Text: © Alliance biblique de Côte d'Ivoire, 2003 Audio: ℗ 2007 Hosanna

Alladian - 2003 Edition (NT)

Alladian: Ɛmɛẅi ankà ankrànkràn © Alliance Biblique de Cote d'Ivoire, 2003.

Zɛntɛn Zhezü hɔ́n anmàn cüìcüì mán anmàn cɛ kɛ dɔ́ anwrɔn Ɛmɛẅi ankà Ankrànkràn léyi dú Anhobɩ́ Nɛ̀ncüì-dúyri ankà nɔn. N'ɛsɛnkɛn-bɔ̀ ɛvà-anhyrɛ̀ lɔ cɔ́ nɛ̀n mɛhi yɔ hɔ̀n, wúyɔ̀ jan bɔ̀ léyi nɛ̀n wrɔ́ anhɛ́n gbangàn edomɛ̀n, hɩ nɛ̀n kɔrɛ y'ɛnlɔẅiɛ hɔ̀n lɔ nɔn, mán hɔ́n sɩ́ nɛ̀n: Magdala nyɔnwrɔn tɔ̀n léyi ye bi Mari, hɩ nɛ̀n wrɔ́ anhɛ́n gbàngbàn ɔbɔɛ̀n edomɛ̀n nɔn. Zhannɛ̀n, Shüza hi, Herɔdɛ̀n-kɔhɔ̀n-hán-wrɔn cüìcüì; Süzanɛ̀n mán wúyɔ̀ bobrebe janbɔ̀ léyi bɩ́ y'ɔkùa wá Zhezü mán n'ɛsɛnkɛn-bɔ̀ ɛkɔrɛ̀ nɔn.


Anmàn lɔ fɛn mɛ̀n, anwrɔn ke ji Zhezü kɛ và. Ɔmuhi fɛcüè vri tɔ̀n kɛ bɔrɛkru nɔn, Zhezü ci nyandrɛn ndɔ lɔ mɛ̀n kɛ dɔ̀ le: “Ɔwrɔn tɔ̀n hɔ́n n'ɛkɛ̀tɛ́mɛ̀n ɛci-tɛ́-yri. N'ɛci-tɛ́ mɛ̀n lɔ, ɛci janbɔ̀ cüe ɛnlevriɛ: anwrɔn nán esù ɛwú kɩ annrɛ́n hɔ̀n mán vá sɔran ɛci lɔ. Ɛci janbɔ̀ cüe ɛbù-hiẅia mɛ̀n. Ɛnvra léyi ɛci lɔ bukru ke dì nɔn, yɔ sɩ̀ cɔ̀ ɛnshi, kɩ yɔ wù. Ɛci ndɔ hɔ̀n cüe antɛ̀-wi granmɛ̀n, ɛci hɔ̀n lɔ dì, antɛ̀-wí hɔ̀n lɔ dikɔra yɔ, kɩ ɛci hɔ̀n lɔ wù. Ɔtrɔmɛ̀n lɔ, ɛci janbɔ̀ cüe ɛnhi ankrànkràn mɛ̀n. Ɛci hɔ̀n lɔ dì, sɔ́, shi ɛẅì; nzri zri ke shi ɛẅì ɛkoẅi-ɛnrì.” Kɩ Zhezü kɛ dɔ̀ le: “Nyɛ́n die nukù anvrɛnvrɛn, ke dú kɛ nyɛ́n ẅɛn nukù nyɛ yá ankà!”


Zhezü sɛnkɛn-bɔ̀ kɛ yrɛ nɛ̀n, nyandrɛn ndɔ lɔ hɩ mɛ̀n ankà. Nɛ dɔ́ yɔ le: “Nyɛ tɛn nyɛ́n cɔ́ anhobɩ́ ankà-bán-ankà nyɛ́n nyrì; tɛ́n anwrɔn ndɔ hɔ̀n, nyandrɛn mɛ̀n de ye yé yɔ ankà nɔn.
‘Yɔ lɛ nyan tɛ̀, tɛ́n yɔ sɩ̀ kàn,
yɔ lɛ yá tɛ̀, tɛ́n yɔ sɩ̀ nyri n'ɛmɛ̀n.’ ”


“Nyàn ankà léyi nyandrɛn ndɔ lɔ kɛ dɔ̀ nɔn: antɛ̀-ẅì dú Ɔwɔ mùan ankà-dɔ̀. Anwrɔn ndɔ hɔ̀n dú cá ɛnlevri mùan léyi antɛ̀-ẅì ke cüe nɔn: yɔ yá ankà lɔ, tɛ́n anwa-wrɔn kɛ và ke bɩ́ ankà-dɔ̀ lɔ kɛ sɔhɔ́ y'ɛnbɔrɛmɛ̀n, ô yɔ bɩ́ bú tán ankàẅì, ô yɔ bɩ́ cɔ́ ɛnkrukɔrɛ̀. Ndɔ hɔ̀n dù cá ɛbù-hiẅia: yɔ yá ankà-dɔ̀ lɔ kɩ yɔ bɩ́ nɛ̀n pɔpüɛ̀ mɛ̀n. Tɛ́n, yɔ sɩ́ teze nɛ̀n nɛ́n di annyràn, yɔ bú tán ankàẅì ɛnvra cá mɛ̀n, kɩ yɔ teze y'ankàẅì-bùtan lɔ ɛnvra léyi ejüezì kɛ srɔ́n yɔ ɛsù nɔn. Antɛ̀-ẅì léyi ke cüe antɛ̀-wí granmɛ̀n nɔn, dú yɔ léyi yɔ yá ankà-dɔ̀ lɔ; tɛ́n yɔ teze y'edomɛ̀n yɔ tán ɛnhibù wú ci-hán, n'ɛnnɛ̀ncüì-dì mán nɛ́n pɔpüɛ̀-brà, kɩ kɛ hán tán, yɔ sɩ́ shi ɛẅì ankrànkràn. Antɛ̀-ẅì léyi ke cüe ɛnhi ankrànkràn mɛ̀n nɔn, dú yɔ léyi yɔ die ankà-dɔ̀ lɔ nukùɛ, yɔ ẅɛn nɛ̀n yɔ hɛ́n ɛnbɔrɛ anvrɛnvrɛn mɛ̀n, yɔ di ɔmuan zri, kɩ yɔ shi ɛẅì.”


Ɔwrɔnẅì zriɛmɛ́n ke sɩ́ dɔ́n kɛniɛn kɛ wá sonu mán sofa krugbɛ̀n. Tɛ́n kɛniɛn tɛ̀ wú de yɛ hɛ́n nɛ̀n, ô anwrɔn hɔ̀n léyi ke bru anwɔn mɛ̀n nɔn kɛ̀ kán ɛyri. Ɛci hɔ̀n léyi dú ɛyrí yɔwɔ mɛ̀n nɔn, kɛ lɛ srɔ ɛcɛ̀n pupu mɛ̀n, kɩ ankà-bán-ankà hɔ̀n lɔ fɛn kɛ lɛ srɔ ɛwú ɛyri-kan mɛ̀n. Nyɛ́n wá esùva, ny'ankà nukù-diemɛ̀n! Ɔmuhi ɔwrɔn léyi ẅɛn eci nɔn ne le vru nɛ lɛ cɔ̀ kɛ lɛ cüɛn; tɛ́n, ɔwrɔn léyi ke sɩ̀ ẅɛ̀n hàn nɔn, ɛẅiɛ léyi ne tro le nɛ́n ẅɛ̀n nɔn, hɩ mán ye le bɩ̀ sɔhɔ́.


Zhezü nɛ́n muan mán nɛ́n muan-ẅì hɔ̀n ji nɛ̀n nvà kɩ yɔ sɩ́ cɔ́ ɛyri, y'á hɔ́n nɛ̀n ɛtɛsɛ̀n, fɛcüè léyi nyɔn nɔn kruhú. Ye bi Zhezü yɔ dɔ́ nɛ̀n le: “Ɔmuan mán ɔmuan-ẅì hɔ̀n nyɔn ɛntrɛ ke ji kɛ̀ kán mɛ́n.” Kɩ, Zhezü kɛ dɔ́ yɔ lɔ fɛn le: “Nmàn mán nmàn-ẅì hɔ̀n, dú yɔ hɔ̀n léyi ke die Ɔwɔ ankà nukùɛ, hɩ kɛ hán n'ɛkɔrɛ̀zì-ci nɔn.”


Ɛnbì tɔ̀n, Zhezü bru anhàka tɔ̀n mɛ̀n, nɛ́n mán n'ɛsɛ̀nkɛn-bɔ̀ mɛhi kɩ nɛ dɔ́ yɔ le: “Bɔ̀ hɔ́n nyɛ̀n nɛnbà cɛ mɛẅi.” Kɩ yɔ hɔ̀n. Yɔ dú ɛvrà wɔ́ mɛ̀n, kɩ Zhezü ndà wrì. Kpatakpata lɔ ɔwràn shishi tɔ̀n bukru ke bɩ́ nɛnbà cɛ wú, kɩ ɛnshi ke ku anhɛmɛ̀n; yɔ lɔ fɛn owù-jansù ku yɔ edù. Zɛtɛn Zhezü sɛnkɛn-bɔ̀ lɔ, vá nɛ̀n ɛtɛsɛ̀n, fri nɛ̀n kɩ ke di bobo kɛ dɔ̀ le: “Ankà-yé-wrɔn, Ankà-yé-wrɔn, bɔ́ le wù!” Zhezü gbɛ́ ɛvɛ̀ kɩ wá tán ɛndɔnwrɔ̀n mán nɛnbà-fù kɛ̀ sànnyɔn. Kɩ ɛyri sannyɔn. Zhezü kɛ dɔ́ n'ɛsɛnkɛn-bɔ̀ le: “Ny'ankàẅì-bùtan lɔ tówà?” Tɛ́n yɔ lɔ fɛn ɛnjansù kɛ ẅɛn yɔ, kɩ yɔ dú anvɛmɛ̀n-frɛ́n mɛ̀n, yɔ yrɛ y'edomɛ̀n le: “Antɔnwrɔn dú ɔwrɔn ndɔ lɔa? Nɛ wá ɛnyanmàn tán ɛndɔwrɔ̀n mán ɛnshi, kɩ yɔ die nɛ̀n nukùɛ!”


Yɔ cɔ́ anmàn hɔ̀n léyi dú Gadara Kpɔsɔ wú hɩ dú nɛnbà cɛ mɛẅi kɩ kɛ́n Galile ezì nɔn. Ɛnvra léyi, Zhezü dú anhàka mɛ̀n kakɛ ɛvúhuɛ nɔn, ɔwrɔn tɔ̀n dú anmàn vá nɛ̀n ɛsù. Ɔwrɔn ndɔ lɔ, anhɛ́n gbànbgàn hɔ̀n dú nɛ̀n edomɛ̀n; ɛnvra sheshemɛ̀n de nɛ́n sɩ́ ku ɛci edù, nɛ̀n sɩ̀ ẅɛ̀n ebɩ́ nɛ̀n dù ɛmɛ̀n, tɛ́n ɛzhe-bɩ́-yri de dú n'edùyri nɔn. Ɛnvra léyi nɛ̀n kán Zhezü nɔn, nɛ̀n di nkù zri, nɛ̀n bore yi annan tɛsɛ̀n, kɩ nɛ dɔ́ ɛsùva cüìcüìemɛ̀n le: “Ecitan e ji ɛ̀ hán mɛ̀n Zhezü, Ɔwɔ léyi dú ɛwúɛ hɛ́n nɔn n'ɛnẅì? Mɛ sɛ́n mɛ́n e bɩ́ hán mɛ̀n ɛgbàn!” Nɛ dɔ́ ɔmu lɔ, ɔmuhi Zhezü ke wá tán ɛnhɛ́n gbangbàn lɔ, kɛ cɔhɔ́ nɛ̀n edomɛ̀n nɔn. Ɛnhɛ́n ndɔ lɔ ke bru nɛ̀n edù ɛnvra bobrebe; kɩ ɔwrɔn ndɔ lɔ, yɛ kora nɛ̀n annan mán ankɔrɛ̀ gbraka mɛ̀n, ô nɛ̀n yɛ́ ɛyri zriɛ, tɛ́n nɛ voyan gbraka lɔ, kɩ ɛnhɛ́n gbangbàn kɛ wán nɛ̀n sɩ́ ɛyri tramɛ̀n. Zhezü ke yrɛ nɛ̀n le: “Anwɔntan yɛ hán ye bi mɛ́n?” Nɛ̀n mrɛ́n ɔmùan le: “M'ebí dú ‘bobrebe’ ”, annànwɔrɛ mɛ̀n lɔ, anhɛ́n gbàngbàn bobrebe de dú nɛ̀n edomɛ̀n nɔn. Kɩ anhɛ́n hɔ̀n lɔ kɛ sɛ́n Zhezü ô, ke bɩ́ kɔ́n yɔ ku ɛnnànmàn léyi n'ɛvrɛ́n kè sɩ̀ ẅɛ̀n ɛnkru-trɔ nɔn mɛ̀n.
Nanvrɛn lɔ gbroko kà tɔ̀n ndù ke ji ɛci-zî ɛnkpò cɛ wú. Anhɛ́n gbangbàn hɔ̀n lɔ kɛ sɛ́n Zhezü kè shrì kɛ̀ tán yɔ ɛkɔrɛ̀-levri yɔ bru gbroko hɔ̀n lɔ ɛmɛ̀n. Nɛ́n shrì nɛ̀n tán yɔ ɛkɔrɛ̀-levri. Zɛtɛn anhɛ́n gbangàn hɔ̀n lɔ dú ɔwrɔn lɔ edomɛ̀n srɔ ɛntrɛ kɩ bru gbroko hɔ̀n lɔ mɛ̀n. Gbroko kà lɔ fɛn dú ɛnkpò wú trɛ́n ku nɛnbà cɛ mɛ̀n, kɩ nwù. Ɛnvra léyi, anwrɔn hɔ̀n léyi ke nán gbroko nɔn, kán eci léyi wɔɛ̀n nɔn, yɔ srɛ́, yɔ bɩ́ ɛmɛẅi ankà yɔ hɔ́n sɩ́ anmàn mán nanbuenu. Anwrɔn srɔ ɛntrɛ hɔ́n nyan eci léyi wɔɛ̀n nɔn. Yɔ vá Zhezü ɛtɛsɛ̀n, kɩ yɔ cɔ́ ɔwrɔn léyi anhɛ́n gbangbàn cɔhɔ́ edomɛ̀n nɔn: nɛ̀n yɛ́ Zhezü annan tɛsɛ̀n, nɛ̀n cɔ́ ɛceci kɩ anvɛmɛ̀n cüe nɛ̀n. Zɛtɛn ɛnjansù kɛ ẅɛn yɔ. Anwrɔn hɔ̀n léyi kán ankà lɔ ɛyri nɔn, kɛ dɔ́ yɔ ɔmu le ɔwrɔn léyi anhɛ́n gbangàn dú edomɛ̀n, hán cɔ́ ɔkɔrɛ̀ nɔn. Zɛtɛn, anwrɔn hɔ̀n lɔ fɛn léyi dú ɔkpɔsɔ lɔ wú nɔn kɛ dɔ́ Zhezü kɛ̀ cɔhɔ́ y'anmàn, ɔmuhi ɛnjansù kɛ ẅɛn yɔ nɔn. Zhezü bru anhàka mɛ̀n ô kɛ̀ hɔ̀n. Ɔwrɔn léyi anhɛ́n gbàngbàn cɔhɔ́ edomɛ̀n nɔn, kɛ sɛ́n Zhezü ô nɛ̀n cɔ́ yi mɛhi yɔ yɛ́. Tɛ́n Zhezü hán nɛ̀n nɛ́n hɔ̀n kɩ kɛ dɔ́ nɛ̀n le: “Vrù ɛmɛẅí hɔ̀n ɛbemɛ̀n, ô ɛ̀ dɔ́ yɔ eci léyi Ɔwɔ hán tán mɛ́n nɔn.” Ɔwrɔn lɔ hɔ̀n, kɩ kɛ dɔ́ yɔ anmàn mumù lɔ fɛn, eci léyi Zhezü hán tán nɛ̀n nɔn.


Ɛnvra léyi Zhezü dú nɛnba cɛ mɛẅi vru và nɔn, fɛcüè bɩ́ nɛ̀n, ɔmuhi yɔ lɔ fɛn yɔ vrá nɛ̀n nɔn. Zɛtɛn ɔwrɔn tɔ̀n ye bi nɛ̀n Zhahirüsɛ̀n, nɛ́n mán nɛ́n và. Nɛ̀n dú anmàn Wɔ-sɛ́n-wɔn lɔ n'ɔwrɔn cüìcüì. Nɛ̀n bore Zhezü annan zìwú kɩ, nɛ sɛ́n yi kɛ̀ vá n'eyri ɛbemɛ̀n, ɔmuhi n'ɛnnyɔnwrɔn-ẅì zri léyi ẅɛn ɛnnanwàn-kru ɛvà-anhyrɛ̀ nɔn ke ji kè wù. Ɛnvra léyi Zhezü dù kɛ hɔ́n Zhahirüsɛ̀n nanvrɛn ɛbemɛ̀n nɔn, fɛcüè kɛ kɛ́n nɛ̀n ɛyri lɔ fɛn.
Nanvrɛn lɔ, ɛnnyɔnwrɔn tɔ̀n ɛnkrɛ̀-vɔ́n lɔwiɛ dú edomɛ̀n ɛnnanwàn-kru ɛvà-anhyrɛ̀ ndɔ. Ɛnnyɔnwrɔn ndɔ lɔ jrɛ́ n'ɔkùa lɔ fɛn ɛci-hán-bɔ̀ yri, kɩ ɔwrɔn zriɛmɛ̀n ke sɩ̀ kɔrɛ̀ nɛ̀n rɔ̀a. Nɛ̀n ci Zhezü ɛmɛẅi, nɛ́n sɔnba yi ɛtɛsɛ̀n, kɩ nɛ̀n tɛ́ yi ɛceci-mùan ɛkɔrɛ̀. Ɛnvra zri lɔ n'ɛnkrɛ̀ vɔ̀n lɔ sannyɔn. Zhezü ke yrɛ le: “Antɔn tɛ́ mɛ̀n ɛkɔrɛ̀a?” Yɔ lɔ fɛn yɔ wrɔ́n anmanta kɩ piɛrɛ̀n kɛ dɔ̀ le: “Ankà-yé-wrɔn, fɛcüè gbrɛnkɛn mɛ́n ɔmuàn, kɩ kɛ kɛ́n mɛ́n sɩ́ ɛyri lɔ fɛn.” Kɩ Zhezü kɛ dɔ̀ le: “Ɔwrɔn tɔ̀n tɛ́ mɛ̀n ɛkɔrɛ̀, kɩ mɛ́n nyrì le, ecüì tɔ̀n dú mɛ̀n edomɛ̀n srɔ ɛntrɛ.” Ɛnnyɔnwrɔn lɔ kán ɔmu le ye nyri nɛ̀n, kɩ ɛnjansù bru nɛ̀n; nɛ́n và nɛ̀n bore Zhezü annan zìwúɛ. Zɛtɛn nɛ dɔ́ yi anwrɔn lɔ fɛn zìwú eci le kruhú mán ɔmu le nɛ̀n hán nɛ̀n tɛ́ yi ɛkɔrɛ̀, kɩ ɛdomɛ̀n wule nɛ̀n ɛnvra zri lɔ mɛ̀n nɔn. Zhezü kɛ dɔ́ nɛ̀n le: “M'ɛnẅì, v'ankàẅì-bùtan lɔ kɔrɛ mɛ́n. Ɛ̀ hɔ́n anwɔwɔ mɛ̀n.” Zhezü dú ɛnnyɔnwrɔn lɔ ankà dɔ́ mɛ̀n, kɩ ɔkɔhɔ̀n-wá-wrɔn dú Zhahirüsɛ̀n nanvrɛn ɛbemɛ̀n nvà kɛ dɔ́ nɛ́n zi lɔ le: “V'ɛnẅì lɔ wù. E bɩ́ di ankà-yé-wrɔn ejüe.” Zhezü yá ankà lɔ, kɩ kɛ dɔ́ Zhahirüsɛ̀n le: “Ɛnjansù ke bɩ́ ẅɛn mɛ́n, è bùtán kɩ v'ɛnẅì lɔ kɛ lɛ kɔrɛ̀.” Ɛnvra léyi nɛ̀n bru Zhahirüsɛ̀n nanvrɛn ɛbemɛ̀n nɔn, nɛ̀n sɩ̀ shrì nɛ̀n tán ɔwrɔn zriɛmɛ̀n ɛkɔrɛ̀-levri kɛ cɔ́ nɛ̀n mɛhi yɔ bru anwɔn mɛ̀n, ke dú kɛ kè sɩ̀ dù Piɛrɛ̀n, Zhan, Zhakɛ̀n, ɛnẅì-nɛ́n-zi mán ɛnẅì-nɛ́n-muan. Yɔ lɔ fɛn, ye dú eyú wúemɛ̀n mán oboto mɛ̀n, ɛnẅì lɔ kruhú. Zɛtɛn Zhezü kɛ dɔ́ yɔ le: “Nyɛ́n bɩ́ wú eyú, nɛ̀n sɩ̀ wúɛ, tɛ́n ndà nɛ dà.” Tɛ́n yɔ hán nɛ̀n ɛnhyürɛ̀, ɔmuhi yɔ nyri ɔmu le ɛnẅì lɔ wù nɔn. Zhezü ẅɛn ɛnẅì lɔ ɛkɔrɛ̀, kɩ kɛ dɔ́ esùva cuìcüìemɛ̀n le: “Ɛnẅì cɛ tɔhú!” Ɛnẅì lɔ vru vá ɔkɔrɛ-bɔ̀ mɛ̀n, kɩ tɔhú ɛnvra zri lɔ. Zhezü wá tán yɔ, ô yɔ tán nɛ̀n ɛci nɛ̀n zî. N'ɛmɛ̀n-bɔ̀ dú anvɛmɛ̀n-frɛ́n mɛ̀n, kɩ Zhezü wá tán yɔ ye bɩ́ dɔ́ ɔwrɔn zriɛmɛ́n eci léyi wɔɛ̀n nɔn yi ankà.

వినండి Lükɛ̀n 8