Gola - 2019 LIB (NT) Drama

Gola New Testament Translation and Literacy Project © Bible Society in Liberia, 2019.

Wo kenàŋ bà yaào wa àŋ nyaaŋ wo Nìkɔ̀dimɔ̀. Wò yaà wa wo nyùùŋ gbèè aŋ Juùù nyaŋ bà guùŋ e yìwìà ke gbòò aŋ Fɛlosiì nyaŋ sùà. Wɔŋ dùùm guùŋ wò naŋ wa kɔ̀ koɓɛ̀i wo Jisɛ̀ joà lɛ yèè wò nauŋ woò wààŋ, “Kààmɔɔŋ, èiŋ nyìmàŋ kɛ̀ wo Dayà naum tùɔ̀ŋ ko nɛ̀ɛ̀ŋ wiì wèè maŋ wi kàà e ɗèwè ke dòmauŋ nɛɛ̀ŋ dè diɛŋ. Esaɓù kɛ̀, sèè wo Dayà goum weè nɔ̀ŋ maŋjɛ̀wɛ, muŋ fè weè ɓɛ̀nɛ̀ŋ nyɛ̀nɛ̀ŋ màŋ kèè mèè mɛɛ̀ŋ mùŋ nyɛnɛŋ yaà maŋ.”
Wo Jisɛ̀ naŋ fasàì yèè wò nauŋ woò wààŋ, “Mìŋ yààùm wòò sùà e tɔɔɓaaà kɛ̀ sɔɔ̀ nɔŋ wò nyùùŋ wo ɓɛìŋ nɔ̀ŋ e kòmauŋ jɛ̀ì paŋgàà wò nɔ̀ŋ wo bàuŋbà e Kànà Dayàa sùà.”
Wo Nìkɔ̀dimɔ̀ nauŋ dawè wààŋ, “Dièsɔa wo nyuùŋ kàmaiŋ tɛɔ̀ naŋ ɓɛìŋ ɓɛ̀nɛ̀ŋ nɔ̀ŋ e kòmauŋ e dìà tìyèeɛ̀? Wò do ɓɛìŋ nàŋ kɛ̀ɛ̀ ko sùà yèyeuŋ noo wo ɓɛìŋ nɔ̀ŋ kòmauŋ?”
Wo Jisɛ̀ naŋ fasaì wààŋ, “Miŋ woòum e tɔɔɓaaà kɛ̀, wo nyùùŋ gbiŋ fè ɓɛ̀nɛ̀ŋ nɔ̀ŋ wò bàuŋbà è Kànà Dayàa sùà sèè wo gò nɔ̀ŋ kòmauŋ e yìwìà è wùìyè yaà wo Jìnàŋ wo Kanaà Dayà. Anyuùŋ kpùuŋ komo aŋ jɔ̀à nyiŋ nyàŋ anyuùŋ kpùuŋ sùà, kɛɛ wo Jìnàŋ wo Kanaà Dayà nɔŋ nàŋ kile wo nyùùŋ wo nɔ̀ŋ wo jɔ̀à Dayà. Ɓɔ̀ è foonòum esaɓù kɛ̀ mìŋ naŋ woò kɛ̀ sɔɔ̀ maŋ ɓɛìŋ nɔ̀ŋ e kòmaum jɛ̀ì. Wo Jìnàaŋ nɔŋ nàŋ kiɛ̀ŋ wo nyùùŋ wɔŋ nyiiŋ gèe jɛi. Wo Jinàaŋ yaà mààŋ wɔŋ fòì, wo nyùùŋ gbiŋ nyimààŋ kɛ̀ kòò wɔ̀ŋ yewe wɔ̀ŋ vukà nyùùŋ; mùŋ komo ebò wɔŋ fòìɔ, kɛɛ muŋ nyimààŋ kɛ̀ kòò wɔ̀ŋ yewe ɔ̀ɔ̀ kòò wɔ̀ŋ yaà kɔɔyɛ.”
Wo Nìkɔ̀dimɔ̀ naŋ dawè wààŋ, “Dièsɔa tɛɛ̀ naŋ ɓɛ̀nɛ̀ŋ hɛ̀ɛ̀nɛŋ?”
Wo Jisɛ̀ nauŋ fasaì wààŋ, “Mùŋ yaà wo kààmɔɔŋ kɛnɛ anyùùŋ nyaŋ naŋ nyìmè ko Ezɔ̀ɛ̀ wèè maŋ maŋ Sàwà Dayà maŋ kàa, yèè mààŋ muŋ nyimààŋ tɛɛ̀? Mìŋ yààùm wòò sùà e tɔɔɓaaà kɛ̀, è yààìŋ gbùùyè koɓɛ̀ nyɛ̀iŋ nààŋ gbiìŋ e nyaàiŋ dè e yèɛ è naiŋ nyìmè yèè è naiŋ yɛmɛ̀ yàwi nààŋ bi lɛ̀. Nyɛ̀iŋ nààŋ bà gbiŋ kòò nìŋ nyìmèè wèè naŋ hààwè kè mìè seìɛ è naiŋ kiɛ̀ŋ lɛ. Sèè mùŋ go hààwè è yèɛ mìŋ naum woò lɛ è nyaàiŋ dè maŋ keì maŋ kaaìŋ e ɗuunyaŋ lɛɛ̀ maŋ, kɛ̀ dièsɔa mùŋ doim nàŋ haawè sèè kaum wòò e kèè maŋ keì maŋ kaaìŋ ko àìjɛnɛ̀ŋ maŋ? Wo nyùùŋ bà gbiŋ kòò wò jòwò wa kò àìjɛnɛ̀ŋ, kɛɛ sɔɔ̀ nɔŋ miàim wo Jɔ̀àfèlàà Nyuùŋ Kpùnɔɔ̀ŋ wo yèɔ naŋ dèyè e yìwìà ko àìjɛnɛ̀ŋ wɔ.
“Màànààŋ nɔŋ wo Mòòze naŋ wa dìkìè wo kaì bàànè maŋ kàìɔ ke kùù yèè wò nauŋ jòòwò fùùŋ ke fòùngà e diì wòaà diɛŋ lɛ̀, yɛi nɔŋ miàim wo Jɔ̀àfèlàà Nyuùŋ Kpùnɔɔ̀ŋ do nàŋ nɔ̀ŋ jòòwoim e ɗèwè kìì guùŋ nɛ sùà. Sèè è nɔ̀ŋ yɛi, wo nyùnɔ̀ɔŋ gbiŋ kɛɛnɛ̀ìm e hààwe sùà wɔ, wò do nàŋ kɛ̀ɛ̀nɛ̀ŋ wɔŋ nyiiŋ gèe gò jùà. E ɗeweɛ̀ lɛɛ̀ wo Dayà naŋ wa tɔ̀ɔ̀ e mànauŋ nɛ̀ koɓɛ̀ anyùùŋ nyaŋ e ɗuunyaàŋ. Wò naŋ wa kìɛ̀ŋ wo Jɔ̀àfèlàà gunùuŋ nɔɔ̀ŋ, wèè kɛ̀ wo nyùnɔ̀ɔŋ gbiŋ haawà miàim wo Jɔ̀àfèlàà Dayàa sùà wɔ, ke kpùnauŋ nɛɛ̀ŋ naàŋ fɔ̀, kɛɛ wò do nàŋ kɛ̀ɛ̀nɛ̀ŋ wɔŋ nyiiŋ gèe gò jùà. E teengaà wo Dayà naŋ wa tùɔ̀ŋ wo Jɔ̀àfelaauŋ nɔɔ̀ŋ koɓɛ̀ anyùùŋ nyaŋ e ɗuunyaàŋ lɛ, e fè wa wèè wo nyiŋ kìlìà è kiti diɛŋ. Wo Dayà nauŋ wa tùɔ̀ŋ ko nɛ̀ɛ̀ŋ nyiŋ niìŋ wèè wo nɔ̀ŋ wo Nyuùŋ Jòèye nyiŋ nɔɔ̀ŋ.
“Anyùùŋ nyaŋ gbiŋ naŋ hààwè miàim wo Jɔ̀àfèlàà Dayaà sùà wɔ, wo Dayà naàŋ nyiìŋ jèè è keì. Kɛɛ anyùùŋ nyaŋ naŋ gè maŋhɛɛ wèè aŋ hààwè miàim wo Jɔ̀àfelaauŋ nɔɔ̀ŋ sùà nyaŋ, wo Dayà wò nyiŋ kìlìà kiti tɛ. E ɗeweɛ̀ lɛɛ̀ sùà wo Dayà do wa nàwèè nàŋ kìlìè kiti anyùùŋ diɛŋ. Esaɓù kɛ̀, anyùùŋ nyaŋ e ɗuunyaàŋ naŋ yɛ̀mɛ̀ e gbòlòùŋ Dayàa, kɛɛ anyuùŋ kpùuŋ manaŋ ke nyìwìɛ e nìàŋ e gbolòùŋ nɛ, esaɓù kɛ̀ ke nyìwìɛ sùà àŋ nyiniàŋ maŋ keì ngaamuŋ ngààmùŋ nyiŋ màŋ. Anyuùŋ nyɛ̀nɛ̀ŋ maŋ keì ngaamuŋ ngààmùŋ nyaŋ fè hnàŋ kòɓɛ̀ è gbolòùŋ lɛ, esaɓù maŋ nyɛ̀nɛ̀ŋ nyiŋ màŋ do nàŋ fòlò ke fòolà e kìlà anyùùŋ aŋ miŋ yɛmɛ̀ janjai. Kɛɛ wo nyùnɔ̀ɔŋ gbiŋ nɔ̀ŋ e tɔ̀ɔ̀nyaàŋ sùà wɔŋ nyiiŋ gèeuŋ nɔɔ̀ŋ sùà wɔ do nàŋ hnè koɓɛ̀ e gbolòùŋ lɛ, esaɓù kɛ̀ àŋ do nàŋ mɔ̀nɔ̀ŋ wèè anyùùŋ aŋ nyìmàŋ kɛ̀ wo Dayà nàŋ yaà nyìnìè e yèɛ àŋ nyɛnɛŋ lɛ̀.”

Eɓìèmàŋjɛ̀wɛ̀ tɛɛ̀, wo Jisɛ̀ yaà anyùùŋ màŋjɛ̀wɛ̀uŋ nyàŋ naŋ kɔ̀ wɔŋ fùɔ̀ŋ Jùdiàa sùà. Yaà nyiŋ naŋ nɔ̀ŋ koɓɛ̀ anyùùŋ Jùdià nyaŋ wèè e teenga bà, e kìlà e tèèngà guùŋ bi wò yaào gùùyè anyùùŋ. Wo Jɔ̀ɔŋ wuŋ pɛɛ wò yaà wa ko jawaì àŋ nyaaŋ ko Enɔ̀ŋ, e gbɛ̀ɛ̀ ko Sàliìm. E wuiyè zimgbe yaà wa koɓɛ̀ bi, e kìlà anyùùŋ yaào wa kɔɔyɛ yèè wo Jɔ̀ɔŋ naŋ nyiŋ noo guuyè e wùìyè bi sùà. Tɛɛ̀ kpɛlɛɛ naŋ kaaìŋ paŋgàà wo Hɛɛlɔ̀ naŋ wa gbìɛ̀ŋ wo Jɔ̀ɔŋ ko sààŋ nyìwìi.
Anyùùŋ màŋjɛ̀wɛ̀ Jɔ̀ɔŋ nyàŋ yaà aŋ Juùù nyaŋ bà nyiŋ naŋ wa kpàànè kpàànè e fèemàŋ e nyaàiŋ dè e ɗewe kiiɛ̀ àŋ guo nyiŋ bi lɛ̀ e làngì zòòlo nyiŋ nɛ̀ sùà wèè aŋ nɔ̀ŋ anyuùŋ zɛ̀nɛŋ. Kpeiŋ àŋ naŋ kɔ̀ koɓɛ̀ Jɔ̀ɔìŋ yèè àŋ nauŋ wòò ke mìè seì nyààŋ, “Kààmɔɔŋ, wo kenàŋ wii yààùm yɛi mɛ̀iŋ kɔɔ e Wùìyè Jɔɔɗììŋ nɛ wɔŋ fàa bàa, wo yèɔ mùŋ naŋ mɛ̀iŋ gbòò kiiuŋ tɛ̀ɛ̀ wɔ, kòò wò yaà naàŋ gùùyè anyùùŋ, e kìlà anyuùŋ zimgbe kòò àŋ yaà kɔ̀ɔ̀yɛ̀ ko nɛ̀ɛ̀uŋ niìŋ.”
Wo Jɔ̀ɔŋ naŋ nyiŋ fasàì wààŋ, “E keì mààŋ tɛɛ̀ fè ɓɛ̀nɛ̀ŋ kàaiŋ kòɓɛ̀ wò nyùùŋ gbiŋ sɔɔ̀ wo Dayà e yìwìà ko àìjɛnɛ̀ŋ wouŋ gè nyààŋ diɛŋ. Sèè niŋ nɔ̀ŋ weè anyuùŋ jàà keì jii, mìŋ naiŋ kìɛ̀ŋ ke mìè seì mìàŋ, miàŋ nàŋ fè wò yèɔ wò Dayà naŋ tàeɗùù wɔ. Kɛɛ miàŋ nàŋ yaà wo yèɔ wo Dayà naŋ tùɔ̀ŋ ko feìŋ wèè ka dàànè ebòuŋ nɛ̀. E kèè ke nyɛɛ̀ gbìaàŋ sùà, wo kɛ̀ɛ̀nɛ̀ŋ jɔunɔ̀ɔŋ nàŋ mɔnɔŋ wo jɔunɔ̀ɔŋ. Wo dàwì mɔ̀ɔ̀nɔ̀ŋ wo kɛ̀ɛ̀nɛ̀ŋ jɔunɔ̀ɔŋ siàuŋ kɔɔ wèè wo kumiàŋ e nɛ̀ɛŋ wò woà lɛ, wò giiyà ke mìè gbòà wo kɛ̀ɛ̀nɛ̀ŋ jɔunɔ̀ɔŋ e zɔ̀lɔ̀ zimgbe. Weètii, e zɔlɔ̀ naim diè zimgbe. Tɔ̀ anyuùŋ zimgbe dòuŋ maŋjɛ̀wɛ, kɛɛ miàŋ, anyuùŋ kpàka aim dè maŋjɛ̀wɛ.”

Wo Jɔ̀àfèlàà Dayàa naŋ yèwè ko àìjɛnɛ̀ŋ wɔ kuwà e gààŋ e nìàŋ anyùùŋ nyaŋ gbiŋ e ɗuunyaàŋ. Wo yèɔ wo Dayà naŋ banè e ɗuunyaŋ lɛɛ̀ dìì wɔ woà e kèè maŋ keì maŋ kaaìŋ e ɗuunyaŋ lɛɛ̀ dìì maŋ. Kɛɛ wo yèɔ naŋ hnè e yìwìà ko àìjɛnɛ̀ŋ wɔ wò yaà manɛ̀ŋ bànè Dayà maŋ gbiŋ diɛŋ e ɗuunyaàŋ. Wò naŋ kìɛ̀ŋ ke mìè seì wèè e yèɛ wò naŋ yɛmɛ̀ yèè wò naŋ kòmò lɛ ko àìjɛnɛ̀ŋ. Yèè yɛi nɔŋ è yaà anyùùŋ nyaŋ gò wa jàà kè mìè gbìauŋ nɛɛ̀ŋ kùàŋ dìì. Kɛɛ wo nyùnɔ̀ɔŋ gbiŋ haawà ke mìè seìuŋ nɛɛ̀ŋ wɔ, wò tɔɔ̀ kɛ̀ wò haawè kɛ̀ e yèɛ wo Dayà naŋ wa woò lɛ è yaà tɔ̀ɔ̀nyaàŋ. Wo nyùnɔ̀ɔŋ wo Dayà naŋ tùɔ̀ŋ wɔ naŋ wòò ke mìè gbìàŋ Dayàa. E fèfoo wo Dayà naŋ nyɛ̀nɛ̀ŋ wo Jinàuŋ nɔɔ̀ŋ wo nɔ̀ŋ wo nyùùŋ bi diɛŋ. Wo Dèda wiɔ̀ Dayà manaŋ wo Jɔ̀àfelaauŋ nɔɔ̀ŋ, yèè wò nauŋ kìɛ̀ŋ e gààŋ manɛ̀ŋ maŋ gbiŋ diɛŋ. Wo nyùnɔ̀ɔŋ gbiŋ haawà wo Jɔ̀àfèlàà Dayàa sùà wɔ, wò do nàŋ kɛ̀ɛ̀nɛ̀ŋ wɔŋ nyiiŋ gèe gò jùà. Kɛɛ wo nyùnɔ̀ɔŋ yèɔ gbiŋ gè maŋhɛɛ wèè wouŋ haawè wɔ wò naàŋ wa nàwèè nɔ̀ŋ wò bàuŋbà wɔ̀ŋ nyiiŋ gèe bi sùà, yèè wo Dayà do nàŋ kìɛ̀ŋ wo nyùùŋ wii e keì nyìnga wèè julɔfɔ.

వినండి Jɔ̀ɔŋ 3