Gola - 2019 LIB (NT) Drama

Gola New Testament Translation and Literacy Project © Bible Society in Liberia, 2019.

Wo Jisɛ̀ yaà wa kɔɔyɛ yèè wò naŋ kɔ̀ɛ̀ɛ̀ ko jawaì àŋ nyaaŋ Jɛlekò lɛ. Wo kana nyuuŋ kùwà e nɛ̀ɛ̀nɛ̀ŋ fuɔŋ bà yaào wa àŋ nyaaŋ wo Zakiɔ̀. Wò yaà wa wo nyuùŋ bàne. Wò yaà wa kààmè ɗewe wèè wo yɛmɛ̀ Jisɛ̀, kɛɛ wò naŋ wa kpuumɛ̀ɛ̀ŋ, yèè wo gò wa ɓɛ̀nɛ̀ŋ yɛ̀mɛ̀ wò Jisɛ̀ esaɓù kɛ̀ anyùùŋ nyaŋ nauŋ wa kiliè. Kpeiŋ wò naŋ dùɔ̀ŋ wo mààŋ anyùùŋ nyaŋ feìŋ yèè wò naŋ jòwò ke feè kùù sùà wèè wo yɛmɛ̀ Jisɛ̀ nààŋ wò yaà wa kɔ̀ɛ̀ sùà ke dòmaŋ yii. Nààŋ wo Jisɛ̀ naŋ wa hàì koɓɛ̀i, wò naŋ gbìɛ̀ŋ fɛ̀ɛ̀ fùùŋ yèè wò naŋ wòò wo Zakiɔ̀ wààŋ, “Biào sùà muŋ dè, Zakiɔ̀, esaɓù kɛ̀ mìŋ yaà nàaŋ ke nyɛiŋ weèum ko gboo moo.”
Wo Zakiɔ̀ naŋ dè fiò yèè wo naŋ ɓèè wo Jisɛ̀ e zɔlɔ̀ gbee sùà. Anyùùŋ nyaŋ gbiŋ naŋ wa yɛ̀mɛ̀ e keì bi nyàŋ naŋ tɔ̀ɔ̀tù ɗìòsùà gùlia nyààŋ, “Wo kenàŋ wɛɛ̀ wò kà ke nyɛiŋ ko gbòò wo nyùùŋ maŋ jùumù.”
Kpeiŋ wo Zakiɔ̀ naŋ sie yèè wò naŋ wòò wo Jisɛ̀ wààŋ, “Kanaà, mìŋ do nàŋ kìɛ̀ŋ e nɛ̀ŋ kɛ̀ɛ̀nɛŋ mɛ̀ e gbu niŋ koɓɛ̀ anyuùŋ pɔ̀ɔ nyàŋ. Yèè sèè ka wa kàaɓì wo nyùùŋ gbiŋ, mìŋ douŋ niŋ nàŋ kɛlɛ̀ɛ̀ e sùà tiinàŋ.”
Yèè wo Jisɛ̀ nauŋ woò wààŋ, “E jòèye è nàaŋ hnàŋ ko gboo yaà, esaɓù kɛ̀ wo felaa wɛɛ̀ wuŋ pɛɛ wò yaà wo jɔ̀ɛ̀jɔ̀ɛ̀ Eɓulɔhɛɛ̀ɔŋ bà. Miàim wo Jɔ̀àfèlàà Nyuùŋ Kpùnɔɔ̀ŋ naŋ hnè wèè ka kàmè e kìlà ka jòèyè anyùùŋ nyaŋ naŋ go nyàŋ.”


Nààŋ àŋ yaà wa gbɛ̀ɛ̀ sùà ko Jùlusɛ̀làm, anyùùŋ nyaŋ kuwa wa wo Jisɛ̀ maŋjɛ̀wɛ naŋ kòmò maŋ kàɓanè maŋ wò yaà wa giiye màŋ, naŋ gongò kɛ̀ sèè wò haì wa nɔŋ ko Jùlusɛ̀làm fà wò nɔ̀ŋ wo kana nyiŋ nɔɔ̀ŋ. Kpeiŋ wò naŋ nyiŋ woò wààŋ, “Wo jɔ̀àfèlàà wo kana gbee bà yaà wa kɔ̀ɔ̀yɛ̀ wɔŋ fuɔŋ joo bà sùà wèè auŋ nyɛ̀nɛ̀ŋ wo kana. Wò naŋ wa ɗewè wèè wo kɛ̀ɛ̀ maŋjɛ̀wɛ wɔŋ fuɔuŋ nɔɔ̀ŋ sèè àŋ nyɛ̀nɛùŋ wo kana. Kɛɛ wèè paŋ wo ka wa, wò naŋ nyààŋ aŋ ɓɔ̀ìjɔ̀à zììyàuŋ nyàŋ koɓɛ̀ guùŋ. Wò naŋ kìɛ̀ŋ wo bà guùŋ gbiŋ e nɛɛnɛŋ jika. Wò naŋ nyiŋ woò wààŋ, ‘Tòòmoìŋ e nɛɛnɛŋ lɛɛ̀ wèè niŋ kuwiè e nɛɛnɛŋ zimgbe e jèèsùà miŋ kɛɛ̀ maŋjɛ̀wɛ.’ Kɛɛ anyùùŋ wuŋ bi nyàŋ wɔŋ fuɔuŋ nɔɔ̀ŋ nauŋ wa wùɔ̀ŋ. Kpeiŋ àŋ naŋ tùɔ̀ŋ aŋ keela wɔŋ fuɔŋ joo bi sùà wèè aŋ woò nyààŋ, ‘E manàìŋ wò felaa wɛɛ̀ wò do nɔ̀ŋ wò kana wiɔ̀.’
“Kɛɛ e ɗewe gbio sùà, àŋ naŋ wa nyɛ̀nɛ̀ŋ wo felaaà wo kana. Eɓìèmàŋjɛ̀wɛ̀ tii wò naŋ kɛ̀ɛ̀ maŋjɛ̀wɛ wɔŋ fuɔuŋ nɔɔ̀ŋ. Kpeiŋ wò naŋ nyààŋ aŋ ɓɔìjɔ̀àuŋ nyàŋ wò naŋ kìɛ̀ŋ nɛɛnɛɛ̀ŋ nyaŋ. Wò naŋ nyiŋ dawè sèè mààŋ kɛ̀ kiìŋ wo nyùùŋ gbiŋ naŋ wa yɛmɛ̀ e nɛɛnɛɛ̀ŋ diɛŋ. Wo jiɛ̀jiɛ̀ɔ naŋ hnè wò naŋ woò wààŋ, ‘Kààmɔɔŋ, mìŋ naŋ yɛ̀mɛ̀ e nɛɛnɛŋ jika pàtàà zììyà e geenìŋ sùà e yìwìà ke pàtàà gunɛ̀ɛŋ mùŋ naim mɛ̀iŋ kiɛ̀ŋ lɛ.’ Yèè wo kààmɔɔuŋ nɔɔ̀ŋ naŋ woò wààŋ, ‘Mùŋ naŋ nyɛ̀nɛ̀ŋ tɛ̀ɛ̀. Mùŋ yaà wo ɓɔìjɔ̀à siaŋ! Nààŋ mùŋ naŋ tɔɔ̀ kɛ̀ mùŋ yaà wo nyùùŋ tɔ̀ɔ̀nyaàŋ wèè manɛ̀ŋ jɔa lɛ̀, mìŋ doum nàŋ nyɛ̀nɛ̀ŋ wo sìèfèìŋ maŋ jàwà gbèègbèè zììyà.’ Wo dìà tìyèeɔ̀ naŋ hnè yèè wò naŋ woò wààŋ, ‘Kààmɔɔŋ, mìŋ naŋ yɛ̀mɛ̀ e nɛɛnɛŋ jika pàtàà nɔɔnɔŋ e geenìŋ sùà e yìwìà ke pàtàà gunɛ̀ɛŋ mùŋ naim mɛ̀iŋ kiɛ̀ŋ lɛ.’ Wo kanaà naŋ wòò wo yè wɛɛ̀ wààŋ, ‘Mùŋ do nàŋ nɔ̀ŋ wo sìèfèìŋ maŋ jàwà gbèègbèè nɔɔnɔŋ.’ Wo ɓɔìjɔ̀àa bà guùŋ naŋ ɓɛìŋ hnè wò naŋ woò wààŋ, ‘Kààmɔɔŋ, ke pàtàà guùŋ mɔɛ̀ŋ kɛɛ̀. Mìŋ naŋ nyiŋ mɛ̀iŋ kpènèkpènè wɔŋ pisì sùà. Mìŋ naŋ tii nyɛ̀nɛ̀ŋ esaɓù kɛ̀ e jùùɛ yààìm mɛ̀iŋ wèè e nɛ̀ɛŋ mùŋ he weè nàŋ nyɛ̀nɛ̀ŋ lɛ, sèè mìŋ go nyɛ̀nɛ̀ŋ e geenìŋ. Kà nyìmàŋ kɛ̀ e tùwo mɔ̀ɛ̀ è naŋ nyìngè. Mùŋ ɓemàŋ e nɛ̀ɛŋ muŋ kanàŋ lɛ yèè mùŋ kpaa maŋ nɛ̀ŋje ɓù maŋ muŋ gò nyùàŋ maŋ.’ Wo kanaà nauŋ woò wààŋ, ‘Mùŋ yaà wo ɓɔìjɔ̀à naanààŋ! Maŋ mìè nyààŋ muàŋ bi mɛɛ̀ŋ mìŋ doum nàŋ kìlìè e kiti diɛŋ! Màŋ nyìmàŋ kɛ̀ mìŋ ɓemàŋ e nɛ̀ɛŋ miŋ kanàŋ lɛ yèè mìŋ kpaa maŋ nɛ̀ŋje ɓù maŋ miŋ gò nyùàŋ maŋ. Sèè è nɔ̀ŋ yɛi, wèè kiìŋ muŋ gò mɛ̀iŋ gbìàŋ è nɛɛnɛŋ mɛ̀ ko saaŋ bàànè nɛɛnɛŋ hàaì? Kpeiŋ kɛ̀ mìŋ he weè nàŋ yɛ̀mɛ̀ e geenìŋ e hàwè nɛɛnɛŋ mɛ̀ diɛŋ sèè mìŋ kɛɛ̀ maŋjɛ̀wɛ.’ Kpeiŋ wo kenàaŋ naŋ wòò anyùùŋ nyaŋ siao nyàŋ wààŋ, ‘Ge nùuŋ ke pàtàà gunɛ̀ɛŋ sìwè niŋ kiɛ̀ŋ nyiŋ koɓɛ̀ wo ɓɔìjɔ̀àa kuwa e pàtàà zììyàa wɔ̀!’ Kɛɛ anyùùŋ nyaŋ nauŋ woò nyààŋ, ‘Kààmɔɔŋ, kòò wò kuwa e nɛɛnɛŋ jika pàtàà zììyà tɛ!’ Kɛɛ wo kanaà naŋ woò wààŋ, ‘Tɔ̀ miŋ woòiŋ tɛɛ̀, anyùùŋ nyaŋ kuwa e nɛ̀ŋ bà nyaŋ, àŋ do nyiŋ ɓɛìŋ nàŋ tooyè. Kɛɛ anyùùŋ nyaŋ kuwà è nɛ̀ŋ bà gbiŋ nyàŋ, e tòloòɛ pɛɛ àŋ kuwa lɛ̀, àŋ do nyiŋ niŋ nàŋ gè sìwè. Tɔ̀ miŋ woòiŋ naàŋ kɛ̀ sèè è nɔ̀ŋ wèè aŋ jooim nyiiŋ, aŋ yè nyaŋ manàŋ mɛ̀iŋ wèè ka nɔ̀ŋ wò kana nyiŋ nɔɔ̀ŋ nyaŋ, hìaìŋ nyiŋ kià ko fɛɛ̀fenìim niŋ jìwà nyiŋ.’ ”


Nààŋ wo Jisɛ̀ naŋ tɛɛ̀ kpɛ̀ɛ̀yɛ̀ wòo, wò naŋ nyiŋ kɔ̀ feìŋ e tèèngà ko Jùlusɛ̀làm. Nààŋ wò yaà wa gbɛ̀ɛ̀ sùà maŋ jawa mɛɛ̀ŋ, ko Bɛfejì yaà ko Bɛfenè, àŋ naŋ hnè koɓɛ̀ wɔŋ tolòɔ àŋ nyaaŋ nyààŋ wɔŋ tòò maŋ Ɔlè Kùùɔ, wo Jisɛ̀ naŋ wa tùɔ̀ŋ anyùùŋ màŋjɛ̀wɛ̀uŋ nyàŋ àŋ tìyèe ko feìŋ. Wò naŋ nyiŋ woò wààŋ, “Kɔ̀àaìŋ koɓɛ̀ e vàaà yààìŋ ko feìŋ lɛ. Sèè nìŋ haìyòo nɔŋ fa, nìŋ doo nàŋ mɛ̀ɛ̀ŋ wo sòo bɔwɔ jɔa wò yaà dìkiauŋ wo yèɔ wo nyùùŋ gbiŋ kòò wò jɛ̀ì wa diɛŋ wɔ̀. Fìle nùuŋ niŋ hiàuŋ kià ko nɛ̀ɛ̀ŋ miìŋ. Sèè wo nyùùŋ gbiŋ wò dawàìŋ kɛ̀ wèè kiìŋ nìŋ yàaùŋ fìlè sùà, wòo nùuŋ nààŋ wo Kààmɔɔŋ naŋ kpɛɛ̀ŋ weèuŋ.”
Àŋ naŋ kɔ̀ aŋ mɛ̀ɛ̀ŋ e nɛ̀ɛŋ gbiŋ màànààŋ nɔŋ wo Jisɛ̀ naŋ nyiŋ woò lɛ. Nààŋ àŋ yaà wa fìle sùà wo ɗòsòoɔ̀, wo kɛ̀ɛ̀nɛuŋ nɔɔ̀ŋ naŋ dawè wààŋ, “Wèè kiìŋ nìŋ yàaùŋ fìle sùà?”
Kpeiŋ àŋ naŋ woò nyààŋ, “Wo Kààmɔɔŋ naŋ kpɛɛ̀ŋ weèuŋ.” Àŋ naŋ kɔ̀ɔ̀ wo ɗòsòoɔ̀ koɓɛ̀ Jisɛ̀i. Kpeiŋ àŋ naŋ gbìɛ̀ŋ maŋ kùmà nyiŋ màŋ wo yìlìɔ diɛŋ, aŋ kpùùmàŋ wo Jisɛ̀ wouŋ jòwà diɛŋ wo jɛi. Nààŋ wò jaa wa wo ɗòsòoɔ̀ diɛŋ wò yaà kɔɔyɛ, anyùùŋ naŋ mɛ̀ɛ̀ŋ maŋ dèè kɔɔ nyiŋ màŋ ke dòmaàŋ diɛŋ.
Nààŋ wò naŋ hàì e gbɛ̀ɛ̀ ko Jùlusɛ̀làm, koɓɛ̀i ke dòmaàŋ deye e yìwìà wɔŋ tòò maŋ Ɔlè Kùùɔ dìmɛ̀, ke gbòò gbèè anyùùŋ màŋjɛ̀wɛ̀uŋ nyàŋ yaà wa gììyè zɔlɔ̀ e kìlà àŋ yaà jòòwò Dayà wèè maŋ kèè mèè maŋ gbiŋ àŋ naŋ yɛmɛ̀ maŋ. Àŋ yaà wa kpàaŋ sùà àŋ yaà woo nyààŋ, “Wo Dayà kpuumàŋ wo kanaà hnàŋ e dèè Kanaà diɛŋ wɔ̀! Ke jii fàa nɔ̀ŋ ko àìjɛnɛ̀ŋ yèè e jòòwo nɔ̀ŋ koɓɛ̀ Dayài!”
Kpeiŋ aŋ Fɛlosiì nyaŋ bà nyiŋ e faaàŋ sùà naŋ wòò wo Jisɛ̀ nyààŋ, “Kààmɔɔŋ, wòò anyùùŋ màŋjɛ̀wɛ̀um nyàŋ aŋ kumiàŋ!”
Wo Jisɛ̀ naŋ nyiŋ woò wààŋ, “Tɔ̀ miŋ woòiŋ kɛ̀ sèè àŋ kumiàŋ, e dùò lɛ tiiŋ bi do nàŋ tɔ̀ɔ̀tù kpàaŋ.”

Nààŋ wo Jisɛ̀ naŋ gbɛ̀ɛ̀ yèè wò naŋ yɛ̀mɛ̀ ko Jùlusɛ̀làm, wò naŋ gòlò. Wò naŋ woò wààŋ, “Sèè anyùùŋ nyaŋ ko Jùlusɛ̀làm aŋ nàaŋ weè nyìmàŋ kɛ̀ kiìŋ nàŋ do nyiŋ nàŋ hìɛ̀ŋ ke jii fàa! Kɛɛ è yaà ko nyɛɛnɛŋ, niŋ fè niŋ yɛmɛ̀. Jùlusɛ̀làm, e teenga do nàŋ hnè aŋ jooiŋ nyàŋ do nàŋ nyɛ̀lɛ̀ maŋ gbàngi aiŋ kilià wèè aiŋ gbùwà ke gùuŋ. Aŋ kààlòòɗùà doiŋ nàŋ kiliè e kìlà aŋ yìlà maŋ dòmaŋ nyaaŋ màŋ gbiŋ. Àŋ doum nàŋ nɛɛlɛ̀ ko dììnaŋ yèè aŋ jìwà anyunùum nyàŋ gbiŋ. Ke dùò guùŋ pɛɛ maŋ saaiŋ màŋ ke naàŋ jèè hàwè kè dàwi nyiŋ nɛɛ̀ŋ diɛŋ. Tɛɛ̀ do nàŋ kaaìŋ esaɓù kɛ̀ niŋ gò yɛmɛ̀ kɛ̀ wò Dayà naŋ hnè wèè woiŋ joeyè.”


Kpeiŋ wò Jisɛ̀ naŋ kɔ̀ ko Saaŋ Zòòlò Dayài yèè wò naŋ tɔ̀ɔ̀tù nyìmàŋ anyuùŋ mààŋ bòli nyàŋ yaà anyuùŋ dènàŋ bòli nyàŋ ke saàŋ dìì. Wò naŋ nyiŋ woò wààŋ, “È yaà wa sìnga niŋ wɔŋ fɛ̀ì Dayàa sùà kɛ̀, wo Dayà naŋ woò wààŋ, ‘Àŋ do nàŋ nyààŋ ke saaŋ miɛ̀ŋ ke Saaŋ Zòòlò Dayàa.’ Kɛɛ nào mììnè ko nyɛ̀ɛ̀nɛ̀ŋ aŋ nyuùŋ wùà!”
Wo Jisɛ̀ hewa kàà anyùùŋ nyaŋ ko Saaŋ Zòòlò Dayài ke ɗɔɔ gbiŋ. Aŋ kànà sìèfèìŋ zòòlo nyàŋ yaà aŋ kààmɔ̀ɔ̀ŋ maŋ Sàwà Dayà nyaŋ e kpùlìà aŋ màmànkùmɛ̀ŋ aŋ Juùù nyaŋ naŋ tɔ̀ɔ̀tù ɗewe kàme wèè aŋ jìwà wo Jisɛ̀. Kɛɛ aŋ gò wa yɛ̀mɛ̀ è ɗewe gbiŋ wèè aŋ niŋ nyɛ̀nɛ̀ŋ, esaɓù kɛ̀ anyùùŋ nyaŋ gbiŋ manàŋ wa àŋ do ɓà è nɛ̀ɛŋ wò yaà wa woo lɛ̀ nààŋ àŋ yàaùŋ wa kùmiaŋ sùà tɛ̀ɛ̀.

వినండి Luù 19