Марк 3
3
1Исусыс бӧра муніс синагогаӧ. Сэтчин вӧлі косьмӧм киа морт. 2Фарисейес Исуссӧ мыйынкӧ мӧдісӧ кутны. Сійӧн видзӧтісӧ Сы сьӧрын, оз я веськӧт косьмӧм киа мортсӧ шоччисян лунӧ. Сэк лоас мый понда Сійӧ судитны. 3Исусыс шуис косьмӧм киа мортлӧ: «Сувт шӧрас». 4Фарисейеслісь Сія юаліс: «Мый позьӧ керны шоччисян лунӧ: бурсӧ али умӧльсӧ, мездыны мортсӧ али вийны сійӧ?» Нія шы эзӧ сетӧ. 5Исусыс тӧждісис чорзьӧм сьӧлӧммезныс кузя, сійӧн лӧгӧн видзӧтіс ны вылӧ. Сія шуис косьмӧм киа мортлӧ: «Нюжӧт китӧ». Мортыс сідз и керис. Сылӧн киыс веськаліс, лоис мӧдыс кодь. 6Фарисейес петісӧ да сэк жӧ пондісӧ баитчыны Ирод дор сулалісь йӧзкӧт, кыдз бы вийны Исуссӧ.
Ты дорын
7Исусыс аслас велӧтчиссезкӧт иньдӧтчис ты дорӧ. Сы сьӧрӧ муніс уна отир Галилеяись, Иудеяись, 8Ерусалимись, Идумеяись, Иордан сайись, Тир да Сидон гӧгӧрись. Отирыс локтісӧ Сы дынӧ, нылӧ эд кывсьӧм, мый Сія керӧ. 9Исусыс тшӧктіс Аслас велӧтчиссезлӧ лӧсьӧтны Сылӧ пыж, медбы унася-уна отирыс Сійӧ эзӧ дзескӧтӧ. 10Исусыс унаӧс веськӧтіс. Сійӧн шогаліссес пелитчисӧ одзлань, медбы павкӧтчыны Сы бердӧ. 11Исуссӧ казялікӧ сэрпӧсь ловвес усьлісӧ Сы одзӧ да горӧтлісӧ: «Тэ Енлӧн Зон!» 12Но Исусыс чорыта ӧліс нійӧ, медбы эзӧ висьтасьӧ, кин Сія.
Даскык велӧтчись
(Мт. 10:1-4; Лк. 6:12-16)
13Сыбӧрын Исусыс кайис керӧс вылӧ. Сія корис сьӧрас нійӧ, кӧдна Сылӧ колісӧ. Нія локтісӧ Сы дынӧ. 14Исусыс бӧрйис даскык мортӧс, медбы нія пыр вӧлісӧ Сыкӧт. Сія мӧдіс ыстывлыны нійӧ висьтасьны Бур Юӧрсӧ 15да сетны нылӧ вын веськӧтны шогаліссесӧ да вашӧтны сэрпӧсь ловвесӧ. 16Бӧрйӧм даскыкыс вӧлісӧ: Симон, кӧдалӧ Сія сетіс Петра ним; 17Зеведейлӧн Яков да Иоан зоннэз, кӧдналӧ сетіс Воанергес ним, кӧдӧ позьӧ вуджӧтны «гымлӧн зоннэз»; 18Ӧндрей, Филип, Варфоломей, Матвей, Фома, Алфейлӧн Яков зон, Фаддей, Кананит Симон 19да Искариот Иуда, кӧда и вузаліс Исуссӧ.
Кинсянь Исуслӧн выныс?
(Мт. 12:22-32; Лк. 11:14-23; 12:10)
20Кӧр нія пырисӧ керкуӧ, Сы дынӧ бӧра чукӧртчисӧ отир. Нія эзӧ ештӧ нельки нянь тор сёйны. 21Исуслӧн гортіссес кылӧмась керсьӧмыс йылісь да локтӧмась нуӧтны Сійӧ. Нія баитӧмась, Сія пӧ бӧбсяліс.
22Сэтчӧ локтӧмась и Ерусалимись Туйдӧтӧ велӧтіссез. Нія баитісӧ: «Сы пытшкын Вельзевул. Сія вашӧтлӧ сэрпӧсь ловвесӧ ны вылын юралісь вынӧн».
23Исусыс корис нійӧ дынас да пондіс баитны нылӧ велӧтан висьттэзӧн#3:23 велӧтан висьт ─ притча:
«Кыдз вермас сотана вашӧтны сотанаӧс? 24Ӧксу кипод увтын олісь йӧзыс ӧтамӧдкӧт янсӧтчас кӧ да пондас тышкасьны, сія муыс кушамас#3:24 кушамны ─ опустеть. 25Керкуын оліссес ӧтамӧдкӧт кӧ озӧ лӧсялӧ, сія керкуыс дыр оз сулав. 26Сотанаыс ас вылас лэбтісяс кӧ да торьясяс, сія сэк ӧштас вынсӧ. Ачыс асьсӧ изводалас. 27Вермас разь кинкӧ пырны вына мортлӧн керкуӧ да мыйкӧ петкӧтны, оз кӧ сійӧ домав? Мортсӧ домалас да вӧлись куштас керкусӧ. 28Быльсӧ висьтала тіянлӧ: лоасӧ проститӧмӧсь отирлӧн быдӧс умӧль керӧммез да умӧльтӧммез, кыдз бы нія эзӧ умӧльтӧ. 29Но кин пондас умӧльтны Вежа Ловсӧ, сылӧн сія умӧль керӧмыс некӧр оз ло проститӧм. Умӧль керӧмыс пыр кежӧ кольччас сы юр вылын».
30Сідз Исусыс висьталіс сійӧн, мыля баитісӧ, Сы пытшкын пӧ сэрпӧсь лов.
Исуслӧн сой, вон, мам
(Мт. 12:46-50; Лк. 8:19-21)
31Сэтчӧ локтӧмась Исуслӧн Мамыс да воннэс. Нія асьныс эзӧ пырӧ керку пытшкас, а тшӧктӧмась Сійӧ корны. 32Исусыс гӧгӧр пукаліс отир. Сылӧ висьталісӧ: «Тэнат Мамыт, воннэт да сойет сулалӧны ӧтӧрас да корӧны Тэнӧ». 33Исусыс шуис нылӧ: «Кин Менам мамӧ да воннэзӧ?» 34Сія видзӧтіс Сы гӧгӧр пукаліссес вылӧ да висьталіс: «Нія Менам мамӧ да Менам воннэзӧ. 35Кин керӧ Енлӧ колӧм сьӧрті, сія Меным вон, сой да мам».
Кӧдзись йылісь велӧтан висьт
(Мт. 13:1-9; Лк. 8:4-8)
தற்சமயம் தேர்ந்தெடுக்கப்பட்டது:
Марк 3: БЮ19
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்