Apkelaqnekhek nak neten aplhamakho apkelemhama apmaniaie apkellailheiangko lhnak Jesús apkeltennaikama m'a, ka apkelpathetmo lhnak na m'a, apkeliantemekho lhnak napaqtek apveske ko Roma apvesai'a Pilato. Apkeleltennaskamo lhnak meihamolhma Jesús napaqtek Pilato m'a, lhna aptaiangkok:
—Apveske, nelvet'a lhta ennengko'o enenlhet anak apkeliaseiangko lhma' enenlhet'avok kakpota melianmonkesek impuesto ankok anak Roma, kakpota nhan aplhenammakpe panke apto Cristo kanhan apiav'akha apveske —lhna aptaiangkok ma'a.
Netamen nak ma'a Pilato lhna aptemak apkelmalhneiangka Jesús:
—¿Lheiap anlho apiav'akha apveske apanko'ok Judios, he? —lhna aptemak Pilato.
—Ka aptakha nak lheiap —lhna aptemak Jesús apkatemmoiangka m'a.
Lhna aptemak Pilato apkanemo apveske sacerdotes kakpota nhan enenlhet'avok ma'a:
—Mamma aptemakha meihamolhma apkelanai'a hengke'e enenlhet anak —lhna aptemak.
Koka nheklhek noka apkeliatekamok apkelemhama apmaniaie m'a, lhna aptaiangkok
—Hai, ietnek meihamolhma enenlhet anak, nkeliaseiangke lhma apketlhekmoskama apankok enenlhet'avok lhamakho apkellavakha ham, ka apkempai'ak ma'a Galilea kolhva koka hengke'e Judea —lhna aptaiangkok.

Ka aplengai'o lhnak Pilato m'a Jesús apkeniemai'a Galilea, apkelelmalhneiangka lhnak, lhna aptemak:
—¿Have nlho Jesús apkeniem'o Galilea, he? —lhna aptemak.
—Hai', tokha ham.
Aklheianvekho lhnak apvalhok Pilato m'a mankoietemo eiekpelkok Jesús, ka apkapaskamo lhnak napaqtek apveske ko Galilea apvesai'a Herodes Antipas. Nietemavek nak aptemo amaika'a Herodes ma'a na temma Jerusalen. Mpaihekhek nak apvalhok Herodes apvetai'o Jesús ma'a, aplengai'o lhna mota vanlha aplhenammap Jesús, apmahai'ak nak na eiekpelko niekhe' kakpota nhan etak qaselha mongenatkeskama apkelanai'a. Man nantek qaselha apkenmalhnekama, mannoka eniatemmoikama Jesús ma'a. Apkakhaiangkek nak na m'a apkelveskai'e sacerdotes kakpota nhan escribas, apkellapekama lhnak apketlheianma Jesús meihamolhma. Ka apkelempai'akha lhnak apkelvannaikama kempokhakme kakpota nhan apveske Herodes. Apkelentalhneskasekho nhan aptalhnema apmennave, malha apveske aptalhnema, apkeltaikama lhnak apankek ma'a apkelvannaikama lhnoka m'a. Netamen Herodes apkapasekho lhnak mokhom Jesús napaqtek Pilato m'a. Ntepekhek nak mokhom apkelasekhammakpo Pilato kanhan Herodes aniem'o lhta apkellammelhammap ma'a.

Ka apkellaveiangka lhnak apveske Pilato apkelveskai'e sacerdotes kakpota nhan apkelemhama apmaniaie apkellavakha m'a, lhna aptemak apkellanemo:
—Apkeliantemante lhta ketlhengkap nehaqtek enenlhet anak, heleltennaso lhta nhan apkeliasekamo lhma' enenlhet'avok apkellavakha nak ma'a. Koka askenmalhnema lhtoka ham napaqtavek ketlhengkap, ma lhta nhan ata'ak meihamolhma ham enenlhet anak. Aplhengkek lhek na Herodes mamma aptemengveiakmo lhma enenlhet anak ham, ka apkapasakho mokhom hengke'e asnakha nak. Skanek ko'o mankoietok angaqhek, vanlha ta aliaqpelhketama apiempehek kakpota apaqnemekha —lhna aptema Pilato apkellanemo enenlhet'avok.
Koka ngkelpaihekama lhnak apatno'ok enenlhet'avok ma'a, lhna aptaiangkok:
—¡Ma, mepaqnemekha nko ie', eniaqha toka, koka epaqnemekha Barrabas! —lhna aptaiangkok ma'a.
Barrabas noka apto meihamolhma, apnengkek nak nengaqlhengkasemmalhkelha ngkanek apkelammelhma mota apkelveskai'e kanhan akietnema apiemongke lhma lhnak na m'a. Koka Pilato apkelienlhaneiakmek na niekhe enenlhet'avok apkeltemo epaqnemekha niekhe Jesús. Koka niaveiangkek nak na alpaihekama apatno'ok enenlhet'avok ma'a, lhna aptaiangkok:
—¡Eliaqlha ta apmeiok apmankok neten iamet aktenneskama, eliaqlha ta! —lhna aptaiangkok ma'a.
Koka lhna aptemak mokhom Pilato apkellanemo enenlhet'avok:
—Mamma meihamolhma hengke'e enenlhet anak, ¿se lha ntak apkellelto nak ennapok ke, he? Vanlha ta aliaqpelhketama apiempehek kakpota apaqnemekha —lhna aptemak mokhom Pilato.
Koka nheklhek nak alpaiheiangka apatno'ok enenlhet'avok akiennaktema m'a apkeleltemo eniaqhek Jesús, apkeltemeskesentamo nhan koneng aptemakha aplheianma Pilato m'a. Ka apkaiangko lhnak Pilato apkenmak'akha la etnangkok enenlhet'avok ma'a, apaqnemekho lhnoka nhan apto apkaklhengkasemmap aniem'o apkellammelhma mota apkelveskaie, apkellaiangko nhan Jesús enenlhet'avok apkenmak'akha la etnangkok apkellanei'o.

Nemo lhnak akiantemekho Jesús kakpota ngkolhek aliaqlho apmeiok apmankok neten iamet aktenneskama. Ka apkelvetai'o lhnak nalhet amai lhema enenlhet apkeniekta nalhma apvesai'a Simon, ko na temma Cirene lhnak ma'a. Apkelleltemo lhnak na epatmok iamet aktenneskama m'a, ka aplhengamo Simon neptamen Jesús. Man na ntek enenlhet'avok apkelieploma Jesús ma'a apkenmahai'a elveta', man nantek nak na ngkelvana'ak akiapqalhema, alpaiheiangka lhnak na atno'ok, anmaiosak'a av'alho'ok akmak'akha ngkotnek ma'a. Koka lhna aptemak Jesús apkellanemo ngkelvana'ak:
—Moliapqalh hellanhoho' ngkelvana'ak ko Jerusalen, ntasek koka nkoliapqalhek nkollanalhko nkek ketlhengka kanhan atkak, ngkanek nkovak hata akiavai'a akientalhnema, hata etnangkok enenlhet:
"Aktaqmelakho niekhe ngkelvana'ak mankotnema na nlose, kakpota nhan metka nak atkak aktengkeskama aknemakha", hata etnangkok enenlhet ma'a.
Hata nhan niekhe eltehek enenlhet'avok ma'a:
"¡Koiaqnen tekhenlhet'ok metaimong akhaiam kakpota angelielhanmok!" hata etnangko niekhe m'a.
Nnek aktevaso iamet anak alielsellemo nke nak ava, koka neten ankek hata ngkotnek ma'a aktevasemmalhka iamet anak akiemai'a —lhnak aptemak Jesús.
Netamen nak mokhom ma'a, apkeliantemekho lhnak na apqanet enenlhet meliamolhma' kakpota ngkolhek aliaqlhangko apmeio'ok apmanko'ok neten iamet aktenneskama. Apkelvekho lhnak na iokhalhma' aknaiangkelha ientepak empatek, ka apkeliaqlhaqlhemo lhnak apmeio'ok apmanko'ok neten iamet aktenneskama m'a kakpota nhan apqanet enenlhet meliamolhma', po'ok nak akiennakha' kakpota nhan sanqalvelha'. Koka lhnak aptemak Jesús:
—Tata, nkotnama ta nkek ma'a ngkanek meliohok aptangkolha helanei'o —lhna aptemak.
Netamen soldados apnaqtevaseiangko lhnak lhema nennaqtevaskama nenietemo kakpota esakhak lhema apto la apnaksepma nennaqtevaskama aptalhnema Jesús ma'a. Man nantek enenlhet apkellanekama m'a, apkelvannaikama lhnak na apkelemhama apmaniaie Jesús, lhnak aptaiangkok:
—Apkelvongkaske lhta tep enenlhet'avok, ma nak na evongkasekpo pankek tep apto nlho haveniapak Cristo Eniapom Neten apkapaskama —lhnak aptaiangkok ma'a.
Ka apkelvannaiangka lhnak na soldados ma'a, apkellaiangko lhnak na vino akmaska kakpota einek Jesús, lhna aptaiangkok:
—Apto la have niapak lheiap apiav'akha apveske apanko'ok judios, evongkasakpo' pankek tep lheiap —lhna aptaiangkok.
Nietnengkek nak na aktalhesammalhka takhaplhet Jesús iamet akpaihema, lhna ntemak:
—Ka apiav'akha apveske apanko'ok judios hengke'e —lhna ntemak aktalhesammalhka m'a.
Lhema lhnak na apkelanai'a ngkollatsekama apvannaikama Jesús, apielhnemo lheme neten iamet aktenneskama m'a, lhna aptemak apkanemo Jesús:
—Apto la lheiap have niapak ankek Cristo, evongkasakpo' panke' tep lheiap, kakpota nhan ennengko'o —lhna aptemak.
Koka po'ok noka apkelanai'a ngkollatsekama apiamenaikama lhnak aptemo lhemek apielhnema neten ma'a, lhna aptemak apkanemo:
—Aplengangkek lheiap akmaska, nheklhek koka meniai'o Eniapom Neten. Mamma aptemengveiakmo lhma' enenlhet anak, ennengko'o koka have niapak nellanekamok ngkollatsekama, nietave ngkolhek akiaqmongkasakho neltemakha akiavai'a nellengaiangko —lhna aptemak ma'a.
Ka apkelanei'o lhnak enenlhet meihamolhma Jesús ma'a, lhna aptemak:
—Jesús, koietnama ta apaqtek asvesai'a nak ko'o akvo'o ta aknem apteiakha ta apveske —lhna aptemak ma'a.
Ka apkatemmoiangka lhnak Jesús ma'a, lhna aptemak
—Hai', haveniapak anke aloka ta lhemek lheiap akieto iokhalhma aktaqmanma aknem anak —lhna aptemak. Jesús.

Malha la 12 katelho lhna ntemak ma'a akmaskemo apommatma aknem, apienakteskamo lhna lhma' lhmankek ham akvakmo la tres ienaqteso. Netamen nak ma'a aphalhtemommap ietamopai'a akieto Eniapom Neten apnemakha apiaqtemmakpo lhnak apieseksek ma'a. Man nak enieskamak apveneiangka Jesús ma'a, lhna aptemak:
—Tata, ema ta takha ehangok anak —lhna aptemak.
Ka apketsepmo lhnak ma'a.
Apvetai'o lhnak capitan Romano m'a, apiavenkaskesaiangka lhnak apvesai'a Eniapom Neten, lhna aptemak:
—Have na niapak enenlhet anak mamma aptemengveiakmo lhma —lhna aptemak.
Ka apkeltaqhekho lhnak enenlhet'avok ma'a, apkeltekpoikokho nhan apnenio'ok ma'a aniem'o anmaiosak'a apvalho'ok. Aplhamakho lhnak apkellelto apkeliekpelkemelha Jesús ma'a kakpota nhan ngkelvana'ak alieplekha alhta allempai'o Galilea akvakho akvaktamo Jerusalen, mokhe tketsek nak apkellanekama m'a aktemakha aptevasemmap Jesús.

Apnengkek nak na m'a lhema enenlhet apvesai'a José, ko na temma Arimatea lhnak ma'a, iokhalhma Judea. Apiamolhma lhnak ma'a, apeivomo nhan, avanhek nak apkeltemo nkovak aptaiekha apveske Eniapom Neten. Apto lhnak na apketlhelhma'ak apkelemhama apmaniaie' Judios neten apankavek, koka mang noka nkoleklemok apvalhok aptaiangkolha' apkellanei'o Jesús ma'a. Ka apmeiekho lhnak apnakha apveske Pilato, apkenmalhnengvekho lhnak elkok aphapak Jesús ma'a neten iamet aktenneskama. Ka apmeiekho lhnak ma'a, aplekvekho aphapak Jesús neten iamet aktenneskama, apelhketmo lhnak na ietamopai'a apmennave' apanke, apkaklhengkeskekho nhan aphapak metaimong alhva nemakha aklhengkeskaianlha enghapak, mamma lhnak nema akmaikama m'a, alhnankok nak ma'a. Nietemavek nak aknem apkelpeneskamelha qaselha apanko'ok aniem'o sabado aknem apkakhaikokhelha m'a.
Neksa apkelletsekha lhnak aphapak Jesús ma'a alieplekho lhnak na moklhem'a ngkelvana'ak, alvetangveiakmo nhan apkellaqlhengkeskaianlha metaimong alhva aphapak Jesús ma'a, ka ngkelvana'ak anak alieploiangka lhnak Jesús allempai'o Galilea. Netamen altaqhemo lhnak ma'a natemma, alpeneskekho lhnak panaktema aimenek alvaiam ka nhan aimenek akmases aimes. Netamen aliamposammalhko m'a aknem nennekhelha aniem'o nhan aktemakha aklheianma henganemakha.

వినండి Lucas 23