التكوين 14

بركة أبرام

أبرام يسلك شعوب

1وفذاك الوقت اخلڮ اعلن أمرافل ملك بابل وأريوك ملك ألاسار وكدرلعومر ملك عيلام وتدعال ملك جويم 2ادايڮو امع بارع ملك سدوم وبرشاع ملك عمورة وشنأب ملك أدمة وشمئير ملك صبويم وملك بالع اللي هي صوغر. 3كلهم اجمع اللي عندو من لجنود فواد السديم اللي ينڮالو لبحر الميت. 4واللي كانو اعبيد لكدرلعومر مدة 12 سنة، يغير امبلڮو واتكبرو اعليه فالسنة 13 . 5وفالسنة 14 امشا كدرلعومر وأصحابو من الملوك، وغلبو الرفائيين فلبليدة ينڮالها عشتروت قرنائم. وغلبو الزوزيين فلبليدة ينڮالها هام. وغلبو الإيميين فبطحة قريتايم. 6وغلبو الحوريين احذا كدية سعير يلين بيت فاران اللي ماهو ابعيد من الخلوات. 7ومن فم رجعو واعدين مدينة قادش، وغلبو كل لارض اللي كانو فيها قبيلة العماليق. وغلبو املي الأموريين اللي كانو ساكنين فارض حزازون تامار.

8وعاڮب ذاك ڮامو كل من ملك سدوم وملك عمورة وملك أدمة وملك صبويم وملك بالع، 9وادايڮو امع كدرلعومر ملك عيلام وتدعال ملك جويم وأمرافل ملك بابل وأريوك ملك ألاسار فواد السديم. وكانو أربع ملوك ضد خمسة. 10وكان واد السديم املان من ظايات الطين. وكل من ملك سدوم وملك عمورة حاولو يهربو امع رجالتهم من الحرب يغير وحلو فالطين واللي اسلك منهم اهرب شور الكدية. 11وڮامو الملوك لخرين الربعة الباڮين اللي غلبو فالحرب وڮبظو كل شي كان فسدوم وعمورة من أملاك واطعام وامشاو. 12وڮردو لوط ول خو أبرام اللي كان ساكن فسدوم فهاذا الوقت، وڮبظو كل شي كان عندو.

13واسلك آراڮاج من أهل سدوم وعمورة، وجا لأبرام العبراني ورد اعليه ذا اللي اخلڮ. وكان أبرام ساكن احذا صدراية اكبيرة اللي فاتراب ممرا، اللي من الأموريين، وهو خو أشكول وعانر، وكلهم أصحاب لأبرام. 14وإلين اسمع أبرام باعلن ول خوه نحبس، ڮام واڮبظ كل رجالتو اللي اخلاڮة وكابرين عندو، واللي كان عددهم 318 آراڮاج، وامشا دافع اورا الملوك الربعة يلين لحڮ مدينة دان. 15وإلين عاد ليل، ڮام أبرام وڮسم رجالتو اعلى فرق، واهجم اعليهم، واغلبهم، وامشا دافع اوراهم يلين لحڮو ابليدة أسمها حوبه اللي هي شمال دمشق. 16واڮبظ اللي كانو يملكو، وجاب لوط ول خوه وأملاكو ولعليات ولمحابيس لخرين.

17وارجع إبراهيم بعدما اغلب الملك كدرلعومر والملوك لخرين اللي كانو امعاه. وخاظ ملك سدوم اياك يستقبلو فواد شوى اللي أسمو واد الملك. 18وكان ملكيصادق ملك ساليم امع ملك سدوم . واعطا ملكيصادق لأبرام شي من امبورو وشي من عصير العنب. وكان راجل من رجالة مولانا العظيم. 19وبارك أبرام وڮالّو:

اعليك بركة مولانا العظيم

اللي خلڮ السما والتراب،

20والحمد لمولانا العظيم

اللي نصرك اعلى أعدائك.

واعطاه أبرام العشر من كل شي كان عندو. 21وعاڮب ذاك ڮال ملك سدوم لأبرام: لاهي نڮبظ الرواڮيج وانتا تڮبظ الباڮي. 22وڮالّو أبرام: احلفت اعلى الله تعالى اللي خلك السما والتراب، 23اعلني ما نڮبظ أي شي من ذا اللي عندك اياك ما اتڮول اعلني اجبرت الخير من عندك. 24ولاني لاهي نڮبظ من عندك ماهو اللي كالو رجالتي. يغير اصا الرجالة اللي امشاو امعايَ فالحرب واللي هوما عانر وأشكول وممرا، خليهم يجبرو ڮرعتهم.

தற்சமயம் தேர்ந்தெடுக்கப்பட்டது:

التكوين 14: الحسانية

சிறப்புக்கூறு

பகிர்

நகல்

உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்

This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/

الكتاب المقدس بلغة الحسانية பற்றி மேலும் அறிக

التكوين 14