜꤢꤪ꤭ꤟꤣꤧ ꤕꤢ꤭ꤔꤣꤧ꤬, ꤢꤨ꤭ ꤊ꤫ꤢꤦ꤬ ꤢꤩꤏꤢꤦ꤬ ꤘꤢꤦ꤬ ꤔꤢꤧ꤬ ꤘꤣ ꤒꤢꤩ꤬ꤞꤣꤧ꤭ꤖꤚꤢꤩ꤬ ꤒꤣꤧ꤬ꤡꤢꤨ꤬ꤖꤚꤢꤩ꤬ ꤘꤣ ꤗꤢꤪꤋꤢꤨ꤬ ꤢ꤬ꤓꤣꤧ꤭ꤢ꤬ꤊ꤫ꤢꤩ꤬ꤊꤢꤨ꤭ ꤔꤣꤧ꤬ ꤕꤢ꤭꤯
10“ꤊꤣꤧ꤬ꤛꤢꤧ꤭ ꤘꤣ ꤢꤨ꤭ ꤛ꤫ꤢꤦ꤬ꤢꤩ꤬ꤚꤣꤧ ꤡ꤫ꤢꤧ꤬ ꤢ꤬ ꤘꤣ ꤒꤢꤩ꤬ꤕꤣꤧ꤬ꤒꤤꤟꤢꤨ ꤖꤢꤧ ꤢ꤬ꤊꤢꤨ꤭ ꤒꤣ꤬ꤖꤚꤢꤩ꤬ꤔꤣꤧ꤬, ꤒꤢꤩ꤬ꤢ꤬ꤘꤢꤨ꤬ꤢ꤬ꤛꤢꤧ꤭ ꤊꤢꤨ꤭ꤔꤣꤧ꤬꤮ ꤗꤢ꤬ ꤢꤨ꤭ ꤊ꤫ꤢꤦ꤬ ꤛ꤫ꤢꤦ꤬ꤢꤩ꤬ꤚꤣꤧ ꤡ꤫ꤢꤧ꤬ ꤢ꤬ ꤕꤢ꤭꤯ ꤗꤢ꤬ꤔꤢꤧꤚꤣꤧ꤬ ꤊꤣꤧ꤬ꤛꤢꤧ꤭ ꤘꤣ ꤢꤨ꤭ ꤛ꤫ꤢꤦ꤬ꤢꤩ꤬ꤚꤣꤧ ꤡ꤫ꤢꤧ꤬ ꤢ꤬ ꤘꤣ ꤒꤢꤩ꤬ꤕꤣꤧ꤬ꤒꤤꤟꤢꤨ ꤢ꤬ꤊꤢꤨ꤭ ꤒꤥ꤬ ꤒꤣ꤬ꤖꤚꤢꤩ꤬ꤔꤣꤧ꤬, ꤒꤢꤩ꤬ꤢ꤬ꤘꤢꤨ꤬ꤢ꤬ꤛꤢꤧ꤭ ꤊꤢꤨ꤭ꤔꤣꤧ꤬꤮ ꤗꤢ꤬ ꤢꤨ꤭ ꤛ꤫ꤢꤦ꤬ꤢꤩ꤬ꤚꤣꤧ ꤡ꤫ꤢꤧ꤬ ꤜꤢꤨ꤭ ꤒꤥ꤬ꤒꤥ꤬꤯ 11ꤊꤢꤩ꤬ ꤗꤢꤩ꤬ꤟꤢꤨꤔꤣꤧ꤬ ꤟꤢꤩꤚꤣꤧ꤬, ꤞꤤ꤭ ꤊꤢꤩ꤬ ꤡꤢꤪꤒꤢꤩ꤬ ꤔꤢꤧ ꤒꤢꤩ꤬ꤗꤢꤧꤡꤢꤧ꤬ ꤟꤢꤩ꤬ꤋꤢꤨ꤬ ꤢ꤬ ꤒꤢꤩ꤬ꤘꤢꤨ꤬ꤛ꤫ꤢꤧ꤬ꤓꤢꤧ꤬ꤞꤢꤩ꤭ ꤒꤥ꤬ ꤟꤢꤩꤚꤣꤧ꤬, ꤗꤢꤪꤋꤢꤨ꤬ ꤒꤢꤩ꤬ꤘꤢꤨ꤬ꤛ꤫ꤢꤧ꤬ꤓꤢꤧ꤬ꤞꤢꤩ꤭ ꤗ꤫ꤢ꤬ꤔꤤꤔꤢꤧ꤬ ꤣꤧ꤭ꤔꤣꤧ꤬, ꤢꤨ꤭ ꤛ꤫ꤢꤦ꤬ꤢꤩ꤬ ꤡ꤫ꤢꤧ꤬ ꤞꤤ꤭ ꤒꤥ꤬꤯ 12ꤚꤣꤧ꤬ ꤞꤤ꤭ ꤊꤢꤩ꤬ ꤡꤢꤪꤒꤢꤩ꤬ ꤔꤢꤧ ꤢꤨ꤭ꤚꤥ꤬ ꤒꤢ꤭ꤗ꤫ꤥ꤬ꤒꤢ꤭ꤒꤢꤩ꤬ ꤒꤥ꤬ ꤊꤢꤩ꤬ꤟꤢꤩꤚꤣꤧ꤬ ꤢꤨ꤭ ꤊ꤫ꤢꤦ꤬ ꤘꤣꤧ ꤞꤤ꤭ ꤒꤢ꤭ꤒꤢꤩ꤬ ꤘꤣ ꤢ꤬ ꤊ꤫ꤢꤦ꤬ ꤓꤝꤢ꤭ ꤔꤢꤧ꤬ ꤒꤢꤩ꤬ꤔꤣꤧ꤬ ꤢ꤬ ꤥ꤬ ꤒꤣ꤬ꤖꤚꤢꤩ꤬꤮ ꤒꤥ꤬꤯
13“ꤜꤢꤨ꤬ꤜꤢꤩ ꤒꤣ꤬ꤖꤚꤢꤩ꤬ ꤗꤢꤩ꤬ꤡ꤫ꤢꤧ꤬ ꤒꤢꤩ꤬ꤗꤢꤩ꤬ ꤘꤣ ꤙꤢꤧ꤬ꤡꤢꤩ꤬ ꤞꤤꤔꤣꤧ꤭ ꤢ꤬ꤒꤢꤩ꤬ꤔꤢꤪ꤭ ꤢ꤬ꤜꤢꤩ꤭ꤔꤣꤧ꤬ ꤢ꤬ ꤥ꤬ ꤒꤣ꤬ꤖꤚꤢꤩ꤬꤮ ꤒꤥ꤬꤯ ꤢ꤬ ꤊ꤫ꤢꤦ꤬ ꤞꤤꤒꤣꤧ꤬ꤋꤥ꤭ꤊꤢꤧ꤭ ꤚꤣꤧꤘꤢꤦ꤬ ꤒꤣ꤬ꤖꤚꤢꤩ꤬ ꤕꤢ꤭, ꤚꤣꤧ꤬ ꤢ꤬ ꤊ꤫ꤢꤦ꤬ ꤗꤥ꤬ ꤚꤣꤧꤘꤢꤦ꤬ ꤒꤣ꤬ꤖꤚꤢꤩ꤬ ꤕꤢ꤭꤯ ꤗ꤫ꤢ꤬ꤒꤥ꤬ꤚꤣꤧ꤬ ꤢ꤬ ꤊ꤫ꤢꤦ꤬ ꤞꤤꤕꤜꤢꤪ꤬ꤡ꤫ꤢꤩ꤬ꤡꤢꤦ꤭ ꤚꤣꤧꤘꤢꤦ꤬ ꤒꤣ꤬ꤖꤚꤢꤩ꤬ ꤕꤢ꤭, ꤚꤣꤧ꤬ ꤢ꤬ ꤊ꤫ꤢꤦ꤬ ꤗꤢꤩ꤬ꤒꤣꤧ꤬ꤗꤥ꤭ꤒꤣꤧ꤬ꤊꤢꤩ꤬ ꤏꤢꤦ꤬ꤊꤢꤧ꤭ ꤚꤣꤧꤘꤢꤦ꤬ ꤒꤣ꤬ꤖꤚꤢꤩ꤬ ꤕꤢ꤭꤯ ꤞꤤ꤭ ꤗꤢꤩ꤬ ꤕ꤫ꤢꤩ꤬ ꤜꤢꤪ꤭ ꤡꤢꤪꤗꤣꤧ꤬ꤚꤢꤧ꤬ ꤢ꤬ꤑꤢꤩ꤭ꤑꤢꤩ꤭, ꤚꤢꤦ꤭ ꤢ꤬ꤑꤢꤩ꤭ꤑꤢꤩ꤭ ꤔꤣꤧ꤭ꤡꤣ꤬ꤜꤢꤪ꤭ ꤔꤣꤧ꤬, ꤢ꤬ꤔ꤫ꤤ꤬ ꤒꤥ꤬꤯”#ꤗꤢꤞꤢꤧ ꤆:꤂꤄
ꤛꤢꤩ꤬ꤏꤛꤢꤨ ꤟꤢꤩꤙꤢꤩ꤬ ꤍ꤫ꤥ꤬ꤋꤢꤋꤥ꤬ ꤒꤣꤧ꤬ꤟꤢꤩ꤬
(ꤗꤢꤞꤢꤧ ꤁꤁:꤁꤂-꤁꤃, ꤅:꤃꤁-꤃꤂, ꤗꤢ꤬ꤊꤢꤨ ꤁꤀:꤁꤁-꤁꤂)
14ꤖꤢ꤬ꤚꤤ꤬ꤏꤛꤢꤧꤖꤢꤨ ꤘꤣ ꤢ꤬ ꤗꤥ꤬ꤚꤣꤧ ꤚꤢꤦ꤭ꤓꤢꤩ꤭ ꤔꤣꤧ꤬ꤒꤣꤧ꤬ꤟꤢꤩ꤬ ꤔ꤫ꤤ꤬ꤟꤥ꤭ ꤍ꤫ꤥ꤬ꤣꤧ꤭ ꤢ꤬ꤋꤢꤩ꤭ꤔꤣꤧ꤬, ꤢ꤬ ꤑꤢ꤭ꤋꤚꤥ꤭ ꤜꤢ꤭ꤋꤢꤧ꤭ ꤛꤢꤩ꤬ꤏꤛꤢꤨ꤯ 15ꤛꤢꤩ꤬ꤏꤛꤢꤨ ꤟꤢꤩ ꤛꤢꤩ꤬ꤞꤤ꤭ ꤔꤢꤧ, “ꤞꤤ꤭ ꤗꤢ꤬ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤢꤧꤡꤢꤪꤢꤧꤒꤢꤩ꤬ ꤖꤢꤧ ꤢ꤬ꤔ꤫ꤢꤩ꤬ ꤘꤣ ꤊꤣꤧ꤬ꤛꤢꤧ꤭ ꤢ꤬ ꤕꤣꤧꤞꤢꤩ꤬ꤑꤢꤩ꤭ ꤔꤣꤧ꤬ꤒꤣꤧ꤬ꤟꤢꤩ꤬ ꤖꤢꤧ, ꤗꤢ꤬ꤔꤢꤧꤚꤣꤧ꤬ ꤡꤢꤪꤗꤣꤧ꤬ꤚꤢꤧ꤬ ꤞꤤꤑꤢꤩ꤭ ꤜꤢꤪ꤭ꤕꤜꤤ꤭ ꤟꤣꤧ ꤞꤤ꤭ ꤞꤤꤕꤜꤢꤪ꤬ꤊꤢꤨ꤭꤯ ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬, ꤒꤢꤩ꤬ ꤘꤣ ꤊꤣꤧ꤬ꤛꤢꤧ꤭ ꤒꤣꤧ꤬ꤔꤢꤩ꤬ ꤔꤢꤧ ꤢ꤬ꤍꤢꤨ꤬ꤘꤢꤨ꤬ꤖꤚꤤ꤬ꤘꤢꤨ꤬ꤜꤣ ꤢꤨ꤭ ꤒꤣꤧ꤬ꤟꤢꤩ꤬ꤔꤣꤧ꤬, ꤘꤣ ꤡꤢꤪꤗꤣꤧ꤬ꤚꤢꤧ꤬ ꤕꤣꤧꤞꤢꤩ꤬ꤑꤢꤩ꤭ ꤔꤣꤧ꤬ꤗꤢ꤬ ꤗ꤫ꤢ꤬ ꤖꤢꤧ ꤒꤢꤩ꤬ꤗꤢꤨꤗ꤫ꤢꤧ꤬ꤚꤤ꤬ꤡ꤫ꤢꤧ꤬ ꤘꤣ ꤢꤨ꤭ ꤜ꤫ꤢꤩ꤬ꤞꤤꤛ꤫ꤢꤪ꤬ꤞꤤꤙꤤ꤭ ꤢ꤬ ꤔꤣꤧ꤬ꤒꤣꤧ꤬ꤟꤢꤩ꤬ ꤖꤢꤧ꤯
16“ꤋꤢꤨ꤭ꤗꤢꤪꤎꤢꤧ ꤒꤢꤩ꤬ꤞꤝꤢꤒꤢꤩ꤬ꤞꤢꤧ꤬ ꤔꤢꤧ ꤖꤚꤢꤩ꤬ꤖꤚꤥ꤬ ꤢ꤬ ꤒꤢꤩ꤬ꤚꤢ꤭ꤊꤢꤧ꤭ ꤒꤣꤧ꤬ꤟꤢꤩ꤬ꤔꤣꤧ꤬, ꤢꤨ꤭ ꤟꤢꤩꤏꤥ꤬ꤘꤥ꤬ꤔꤢꤧ꤭ ꤒ꤫ꤥ꤬ ꤒꤣꤧ꤬ꤘꤢꤦ꤬ ꤢ꤬ ꤙꤣꤧ ꤖꤚꤢꤩ꤬ꤡꤢꤩ꤬ ꤢꤨ꤭ ꤋꤢꤨ꤭ꤛꤥ꤭ꤟꤢ꤬ ꤢ꤬ ꤓꤢꤦ꤭ꤋꤢꤩ꤭ ꤔꤣꤧ꤬ꤖꤢꤧ꤯ ꤘꤣꤋꤛꤢ꤭ꤣꤧ꤭ ꤠꤢꤧ꤭ ꤟꤢꤩꤏꤥ꤬ꤘꤥ꤬ꤔꤢꤧ꤭ ꤕ꤫ꤢꤩ꤬ ꤢꤨ꤭ ꤔꤢꤧ ꤡꤢꤪꤗꤣꤧ꤬ꤚꤢꤧ꤬ ꤓꤣꤧ꤭ꤜ꤫ꤢꤩ꤬ꤊ꤫ꤢꤩ꤬ꤊꤢꤨ꤭ ꤒꤢꤩ꤬ꤞꤤꤋꤚꤢꤦ꤭ꤗꤝꤤ꤭ꤜꤢ꤬ ꤢ꤬ꤚꤤ꤬ꤢ꤬ꤊꤢꤧ꤭ ꤚꤣꤧ꤬ ꤢꤨ꤭ ꤢꤧꤡꤢꤦ ꤔꤥ꤭ꤖꤢꤩ꤬ ꤜꤢꤪ꤭ ꤡꤣꤧ ꤜꤢꤨ꤭ ꤕꤝꤢ꤭꤮ ꤒꤣ꤬ꤖꤚꤢꤩ꤬ ꤡꤣꤧ꤯#ꤗꤢꤞꤢꤧ ꤁꤁:꤁꤂-꤁꤃ 17ꤗꤢ꤬ꤔꤢꤧꤚꤣꤧ꤬ ꤗꤢꤪꤋꤢꤨ꤬ ꤔꤢꤧ ꤟꤢꤩ꤬ꤋꤢꤨ꤬ ꤕꤛꤢꤊꤢꤧ꤭ ꤛꤢꤨ꤭ꤜꤣ ꤒꤣꤧ꤬ꤕꤜꤢꤩ꤬꤮ ꤕꤢ꤬ ꤡꤣꤧ ꤔꤢꤧ ꤡꤢꤪꤗꤣꤧ꤬ꤚꤢꤧ꤬ ꤢ꤬ ꤒꤢꤩ꤬ꤞꤝꤢꤒꤢꤩ꤬ꤞꤢꤧ꤬ ꤘꤣ ꤢ꤬ ꤕꤣꤧ꤬ꤒꤤꤜꤣ ꤒꤣ꤬ꤕꤜꤢꤪ꤬ ꤊ꤫ꤢꤦ꤬ꤚꤢꤩ꤭ ꤕꤛꤢꤊꤢꤧ꤭ ꤢ꤬ꤑꤢꤩ꤭ ꤔꤣꤧ꤬ ꤡꤣꤧ꤯#ꤗꤢꤞꤢꤧ ꤅:꤁꤈
18“ꤖꤚꤢꤩ꤬ꤋꤢꤨ꤭ ꤒꤣ꤬ꤖꤚꤢꤩ꤬ꤖꤚꤢꤩ꤬ ꤘꤣ ꤢ꤬ ꤥ꤬ꤊꤢꤧ꤭ ꤢ꤬ꤗꤢꤩ꤭ ꤚꤣꤧ꤬ ꤢ꤬ ꤊꤢꤩ꤬ ꤡꤝꤢꤖꤛꤢ ꤒꤣꤧ꤬ꤕꤜꤢꤩ꤬ ꤔꤢꤧ ꤖꤚꤢꤩ꤬ꤗꤢꤪ꤬ ꤘꤣ ꤢ꤬ꤚꤥ꤬ ꤒꤣ꤬ꤖꤚꤢꤩ꤬ꤖꤚꤢꤩ꤬ ꤟꤢꤩꤔꤣꤧ꤬ꤗꤢ꤬ ꤢ꤬ ꤡꤝꤢꤞꤢꤦꤟꤣꤧ ꤔꤢꤧ ꤖꤚꤢꤩ꤬ꤗꤢꤪ꤬ ꤔꤣꤧ꤬ꤒꤣ꤬ꤖꤚꤢꤩ꤬ ꤟꤣꤧ꤯ ꤚꤣꤧ꤬ ꤖꤚꤢꤩ꤬ꤋꤢꤨ꤭ ꤒꤣ꤬ꤖꤚꤢꤩ꤬ꤖꤚꤢꤩ꤬ ꤘꤣ ꤢ꤬ ꤖꤛꤢ ꤖꤚꤢꤩ꤬ꤗꤢꤪ꤬ ꤘꤣ ꤢ꤬ ꤠꤢꤩ꤬ ꤥ꤬ꤊꤢꤧ꤭ ꤜꤢꤨ꤭ ꤣꤧ꤭ꤒꤣ꤬ꤖꤚꤢꤩ꤬ ꤔꤣꤧ꤬ꤗꤢ꤬ ꤢ꤬ ꤡꤝꤢꤞꤢꤦꤟꤣꤧ ꤔꤢꤧ ꤖꤚꤢꤩ꤬ꤗꤢꤪ꤬ ꤔꤣꤧ꤬ꤒꤣ꤬ꤖꤚꤢꤩ꤬ ꤟꤣꤧ꤯#ꤗꤢꤞꤢꤧ ꤅:꤂꤃, ꤊꤢ꤬ꤚꤤ꤬ꤞꤢꤨ꤬ ꤢ꤬ꤚ꤫ꤣꤧ꤬ꤜꤣ ꤒꤣ꤬ꤙꤢ꤬ ꤇:꤁꤀-꤁꤁
ꤊꤣꤧ꤬ꤛꤢꤧ꤭ ꤘꤢꤨ꤬ꤛ꤫ꤢꤧ꤬ꤓꤢꤧ꤬ꤞꤢꤩ꤭ ꤒꤣ꤬ꤖꤚꤢꤩ꤬ ꤔꤢꤧ ꤋꤢꤨ꤭ꤜꤢ꤬ꤎꤢ꤬ꤚꤢꤨ
19“ꤒꤣ꤬ꤖꤥꤢ꤬ꤋꤢꤩ꤭ꤔꤣꤧ꤬, ꤊꤣꤧ꤬ꤛꤢꤧ꤭ ꤘꤢꤨ꤬ꤛ꤫ꤢꤧ꤬ꤓꤢꤧ꤬ꤞꤢꤩ꤭ ꤥ꤬ꤒꤣ꤬ꤖꤚꤢꤩ꤬꤯ ꤢ꤬ꤊꤢꤦ꤭ꤢ꤬ꤞꤢꤧ ꤏꤥ꤭ꤏꤢꤦ ꤡꤣꤧ ꤟꤣꤧ꤬ꤡꤢ꤬ ꤘꤣ ꤢ꤬ꤍꤢꤨ꤬ꤘꤢꤨ꤬ꤜꤣ ꤒꤣꤧ꤬ꤟꤢꤩ꤬, ꤚꤣꤧ꤬ ꤢ꤬ ꤢꤩ꤬ꤠꤤ꤬ꤥ꤭ꤏꤢꤦ꤭, ꤗꤢꤩ꤬ꤗꤥ꤬ ꤚꤣꤧꤘꤢꤦ꤬ ꤢ꤬ꤔ꤫ꤢꤩ꤬ ꤕꤝꤢ꤭꤮ ꤒꤣ꤬ꤔꤣꤧ꤭ ꤡꤣꤧ꤯ 20ꤊꤣꤧ꤬ꤛꤢꤧ꤭ ꤏꤥ꤭ꤖꤢꤏꤥ꤭ꤚꤢꤧ꤬ꤖꤢꤨ ꤥ꤬ꤒꤣ꤬ꤖꤚꤢꤩ꤬꤯ ꤚꤣꤧ꤬ ꤢ꤬ꤗꤝꤤ꤭ ꤔꤢꤧ ꤋꤢꤨ꤭ꤜꤢ꤬ꤎꤢ꤬ꤚꤢꤨ꤯ ꤢ꤬ꤠꤢ꤭ ꤓꤢꤩ꤬ꤜꤢꤪ꤭ ꤔ꤫ꤢꤩ꤬ꤒꤣ꤬ꤖꤚꤢꤩ꤬ ꤡꤣꤧ, ꤚꤣꤧ꤬ ꤢꤨ꤭ ꤡꤢꤪ꤭ꤟꤢꤧ꤭ ꤘꤢꤧ꤬ ꤥ꤬ꤗꤣꤧ꤭ꤢꤩ꤭ ꤜꤢꤨ꤭ ꤙꤣꤧ ꤊꤣꤧ꤬ꤛꤢꤧ꤭ ꤘꤢꤨ꤬ꤛ꤫ꤢꤧ꤬ꤓꤢꤧ꤬ꤞꤢꤩ꤭ ꤣꤧ꤭ꤒꤣ꤬ꤖꤚꤢꤩ꤬ ꤢ꤬ ꤜꤥ꤬ꤊꤣꤧ꤬ꤘꤢ꤭ꤘꤢꤨ꤬ ꤏꤢ ꤔꤣꤧ꤬꤯ 21ꤢ꤬ ꤥ꤬ꤕ꤫ꤢꤪ꤬ ꤗꤢꤧꤏꤢꤦ꤭ꤗꤢꤧꤒ꤫ꤢꤨ꤬ ꤢꤩ꤬ ꤊꤣꤧ꤭ ꤖꤢꤧ ꤊꤣꤧ꤬ꤛꤢꤧ꤭ꤘꤢꤨ꤬ꤛ꤫ꤢꤧ꤬ ꤣꤧ꤭ꤒꤣ꤬ꤖꤚꤢꤩ꤬ ꤢ꤬ꤏꤢꤩ꤬ꤢꤩ꤬ ꤒꤢ꤭ꤊ꤫ꤥ꤬ꤒꤢ꤭ꤠꤢꤩ꤭ ꤘꤣ ꤢ꤬ ꤘꤤ꤭ꤚ꤫ꤢꤩ꤬ꤜꤢꤩ꤭ ꤔꤣꤧ꤬ꤒꤣꤧ꤬ꤟꤢꤩ꤬ ꤖꤢꤧ꤯ ꤓꤥ꤭ꤒꤥ꤬ ꤓꤝꤤ꤬ꤒꤣꤧ꤬ꤟꤢꤩ꤬ ꤟꤢꤧ꤭ꤛ꤫ꤢ꤬ ꤜꤢꤪ꤭ꤕꤜꤤ꤭ ꤜꤢꤨ꤭ꤠꤢ꤭ ꤔꤣꤧ꤬ꤒꤣꤧ꤬ꤟꤢꤩ꤬꤯
22“ꤙꤣꤧ ꤊꤣꤧ꤬ꤛꤢꤧ꤭ ꤏꤥ꤭ꤖꤢꤏꤥ꤭ꤚꤢꤧ꤬ꤖꤢꤨ ꤣꤧ꤭ꤒꤣ꤬ꤖꤚꤢꤩ꤬ ꤞꤣꤧ꤭ ꤢ꤬ꤋꤢꤩ꤭ꤔꤣꤧ꤬, ꤗꤢꤪꤋꤢꤨ꤬ꤒꤣꤧ꤬ꤔꤢꤩꤖꤢꤨ ꤒꤣꤧ꤬ꤟꤢꤩ꤬ ꤡꤢꤪ꤭ꤓꤢꤧ꤬ ꤢ꤬ ꤘꤣ ꤖꤢꤩ꤭ꤢ꤬ꤙꤚꤢ꤬ꤟꤢ꤬ ꤢ꤬ꤊꤢꤧ꤭ꤏꤢ꤯ ꤊꤣꤧ꤬ꤛꤢꤧ꤭ ꤘꤢꤨ꤬ꤛ꤫ꤢꤧ꤬ꤓꤢꤧ꤬ꤞꤢꤩ꤭ ꤣꤧ꤭ꤒꤣ꤬ꤖꤚꤢꤩ꤬ꤔꤣꤧ꤬, ꤢ꤬ ꤞꤣꤧ꤭ꤊꤣꤧ꤭ꤜꤢ꤭ꤒꤢꤩ꤬ ꤚꤣꤧ꤬ ꤢꤨ꤭ ꤡꤝꤢ ꤜꤥꤊꤢꤧ꤭ ꤜꤢꤨ꤭꤯ 23ꤙꤣꤧ ꤢ꤬ ꤋꤢꤧꤙꤢꤩ꤬ ꤔꤢꤧ꤬ꤡꤣꤧ ꤒꤢꤩ꤬ꤡꤢ꤭ ꤘꤣ ꤍꤢ꤬ꤚꤢ꤬ꤊꤢꤨ꤭ ꤢ꤬ꤋꤢꤩ꤭ꤔꤣꤧ꤬, ꤢ꤬ ꤗꤢꤧꤓꤢꤧ꤬ ꤘꤣ ꤗꤢꤪꤋꤢꤨ꤬ ꤚꤣꤧ꤬ ꤢ꤬ ꤗꤢꤧꤓ꤫ꤣꤧ꤬ ꤓꤢꤧ꤬ꤡꤝꤢꤏꤢꤔꤢꤩꤜꤥ꤭ ꤖꤢꤩ꤭ꤢ꤬ꤙꤚꤢ꤬ꤟꤢ꤬, ꤚꤣꤧ꤬ ꤋꤢꤨ꤭ꤜꤢ꤬ꤎꤢ꤬ꤚꤢꤨ ꤥ꤬ꤊꤣꤧ꤭ ꤘꤣ ꤜꤢꤨ꤭ ꤊꤢꤧ꤭ꤏꤢ꤯ 24ꤚꤣꤧ꤬ ꤢ꤬ ꤢꤩꤓꤥ꤭ꤓꤢꤧ꤬ ꤔꤢꤧ, ‘ꤊꤣ꤮ ꤖꤢꤩ꤭ꤢ꤬ꤙꤚꤢ꤬ꤟꤢ꤬꤮! ꤞꤤꤛꤢꤪ꤬ꤚꤣꤧ ꤠꤢꤧ꤭ ꤔꤤ꤮, ꤔꤢꤪ꤭ꤡꤢꤩ꤬ꤔꤥ꤭ꤊꤣꤧ꤭ ꤋꤢꤨ꤭ꤜꤢ꤬ꤎꤢ꤬ꤚꤢꤨ ꤢ꤬ ꤊꤢꤨꤔꤢꤪ꤭ꤋꤣꤧ꤭ ꤘꤣ ꤓꤣꤧ꤭ꤊꤢꤨ꤭ ꤚꤣꤧ꤬ ꤔꤢꤪ꤭ꤕꤜꤝꤢ꤭ꤒꤢ꤭ꤗꤢꤩ ꤒꤣꤧ꤬ꤡꤣꤧ ꤕ꤫ꤢꤩ꤬ꤚꤣꤧ ꤠꤢꤧ꤭ ꤕꤜꤤ꤬ꤣꤧ꤭ ꤔꤤ꤮, ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬ ꤠꤢꤧ꤭ ꤋꤢꤧꤙꤢꤩ꤬ ꤒꤢꤩ꤬ ꤘꤣ ꤗꤤ꤬ꤊꤢꤨ꤭ ꤣꤧ꤭ꤔꤣꤧ꤬ ꤢ꤬ꤡꤢ꤭ꤢ꤬ꤡꤢꤦ꤬ ꤔꤢꤧ꤬ꤡꤣꤧ ꤠꤢꤧ꤭ ꤟꤣꤧ꤯’
25“ꤗꤢ꤬ꤔꤢꤧꤚꤣꤧ꤬ ꤖꤢꤩ꤭ꤢ꤬ꤙꤚꤢ꤬ꤟꤢ꤬ ꤟꤢꤩꤏꤢꤦ꤬ ꤜꤢꤨ꤭ ꤔꤢꤧ, ‘ꤠꤢꤧ꤭ꤖꤢꤨꤋꤢꤨ꤭꤮ ꤒꤣꤧ꤬ꤔꤢꤩ꤬ꤓꤢꤧ꤬ꤙꤢꤩ꤬ ꤒ꤫ꤥ꤬ꤋꤛꤢ꤭ ꤙꤣꤧ ꤔꤢꤧ꤬ ꤥ꤬ꤞꤣꤧ꤭ꤖꤚꤢꤩ꤬ ꤕꤢ꤬ ꤢ꤬ꤏꤣꤧꤋꤢꤩ꤭ꤔꤣꤧ꤬, ꤔꤢꤧ꤬ ꤥ꤬ ꤔꤢꤧ ꤒꤢꤩ꤬ ꤘꤣ ꤢ꤬ ꤗꤢꤩ꤬ꤗꤥ꤬ꤗꤢꤩ꤬ꤖꤝꤤ꤭ ꤔꤢꤧ꤬ ꤔꤣꤧ꤬ꤒꤣꤧ꤬ꤟꤢꤩ꤬, ꤗꤢ꤬ꤔꤢꤧꤚꤣꤧ꤬ ꤋꤢꤨ꤭ꤜꤢ꤬ꤎꤢ꤬ꤚꤢꤨ ꤣꤧ꤭ꤔꤣꤧ꤬, ꤢ꤬ ꤔ꤫ꤤ꤬ꤙꤢꤩ꤬ ꤜꤢꤪ꤭ꤕꤜꤤ꤭ ꤒꤢꤩ꤬ꤡꤢ꤭ꤒꤢꤩ꤬ꤡꤢꤦ꤬ ꤒꤣꤧ꤬ꤟꤢꤩ꤬, ꤒꤣꤧ꤬ꤘꤢꤦꤚꤣꤧ꤬ ꤊꤢꤨꤔ꤫ꤢꤧ꤬ꤣꤧ꤭, ꤢ꤬ ꤔ꤫ꤤ꤬ꤙꤢꤩ꤬ ꤊꤣꤧ꤭ꤜꤢ꤭ꤒꤢꤩ꤬ ꤟꤣꤧ ꤒꤢꤩ꤬ꤥ꤬ꤗꤥ꤬ꤥ꤬ꤖꤝꤤ꤭ ꤜ꤫ꤢꤩ꤬ꤥ꤬ ꤙꤣꤧꤣꤧ꤭ ꤟꤣꤧ, ꤚꤣꤧ꤬ ꤔꤢꤧ꤬ ꤚꤣꤧ꤬ ꤔꤢꤧ꤬ ꤋꤢꤧꤙꤢꤩ꤬ ꤊꤣꤧ꤭ꤜꤢ꤭ꤒꤢꤩ꤬ ꤒꤢꤩ꤬ꤡꤢ꤭ꤒꤢꤩ꤬ꤡꤢꤦ꤬ ꤟꤣꤧ꤯ 26ꤒꤢꤦꤔꤣꤧ꤬ꤓꤥ꤭ꤒꤥ꤬, ꤕ꤫ꤢꤩ꤬ ꤔꤢꤧ ꤞꤤ꤭ ꤢ꤬ꤡꤢꤪ꤬ꤊꤢꤨ꤭ ꤣꤧ꤭ꤔꤣꤧ꤬, ꤜꤢꤧ꤭ꤛꤢꤧ꤭ꤘꤢꤨ꤬ ꤔꤢꤧ꤬ꤡꤣꤧ ꤥ꤬ ꤒꤣ꤬ꤙꤥ꤭ ꤚꤣꤧ꤬ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤥ꤬ ꤙꤣꤧꤣꤧ꤭ ꤒꤣꤧ꤬ꤟꤢꤩ꤬ꤔꤣꤧ꤬, ꤢ꤬ ꤞꤤꤛ꤫ꤢꤦ꤬ ꤡꤝꤢ ꤘꤣ ꤞꤤ꤭ ꤥ꤬ ꤒꤣꤧ꤬ꤘꤢꤦꤚꤣꤧ꤬ ꤢ꤬ ꤡꤝꤢ ꤡ꤫ꤢꤧ꤬ ꤒꤥ꤬, ꤓꤥ꤭ꤒꤥ꤬ ꤊꤣꤧ꤬ꤛꤢꤧ꤭ ꤘꤣ ꤞꤤ꤭ ꤥ꤬ ꤒꤣꤧ꤬ꤟꤢꤩ꤬ꤔꤣꤧ꤬, ꤢ꤬ ꤞꤤꤛ꤫ꤢꤦ꤬ ꤟꤢꤧ꤭ ꤙꤣꤧ ꤕꤢꤩ꤬ ꤥ꤬ ꤣꤧ꤭ ꤒꤣꤧ꤬ꤘꤢꤦꤚꤣꤧ꤬ ꤢ꤬ ꤟꤢꤧ꤭ ꤡ꤫ꤢꤧ꤬ ꤒꤥ꤬꤯’
27“ꤚꤣꤧ꤬ ꤊꤣꤧ꤬ꤛꤢꤧ꤭ ꤘꤢꤨ꤬ꤛ꤫ꤢꤧ꤬ꤓꤢꤧ꤬ꤞꤢꤩ꤭ ꤣꤧ꤭ꤒꤣ꤬ꤖꤚꤢꤩ꤬ ꤟꤢꤩꤏꤢꤦ꤬ ꤔꤢꤧ, ‘ꤊꤢꤩ꤬ ꤗꤢꤩ꤬ꤟꤢꤨꤔꤣꤧ꤬ ꤟꤢꤩꤚꤣꤧ꤬, ꤖꤢꤩ꤭ꤢ꤬ꤙꤚꤢ꤬ꤟꤢ꤬꤮, ꤠꤢꤧ꤭ ꤊꤝꤤ꤭ꤞꤤꤛꤢꤪ꤬ ꤔꤢꤧ꤬, ꤔꤢꤪ꤭ꤊꤢ꤬ꤚꤣꤧ ꤋꤢꤨ꤭ꤜꤢ꤬ꤎꤢ꤬ꤚꤢꤨ ꤘꤣ ꤠꤢꤧ꤭ꤖꤢꤩ꤭ ꤢ꤬ꤟꤤ꤬ ꤔꤣꤧ꤬꤯ 28ꤠꤢꤧ꤭ ꤕ꤫ꤥ꤬ꤗ꤫ꤢꤧ꤬ ꤖꤚꤢꤩ꤬ꤋꤢꤨ꤭ ꤥ꤬ꤊꤢꤧ꤭ ꤕꤢ꤬ ꤡꤣꤧ ꤞꤤꤍꤢꤧ꤭ ꤡꤣꤧ꤯ ꤞꤢꤧꤟꤢꤨ ꤢ꤬ ꤊ꤫ꤢꤦ꤬ ꤟꤢꤧ꤭ꤒ꤫ꤥ꤬ꤊꤣꤧ꤭ ꤒ꤫ꤢꤧ꤬ ꤙꤣꤧ ꤒꤢꤩ꤬ꤡꤢ꤭ꤒꤢꤩ꤬ꤡꤢꤦ꤬ ꤢ꤬ꤜ꤫ꤢꤩ꤬ꤥ꤬ ꤣꤧ꤭ꤒꤣ꤬ꤖꤥ꤬ ꤒ꤫ꤢꤧ꤬ꤗꤢꤩ꤬ ꤔꤣꤧ꤬, ꤕꤜꤝꤢ꤭ꤊꤢ꤬ ꤕ꤫ꤢꤩ꤬ꤚꤣꤧ ꤠꤢꤧ꤭ ꤋꤢꤨ꤭ꤜꤢ꤬ꤎꤢ꤬ꤚꤢꤨ ꤔꤣꤧ꤬, ꤚꤣꤧ꤬ ꤔꤢꤪ꤭ꤊꤢ꤬ ꤘꤣꤧꤚꤢꤪ꤬ꤘꤣꤧꤚꤢꤩ꤭ ꤕ꤫ꤢꤩ꤬ꤚꤣꤧ ꤔꤢꤧ ꤛꤢꤩ꤬ꤞꤤ꤭ ꤔꤣꤧ꤬ꤒꤣꤧ꤬ꤟꤢꤩ꤬꤯’
29“ꤖꤢꤩ꤭ꤢ꤬ꤙꤚꤢ꤬ꤟꤢ꤬ ꤟꤢꤩꤏꤢꤦ꤬ ꤜꤢꤨ꤭ ꤔꤢꤧ, ‘ꤋꤢꤨ꤭ꤗꤢꤪꤎꤢꤧ ꤔꤢꤧ ꤖꤚꤢꤩ꤬ꤖꤚꤥ꤬ ꤒꤣꤧ꤬ꤟꤢꤩ꤬ ꤥ꤬ꤔꤢꤩ꤬ ꤘꤢꤦ꤬ ꤟꤣꤧ ꤘꤣ ꤢ꤬ ꤊ꤫ꤢꤦ꤬ ꤘꤣꤧꤚꤢꤪ꤬ꤘꤣꤧꤚꤢꤩ꤭ ꤕ꤫ꤢꤩ꤬ ꤔꤢꤧ꤬ ꤕ꤫ꤥ꤬ꤗ꤫ꤢꤧ꤬ ꤖꤚꤢꤩ꤬ꤋꤢꤨ꤭ ꤔꤣꤧ꤬ꤒꤣꤧ꤬ꤟꤢꤩ꤬ ꤟꤣꤧ꤯ ꤛꤢꤩ꤬ꤞꤤ꤭ ꤒꤥ꤭ꤙꤢꤩ꤬ ꤔ꤫ꤤ꤬ꤘꤢ꤭ ꤘꤢꤦ꤬ꤟꤣꤧ ꤛꤢꤩ꤬ꤞꤤ꤭ꤍ꤫ꤥ꤬ ꤕꤢ꤭꤯’
30“ꤚꤣꤧ꤬ ꤊꤣꤧ꤬ꤛꤢꤧ꤭ ꤘꤢꤨ꤬ꤛ꤫ꤢꤧ꤬ꤓꤢꤧ꤬ꤞꤢꤩ꤭ ꤣꤧ꤭ꤒꤣ꤬ꤖꤚꤢꤩ꤬ ꤟꤢꤩꤏꤢꤦ꤬ ꤔꤢꤧ, ‘ꤖꤢꤩ꤭ꤢ꤬ꤙꤚꤢ꤬ꤟꤢ꤬꤮ ꤒꤢꤦꤣꤧ꤭ꤔꤣꤧ꤬ ꤚꤣꤧ꤬ ꤢ꤬ ꤜꤣꤙꤢ꤭ ꤜꤢ꤭ꤟꤤꤒꤥ꤬꤯ ꤊꤣꤧ꤬ꤛꤢꤧ꤭ꤞꤣꤧ꤭ ꤒꤣ꤬ꤖꤚꤢꤩ꤬ ꤊꤢꤩ꤬ ꤞꤣꤧ꤭ꤖꤚꤢꤩ꤬ꤊꤣꤧ꤬ꤓꤢꤪ꤬ ꤊꤢ꤬ꤋꤛꤢ꤭, ꤚꤣꤧ꤬ ꤢ꤬ ꤊꤢꤩ꤬ ꤊꤢ꤬ꤋꤛꤢ꤭ ꤘꤢꤧꤏꤥ꤬ ꤕ꤫ꤢꤩ꤬ ꤛꤢꤩ꤬ꤞꤤ꤭ ꤒꤢꤦꤗꤢ꤬ ꤢ꤬ ꤛꤢꤧ꤬ ꤚꤣꤧ ꤔꤥ꤬ ꤖꤢꤧ ꤢ꤬ꤔ꤫ꤢꤩ꤬ ꤖꤢꤧ꤯’
31“ꤗꤢ꤬ꤔꤢꤧꤚꤣꤧ꤬ ꤖꤢꤩ꤭ꤢ꤬ꤙꤚꤢ꤬ꤟꤢ꤬ ꤟꤢꤩꤏꤢꤦ꤬ ꤜꤢꤨ꤭ ꤔꤢꤧ, ‘ꤛꤢꤩ꤬ꤞꤤ꤭ ꤊꤢꤩ꤬ ꤋꤚꤝꤢ꤭ꤗꤢꤩ꤬ ꤊꤣꤧ꤭ ꤟꤢꤨ ꤋꤢꤨ꤭ꤗꤢꤪꤎꤢꤧ ꤔꤢꤧ ꤖꤚꤢꤩ꤬ꤖꤚꤥ꤬ ꤚꤢ꤭ꤊꤢꤧ꤭ ꤔꤣꤧ꤬ꤒꤣꤧ꤬ꤟꤢꤩ꤬ ꤒꤥ꤬ ꤟꤢꤩꤚꤣꤧ꤬, ꤊꤣꤧ꤬ꤛꤢꤧ꤭ ꤒꤣ꤬ꤖꤚꤢꤩ꤬ꤖꤚꤢꤩ꤬ ꤊꤢꤩ꤬ ꤞꤣꤧ꤭ꤖꤚꤢꤩ꤬ꤊꤣꤧ꤬ꤓꤢꤪ꤬ ꤊꤢ꤬ꤋꤛꤢ꤭ ꤕ꤫ꤢꤩ꤬ ꤡꤣꤧ ꤛꤢꤩ꤬ꤞꤤ꤭ ꤡꤣꤧ꤮ ꤗꤢ꤬, ꤢ꤬ ꤛ꤫ꤢꤦ꤬ꤢꤩ꤬ ꤕ꤫ꤢꤩ꤬ ꤔꤢꤧ ꤔꤢꤧ꤬ ꤒꤥ꤬꤯’”
தற்சமயம் தேர்ந்தெடுக்கப்பட்டது:
ꤜꤢꤨꤊꤢ꤬ 16: eky-Kali-MM
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
Wycliffe USA