Lukah 5
5
Hi Yehu napediha ɗa ana pahakoalan-Na ɗama kawunga
(Mat. 4:18-22; Mrk. 1:16-20)
1Einya hangi laɗɗu hi Yehu nadedi ta wiwi tamma Geneharet.#5.1 Nahawiɗang tamma Geneharet wiɗa ʄellanya tamma Galilea. Duku ɗanguha ɗa tou ɗama kaworu-Nya kama ranguya nawini nama waling lahi Alla awiɗ. 2Hi Yehu na itaha ɗama ɗubbaɗa ɗa teana ta wiwi tamma. Jaka ɗa makawua purungɗanyak waling ta teana hiɗa pawarahuha ɗa ʄalaɗa. 3Manga hi Yehu naɗeahang ta pinu teanan hi Himon, ʄaka napaleawaya hi Himon kana tularunya na teanana ta mamarou hakuɗuk waling ta wiwi. Hi Yehu ngoɗunanyaka ta rongu teana manga hina panunga-papeakang ta tou ɗangu.
4Namengaka ana panunga-papeakaja, panewinanyaka lahi Himon, “Muɓoahinya na teana ta padoung nama maʄallung, ʄaka mupahelaya na ʄalamu kana kena kaboku.”
5Nagapiya hi Himon, “To Gurr, walingu riɗuga majoili-lengaka ama manyerang damali kollimang gana anyaka, ʄiaɗinguka Ou langa paleawamuga enga ʄalaɗigu.” 6Wali nounaka aɗa pahelaya na ʄala, duku kollipaɗanguha kaboku, tiki pamajirak na ʄalaɗa. 7Manga ɗa hawaipuja ɗa oaliɗ waling ta teana hawanguk kaɗa gatagama awiɗa. Ɗa oaliɗ amija aɗa tomaja lapakungu hiɗa tau ʄellaja kaboku ɗama ɗubba ɗa teana, ʄiayaka hiɗa tiki patabillu. 8Ana itakiyaka namaʄaʄi hi Himon Petruh karaɗananyaka ta hagana hi Yehu, wina, “Maroukiga Moiri, nyouwa tou doku-jalawa.”
9Hi Himon ʄaka ngaladukaɗa ɗa tou ɗapamaraiɗa ɗa kaɓarra aɗa itaha duku ɗanguha ɗa kaboku ɗapa kolliɗ. 10Tou ʄellaɗa ɗa oalin hi Himonː hi Yakobuh ʄaka hi Yohanih ɗa anan hi Hebedeuh. Hi Yehu napanewi lahi Himon, “Abi mumangeꞌatɗing! Walingu ta laɗɗu ya, ou muʄaʄiha ma ʄala tourara kapiku keriɗa-Ga.”
11Jiayak hi Himon ʄaka ɗa oalina paɗeahaɗajaka ɗa teana ta wiwi tamma, manga hiɗa ɗujakuja ngalaɗukaɗa aɗa keriya hi Yehu.
Hi Yehu napateggahuya natou nama katobu
(Mat. 8:1-4; Mrk. 1:40-45)
12Einya hadeka, hi Yehu a einya ta hangi koata. Einya hatou moani napabinung katobu.#5.12 Ta rahi nou, na lii-pareahaɗ ɗa tou Yahudi nama wina, ɗa tou katobu daɗa piakumang aɗa tama ta umma pingi pakaɓuangu tou Yahudi, kaɗang ɗayapuha tou marihak. Bahhaya ta hurat Imamat 14:1-32. Na itakiyak hi Yehu, karaɗananyaka ta haga-Na, ʄaka nakareiya, “Ama, amu weakuɗing, mupateggahukiwa.”
13Hi Yehu naɗeɗaya natou manga hina panewi, “Ku weaku, papateggahuwu!” Ailolu pijalɗanyaka ɗa katobun. 14Manga hi Yehu naheirunya abi panewiɗingu ta tou hawanguku wina-Nya, “Muhalaku ʄaka mupatekang wikimu ta imam.#5.14 Imam ʄiayak natou nama ta paɗuana hi Alla ʄaka na tourara. Manga kamu halaku idi manuatung, keriya napareahana hi Muha, tadananyaka ta tou ɗangu amu teggahu.”
15Jiaɗinguka nalarana hi Yehu kii-ki mahoꞌarungnanyaka, ʄiayaka hiduku-ɗanguha ɗa tou ɗama aming aɗa rangu-Ya, ʄaka ɗakarei-Ya kana pateggahuma waling ta kadauk awiɗ. 16Laka atounouɗin hi Yehu nahalaku ta makahika ana habayang.
Hi Yehu napateggahuya nama kalikku
(Mat. 9:1-8; Mrk. 2:1-12)
17Einya nama hangina na laɗɗu hi Yehu ana panunga-papeakang, eija ɗa tou waling ta kaɓuangu Parihi ʄaka ɗa gurr agama tou Yahudi ɗama ngoɗu hou. Ɗuɗa ɗama waling ta koata Yeruhalem, mawaling ta paraingu ɗama eija ta loaɗa Galilea ʄaka ta loaɗa Yudea. Nakuaha-Na hi Alla einya lahi Yehu kana pateggahuya natou kadauku. 18Ta rahi nou eija ɗama idiya natou nama kalikku napaɗeitu nama maturu ta pinu rakang. Ɗa kamang papaʄuʄang kamatama idiya ta rongu umma kapiaku ɓijalumanya ta hagana hi Yehu wiɗa. 19Jiaɗinguka ali ɗanguɗa ɗa tou daɗa hilu piakumaha aɗa tama idiya. Wali houɗaka ɗapaɗeahaya ta pinu kabungu ʄaka ɗaweharuya na kabungu umma, manga hi paɗoulunya ta haga lahi Yehu ta paɗua tou ɗangu. 20Hi Yehu na itaha na manninguɗa, hiwinanya natou kalikku nou, “Angwua, ɗa doku-jalamu kupoahi-poɗahugujak.”
21Ɗa gurr agama tou Yahudi ʄaka ɗa tou waling ta kaɓuangu Parihi ɗapa kangurrukung wikiɗa, “Geara ikiyaka natou nei, nama hamearang wikin lahi Alla? Da hilu eimanguha namapoahi-poɗahuha ɗa doku-jala, ada ʄiakayaka hi Alla.”
22Hi Yehu napeaja na pangaɗanguɗa, hi winaja, “Gahimi pangaɗa tonoungu ta atim? 23Beinya nama reihi haleala nyiami ami wai-Ga, awigu ta tou kalikku nei, ‘Ɗa doku-jalamu ɗama poahi-poɗahunguka,’ a da awigu, ‘Mukiɗiyay, kaum halaku?’ 24Kaem peanyay ta pinu-tana ya, na Ana Tourara na kuaha ana poahi-poɗahuha ɗa doku-jalaɗ.” Manga hi Yehu napanewi ɗenganya natou kalikku nou, “Mukiɗiya, ɗekiya na pamaturu waimu, ʄaka kaum ɓaliya.”
25Ta haga bolluɗ kiɗinanyaka natou kalikku, ana haduluya napamaturu waina ɓalinanyaka ʄaka hina wuatu-haliya hi Alla.
26Ngaladukaɗ ɗa tou ɗakaɓarra ʄaka ɗaɓannar manga hiɗa wuatu-haliya hi Alla, hiwiɗa, “Iata langa itadanyak napakaɓarra ɗengangu namaʄaʄi ta laɗɗu ya.”
Hi Yehu nakamaikanya hi Lewi
(Mat. 9:9-13; Mrk. 2:13-17)
27Namengaka nou, louhungnanyaka hi Yehu waling ta umma nou. Manga hina itaya natou nama tagu karei hikatiku, nama ngarangu Lewina, tangirun ana ngoɗu ta padou keranguna. Hi Yehu winanya, “Maiya, kam keri-Wa.” 28Hi Lewi nakiɗ temma bollunajaka ngaladukaɗa, ana keriya hi Yehu.
29Wali nounaka hi Lewi tununanyaka ta ummana tutu-taguna hi Yehu. Ɗangu ɗa tou ɗama tagu karei hikatiku ʄaka ɗa tou hawanguku ɗama a oali ɗengaja. 30Ei ʄellaja ɗa tou waling ta kaɓuangu Parihi ʄaka ɗama tou mapirrah ɗa gurr agamaɗa dama buhaja, manga hiwiɗaja ɗa ana pahakoala-Na, “Gawali nyiami himi a-inu ɗengaja ɗa tou ɗama tagu karei hikatiku ʄaka ɗa tou da kalung?”#5.30 “Ɗa tou da kalung” nahawiɗang ʄiayaka “natou dama keriya na lii-pareahana hi Muha.
31Hi Yehu napagapija, “Natou dama kadauku dana manyeramangu doatir, ʄiaɗinguka natou nama kadauku ʄiaya nama manyerang doatir. 32Hi ami-Ga da kamaikamaguja ɗa tou ɗama peaka wikiɗa kupaɗening ɗama wiɗa, ʄiaɗinguka hi ami-Ga manyeraguja ɗa tou ɗama doku-jala kaɗa haria.”
Nalarana da angu-inung
(Mat. 9:14-17; Mrk. 2:18-22)
33Eija ɗa tou ɗapanewi lahi Yehu, “Ɗama keriya hi Yohanih ʄaka ɗama keriha ɗa tou waling ta kaɓuangu Parihi, daɗa angu daɗa inung ʄiapaya nahabayanguɗa. Jiaɗinguka ɗama keri-Wu ɗa angu ɗa inung.”
34Hi Yehu napagaping, “Atanga einyaha na moani nama parongu ummangu ta pata-lilawi, napiakukaɗingu nyiami ami paleawaha ɗa kulla daɗa angu daɗa inung? Daꞌamang! 35Jiaɗinguka enga tomananya na rahina, na moani nama parongu ummangu aɗa ɗekiya waling ta paɗuaɗa, wali houɗaka ɗuɗa daɗa angu daɗa inung.”
36Hi Yehu naloluk ʄellaya na lii-pangearang ana panunga-papeakaja, natou nama keriya na pata-morik nama ɓuangu waling lahi Moiri, abi hilu kerimaya na pata-morikuɗa nama deingu. Manga hiwinaja, “Da eimangu tou nama kaɗabaruya na koapi dei waingu kajirak koapi ɓua, kaɗang atounoukanaka nahirayah na koapi nama ɓuangu. Atounou ʄellakaɗanyaka, na kajiraku koapi ɓuangu dana hilu hamearamah ta koapi deingu. 37Touʄellana, da eimangu tou nama ɓuriya na anggur ɓuang ta manaingu dei. Kaɗang na anggur ɓuang ana haguakak nahiraya na manaingu dei, ʄaka na anggur nou naboangu. 38Jiayak, na anggur nama ɓuang buriya ta manaingu nama ɓuangu. 39Natou nama langa dammanguna pa inung anggur deingu, dana buhamang pa inung anggur nama ɓuangu, kaɗang ɗunna enga wina, ‘Na anggur dei ʄiaya nama reihi kalung.’ ”
தற்சமயம் தேர்ந்தெடுக்கப்பட்டது:
Lukah 5: wnk
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
© 2024 (Active), Wycliffe Bible Translators, Inc. All rights reserved.